1. Ka abantu ba Yehova bakalongoziwanga buli-buli mukabalilo aka Bakilisitu ababwandilo?

 NANTI u Yehova akubapa abantu bache imbombo iyakuti babombe, akulonda ukuti babombe umwandondomeko. (1 Koli. 14.33) Umwakufwanikizya, u Chala weyo akulonda ukuti amazyu amiza ghalumbililiwe pachisu chosi ichapasi. (Mata. 24.14) U Yehova akamusala u Yesu ukuba mulongozi uwa mbombo iyi. U Yesu akwenelezya ukuti imbombo iyi yikubombiwa umwandondomeko yache. Mukabalilo aka Bakilisitu ababwandilo, ivipanga vikati vyapangiwa mumalo aghakupambana-pambana, abasongo bakasaliwa ukuti bapelekaghe ubulongozi nu kulongozya. (Imbo. 14.23) Mu Yelusalemu mukapangiwa akabukatila ko mukaba abasongo na batumiwa, bo bakanenezannyanga ivintu vyo ivipanga vyosi vikalondiwanga ukwivwila. (Imbo. 15.2; 16.4) Ichifukwa chakuti abakamu na bayemba bakivwilagha ubulongozi bo bakapokelagha, “ivipanga vikaba na maka mulwitiko nukukula, po isiku ni siku akabukatila kakonjelelagha-konjelelagha.”—Imbo. 16.5.

2. Ukwanda bulo mu 1919, ka u Yehova akulongozya buli-buli abantu bache nu kubapa ichakulya ichabuzimu?

² U Yehova akubukilila ukulongozya abantu bache umwandondomeko amasiku ghano. Ukwanda bulo mu 1919, u Yesu akubombezya akagulu akanandi bulo aka banavuli abapakaziwa ukuti balongozyanje imbombo iya bulumbilili sona bapelekaghe ichakulya ichabuzimu pa kabalilo kache. a (Luka 12.42) Tutakukayikila ukuti u Yehova akubukilila ukusaya imbombo iya kagulu aka.—Yesa. 60.22; 65.13, 14.

3-4. (a) Nena ichifwanikizyo icha mo tukupindulila ichifukwa cha kubomba ivintu umwandondomeko. (b) Nkimba inti tunenezannye ichoni munkani iyi?

 ³ Nanti tutakabombagha ivintu umwandondomeko nge tutakukwanisya ukubomba imbombo yo u Yesu akati tubombaghe. (Mata. 28.19, 20) Tufwanikizye ukuti nanti abakamu batakapangagha indondomeko iyakuti tulumbililaghe muchigaba icha chipanga chitu, nge aliwesi akulumbilila kulikosi ko ighana. Ivigaba vimo nge vikulumbililiwa umwakupyanizya-pyanizya na balumbilili abakupambana-pambana po ivigaba vimo nge vitakulumbililiwa. Ka munginong’onelapo izila izinji zyo tukupindula nazyo nanti tukubomba ivintu umwandondomeko?

⁴ U Yesu po akaba pachisu ichapasi akabombagha ivintu umwandondomeko, umwakuyana bulo amasiku ghano pope akubavwa abantu ba Chala ukubukilila ukubomba ivintu umwandondomeko. Munkani iyi inti tunenezannye ichifwanikizyo cha Yesu icha mo akabombelagha ivintu sona mo igulu lyitu likukonkela ichifwanikizyo chache. Inti tunenezannye sona mo tungalangizizya ukuti tukupalizya igulu lya Yehova.

IGULU LYITU LIKUKONKA ICHIFWANIKIZYO ICHA YESU

5. Nkimba zila buli yoka yo tukulangizya ukuti tukukonka ichifwanikizyo icha Yesu? (Yohani 8.28)

⁵ U Yesu akamanyila kwa Baba wache uwa kumwanya mo angabombela ivintu na mo anganenela. Igulu lya Yehova likukonka ichifwanikizyo icha Yesu pakubombezya Amazyu agha Chala pakutwavwa ukumanya cho chiza na cho chibibi sona ukutupa ubulongozi ubwa mo tungabombela ivintu pa bumi bwitu. (Belenga Yohani 8.28; 2 Timo. 3.16, 17) Akabalilo kosi likutukumbusya ukuti tubelengaghe nu kubombezya ivintu vyo twabelenga mu Mazyu gha Chala. Ka tukupindula buli-buli nanti tukukonka ubulongozi ubu?

6. Ka zila buli yoka iyakulondiwa sana yo tukupindula nayo nanti tukumanyila Ibayibolo?

⁶ Tukupindula sana nanti tukumanyila Ibayibolo umwakubombezya amabuku ghitu. Umwakufwanikizya, tukuba nu lusako ulwakuti tungayanisya vyo Ibayibolo likumanyisya nu bulongozi bo tukupokela ukufuma kwigulu. Nanti twennya ukuti ubulongozi bo twapokela bwafuma Mumasimbo, tukwanda ukulisubila nkani igulu lya Yehova.—Loma 12.2.

7. Nkimba u Yesu akalumbililagha butenga buli, sona ka igulu lya Yehova likukonka buli-buli ichifwanikizyo chache?

⁷ U Yesu akalumbililagha “amazyu amiza agha Bumwene ubwa Chala.” (Luka 4.43, 44) Sona akabalamula abamanyili bache balumbililaghe ivyakukwafannya nu Bumwene. (Luka 9.1, 2; 10.8, 9) Amasiku ghano, abantu bosi bo bali mwigulu lya Yehova bakulumbilila ivyakukwafannya nu Bumwene ukusita ukusendela ko bakwikala pamo amabudindo gho bali nagho mwigulu lya Yehova.

8. Ka lusako buli lo tuli nalo?

⁸ Tukwennya ukuti lusako ukubabuzyako abanji ubwanaloli ubwakukwafannya nu Bumwene bwa Chala! Te aliwesi yo ali nu lusako ulu. Umwakufwanikizya, po u Yesu akaba pachisu ichapasi atakayitikizya imizimu imibibi ukuti yimupangile ubukaboni. (Luka 4.41) Amasiku ghano nanti umuntu akulonda ukulumbilila na bantu ba Yehova, abaghiye ukuti abombaghe ivintu ivyakumuhobosya u Yehova. Tukulangizya ukuti tukupalizya ulusako lo tuli nalo ulu pakulumbilila kulikosi na pa kabalilo kalikosi ko tungakwanisya. Ngati we Yesu, ichakwibikila chitu ko kubyala nu kwitilila imbeyu izyabwanaloli ubwakukwafannya nu Bumwene mu myoyo iya bantu.—Mata. 13.3, 23; 1 Koli. 3.6.

9. Ka igulu lyabomba ichoni ukuti izina lya Chala limanyikwe?

⁹ U Yesu akalifumusyanga izina lya Chala. Po akiputagha kwa Baba wache uwa kumwanya, u Yesu akanena ukuti: “Izina lyako indifumusizye kukwabo.” (Yoha. 17.26) Igulu ilya Yehova likweghelela ichifwanikizyo icha Yesu umwakubomba chilichosi cho lingakwanisya, pakubavwa abanji ukuti bope balimanye izina lya Chala. Ibayibolo ilya Malemba Ghakupatulika mu Mang’anamuliro  gha Charu Chiphya, lyanyosezyamo izina lya Chala mumalo ghosi gho izina ili likaghiwangamo. Ibayibolo ili lyang’anamuliliwa lyosi pamo muvigaba bulo likwaghiwa muvinenelo ivya kupululila 270. Nanti mungennya Vyakusazgirapo A4 nu A5 ivya mu Bayibolo ili, mungagha ivyingi ivyakukwafannya na mo bakabombela ukuti balinyosezyamo izina lya Chala mu Bayibolo. Mu Vyakusazgirapo C, vyo vikwaghiwa mu Ibaibolo Ilya Kumanyilila, vikupeleka ubukaboni ubwakukwana ukuti izina lya Chala likulondiwa ukwaghiwa mumalo 237, mu Masimbo agha Chigiliki.

10. Nkimba mukumanyilako ichoni pa vyo umukolo uwa ku Myanmar akanena?

¹⁰ Ngati we Yesu, tukulondiwa ukubavwa abantu abinji ukuti balimanye izina lya Chala. Umukolo yumo uwachigosi uwa ku Myanmar, yo ali ni myaka 67 akalila bo amanya ukuti u Chala ali ni zina. Akanena ukuti: “Kabwandilo pa bumi bwane ukumanya ukuti u Chala, izina lyache we Yehova. Mwamanyisya ichintu chakulondiwa sana cho ntamanyiyepo lumo.” Ngati mo twenezya kwa mama uyu, ukulimanya izina lya Chala kungabakwafya sana abantu aba myoyo iyiza.

MUBUKILILE UKULANGIZYA UKUTI MUKUPALIZYA IGULU LYITU

11. Ka abasongo bangalangizya buli-buli ukuti bakupalizya igulu lya Yehova? (Ennya sona ichituzi.)

¹¹ Nkimba abasongo bangalangizya buli-buli ukuti bakupalizya igulu lya Chala? Nanti bapokela ubulongozi, abasongo bakulondiwa ukububelenga umwakubikapo umoyo nu kwenelezya ukuti babubombezya akiza imbombo. Umwakufwanikizya, batakupokela bulo ubulongozi ubwa mo bangapangila inkomano pamo mo bangiputila inyiputo inyiza pa chipanga, loli bakupokela sona ubulongozi ubwa mo bangapwelelela akiza ing’ozi izya Kilisitu. Abasongo bo bakukonka ubulongozi ubwakufuma kwigulu lyitu, bakupangisya ukuti abakamu na bayemba biyivwange ukuti u Yehova akubafighilila sona abaghanite.

12. (a) Choni cho tubaghiye ukukolelana na bo bakulongozya? (Aba Hebeli 13.7, 17) (b) Choni cho tukulondiwa ukwennya ivintu ivyiza mu bo bakulongozya?

¹² Nanti twapokela ubulongozi ukufuma ku basongo, tubaghiye ukububombezya imbombo nu moyo witu ghosi. Nanti tukubomba bunubu, chingaba chipepe ku bo bakulongozya ukuti babombe akiza imbombo yabo. Ibayibolo likutulimbikisya ukuti tubivwilaghe bo bakutulongozya nu kukonka vivyo bakutubuzya. (Belenga Aba Hebeli 13.7, 17.) Akabalilo kamo chingaba chakutamya ukubomba bunubu. Chifukwa buli? Ichifukwa chakuti abanavuli aba bambula ukufikapo. Nanti tukubika amahala pa vintu vyo bakupuvya, mumalo mwakwennya ivintu ivyiza vyo bakubomba, vingapangisya ukuti tubavwe abalwani bitu. Muzila buli? Muzila iyakuti vingapangisya ukuti tuleke ukulisubila igulu lya Chala, vyo abalwani bitu bakulonda ukuti tubombaghe. Nkimba tungabomba ichoni ukuti tughamanye nu kughakana amabumyasi gho abalwani bitu bakunena?

MUTAKITIKIZYE UKUTI ABANJI BABAPANGISYE UKUTI MULEKE UKUSUBILA IGULU LYITU

13. Ka abalwani ba Chala bakuyezya-yezya ukubomba ichoni ukuti abantu balyennyange igulu lyache ukuti libibi?

¹³ Abantu abakususya bakupangisya ukuti twennyange ivintu ivyiza vyo igulu likubomba ukuti vibibi. Umwakufwanikizya, tukumanyila mu Masimbo ukuti u Yehova akulonda ukuti abantu bo bakumwiputa babanje bakuswepa mumubili, muvyakubomba na mwabuzimu. Akulonda ukuti umuntu aliwesi yo akubukilila ukubomba ivintu ivibibi loli atakulapa bamwefyange muchipanga. (1 Koli. 5.11-13; 6.9, 10) Tukwivwila ilamulo ilya mu Masimbo ili. Nanti tukubomba bunubu, abakususya bangennya ukuti tutabaghanite abantu sona tutakubalondela ivyiza.

14. Ka wenu yo mwenecho uwa nkani zyosi izyabumyasi izyakukwafannya ni gulu lyitu?

¹⁴ Mumanye umuntu yo akususya nkani igulu. U Satana Umubibi weyo akupangisya ukuti abantu basasyange nkani amabumyasi aghakukwafannya  ni gulu. U Satana weyo “mwenecho uwa bumyasi bosi.” (Yoha. 8.44; Ubwa. 3.1-5) Cho chifukwa tukulindilila ukuti inti abukilile ukubombezya abalwani bitu ukunena ivintu ivibibi ivyakukwafannya ni gulu lya Yehova. Ivi vyovyo vikabombiwa kwa Yesu na ku Bakilisitu aba bwandilo.

15. Nkimba abalongozi abavipanga bakabomba buli-buli kwa Yesu na Bakilisitu ababwandilo?

¹⁵ Napo Umwana uwa Chala akaba wakufikapo sona akapangagha iviswigho ivyingi, loli u Satana akabombezya abantu bamo ukumunenela amabumyasi aghinji. Umwakufwanikizya, abalongozi abavipanga bakabuzyanga abantu ukuti amaka gho u Yesu akabombezyanga imbombo pakufumya imizimu imibibi, “usongo uwa mizimu imibibi,” weyo akamupanga. (Mali. 3.22) Pa kabalilo ko u Yesu akalongiwanga, abasongo abavipanga bakamupa inongwa iyakuti wamusamu sona bakasongelezya abantu ukuti bamughoghe. (Mata. 27.20) Pisinda pache, po bo bakamukonkagha u Kilisitu bakalumbililagha amazyu amiza, abakususya “bakabasonjelezya abantu babo bate ba Bayuda” ukuti babayivye. (Imbo. 14.2, 19) Ukuyana ni fundo yo yili pa Imbombo 14.2, Ichitembe cha Mulindilili icha Chichewa, Disembala 1, 1998, chikalongosola ukuti: “Abantu bo bakumwavwa u Satana, bakakanagha ubutenga bo Abakilisitu bakalumbililagha sona bakanenagha ivintu ivibibi ivyakukwafannya na Bakilisitu, ivi vikapangisya ukuti batakabateghelezyanje Abakilisitu.”

16. Nkimba tubaghiye ukukumbukila ichoni nanti twivwa inkani izyabumyasi?

¹⁶ Ukufuma mukabalilo aka Bakilisitu ababwandilo ukufika mukabalilo kitu kano, u Satana akunena ivintu ivya bumyasi. Amasiku ghano “akuchizimbula ichisu chosi ichapasi.” (Ubuvu. 12.9) Nanti mwivwa inkani izibibi izyakukwafannya ni gulu lyitu pamo abakamu bo bakulongozya, mukumbukilaghe mo abalwani bakabombela nu Yesu na Bakilisitu ababwandilo. Amasiku ghano, abantu ba Yehova bakutamiwa sona bakubanenela ivintu ivya bumyasi ukuyana ndendende na mo  Ibayibolo likanenela. (Mata. 5.11, 12) Nanti tukumumanya yo akwandisya inkani izyabumyasi, vingapangisya ukuti tutakavulungane sona tutakabombepo zimo mwalubilo. Nkimba tungifighilila buli-buli?

17. Ka tungabomba ichoni ukuti tutakavulaziwe ni nkani izyabumyasi? (2 Timoti 1.13) (Ennya sona ibokosi ilyakuti “ Mo Tungabombela ni Nkani Izyabumyasi.”)

¹⁷ Mukane inkani izyabumyasi. Umutumiwa u Pabuli akapeleka ubulongozi ubwa mo tungabombela nanti twivwa inkani izyabumyasi. Akamubuzya u Timoti ukuti “abantu bamo babo bakumanyizya ivimanyisyo ivya bumyasi . . . ubakanizye ukuti baleke pakubikako umoyo patupangwi bulo” sona “utuleghuke utupangwi utwamwalwe.” (1 Timo. 1.3, 4; 4.7) Inong’onela ifundo iyi, umwana umunandi angasenda ichintu cho chinyalite nu kwanda ukulya, loli umuntu usongo atangabomba bunubu. Umwakuyana bulo, umuntu yo Mukilisitu uwakughoma mwabuzimu yo akumanya ukoghofya ukwa kubomba ivi, atangabomba bunubu. Tukukana inkani izyabumyasi ichifukwa chakuti tukumanya ko zikufuma. Mumalo mwache tukuchilemezannya “ichimanyisyo” icha bwanaloli.—Belenga 2 Timoti 1.13.

18. Ka tungalangizya buli-buli ukuti tukulisubila igulu lya Yehova?

¹⁸ Twennya izila zitatu bulo izya mo igulu lya Yehova lukubombela pakumweghelela u Yesu. Nanti mukumanyila Ibayibolo, muyezye ukwagha izila izyamwabo izya mo igulu lyitu likulangizizya ukuti likweghelela ichifwanikizyo icha Yesu. Mubavwe abanji muchipanga ukuti bope babukilile ukulisubila igulu. Sona mubukilile ukuba basubaliwa ukulangizya ukuti mukumusubila nkani u Yehova nu kukolelana nkani ni gulu lyache lyo akulibombezya imbombo ukuti akwanilisye ubwighane bwache. (Sali. 37.28) Nge twabukilila ukupalizya ulusako lo tuli nalo ulwakuba mwigulu lya Yehova ilya lughano lyo lili na bantu abasubaliwa.