1. Bwe bakubikila kanda dia Yehova mu bandu ya ntete?

 NTANGU zazansoni Yehova yi kahanaka tisalu kwe kanda diandi, Yandi zoloko ti basala tio na bunkete bwabwansoni. (1 Kor. 14:33) Mu tifwani, ni Nzambi zololo ti basamuna nsangu za mbote mu nza yayansoni. (Mat. 24:14) Yehova wahana dema kwe Yezu dia twarisa tisalu tio. Yezu wasa miamiansoni, ngatu tisalu tio tia salama na bunkete bwabwansoni. Mu bandu ya ntete, bu babatika mu tûla bimvuka mu mbuka zazingi, bayizi noma bakuluntu mu hana lutwalusu. (Bis. 14:23) Ku Yerusaleme Timvuka titwarisaka tieri kô, mu kati mweri na bantumwa na bakuluntu beri bongaka nzengolo zakaka zafweti zitisa bimvuka biabiansoni. (Bis. 15:2; 16:4) Mu bungu ti bampangi batumamana lutwalusu lu beri bakaka, ‘bimvuka ni biatatamana mu yikama ngolo mu timinu na mu funa lumbu basiri lumbu.’—Bis. 16:5.

2. Tûka 1919, bwe Yehova katwarisila mpe kadikila kanda diandi mu timpeve?

² Lumbu ti mpe Yehova kanda diandi katatamanaka mu kubika. Tûka 1919, mu lutwalusu lwa Yehova, Yezu wasarila tikunku tia babakala ba tumbu mu kubika tisalu tia samuna na mu hana bidia bia timpeve kwe milongoki miandi. a (Like 12:42) Diangana Yehova tisalu tiawu tia kata sakumuna.—Iza. 60:22; 65:​13, 14.

3-4. a) Hana tifwani tita songela ndandu zitubakaka mu organizasio ya Yehova. b) Nti tutaluzula mu timoko ti?

 ³ Tala ti ka tweri’â ba kubama ko, ka taketi’â bâ na lenda ko dia lungisa tisalu tia tu hana Yezu mu sala. (Mat. 28:​19, 20) Mu tifwani, tala ti ka kwena teritware ko zi batuhana; muna muntu mbo kaketi samuna ku mbuka yi kazololo. Teritware zakaka balendi za sala mbala zazingi kwe bisamuni bia swaswana, mpe zakaka balendi za yambirika. Ngano lendi banza mpila zakaka zitubakilaka ndandu kwe organizasio ya Yehova?

⁴ Ntiana kwa Yezu bu kakubika milongoki miandi bu keri ha mutoto, kanda dia Nzambi katatamanaka mu kubika lumbi ti. Mu timoko ti, mbo tutaluzula tifwani tia songela Yezu mpe bwe organizasio’eto yilandilaka tifwani tio. Mbo tumona mpe bwe tulendi songela ti organizasio ya Yehova tukwikilaka.

ORGANIZASIO’ETO TIFWANI TIA YEZU YILANDAKA

5. Bwe tulendi landila tifwani tia Yezu? (Za 8:28)

⁵ Yezu wabaka ndongokolo kwe Tata’andi mu mio mi keri tâka na mu mio mi keri yirikaka. Mu tifwani tia Yezu, organizasio ya Yehova Zu dia Nzambi yisarilaka mu tu hana lutwalusu na ndongosolo yitariri ndiatulu. (Tanga Za 8:28; 2 Tim. 3:​16, 17) Ntangu zazansoni beto babambulaka moyo mu tanga na mu sarila Zu dia Nzambi. Malongi mo ntia ndandu tubakilaka mo?

6. Mu ntia mpila ya mfunu ndongokolo ya Bibila yitunatinaka ndandu?

⁶ Ndandu yayingi tubakaka bu tulongokaka Bibila mu nzila ya mikanda mieto. Mu tifwani, tulendi fwanakasa ndongosolo za Bibila na lutwalusu lu tubakaka kwe organizasio ya Yehova. Bu tumonaka ti malongi ma yituhanaka mu Bibila matûkaka, lukwikulu lweto mu organizasio ya Yehova kula lutomo kulaka.—Rom. 12:2.

7. Ntia nsangu Yezu kasamuna, mpe bwe organizasio ya Yehova yilandilaka tifwani tiandi?

⁷ Yezu wasamuna “nsangu za mbote za Timfumu tia Nzambi.” (Like 4:​43, 44) Yezu watuma mpe kwe milongoki miandi mu samuna nsangu za Timfumu. (Like 9:​1, 2; 10:​8, 9) Lumbu ti, bô babansoni bê tintwari na organizasio ya Yehova nsangu za Timfumu basamunaka, kûma ni kûma ku babêlaka ni bu sa ti madema mamingi me nawu mu organizasio ya Yehova.

8. Ntia bweso batuhana?

⁸ Diangana, bweso bwena kwe beto mu samuna matieleka ma Timfumu tia Nzambi kwe bantu bakaka! Bantu babansoni ka bena na bweso bo ko. Mu tifwani, Yezu bu keri ha mutoto, wayimina mpeve za mbi mu zonzela nkumbu’andi. (Like 4:41) Lumbu ti, muntu ntete kabatika mu samuna na kanda dia Yehova, fweti diatila mu mpila yi tâka Yehova nsayi. Mbo tusongelaka ti bweso bwa samuna bwa tuzololo bu tusamunaka kwakwansoni, mpe mu ntangu ni ntangu yi tubâka na lenda dia sila bo. Ntiana Yezu, miamiansoni mi tulenda tusaka mu samuna kwe bantu na mu ba longesa matieleka.—Mat. 13:​3, 23; 1 Kor. 3:6.

9. Bwe organizasio ya Yehova yizabikisaka nkumbu ya Nzambi?

⁹ Yezu wazabikisa nkumbu ya Nzambi. Mu lusambulu lu kasa kwe Tata’andi die ku mazulu, Yezu watâ: ‘Kumbu’aku ya nabazabikisi.’ (Za 17:26) Organizasio ya Yehova tifwani tia Yezu yilandaka, bu yisaka miamiansoni mi yilenda mu bakisa bantu mu zaba nkumbu ya Nzambi. Mpila yimosi mu mpila zazansoni organizasio yi kalendelaka mu sila bo, ni mu Bibila dia Traduction du monde nouveau. Mu  mbangululu yo ya Bibila bakârisa nkumbu ya Nzambi mu mbuka zi yeri ku mbatukulu mu mazu ma batsonekena Bibila. Lumbu ti mbangululu yo tulendi ya baka ya mukaka peleko ya tibuku mu mazu yôka 270. Mu Appendice A4 na A5 za mbangululu yo, mbo kwizi tomo bakula mu bungu dia nti bakârisila nkumbu ya Nzambi mu Bibila. Appendice C, ye mu Bibila dia ndongokolo, bidimbu biabingi yihanaka bisongelaka ti nkumbu ya Nzambi yafweti tsonama mbala 237 mu Matsonoko ma Greke ma Bakristo.

10. Nti longokele mu misamu mitêle mukento wo wa ku Birmanie?

¹⁰ Ntiana Yezu, tuzololo mu bakisa bantu babingi mu zaba nkumbu ya Nzambi. Ku Birmanie mukento wumosi we na mvula 67 bu kazaba nkumbu ya Nzambi wabatika mu dila, mpe watâ: “Yi ni mbala’ani ya ntete yi nitawâ ti Nzambi nkumbu’andi Yehova. [. . .] Musamu wuyôkele mfunu kundongese, wu ndieka lembo longoka.” Tifwani ti, tisongele ti ndongokolo ya nkumbu ya Nzambi yilendi nata nsobolo za ngolo kwe bantu ba sungama.

TATAMANA MU SONGELA LUKWIKULU LWAKU MU ORGANIZASIO’ETO

11. Bwe bakuluntu balendi songela lukwikulu lwawu mu organizasio Yehova? (Tala mpe tifwani.)

¹¹ Bwe bakuluntu balendi songela lukwikulu lwawu mu organizasio ya Nzambi? Bu babakaka lutwalusu, bakuluntu bafweti lwa tanga na bunsungu bwabwansoni, mpe bafweti sa miamiansoni mi balenda mu landa lo. Mu tifwani, malongi babakaka mu mpila ya twarisila bitini bia lukutakanu, na ya sila tusambulu mu bungu dia timvuka, kâ mpe na mpila ya kipila bimeme bia Kristo. Bakuluntu bu balandaka lutwalusu lu hanaka organizasio, bampangi babakisaka mu mona ti Yehova bawu kazololo mpe bawu kakipaka.

12. a) Mu bungu dia nti tufweti salarila tintwari na bô batutwarisaka? (Bahebre 13:​7, 17) b) Mu bungu dia nti tufweti tûrila mabanza meto mu bifu bia mbote bia bô batutwarisaka?

¹² Bakuluntu bu batuhanaka lutwalusu, tufweti lwa landa mu mutima wumosi. Bu tusila bo, tisalu tiawu ka tibâ mpasi ko. Bibila beto dilombaka mu tumamana na mu bâ balemvoka kwe bô batutwarisaka. (Tanga Bahebre 13:​7, 17.) Ntangu zakaka musamu wa mpasi wubâka. Mu bungu dia nti? Mu bungu ti bantu ba masumu bêna. Kâ, tala ti tutûriri kwa mabanza meto mu bifu biawu bia mbi kani tatûla mo mu bifu biawu bia mbote, mbo tubakisa mbeni zeto. Mu bungu dia nti tuta watêla? Mbeni zeto zizololo tabanza ti Nzambi ka sarilaka organizasio’andi ko mu tu twarisa. Buna, tala ti mabanza ma mbi me neto mu bakuluntu, tulendi batika mu bâ na mbanzulu za mbi mu organizasio, mpe tulendi hombesa lukwikulu lweto mu yandi. Nti tulendi sa mu zaba na mu losa bungungu bwa mbeni zeto?

KUBIKANDI TI BANTU BAKAKA BAWOLESA LUKWIKULU LWAKU MU ORGANIZASIO

13. Bwe mbeni za Nzambi zayêlela mu tâ bungungu mu organizasio?

¹³ Mbeni za Nzambi mbo ziyêlaka mu sa ti misamu mia mbote mia moneka ntiana’eti mia mbi miena. Mu tifwani, Bibila ditulongese ti Yehova zololo ti bisari biandi biabâ bia verela mu tinsuni, mu ndiatulu na mu timpeve. Bibila mbo ditâka ti muntu wutatamanaka mu sarila mbi, mpe wulembo zoloko mu sa nsobolo ka wulendi’â watatamana ko mu bâ mu timvuka. (1 Kor. 5:​11-13; 6:​9, 10) Mu ntumunu yo ya Bibila tutumamanaka. Kâ mu bungu ti ntumunu yo tutumamanaka, mbeni zeto zitâka ti ka tuzololo’â bantu ko, bawu tusembaka mpe ka tutambulaka bantu ba swaswana ko.

14. Nani we titeko tia bungungu bu batâka mu organizasio?

 ¹⁴ Zaba muntu wutunwanisaka. Ni Satana, Diabulu we titeko tia binsamu bia bungungu. Ni yandi ‘tata dia bungungu.’ (Za 8:44; Mba. 3:​1-5) Buna, tufweti kekolo ti Satana kasarila bantu bandi mu mwangasa nsangu za bungungu mu Organizasio ya Yehova. Musamu wo wa matieleka weri mu mbandu ya ntete.

15. Nti mfumu za mabundu zasa kwe Yezu na kwe milongoki miandi?

¹⁵ Ni bu sa ti, Mwana wa Nzambi, Yezu, wa lunga weri mpe bimangu bia nzitukulu kasa, Satana wasarila bantu bakaka mu yangasa bungungu mu Yezu. Mu tifwani, mfumu za mabundu zatâ ti lenda dieri na Yezu dia kuma bademo kwe mfumu ya bademo kabakila dio. (Mak. 3:22) Bu bafundisa Yezu, mfumu za mabundu zamukwikisila ti Nzambi kavweza, mpe batuma yungi dia bantu mu lomba lufwa lwandi. (Mat. 27:20) Ha manima, milongoki mia Yezu bu mieri kwe samuni nsangu za mbote, bantu beri batelemanka batuma bantu bakaka mu ba kwamisa. (Bis. 14:​2, 19) Mu bungu dia Bisalu 14:​2, Nzo ya Zangama ya Munkengi ya 1^er décembre 1998 (Français), yatâ: “Mu bungu ti ka bayangalala ko mu nsangu za babasamunina, Bayuda beri batelamanaka bayangasa bungungu mu yêla mu tuma bantu ba makanda mu kwamisa Bakristo.”

16. Nti tufweti bambukila tala ti tuwîri binsamu bia bungungu?

¹⁶ Satana ka bika ko mu tâ bungungu mu mbandu ya ntete. Lumbu ti mpe, tatamane mu “wubakasa nza ya mukaka.” (Nza. 12:​9, NWT) Tala ti wîri nsangu za bungungu zitariri organizasio peleko mpangi zitutwarisaka, bambuka bwe babongela Yezu na  milongoki miandi mu mbandu ya ntete. Lumbu ti, bisari bia Yehova bakwamisaka mpe bungungu batâka mu bawu, ntiana bwa tâ wo Bibila. (Mat. 5:​11, 12) Ka tukwikila nsangu zo za bungungu ko tala ti tuzebi muntu wo wuyangasaka zo, mpe tala ti tusariri manzangu mu tikengerela. Nti tufweti sa mu tikengerela?

17. Bwe tulendi sila keba ngatu talembo fwema mu binsamu bia bungungu? (2 Timote 1:13) (Tala kaku “ Bwe sa bu wâ binsamu bia bungungu.”)

¹⁷ Kuwândi binsamu bia bungungu. Ntumwa Paulo wahana ntumunu mu mio mi tufweti sa tala ti tuwîri nsangu za bungungu. Watâ kwe Timote mu hana ntumunu kwe bantu bakaka mu ‘lembo singasa bingwa-bingwa’ na mu ‘losa misamu mia mpamba.’ (1 Tim. 1:​3, 4; 4:7) Banza’eti: Mwana wa fioti wulendi tûla tima ti katotele ha mutoto mu munwa, kâ muntu wa kula kani kabwe kasila bo ko, mu bungu ti zebi ti tilendi mu bêlesa. Binsamu bia bungungu tulosaka mu bungu ti tuzebi kwe bitukaka. Kâ ‘misamu mia sungama’ mia matieleka tuwîrikilaka.—Tanga 2 Timote 1:13.

18. Bwe tulendi songela lukwikulu lweto mu organizasio ya Yehova?

¹⁸ Misamu mitatu kwa tutaluzuri mu mpila organizasio ya Nzambi yilandilaka tifwani tia Yezu. Bu kwe longoke Bibila, talaka mpila zakaka organizasio yilandilaka tifwani tia Yezu. Bakisa bantu bakaka mu timvuka tiaku mu bâ na lukwikulu lwalwingi mu organizasio. Mpe tatamana mu songela lukwikulu lwaku bu kwe sariri Yehova na kwikama kwakwansoni, na bu tatamana mu tomo bâ wa kangama kwe organizasio yi kasarilaka mu lungisa luzolo lwandi. (Mik. 37:28) Bika tatatamana mu zolo bweso bwe neto bwa bâ mu kanda dia luzolo mpe dia kwikama dia Yehova.