1. Karne ya kwanza nǎ ká Yova dzá njí dhi ndrŭ kpengʉeni ngbaribbai?

 NJATI Yova bbʉ ngbá njí ma ndidzá ndrŭ dhona ró, ke adi riji kpa njiri kpe ndima kpeni ro. (1 Ko. 14:33) Loroji na, Mungu jiri hwè lo-i d’rani dz’ djolu gble. (Mt. 24:14) Yova bbʉ daraka Yesu dhó ndiro ke ddá chutso fø njí dho d’e. Ndirigoti Yesu liri fø njí njini ngbà kpeni nari bbai. Karne ya kwanza na kutaniko tso ngangʉeni njonjo ngalu ro, le lingʉe wazee ndima di lojadha bbʉ ndirigoti ndima di chutso ddá kutaniko dho d’e. (Mdo. 14:23) Yerusalemu nǎ ngʉ adi chutso ddá lo dho ná Baraza nǎ kpa kana ngʉe mitume ma, wazee ma na, ná fø kpa ngʉ adi lonangavʉ ndi ri kutaniko krʉ dyø d’e. (Mdo. 15:2; 16:4) Le-djoi ma, le-vei ma na rrngʉe nga fø lojadha dho nari dho, “kutaniko ngʉ adi ra anzi kprɨ ndi tøni udha kana ro ndirigoti ndrŭ dhó hesabu ngʉ adi ndrini ndri.”​—Mdo. 16:5.

2. Cho 1919 na ká Yova bbʉngʉe ngbá chutsoddadha ndirigoti kiroho nǎ ngbá nyo ndidzá ndrŭ dho?

² Njʉ maddi Yova adi ra anzi ndidzá ndrŭ ndi kpe nari na. Cho 1919 djo ró, Yesu adi njínji ché na le d’ri ná sese dhó kikundi kʉ ná kpa na nja kpa kpé lod’radha dhi njí ndirigoti kpa bbʉ kiroho nǎ nyo ndi una kpa dho d’e. a (Lu. 12:42) Bbʉbbʉ dhé, Yova adi fø kpa dhó njí ronga lele.​—Isa. 60:22; 65:13, 14.

3-4. (a) Adho ngbaribbai ma ko adi faida ba kpe lo kpeni nari nǎ ro nari. (b) I lo nǎ ká ko si loti ngbá lo djo?

 ³ Njati ko kpeeni nzá ró, ri nzá ka ndi ka ko njí Yesu bbʉngʉe ko dho ná njí ro ri. (Mt. 28:19, 20) Loroji na, njati le-djoi kpee ko lod’radha dho nzá ndirigoti nja ke die lod’ra ndi ji ná nga na dhé ró, ko ka ko die lod’ra bí ina ddikpa eneo nǎ dhé ndirigoti nja eneo nǎ nzá ko ka ko d’rae lo ro ri. Ni ká ddiri ko ka ko ba faida kpe lo kpeni nari nǎ ro nja ngbá chu nǎ?

⁴ Dz’ djó ndi ngʉe ro ndi kpengʉe ndi unakpa nari bbai, Yesu adi ra anzi dhé njʉ ndi Mungu dzá ndrŭ kpe nari na. I lo nǎ ko si loti Yesu bbangʉe ko dho ná loroji djo ndirigoti ngbaribbai ma kodhó tengenezo kedhó loroji dyø nari djo. Føri kina, ko si ko ko thí li nì Yova dhó tengenezo djo nari ko ka ko dhǒ lu ná chu nja.

KODHÓ TENGENEZO ADI YESU DHÓ LOROJI DYØ

5. Yesu dhó loroji ká ko adi dyø ddikpa ngbá chu nǎ? (Yohana 8:28)

⁵ Ndi nji ná lo ma, ndi po ná lo ma na Yesu chungʉe ndidzá ra nǎ Baba dhó ro. Yesu dhó loroji ndi dyø nari chulu, Yova dhó tengenezo adi ndi ddi ná lo ma, ndi bbʉ ná chutsoddadha ma na dyʉ Mungu dzá lo ro. (Azø Yohana 8:28; 2 Ti. 3:16, 17) Krʉ ddo ró le adi ngano ko dho nari kʉ, ko di Mungu dzá lo zø ndirigoti ko di njínji ri nǎ ro ko zø ná lo na. Fø shauri ko dyø nari nǎ ro ká ko adi faida ba ngbaribbai?

6. Biblia ko zø nari nǎ ro ká ko adi faida ba bbo ddikpa ngbá chu nǎ?

⁶ Biblia ko zø kodhó vichapo chulu nari nǎ ro ko adi faida ba bbo. Loroji na, føri adi rili ko ddi Biblia nǎ mafundisho tengenezo bbʉ ko dho ná chutsoddadha na. Njati ko di fø chutsoddadha dyʉ ndi Biblia ró nari nja ró, ko thí ko li Yova dhó tengenezo djo nari adi ndrini ndri.​—Ro. 12:2.

7. Yesu ká ngʉ adi ngbá lo d’ra ndirigoti Yova dhó tengenezo ká adi kedhó loroji dyø ngbaribbai?

⁷ Yesu ngʉ adi “Mungu dzá Pidhinga dhi hwè lo-i d’ra.” (Lu. 4:43, 44) Føri kina, Yesu jangʉeri ndi unakpa di lod’ra Pidhinga djo. (Lu. 9:1, 2; 10:8, 9) Njʉ kʉ Yova dhó tengenezo nǎ ná ndrŭ krʉ adi Pidhinga dzá lo d’ra njati rie ngbaga ma ndima di inga ngbá daraka ma kʉ ndima dhó ró.

8. Kodhó ká ngbá pendeleo bbʉni?

⁸ Ko ba pendeleo ko d’ra bbʉbbʉlo Mungu dhó Pidhinga djo nja ndrŭ dho. Ri nga kʉ ndrŭ krʉ i ba fø pendeleo ri. Loroji na, dz’ djó Yesu ngʉe ná saa na ke pongʉeri nzɨ gó lod’ra ndi djo. (Lu. 4:41) Njʉ maddi ddikpa le lod’radha tso nga Yova dzá Dimu na nari njí, ri adi ngani ke ngá Yova nyǒ tho ná lo ndi nji nari tso. Ko adi ko nanga jini ngbà fø pendeleo dho nari dhǒ Mungu dhó Pidhinga dzá hwè lo-i ko d’ra ndrŭ dho ngbà ko ka ko njiri ná saa krʉ ró ndirigoti ngbà ko ka ko njiri ná nga krʉ lu nari chulu. Yesu bbai ko adi ko dho ka ná lo nji krʉ ko d’ralo nja ndrŭ dho ndirigoti ko ddi bbʉbbʉlo nga kpa dho.​—Mt. 13:3, 23; 1 Ko. 3:6.

9. Yova dhó tengenezo ká adi rili Mungu ró dho chuni ngbaribbai?

⁹ Yesu lingʉeri Mungu ró dho chuni chu. Ndidzá ra nǎ Baba tso Yesu nzingʉe nga nǎ ná sala nǎ ke pongʉeri: “Ma liri ni ró dho chuni chu.” (Yoh. 17:26) Yesu ndi dyø nari chulu Yova dhó tengenezo adi ndi dho ka ná lo nji krʉ nja ndi kó nja ndrŭ tsotso kpa chu Mungu ró dho d’e. Biblia​—Takatifu Tafsiri ya Ulimwengu Mupya ngʉ Mungu ró dho anziro le ndingʉe  Biblia ro ri ngʉe ná nga lu krʉ. Njʉ fø Biblia kʉ ndi lai ró inga lu 270 kʉ ná luga nǎ. Fø Biblia nǎ Nyongeza A4 ndirigoti A5 ni nja ró, ni ka ni nja Mungu ró dho le ngʉ nari djo le d’ra ná lo krʉ. Ndirigoti Francais nǎ Bible d’étude Appendice C tilo bbo Mungu ró dho bani Maandiko ya Kigiriki nǎ, 237 kʉ ná ngalu nari djo.

10. Myanmar nǎ ddikpa isɨle po ná lo nǎ ro ká ni ba ngbá somo?

¹⁰ Yesu bbai, ko adi riji ko kó bí kʉ ná ndrŭ tsotso ngbà ka ko dho ná ngatsi ndiro kpa chu Mungu ró dho d’e. Myanmar nǎ 67 dhó cho kʉ ná ddikpa isɨle rrngʉe Mungu ró dho ro le ngangʉe dzz tso ndirigoti le pongʉeri: “Iri kʉ ya kwanza ma Mungu ró dho e Yova nari rr madhó maisha nǎ ri. . . . Ni ddinga ma dho nari kʉ bbo na mana kʉ ná lo ndirigoti nzá ro ma ka ma chue ná lo.” Fø lo ridho nari bbai, Mungu ró dho ndrŭ chu nari ka ndi ø ndrŭ dhó maisha thika ø.

ARA ANZI KODHÓ TENGENEZO DJO NI NI THÍ LI NARI NA

11. Wazee ká ka ndima dhǒ ndima ndima thí li nì Yova dhó tengenezo djo nari ngbaribbai? (Anja ji maddi.)

¹¹ Mungu dhó tengenezo djo ndima ndima thí li nì nari ká wazee ka ndima dhǒ ddikpa ngbá chulu? Njati kpa ba lojadha tengenezo dhó ro ró, ringani kpa zø ri li ndima li ndima dyu ro ndirigoti kpa njínji ri na ngbà ka ndima dho ná ngatsi. Loroji na, kpa adi lojadha ba ngbaribbai ma ndima ka ndima ongoza njudha nǎ njonjo sehemu nari ma, ngbaribbai ma ndima ka ndima njí sala njudha dhi ngana nari ma, ngbaribbai ma ndima ka ndima b’o Kristo dzá chembø ronga nari ma na djo. Wazee di tengenezo bbʉ ná chutsoddadha dyø ró, kutaniko nǎ le-djoi ma, le-vei ma na adi ndima mbu nì ronga Yova b’o ndirigoti ji ke ji nari bbai.

12. (a) Ri ká ngani ko di ngarr chutso ddá ná kpa dho addudho? (Waebrania 13:7, 17) (b) Ri ká ngani ko di ko thí lí chutso ddá ná kpadhó bblo sifa djo addudho?

¹² Njati ko ba chutsoddadha wazee dhó ro ró, ringani ko di ri dyø ji ko nanga jini ro. Fø ko rinji nari na, ko si rili rie sʉsʉ kpa dho kpa njí ndima dhó njí. Biblia ripo ko dho, ko di ngarr ndirigoti ko di ko djødjø chutso dda ná kpa dho. (Azø Waebrania 13:7, 17.) Nja saa na føri adi si kpakpa. Ká addudho? Dhonalo kpa kʉ nzá kaka ná ndrŭ. Ro, ko di ko thí li kpa dhó che kʉ ná sifa djo i bbo bblo ri djo ko lié ko thí nari rɨngana ró, føri na ko adi kodhó mbubai tsotso kó. Ká ngbaribbai? Føri ka ndi liri nzɨ ko li ko thí Mungu dhó tengenezo djo, ná føri i kʉ kodhó mbubai adi ji ko njí ná lo nganga. Nde, ko ká ka ko njiri ngbǎ nja ko chu kodhó mbubai dhó kali ndirigoti ko nyi ri tso nyi d’e?

NZƗ BBARI NJA NDRŬ CHO NI TSO MUNGU DHÓ TENGENEZO DJO NI NI THÍ LI NARI RÓ

13. Mungu dhó mbubai ká adi riji ndima sa tengenezo ró dho nanga ngbaribbai?

¹³ Mungu dhó mbubai adi rili tengenezo nji ná bblo lo njani che. Loroji na, Maandiko nǎ ko ri zø nari kʉ, Yova adi riji ndidzá njí dhi ndrŭ tsetse ndima ndí ró, ndima dhó akili nǎ, ndirigoti ndima bbʉ ná madha kana. Yova pori njati ddikpa ke bbá che nyi tso nzá ndirigoti ke gʉ le ndi leni nari gʉ ró, le pʉ ke pʉ kutaniko nǎ ro. (1 Ko. 5:11-13; 6:9, 10) Fø yadha dho ko ngarr nari djó ko dhó mbubai adi ripo, ko nzá ji ndrŭ ro ri, ko lod’i ndrŭ djo ndirigoti ko nzɨ adi ko tso gba njonjo kʉ ko ró ro ná ndrŭ na ri.

14. Tengenezo djo ká ie ngangʉe kali dhi lotidha tso?

 ¹⁴ Achu tengenezo tso ró adi tøni ná ke. Kali dhi lo adi si Shetani Ibilisi dhó ro. Ke e “kali dzá baba.” (Yoh. 8:44; Mwa. 3:1-5) Føri dzá lo dho, akochuri nari kʉ Shetani ka ndi cho ndi unakpa ndi pli kali dhi lo nanga Yova dhó tengenezo djo. Føri kʉ Yesu ma, karne ya kwanza nǎ Wakristo ma na ró njingʉeni ná lo.

15. Dini nǎ bbobbonga ká njingʉe ngbá lo Yesu ma, ndi unakpa ma na ró?

¹⁵ Nì mai Mungu dhi Dduna Yesu ngʉe kaka ná ke ndirigoti ke njingʉe ké dho le na nga ka ndi keni ná ddù bí ro, Shetani chongʉe nja ndrŭ ndi pli kali dhi lo nanga ke djo. Loroji na, dini nǎ bbobbonga pongʉeri ndrŭ dho nari kʉ, Yesu gó pʉ “gó djó bbonga dhó kpakpanga na.” (Mk. 3:22) Nza Yesu ngʉ nzani ná saa na, dini nǎ bbobbokpa pongʉeri ke dhu Mungu ndirigoti kpa chongʉe birobiro kʉ ná ndrŭ ndima pori le hwi ke hwi. (Mt. 27:20) Luti, Yesu unakpa ngʉ hwè lo-i d’ra ná saa na, kpadhó mbubai “chongʉe ndrŭ” ndima nzá fø Wakristo. (Mdo. 14:2, 19) Matendo 14:2 djo 1998 nǎ Bi 12 ddo 1 dhi Munara pongʉeri: “Kpa nzá gʉngʉe Yesu unakpa ngʉ d’ra ná lo gʉ kpali ri, ro Wayahudi ngʉ kali dhi lo d’ra kpa djo, ndiro nzɨ ndrŭ rr kpa ndirigoti ndrŭ ndro kpa ndro d’e.”

16. Ri ká ngani ko no ngbá lo nga njati ko rr kali dhi lo ró?

¹⁶ Shetani adi kali sha godhé kpø njʉnga djo. Njʉ maddi ke “dz’ lu djó ndrŭ sha.” (Ufu. 12:9) Njati ni rr kali dhi lo ndrŭ ti tengenezo djo inga chutso ddá ná le-djoi djo nari ró, ano ngbaribbai ma Mungu dhó mbubai njingʉeni Yesu ma,  ndi unakpa ma na na karrne ya kwanza na nari nga. Njʉ ndrŭ adi, Yova dzá ndrŭ nzá ndirigoti ndrŭ adi kali sha kpa djo anziro Biblia pongʉeri nari nganga bbai. (Mt. 5:11, 2) Njati ko chu kali adi si ná nga ndirigoti ko nyi ri tso théi ró, nzá kpa ka ndima sha ko ri. Ko ká ka ko b’o ko ronga ngbaribbai?

17. Ko ká ka ko njiri ngbǎ nzɨ ko shani ró? (2 Timoteo 1:13) (Godhé anja kisanduku “ Kali dhi lo ni rr ró ni ka ni nji ná lo.”)

¹⁷ Nzɨ u kali dhi lo. Mutume Paulo jangʉe kali dhi lo le rr ná saa na le ka le njí ná lo. Ke jangʉeri Timoteo dho ke pori nja ndrŭ dho “nzɨ kpa kali dhi lo rr” ndirigoti “kpa pʉ ngana mana kʉ ná kali dhi lo ndima ró ro.” (1 Tim. 1:3, 4; 4:7) Føro mai, rengba ka ndi dzi che kʉ ná ritsi dz’ djó ro ndi li ndi tso na, ro bbo le nzá ka ndi njiri fø ri dhonalo le churi nari kʉ ri ka ndi bbʉ dhe ndi dho. Føri bbai, ko adi kali dhi lo nyinyi dhonalo ko chu ri adi si nanga ma, ri nǎ hatari ma na chu. Føri rɨngana ko adi ngarr “faida dhi bbʉbbʉlo” dho.​—Azø 2 Timoteo 1:13.

18. Ko li ko thí ngbà Yova dhó tengenezo djó nari ká ko ka ko dhǒ ngbaribbai?

¹⁸ I lo nǎ ko tilo Mungu dhó tengenezo adi Yesu dhó loroji dyø lu ná chu ro djo 3 dhé. Biblia ni zø ná saa na, aneri ni chu, Mungu dhó tengenezo adi Yesu dhó loroji dyø lu ná nja chu. Adi nidhó kutaniko nǎ nja ndrŭ tsotso kó ndiro kpa li ndima thí bbo tengenezo djo d’e. Ara anzi chi ni tøni ro ni njínji Yova dho nari na ndirigoti adi ni thí lili ke ji ná lo adi nji ná tengenezo djo chøchø ni di ri kuso nari chulu. (Zb. 37:28) Ko ba pendeleo ko gba ko tso ji Yova jirie ndirigoti chi adi tøni ke dho ná ndrŭ na nari dho akodi mbai po.