1. Mmushindu kayi uvua bantu ba Nzambi balongolola mu tshikondo tshia bapostolo?

 PATU Yehowa upesha bantu bende mudimu, utu musue bua bawenze mu mushindu mulongolola. (1 Kol. 14:33) Tshilejilu, mmusue bua tuyishe lumu luimpe pa buloba bujima budi bantu basombele. (Mat. 24:14) Yehowa mmuteke Yezu bua kulombola mudimu eu. Yezu udi udienzeja bua tuwukumbaje mu mushindu mulongolola. Mu tshikondo tshia bapostolo, pavuabu benda benza bisumbu, bavua bateka bakulu bua kufilamu buludiki ne kulombola malu. (Bien. 14:23) Mu Yelushalema muvua kasumbu kaludiki kavua kenza ne bapostolo ne bakulu, kavua kafila buludiki buvua bisumbu bionso ne bua kulonda. (Bien. 15:2; 16:4) Bu muvua bena Kristo abu batumikila buludiki buvuabu babapesha, “bisumbu biakatungunuka ne kukoleshibua mu ditabuja ne kuvulangana.”—Bien. 16:5.

2. Mmunyi mudi Yehowa ulombola bantu bende ne ubapesha biakudia bia mu nyuma katshia ku 1919?

² Yehowa udi ulongolola bantu bende nansha lelu. Katshia ku 1919, Yezu mmuteke kasumbu kakese ka bela manyi bua kulongolola mudimu wa buambi ne kupesha bayidi bende biakudia bia mu nyuma. a (Luka 12:42) Bidi bimueneka patoke  mudi Yehowa ubenesha mudimu wa kasumbu aka.—Yesh. 60:22; 65:​13, 14.

3-4. a) Leja mudi kuikala balongolola kutuambuluisha. b) Ntshinyi tshituakuila mu tshiena-bualu etshi?

³ Bu tuetu katuyi balongolola, katuvua mua kukumbaja mudimu udi Yezu mutupeshe to. (Mat. 28:​19, 20) Tshilejilu, bu kabayi bakosele tshisumbu tshionso watshi teritware, mumanyishi yonso uvua mua kuyisha konso kuvuaye musue. Dîba adi, bamue bamanyishi bavua mua kuyisha mu teritware imue imue ayi misangu ya bungi, kabayi badiata mu mikuabu to. Kuikala balongolola kudi kutuambuluisha mu mushindu kayi mukuabu?

⁴ Anu muvua Yezu mulongolole bayidi bende patshivuaye pa buloba, ke mudiye ulongolola kabidi bantu ba Nzambi lelu. Mu tshiena-bualu etshi, netuakule bua tshivua Yezu muenze ne mudi bulongolodi buetu bumuidikija. Netumone kabidi mutudi mua kuleja ne: tudi beyemene bana betu badi batulombola.

BULONGOLODI BUETU BUDI BUIDIKIJA YEZU

5. Mmushindu kayi udi bulongolodi buetu buidikija Yezu? (Yone 8:28)

⁵ Yehowa wakalongesha Yezu tshia kuamba ne tshia kuenza. Anu bu Yezu, bulongolodi buetu budi butulombola ne butulongesha ku diambuluisha dia Dîyi dia Nzambi. (Bala Yone 8:28; 2 Tim. 3:​16, 17) Butu butuvuluija misangu yonso bua kubala Dîyi dia Nzambi ne kuditumikila. Kutumikila mubelu eu kudi kutuambuluisha mushindu kayi?

6. Ngumue mushindu kayi wa mushinga udi kulonga kua Bible kutuambuluisha?

⁶ Kulonga Bible ku diambuluisha dia mikanda yetu kudi kutuambuluisha bikole. Tshilejilu, tudi mua kufuanyikija tshidi Bible wamba ne buludiki budi bulongolodi buetu butupesha. Patudi tumona ne: bulombodi budi bana betu batupesha mbuangatshila mu Bible, tudi tubeyemena bikole.—Lomo 12:2.

7. Ndumu kayi luvua Yezu mumanyishe? Mmunyi mudi bulongolodi bua Yehowa bumuidikija?

⁷ Yezu wakamanyisha “lumu luimpe lua Bukalenge bua Nzambi.” (Luka 4:​43, 44) Wakatumina kabidi bayidi bende dîyi dia kulumanyisha. (Luka 9:​1, 2; 10:​8, 9) Lelu, bantu bonso badi mu bulongolodi bua Yehowa badi bamanyisha mukenji wa Bukalenge abu nansha bobu basombele muaba kayi anyi bikale ne midimu ya bungi mu bulongolodi bua Yehowa.

8. Ndiakalenga kayi ditudi nadi?

⁸ Tudi ne diakalenga dia kuambila bantu bakuabu lumu luimpe lua Bukalenge bua Nzambi! Ki mmuntu yonso udi ne diakalenga edi to. Tshilejilu, pavua Yezu pa buloba, kavua muanyishile nyuma mibi bua yakule bua bualu buende to. (Luka 4:41) Lelu eu, bua muntu kutuadija kuyisha ne Batemu ba Yehowa, udi ne bua kuikala ne nsombelu udi usankisha Yehowa. Tudi tuleja mutudi ne dianyisha dia bungi bua diakalenga ditudi nadi dia kuyisha patudi tudienzeja bua kuambila bantu malu a Nzambi padi mpunga umueneka. Dijinga dietu ndia kukuna ntete ya bulelela mu mioyo ya bantu ne kuyela mâyi anu bu Yezu.—Mat. 13:​3, 23; 1 Kol. 3:6.

9. Mmushindu kayi udi bulongolodi buetu butumanyishe dîna dia Nzambi?

⁹ Yezu wakamanyisha bantu dîna dia Nzambi. Yezu wakambila Tatuende wa mu diulu mu disambila ne: ‘Ndi mumanyishe dîna diebe.’ (Yone 17:26) Bulongolodi bua Yehowa budi buidikija Yezu, budienzeja bua kuambuluisha bantu bakuabu bua bafike ku dimanya dîna dia Nzambi. Tshilejilu, mbupingaje dîna dia Nzambi mu Bible wa nkudimuinu wa  Bulongolodi bupiabupia muaba onso uvuadi mu mifundu ya ku ntuadijilu. Bakadi bapatule Bible eu mujima anyi tshitupa tshiende mu miakulu mipite pa 270. Wewe mutangile mu Tshisakidila tshia A4 ne tshia A5 bidi mu Bible eu, neumanye malu a bungi akuleja bua tshinyi bavua bapingaje dîna dia Nzambi mu Bible eu ne muvuabu badipingaje. Mu Tshisakidila tshia C tshidi mu Bible wa kudilongela nende wa mu Mfualasa, mudi malu a bungi adi aleja ne: dîna dia Nzambi didi ne bua kuikala mu Mifundu ya mu tshiena Greke ya buena Kristo misangu 237.

10. Bualu bua mamu wa mu Birmanie budi bukulongesha tshinyi?

¹⁰ Anu bu Yezu, mbimpe tudienzeje bua kuambuluisha bantu ba bungi bua bamanye dîna dia Nzambi. Pavuabu bambile mamu mukuabu wa bidimu 67 wa mu ditunga dia Birmanie dîna dia Nzambi, wakadila kuambaye ne: “Eu ke musangu wa kumpala undi mumanye ne: Yehowa ke dîna dia Nzambi. . . . Nudi bandongeshe bualu bua mushinga wa bungi.” Bualu ebu budi buleja ne: patu bantu ba muoyo muimpe bamanya dîna dia Nzambi, batu basanka bikole.

TUNGUNUKA NE KUEYEMENA BADI BATULOMBOLA

11. Mmushindu kayi udi bakulu baleja ne: badi beyemena bana betu badi balombola bulongolodi buetu? (Tangila kabidi tshimfuanyi.)

¹¹ Ngumue mushindu kayi udi bakulu baleja ne: badi beyemena bana betu badi balombola bulongolodi buetu? Padibu bapeta mêyi a kulonda, badi baabala bimpe ne badienzeja bua kuatumikila. Tshilejilu, bakulu batu bapeta amue mêyi a kulonda a mua kulombola bisangilu, kusambila kumpala kua tshisumbu, ne kutabalela mikoko ya Kristo. Padibu baatumikila, bena Kristo netu badi bamona mudi Yehowa mubanange ne ubatabalela.

12. a) Bua tshinyi mbimpe tueleshangane diboko ne badi batulombola? (Ebelu 13:​7, 17) b) Bua tshinyi tudi ne bua kuimanyina pa ngikadilu mimpe ya badi batulombola?

¹² Padi bakulu batuambila tshia kuenza, tudi ne bua kutshilonda ne muoyo mujima. Dîba adi, netubapepejile mudimu. Bible udi utulomba bua kubakokela ne kubatumikila. (Bala Ebelu 13:​7, 17.) Kadi kabitu anu bipepele to, bualu mbapange bupuangane. Kadi tuetu tuimanyina anu pa bilema biabu, netuikale mu bulelela tuambuluisha bena lukuna betu. Tudi tuamba nanku bua tshinyi? Bualu katuakubeyemena nansha kakese to. Pabi atshi ke tshidi baluishi betu basue. Tshia kuenza ntshinyi bua kumanya mashimi adi baluishi betu batumuangalajila ne kuepuka?

BAKUABU KABATEKESHI DIEYEMENA DIEBE TO

13. Mmunyi mudi baluishi ba Nzambi bakeba bua tumone malu adi bulongolodi buetu buenza bu mabi?

¹³ Baluishi ba Nzambi badi bakeba bua tumone malu adi bulongolodi buetu buenza bu mabi. Tshilejilu, Bible udi uleja ne: Yehowa mmusue bua tuikale ne mankenda, tuikale ne bikadilu bimpe, ne tuikale tumutendelela mu mushindu udiye wanyisha. Mmuambe ne: muntu yonso udi utungunuka ne kuenza malu mabi kayi unyingalala, udi ne bua kuipatshibua mu tshisumbu. (1 Kol. 5:​11-13; 6:​9, 10) Tutu tumikila dîyi adi. Kadi patudi tuditumikila, baluishi betu badi batuamba ne: katuena banange bantu, tudi tubapisha, ne tudi bakine bantu badi benza malu adi mashilangane ne etu.

14. Nnganyi utu ukebesha ngumu ya dishima itubu bamuangalajila bulongolodi buetu?

¹⁴ Manya muluishi wetu munene. Satana ke mukebeshi wa ngumu ya dishima ayi. Utu  “tatu wa dishima.” (Yone 8:44; Gen. 3:​1-5) Nanku tumanye ne: Satana ke udi usaka bantu bende bua kumuangalajila bulongolodi bua Yehowa ngumu ya dishima. Ke tshivuaye muenzele Yezu ne bayidi bende.

15. Ntshinyi tshivua bamfumu ba tshitendelelu benzele Yezu ne bayidi bende?

¹⁵ Nansha muvua Yezu muana wa Nzambi wenza bishima bia dikema, Satana wakasaka bantu bua kumunyangila lumu. Tshilejilu, bamfumu ba tshitendelelu bavua bambila bantu ne: “mfumu wa bademon” ke uvua mupeshe Yezu bukole buvuaye uwipata nabu bademon. (Mâko 3:22) Pavuabu balumbuluisha Yezu, bamfumu ba tshitendelelu bakamushiminyina ne: uvua upenda Nzambi ne bakasaka bantu bua balombe bua bamushipe. (Mat. 27:20) Pashishe, pakavua bayidi ba Yezu bamanyisha lumu luimpe, baluishi babu ‘bakasonsola bantu, kubapeshabu lungenyi lubi’ bua babakengeshe. (Bien. 14:​2, 19) Tshibumba tshia Nsentedi tshia 1/12/1998 tshivua tshiumvuije Bienzedi 14:2 ne: “Pamutu pa buobu nkayabu kubenga mukenji eu, baluishi bena Yuda bakaditua mu ditangalaja malu a dishima, bakeba bua kupesha Bampangano meji mabi bua bena nkristo.”

16. Ntshinyi tshitudi mua kuvuluka patudi tumvua ngumu ya dishima?

¹⁶ Satana udi utungunuka ne kushimangana too ne lelu. Utshidi “upambuisha ba pa buloba bonso.” (Buak. 12:9) Wewe mumvue bantu bakula bibi bua bulongolodi buetu ne bua bana betu badi batulombola, uvuluke tshivua baluishi ba Nzambi benzele Yezu ne bayidi bende. Lelu badi batukengesha ne batushiminyina malu anu mukavua Yezu muambe. (Mat. 5:​11, 12) Ngumu ya dishima  eyi kayakutupambuisha tuetu bamanye udi uyikebesha ne benze tshidi tshikengela bua kudikuba to. Kadi mmunyi mutudi mua kudikuba?

17. Tshia kuenza ntshinyi bua kudikuba ku ngumu ya dishima? (2 Timote 1:13) (Tangila kabidi kazubu ka “ Tshia kuenza ne ngumu ya dishima.”)

¹⁷ Benga ngumu ya dishima. Mupostolo Paulo mmuleje patoke tshia kuenza tuetu bumvue ngumu ya dishima. Wakambila Timote bua ‘atumine bantu bakuabu dîyi bua kabateyi ntema ku mianu ya dishima’ ne bua ‘babenge mianu ya dishima idi ipendeshisha Nzambi.’ (1 Tim. 1:​3, 4; 4:7) Ela meji a bualu ebu: muana udi mua kuambula tshintu tshia manyanu panshi ne kutshiela mukana, kadi muntu mukole kena yeye mua kuela tshintu tshia nanku mukana to, bualu mmumanye ne: tshidi mua kumukebela masama. Bia momumue, tudi tubenga ngumu ya dishima bualu tudi bamanye kudiye ifumina. Kadi tudi tuteleja anu “mêyi adi akolesha” a bulelela.—Bala 2 Timote 1:13.

18. Mmunyi mutudi mua kuleja ne: tudi ne dianyisha bua bulongolodi bua Yehowa?

¹⁸ Tudi bakule anu bua mishindu isatu patupu idi bulongolodi buetu buidikija Yezu. Paudi wenda udilongela Bible, ukebe mishindu mikuabu idibu buenda buidikija Yezu. Enza bua bena mu tshisumbu tshienu beyemene bana betu badi batulombola. Utungunuke pebe ne kuleja muudi ubeyemena, wenzela Yehowa mudimu ne tshisumi. (Mis. 37:28) Tutungunukayi ne kuleja mutudi ne dianyisha bua diakalenga ditudi nadi dia kuikala munkatshi mua bantu ba Yehowa badi ne lulamatu ne banangangane.