1. Kum zabi khatnaa Jehova mite chu eng anga rêlbâwl nge an nih?

 JEHOVA’N a mite hnêna chanvo a pêk apiang hian, inrêlbâwlna ṭha tak neia hlen tûrin a beisei a. (1 Kor. 14:33) Entîr nân, Pathianin khawvêl zawng zawnga chanchin ṭha hrilh chu a duh a. (Mt. 24:14) Chu hna chu kaihruai tûrin Isua a ruat a. Ani chuan chu hna chu hlen tûrin ṭha takin a rêlbâwl a ni. Kum zabi khatnaa hmun hrang hranga kohhran din a nih khân, upate chu kaihruaitu atâna ruat an ni a. (Tirh. 14:23) Tirhkohte leh tawn hriat ngah tak upate hmanga din, Jerusalema governing body chuan kohhran zawng zawngte zawm atân thu tlûknate an siam a ni. (Tirh. 15:2; 16:4) Kaihhruaina an dawnte an zawm avângin “kohhran pâwlte chu rinnaah chuan an nghet ta a, ni tin an pung ta deuh deuh va.”—Tirh. 16:5.

2. Kum 1919 aṭangin engtin nge Jehova’n kaihhruaina leh thlarau lam chaw a pêk?

² Tûn laiah pawh, Jehova chuan a mite chu fel takin a rêlbâwl zawm zêl a. Kum 1919 aṭangin Jehova kaihhruaina hnuaiah Isua chuan hriak thih pâwl tlêm tê chu fel taka thu hrilh rawngbâwlna ruahman tûr leh a hnungzuitute hnêna thlarau lam chaw pe tûrin a hmang a ni. a (Lk. 12:42) Chu pâwl hnathawhte chu Jehova’n mal a sâwm tih a chiang hle.—Is. 60:22; 65:13, 14.

3-4. (a) Fel taka inrêlbâwlna kan hlâwkpui dân entîrna pe rawh. (b) He thuziakah hian eng nge kan sawiho vang?

 ³ Isua’n thawk tûra min pêk hna hi fel taka kan inrêlbâwl loh chuan kan hlen thei lo vang. (Mt. 28:19, 20) Entîr nân, rawngbâwlna tûr bialte ruahman ni lo ta se, mi zawng zawngin an duhna hmun apiangah thu an hril thei ang a. Thuchhuahtute chuan bial ṭhenkhata thu an hrilh nawn fo laiin, bial dang erawh chu hlamchhiah a ni thei a ni. Fel taka inrêlbâwlna kan hlâwkpui dân kawng dangte i ngaihtuah thei em?

⁴ Isua’n leia a awm laia a hnungzuitute chu fel taka a rêlbâwl ang bawkin, tûn laiah pawh Pathian mite chu fel takin a rêlbâwl chhunzawm zêl a. He thuziakah hian, Isua entawn tûr siam leh kan inawpna pâwlin Isua a entawn dân sawiho a ni ang a. Jehova inawpna pâwl kan hlutzia kan lantîr theih dân pawh sawiho a ni bawk ang.

KAN INAWPNA PAWLIN ISUA A ENTAWN

5. Isua kan entawn dân kawng khat chu eng nge ni? (Johana 8:28)

⁵ Isua chuan a tih tûrte leh a sawi tûrte chu a Pa vâna mi hnên aṭangin a zir. Jehova inawpna pâwl chuan Isua entawn tûr siam chu zuiin Pathian Thu ṭanchhanin nungchang lama zirtîrnate leh kaihhruainate min pe a. (Johana 8:28 chhiar rawh; 2 Tim. 3:16, 17) Pathian Thu chhiar a, nunpui tûra hriat nawntîrnate kan dawng ziah bawk. Engtin nge chu thurâwn zawmna chu kan hlâwkpui?

6. Bible zirna kan hlâwkpui dân kawng pawimawh tak pakhat chu eng nge ni?

⁶ Kan Kristian thu leh hla chhuahte hmanga Bible kan zir hian nasa takin kan hlâwkpui a. Entîr nân, inawpna pâwl aṭanga kan dawn kaihhruainate chu Bible zirtîrnate nên kan khaikhin thei a ni. Kaihhruaina kan dawnte chu Bible zirtîrnate ṭanchhan a ni tih kan hmuh hian, Jehova inawpna pâwl kan rinna chu a nghet lehzual a ni.—Rom 12:2.

7. Isua’n eng thuchah nge a hril a, engtin nge Jehova inawpna pâwl chuan a entawn tûr siam chu a zui?

⁷ Isua chuan “Pathian Ram chanchin ṭha” a hril. (Lk. 4:43, 44) A hnungzuite pawh Lalram chungchâng hril tûrin thu a pe a. (Lk. 9:1, 2; 10:8, 9) Tûn laiah pawh Jehova inawpna pâwla mite chuan khawi hmunah pawh awmin, mawhphurhna tam tak chelh mah se, Lalram thuchah chu an hril a ni.

8. Eng chanvo hlu nge kan neih?

⁸ Mi dangte hnêna Pathian Ram chungchâng thutak kan hrilh thei hi chanvo hlu a va ni tak êm! He chanvo hlu hi mi tinte neih theih a ni lo va. Entîr nân, Isua leia a awm lai khân, ramhuaite’n a chanchin an sawi chu a phal lo. (Lk. 4:41) Tûn laiah pawh, tu emaw chu Jehova mite ruala thu hrilh rawngbâwlnaa a tel hmain Jehova tilâwm zâwnga a nun phawt a ngai a ni. Thu hrilh theihna remchâng kan neihna hmun leh hun apianga thu hrilhna hmangin chu chavo hlu kan neih chu kan ngaihlutzia kan lantîr a. Kan thiltum ber chu Isua angin mite thinlunga Lalram thutak chî tuh a, tuia châwm hi a ni.—Mt. 13:3, 23; 1 Kor. 3:6.

9. Engtin nge inawpna pâwl chuan Pathian hming a hriattîr?

⁹ Isua’n Pathian hming a hriattîr. Isua chuan a Pa vâna mi hnêna a ṭawngṭainaah: “I hming ka hriattîr a,” tiin a sawi a ni. (Joh. 17:26) Isua entawn tûr siamte chu zuiin, Jehova inawpna pâwl chuan mi dangte’n Pathian hming an hriat theih nân a tih theih apiang a ti a ni. New World Translation of the Holy Scriptures chuan Pathian hming chu a dahna tûr dik taka dah lêt lehin a pawimawhna a lantîr a. Chu Bible lehlin a bu pum emaw, a ṭhen lai emaw chu ṭawng 270 chuanga hmuh  theih a ni. “Jehova Thuhretute Tâna Zir Bingna Hmanrua,” tih lehkhabua “Pathian Jehova,” tih thupui hnuaia “Jehova hming,” tih chu en rawh.

10. Myanmar rama chêng nu pakhat thusawi aṭangin eng nge i hriat?

¹⁰ Isua angin, mi a tam thei ang berte chu Pathian hming hre tûra ṭanpui kan duh a. Myanmar rama kum 67 mi nu pakhat chuan Pathian hming a han hriat chuan mittui tla zawih zawih chungin: “Pathian hming Jehova tih hi ka nuna ka vawi khat hriatna a ni. . . . Ka thu hriat tawh azawnga thu pawimawh ber min hriattîr a ni,” tiin a sawi a. Chu a thiltawn aṭangin, Pathian hming hriatnain mi rilru ṭha pute chunga thil a tihtheihzia kan hre thei a ni.

INAWPNA PAWL CHUNGAH NGAIHHLUTNA LANTIR ZAWM ZEL RAWH

11. Engtin nge kohhran upate chuan Jehova inawpna pâwl chunga ngaihhlutna an lantîr theih? (Milem en bawk rawh.)

¹¹ Kohhran upate chuan eng kawng khatin nge Pathian inawpna pâwl chunga an ngaihhlutna an lantîr theih? Kaihhruaina an dawn hunah anni chuan ngun taka chhiarin theih tâwp chhuaha an zui a ngai a. Entîr nân, inkhâwmna an kaihhruai dân tûrte leh kohhran tâna ṭawngṭai dân tûrte chauh ni lovin, Krista berâmte an enkawl dân tûr chungchângah kaihhruainate an dawng a. Inawpna pâwl kaihhruaina zâwmtu upate chuan an enkawlna hnuaia awm unaute chu him leh hmangaihna dawng nia inhriatna an neihtîr a ni.

12. (a) Engvângin nge kohhrana hmahruaitute nêna kan thawhho vang? (Hebrai 13:7, 17) (b) Engvângin nge an mize ṭhate chu kan ngaihven tlat ang?

¹² Kohhran upate hnên aṭanga kaihhruaina kan dawng a nih chuan inhuam takin kan zâwm tûr a ni. Chutianga kan tih chuan, kohhrana kaihruaitute hna kan tih awlsamsak dâwn a ni. Bible chuan hmahruaitute thu awih a, an laka intulût tûrin min fuih a. (Hebrai 13:7, 17 chhiar rawh.) Chu chu a harsat châng a awm thei a ni. Engvângin nge? Anni chu ṭha famkim lo an nih vâng a ni. Mahse, an mize ṭhate aia an ṭhat lohna lai chauh kan en a nih chuan kan hmêlmate thlâwptu kan ni ang. Eng kawngin nge? Kan hmêlmate duh dân angin Pathian inawpna pâwl chunga kan rinna chu a nghet dâwn lo a ni. An dâwt thu theh darhte hria a, hnâwl tûrin a bîk takin eng nge kan tih theih?

MI DANGTE AVANGIN INAWPNA PAWL I NGAIHHLUTNA CHU TIKIAM SUH

13. Engtin nge Pathian hmêlmate’n a inawpna pâwl hming tihchhiat an tum?

¹³ Pathian dodâltute chuan a inawpna pâwl ṭhatna laite chu a ṭha lo zâwnga thlîrtîr min tum a. Entîr nân, Jehova chuan amah betute chu tisa lam, nungchang lam leh, thlarau lama thianghlim tûrin min duh tih Bible aṭangin kan hria a. Ani chuan nungchang bawlhhlawhna kawng zawh a, inlamlêt duh lotute chu kohhran aṭanga hnawt chhuak tûrin a phût a ni. (1 Kor. 5:11-13; 6:9, 10) Chu Bible thupêk chu kan zâwm a. Mahse, min dodâltute chuan chu thupêk chu kan zawm avângin hriatthiamna nei lo, khirhkhiap tak leh hmangaihna nei lo niin min puh a ni.

14. Inawpna pâwl chungchânga thu dik lo theh darhtu ber chu tu nge ni?

¹⁴ Min dotu ber chu hre rawh. Hêng dâwt thu zawng zawngte phênah hian “dâwt pa,” Diabol Setana a awm a ni. (Joh. 8:44; Gen. 3:1-5) Chuvângin, Setana chuan Jehova inawpna pâwl chungchânga dâwt thute theh darh tûrin amah thlâwptute a hmang dâwn tih kan beisei tûr a ni a. Chu chu kum zabi khatnaah pawh a thleng a ni.

15. Sakhaw hruaitute chuan Isua leh a hnungzuitute chungah eng nge an tih?

 ¹⁵ Kum zabi khatnaah khân, Setana thlâwptute chuan mi ṭha famkim Pathian Fapa leh a thilmak tihte chungchângah dâwt thu an theh darh a. Entîr nân, sakhaw hruaitute chuan Isua’n “Ramhuai lal” hnên aṭanga thiltihtheihna a dawn avânga ramhuaite hnawt chhuak thei niin an sawi a ni. (Mk. 3:22) Isua chung thu rêl a nih pawh khân, sakhaw hruaitute chuan Pathian hming sawichhetu anga puhin, mipuite chu tihhlumtîr tûra dîl tûrin an fuih a. (Mt. 27:20) A hnua Krista hnungzuitute’n chanchin ṭha an hril chuan dodâltute’n Kristiante tiduhdah tûrin mite chu ‘an fuih pawrhin an huattîr’ a ni. (Tirh. 14:2, 19) Tirhkohte 14:2-na nêna inkûngkaihin Vênnainsâng, December 1, 1998 chhuak chuan heti hian a hrilhfiah a ni: “Juda mi dodâltute chuan anmahniin thuchah an hnâwl chu duh tâwk mai lovin, Jentail mipuite chu Kristiante hua a, do tûrin an fuih a ni,” tiin.

16. Chanchin dik lote kan hria a nih chuan eng nge kan hriat reng ang?

¹⁶ Setana chuan kum zabi khatna hun lai ang bawkin dâwt thute a la theh darh reng a. Tûn laiah pawh, ani chuan ‘khawvêl zawng zawng a la bum’ reng a ni. (Thup. 12:9) Inawpna pâwl emaw, hmahruaitu unaute emaw chungchâng thu dik lo i hria a nih chuan Pathian hmêlmate’n kum zabi khatnaa Isua leh a hnungzuitute an cheibâwl dân kha hre reng ang che. Tûn laiah pawh, Jehova mite chu Bible-in a hrilh lâwk angin tihduhdah a, dik lo taka sawichhiat an ni a. (Mt. 5:11, 12) Chanchin dik lote lo chhuahna hnâr kan hriat a, kan hnâwl vat a nih chuan  chûngte hruai sualin kan awm lo vang. Eng nge kan tih ngai?

17. Engtin nge chanchin dik lote chu kan pumpelh theih? (2 Timothea 1:13) (“ Chanchin Dik Lote Chhân Lêt Dân Tûr,” tih bâwm chu en bawk rawh.)

¹⁷ Chanchin dik lote chu hnâwl rawh. Tirhkoh Paula chuan chanchin dik lote kan hriat huna chhân lêt dân tûr chungchângah kaihhruaina chiang tak min pe a. Ani chuan Timothea hnênah ‘mi ṭhenkhat chu thawnthu lam,’ a nih loh leh chanchin dik lote sawi bânsan tûra hrilh tûr leh “Pathian pawisa lo . . . thawnthu mai mai chu hnar” tûrin a hrilh a ni. (1 Tim. 1:3, 4; 4:7, Mizo King James Bible) Nautê chuan engmah hre lovin chhuata a hmuh apiang chu chharin ei mai ṭhîn mah se, puitlingte chuan a hlauhawmzia hriain chutiang chuan an ti ngai lo vang. Keini pawhin chanchin dik lote chu a lo chhuahna hnâr kan hriat avângin kan hnâwl a. Thutak, “thu dik dân” chu kan vawng tlat a ni.—2 Timothea 1:13 chhiar rawh.

18. Engtin nge Jehova inawpna pâwl kan ngaihhlutzia kan lantîr theih?

¹⁸ Pathian inawpna pâwlin Isua a entawn dân kawng thum chauh kan sawiho va. Bible i zir hunah inawpna pâwlin Isua a entawn dân kawng dangte chu hriat belh tum ang che. Kohhrana mite chu inawpna pâwl chunga ngaihhlutna nei chho tûrin ṭanpui la. Tichuan, a duh zâwng hlen chhuah nâna a hman a inawpna pâwl chu hnaih tlatin, rinawm taka Jehova rawng bâwlin i ngaihhlutna chu lantîr zawm zêl ang che. (Sâm 37:28) Hmangaihna nei tak leh rinawm tak Jehova mite zînga tel theihna chanvo kan neih hi i ngaihlu zawm zêl ang u.