ZÃMSGÃ YĨNGA 15
YƖƖLL 124 D yɩ neb sẽn maand sɩda
Maneg-y n kɩs-y-yã a Zeova siglgã sɩda
“Tẽegd-y sẽn lʋɩt-b taoor yãmb sʋkã yelle, rat n yeel tɩ neb nins sẽn togs yãmb Wẽnnaam goamã.”—EBRE. 13:7.
D SẼN NA N BÃNGE
Y sẽn tõe n maan to-to n maneg n kɩs a Zeova siglgã sɩda.
1. Pipi kiris-nebã wakatẽ, wãn to la a Zeova nin-buiidã ra sigl-yã?
A ZEOVA sã n kõ a nin-buiidã tʋʋmd fãa, a ratame tɩ b sigl sõma n tʋm tʋʋmdã. (1 Kor. 14:33) Wala makre, Wẽnnaam datame tɩ d moon koe-noogã dũniyã gill zugu. (Mat. 24:14) A Zeova kɩtame t’a Zeezi get tʋʋm-kãng yelle. A Zeezi gesame tɩ b sigl tʋʋmdã sõma. Pipi kiris-nebã wakatẽ, b sẽn wa n lugl tigims zĩis toɛy-toɛyã, b yãka kãsem-dãmb tɩ b wilgd tiging fãa neb sor la b lʋɩt taoore. (Tʋʋ. 14:23) Taoor lʋɩtb sull n da be Zerizalɛm. Yaa tẽn-tʋmdbã ne kãsem-dãmba. B ra yãkda yam bũmb toor-toor wɛɛngẽ, tɩ tigimsã fãa neb segd n tũ. (Tʋʋ. 15:2; 16:4) “Tigimsã neb tẽeb pãng ra paasdame, tɩ b sõorã me ra fɩɩgd wʋsgo,” b sẽn da tũud noy nins b sẽn da kõt-bã yĩnga.—Tʋʋ. 16:5.
2. Yʋʋmd 1919 wã tɛka, ãnda rãmb la a Zeova tũnugd ne n wilgd a nin-buiidã sore, la a sõngd-b tɩ b paamd bũmb nins sẽn yaa tɩlɛ b tẽebã kengr yĩngã?
2 Hal baa rũndã, a Zeova ket n siginda a nin-buiidã. Yʋʋmd 1919 wã tɛka, a Zeezi tũnugda ne rap sul-bil sẽn yaa neb sẽn paam vʋʋsem sõngã zaeebo, n sigind koɛɛgã moonego, la a sõngd a karen-biisã tɩ b paamd bũmb nins sẽn yaa tɩlɛ b tẽebã kengr yĩngã. a (Luk 12:42) Yaa vẽeneg t’a Zeova ningda sul-kãng tʋʋmdã barka.—Eza. 60:22; 65:13, 14.
3-4. a) Wilg-y d sẽn sigl sõma wã sẽn nafd tõnd to-to. b) Bõe yell la d na n gom sõs-kãngã pʋgẽ?
3 D sã n da pa sigl sõma, d pa na n tõog n tʋm tʋʋmd ning a Zeezi sẽn kõ-dã ye. (Mat. 28:19, 20) Wala makre, b sã n da pa yãk zĩig tiging fãa sẽn segd n moone, yɛlã ra na n yɩɩ wãna? Ned fãa ra na n moonda a sẽn datẽ. Koe-moondbã ra na n moona zĩis kẽer naoor wʋsgo, tɩ zĩis sãnda pa paam mooneg ye. Yãmb nee bũmb a taab wɛɛngẽ d sẽn sigl sõma wã sẽn nafd-d bɩ?
4 A Zeezi sẽn maan bũmb nins a sẽn wa n be tẽngã zugã wilgda a sẽn sigind tõnd rũndã-rũndã to-to. Sõs-kãngã pʋgẽ d na n yãa mak-sõng ning a Zeezi sẽn basã, la d siglgã sẽn dɩkd a togs-n-taar to-to. D leb n na n yãa d sẽn tõe n wilg to-to tɩ d kɩsa a Zeova siglgã sɩda.
D SIGLGÃ RƖKDA A ZEEZI TOGS-N-TAARE
5. Bõe la d maand tɩ wilgdẽ tɩ d rɩkda a Zeezi togs-n-taare? (Zã 8:28)
5 A Zeezi ra tikda bũmb nins a Ba wã sẽn wilg-a wã, n bãngd a sẽn na n yeel la a sẽn na n maane. A Zeova siglgã rɩkda a Zeezi togs-n-taare, n tikd Wẽnnaam Gomdã zug n wilgd-d sor la a sõngd-d tɩ d bãngd sẽn yaa sõma la sẽn yaa wẽng n bakdẽ. (Karm-y Zã 8:28; 2 Tɩm. 3:16, 17) B tẽegd-d-la wakat fãa tɩ d karemd Wẽnnaam Gomdã la d tũudẽ. D sẽn tũud sagl-kãngã, wãn to la nafd tõndo?
6. Wãn to la d sẽn zamsd Biiblã nafd tõndo?
6 D sã n tar d siglgã sɛbã n zãmsd Biiblã, nafd-d-la wʋsgo. Wala makre d tõe n maka Biiblã sẽn yetã ne sagls nins siglgã sẽn kõtã. D sã n yã tɩ sagls nins d sẽn paamdã tika Biiblã zugu, d manegd n kɩsa a Zeova siglgã sɩda.—Rom. 12:2.
7. Koe-bʋg la a Zeezi ra moonda, la wãn to la a Zeova siglgã rɩkd a togs-n-taare?
7 A Zeezi ra moonda “Wẽnnaam Rĩungã koe-noogã.” (Luk 4:43, 44) A yeela a karen-biisã me tɩ b moon Rĩungã. (Luk 9:1, 2; 10:8, 9) Rũndã-rũndã, neb nins fãa sẽn be a Zeova siglgã pʋgẽ wã moonda Rĩungã koɛɛgã baa b sẽn be zĩig ninga, la b sẽn tar tʋʋmd ning fãa siglgã pʋgẽ.
8. Tʋʋm-bʋg la b kõ tõnd tɩ yaa zu-zẽkre?
8 D getame tɩ d sẽn paam n tõe n gom Rĩungã yell ne neb a taabã yaa zu-zẽkre. Pa ned yaar n tõe n paam zu-zẽk-kãng ye. Wala makre, a Zeezi sẽn wa n be tẽngã zugã, a pa bas tɩ zĩn-dãmbã kõ kaset a zug ye. (Luk 4:41) Rũndã-rũndã, nand tɩ b sak tɩ ned wa naag a Zeova Kaset rãmbã n moond koɛɛgã, rẽnda a reng n modg t’a sẽn vɩ to-to wã zems ne a Zeova noyã. D wilgdame tɩ d sũur nooma d sẽn paam n tõe n moon koɛɛgã, d sẽn na n moond zĩig fãa, la wakat ning fãa d sẽn paame. D sẽn dat yaa d bʋt Rĩungã koɛɛgã nebã sũyẽ wã la d zãgsd koom wa a Zeezi.—Mat. 13:3, 23; 1 Kor. 3:6.
9. Bõe la siglgã maand sẽn na yɩl tɩ nebã bãng Wẽnnaam yʋʋrã?
9 A Zeezi wilga nebã Wẽnnaam yʋʋrã. Daar a ye, a Zeezi pʋʋsa a Ba sẽn be saasẽ wã n yeel yaa: “Mam kɩtame tɩ b bãng fo yʋʋrã.” (Zã 17:26) A Zeova siglgã rɩkda a Zeezi togs-n-taare, n maand a sẽn tõe fãa n dat n sõng nebã tɩ b bãng Wẽnnaam yʋʋrã. Zĩ-kãng wɛɛngẽ, Gʋls-sõamyã, Dũni-paalgã lebgr sõnga wʋsgo. Biibl-kãng pʋgẽ, b lebs n ninga Wẽnnaam yʋ-peellã zĩis nins fãa a sẽn da be Biiblã seb-kʋdã pʋsẽ wã. Rũndã-rũndã, b lebga Biibl-kãng tõrã wall a pʋɩ-sʋk buud-goam 270 la zak pʋsẽ. Vẽnegre A4 la A5 sẽn be Biibl-kãng pʋgẽ, y tõe n yãa bũmb nins b sẽn tik n lebs n ning Wẽnnaam yʋʋrã Biiblã pʋgẽ wã. Farendã Bible d’étude, Appendice C wã pʋgẽ, b wilga kaset a taab sẽn kɩt tɩ Wẽnnaam yʋ-peellã tog n zĩnd Biiblã babg ning b sẽn da gʋls ne Gɛrkã pʋgẽ naoor 237.
10. Yam-bʋg la d tõe n dɩk Birmani pagã sẽn yeel bũmb ningã pʋgẽ?
10 D rɩkda a Zeezi togs-n-taare, n dat n sõng neb wʋsg wa d sẽn tõe tɛk tɩ b bãng Wẽnnaam yʋʋrã. Birmani pag a ye sẽn tar yʋʋm 67 sẽn bãng Wẽnnaam yʋʋrã a ninga nintãm n yeel yaa: “Woto la pipi m sẽn bãng tɩ Wẽnnaam yʋʋr la a Zeova. . . . M zɩ n bãng bũmb sẽn tar yõod n yɩɩd bũmb ning y sẽn wilg-mã ye.” Pʋ-peelem dãmbã sã n bãng Wẽnnaam yʋʋrã, tõe n yɩ-b-la noog wʋsg wa kiba-kãngã sẽn wilgdã.
D KELL N WILG TƖ D KƖSA A ZEOVA SIGLGÃ SƖDA
11. Bõe la kãsem-dãmbã tõe n maan n wilg tɩ b kɩsa a Zeova siglgã sɩda? (Ges-y fotã me.)
11 Bõe la kãsem-dãmbã tõe n maan n wilg tɩ b kɩsa Wẽnnaam siglgã sɩda? Siglgã sã n wa kõ kãsem-dãmbã noya, b segd n maaga b yĩng n karem n bao n wʋm b võore, la b maan b sẽn tõe fãa n tũ. Wala makre b kõt-b-la sagls tigissã sẽn segd n maand to-to wã wɛɛngẽ, b sẽn segd n pʋʋs tigissã sasa to-to, la b sẽn segd n ges Kirist piisã yell to-to wã wɛɛngẽ. Kãsem-dãmbã sã n tũud noy nins siglgã sẽn kõtã, saam-biisã la saam-bi-pogsã neeme t’a Zeova nong-b lame, la t’a geta b yelle.
Kãsem-dãmbã sõngda tõnd tɩ d tũud sor ning a Zeova siglgã sẽn wilgd tõndã (Ges-y sull 11) b
12. a) Bõe yĩng tɩ d segd n teel neb nins sẽn lʋɩt taoor tõnd sʋkã? (Ebre-rãmbã 13:7, 17) b) Bõe yĩng tɩ d segd n get neb nins sẽn lʋɩt tõnd taoorã zʋg-sõma wã n yɩɩda?
12 Kãsem-dãmbã sã n wa kõ tõnd noore, d segd n tũu ne yamleoogo. D sã n maand woto, kɩtdame tɩ sẽn lʋɩt-b taoorã tʋʋmd yaa nana. Biiblã sagend-d lame tɩ d kelg sẽn lʋɩt-b taoor tõnd sʋkã, la d sulg d meng n sak-ba. (Karm-y Ebre-rãmb 13:7, 17.) Wakat ninga rẽ maaneg pa nana ye. Bõe yĩnga? Yaa tɩ nin-kãens pa zems zãng ye. La d sã n bas b zʋg-sõma wã n get b pãn-komsmã, yaa wa d sẽn sõngd d bɛɛbã. Bõe yĩng tɩ d yet woto? Bala na n kɩtame tɩ d pa le kɩs Wẽnnaam siglgã sɩd zãnga, tɩ yaool n yaa woto bal la d bɛɛbã sẽn datã. Bõe la d tõe n maan n bãng d bɛɛbã zirẽ-beedã, n zãag d meng ne rẽ?
RA BAS-Y TƖ NEB A TAABÃ KƖT TƖ Y PA LE KƖS WẼNNAAM SIGLGÃ SƖD YE
13. Bõe la Wẽnnaam bɛɛbã maand sẽn na yɩl n sãam a siglgã yʋʋre?
13 Wẽnnaam bɛɛbã modgdame n dat tɩ nebã tẽ tɩ bõn-sõma nins Wẽnnaam siglgã sẽn maandã yaa bõn-wẽnse. Wala makre, Biiblã sõnga tõnd tɩ d bãng t’a Zeova ratame tɩ d yɩ yɩlem yĩngã wɛɛngẽ, tũudmã la tʋʋm-tʋmdɩ wã wɛɛngẽ. A yeelame tɩ b yiis ned ning fãa sẽn tʋmd tʋʋm-dẽgd n pa rat n tek yam n kos sugr tigingã pʋgẽ. (1 Kor. 5:11-13; 6:9, 10) D tũuda Biiblã no-kãnga. La d bɛɛbã tikda rẽ n yetẽ tɩ d yaa dem-deme, tɩ d ningda nebã taale, la tɩ d pa nong nebã ye.
14. Ãnda n kɩtd tɩ b yelgd kibay sẽn pa sɩd a Zeova siglgã zugu?
14 Bao-y n bãng-y soab ning sẽn kɩtd tɩ b sãamd d siglgã yʋʋrã. Yaa a Sʋɩtãan n kɩtd tɩ b togsd kibay sẽn pa sɩd a Zeova siglgã zugã. Yẽ n yaa “ziri wã ba.” (Zã 8:44; Sɩng. 3:1-5) Rẽ n so t’a Sʋɩtãan sẽn tũnugd ne a poorẽ dãmbã n yelgd kibay sẽn pa sɩd a Zeova siglgã zugã pa lingd tõnd ye. A maana woto a Zeezi wakatẽ wã, la pipi kiris-nebã wakatẽ.
15. Bõe la tũudmã taoor dãmb maan n sãam a Zeezi ne a karen-biisã yʋʋre?
15 Baa a Zeezi sẽn yaa Wẽnnaam Biigã sẽn da zems zãnga, la a ra maand yel-soalmã, a Sʋɩtãan tũnuga ne neb wʋsg n yelg kibay sẽn pa sɩd a zugu. Wala makre, tũudmã taoor dãmb ra yetame t’a Zeezi “rigda zĩn-dãmbã ne zĩn-dãmbã naab maasem.” (Mark 3:22) B sẽn wa n kaood a Zeezi bʋʋdã, tũudmã taoor dãmb yeelame t’a tʋʋsa Wẽnnaam, n pirs kʋʋngã tɩ b kos tɩ b kʋ a Zeezi. (Mat. 27:20) Kiristã karen-biisã sẽn wa n moond koe-noogã, b bɛɛbã “pirsa bu-zẽmsã neba,” tɩ b nams-ba. (Tʋʋ. 14:2, 19) Yʋʋmd 1998 yʋʋm-sar kiuug pipi daar Gũusg Gasgã goma Tʋʋm 14:2 yell n yeel yaa: “Zʋɩf-rãmbã sẽn pa kelg koe-noogã sẽn yãk a toogo, b togsa goam sẽn pa sɩd kiris-nebã wɛɛngẽ sẽn na yɩl tɩ bu-zẽmsã neb kisg-ba.”
16. D sã n wʋm kibay sẽn pa sɩda, bõe yell la d segd n tẽege?
16 Hal n tãag rũndã, a Sʋɩtãan ket n yagda ziri. A ket n “kẽesda dũniyã fãa moogo.” (Vẽn. 12:9) Y sã n wʋm kibay sẽn sãamd a Zeova siglgã yʋʋr wall saam-biis nins sẽn lʋɩt taoorã yʋʋre, bɩ y tẽeg Wẽnnaam bɛɛbã sẽn maan bũmb ning a Zeezi wakatẽ wã, la pipi kiris-nebã wakatẽ wã yelle. Rũndã-rũndã, b namsda a Zeova nin-buiidã, la b sãamd b yʋʋrã wa Biiblã sẽn da pĩnd n togsã. (Mat. 5:11, 12) D sã n tẽeg sẽn yaa soab ning n kɩt tɩ b yelgd kibay sẽn yaa ziri wã, la d maan bũmb tao-tao sẽn na yɩl n kogl d menga, b pa na n tõog n kẽes-d moog ye. La bõe la d segd n maan n kogl d menga?
17. Bõe la d tõe n maan n da tẽ kibay sẽn pa sɩda? (2 Tɩmote 1:13) (Ges-y zĩ-gũbrã me: “ D manesem sẽn segd n yɩ to-to, d sã n wʋm kibar sẽn pa sɩda.”)
17 Ra kelg-y kibay sẽn pa sɩd ye. Tẽn-tʋmd a Poll wilga bũmb ning d sẽn segd n maanã vẽenega, d sã n wa wʋm kibar sẽn pa sɩda. A yeela a Tɩmote t’a “yeel neb kẽer tɩ b ra . . . kelg soalma,” la t’a “ra kelg soalem nins sẽn paoogd Wẽnnaamã” ye. (1 Tɩm. 1:3, 4; 4:7) Baa bi-kɩdg sẽn tõe n dɩk bũmb tẽng n ning a noorẽ wã, kãsem pa na n saag n maan a buudu, bala a miime tɩ tõe n kɩtame t’a lʋɩ bãaga. D pa na n sak n kelg kibay sẽn yaa ziri, bala d mii kibay a woto sẽn yitẽ wã. D kelgda “goam nins sẽn nafdã” bala, rat n yeel tɩ sẽn yaa sɩdã bala.—Karm-y 2 Tɩmote 1:13.
18. Bõe la d tõe n maan n wilg tɩ d kɩsa a Zeova siglgã sɩda?
18 D yãa bũmb a tãab wɛɛngẽ Wẽnnaam siglgã sẽn dɩkd a Zeezi togs-n-taare. Y sã n wa zãmsd Biiblã, bɩ y bao n bãng bũmb a taab wɛɛngẽ me a Zeova siglgã sẽn dɩkd a Zeezi togs-n-taare. Sõng-y y tigingã neb a taab tɩ b maneg n kɩs a Zeova siglgã sɩda. Bɩ y kell n tũ a Zeova ne y sũur fãa, la y kell n teel a siglgã a sẽn tũnugd ne n pidsd a raabã, tɩ rẽ la y wilgd tɩ y kɩsa a siglgã sɩda. (Yɩɩn. 37:28) Bɩ d kell n wilg tɩ d sũur nooma d sẽn paam n naag a Zeova siglgã neb sẽn tar nonglem la b maand sɩdã.
Y NA N LEOKAME TƖ BÕE?
-
Zĩ-bʋs wɛɛngẽ la Wẽnnaam nin-buiidã rɩkd a Zeezi togs-n-taare?
-
Bõe la d tõe n maand n wilgdẽ tɩ d kɩsa a Zeova siglgã sɩda?
-
D sã n wʋm kibay sẽn pa sɩda, d manesem segd n yɩɩd wãna?
YƖƖLL 103 Kãsem-dãmbã yaa Wẽnnaam kũuni
a Ges-y zĩ-gũbr ning gom-zug sẽn yaa: “Pourquoi 1919 ?” sẽn be Le culte pur de Jéhovah enfin rétabli ! sebrã neng 102-103.
b FOT-RÃMBÃ BILGRI: Kãsem-dãmb sẽn sõsd ne taab perzãntoaarã tall n moonã zugu. Rẽ poore, koe-moonegã sull yel-gɛt n wilgd koe-moondbã tɩ b segd n yalsame tɩ b poayã tees lalgã.
