1. ǂGurokam ǁaeb ǃnâ i ge Jehovab di khoena mati aiǂhomisa ī?

 JEHOVAB ga ǁîb khoena ǁgaumâi-e mâ ob ge ra ǃâubasen în nē sîsen-e ǃgâi ǀgaub ǃnâ dī. (1Kor. 14:33) Aiǁgause, Elob ǂâis ge îs ǃgâiǂhôasa ǃhūbaib ǂhawase aoǁnâhe. (Mat. 24:14) Jehovab ge Jesuba aiǂhanuba ge mâ îb ǁnā sîsen-e daoǁgau. Jesub ge ge kōǃgâ îs ǁnāsa ǃgâi ǀgaub ǃnâ dīhe. (ǃNǃkh. 14:23) ǂGurokham ǁaeb Jerusalems ǃnâ i ge apostelgu tsî kai-aogu tsîna ǀhaohâb ǃûi-aose gere ǂnûǁkhae. ǁÎgu ge hoa ǀhaohâgu nî sao-ai mîǁguiga gere dī. ǀHaohâgu ge ǃkharagagu ǃkhaidi ǃnâ tsoatsoahe khami gu ge ǀhaohâb ǃûi-aoga mâ ǀhaohâb hoab ǃnâ, ǃgâsana nē mîǁguiga gere ǂanǂan. (ǃNǃkh. 15:2; 16:4) ǃGâsan ge nē daoǁgaude gere ǁnâuǀnam amaga i ge ‘ǀhaohâga ǂgoms ǃnâ ǀgaiǀgaihe tsî ǃgôab ǃnâ tsēkorobe gere ǀarosen.’—ǃNǃkh. 16:5.

2. Jehovaba mati ǁîb khoena daoǁgau tsî gāgāsi ǂûna 1919 xu ra mā?

² Jehovab ge noxoba aiǃgû tsî nētsēs tsîna ǁîb khoena ra aiǂhomi. Jesub ge 1919 na xu ǂhauhesa ǃgâsaga ra sîsenū îgu aoǁnâ sîsen-e aiǂhomi tsî daoǁgausa Elobmîsa xu ǁîb saosabena ǂhanu ǁaeb ai mā. a (Luk. 12:42) ǃGāsa i ge a Jehovab nē sîsen-e ra ǀkhaesa.—Jes. 60:22; 65:​13, 14.

3-4. (a) Aiǁgau-e mā re ǁgau ra-e mati da ǃgâise aiǂhomisa ǀgauba xu ra ǀamasa. (b) Tae-e da nē ǁkhāǁkhāǃâs ǃnâ nî ǃhoaǃgao?

 ³ ǃGâise da ga aiǂhomihe tama hâ, o da ge Jesub ǁgaumâi da hâ sîsen-e ga dīho tama hâ. (Mat. 28:​19, 20) Aiǁgause i ga aoǁnâ ǃnâ da nî ǂkharide ǁgaumâihe tama hâ, o i ge mâ khoe-i hoa-e ǂhâba i hâ ǁaeb ai ǂhâba i hâ ǃkhais ai ga aoǁnâ hâ. Tsî i ge ǀnî ǃkhaide ǂguiǃnāde ga sîsen-e hâ ǃkharagagu aoǁnâ-aon xa. ǀNî ǂkharidi tsâǀkhāhe tama hîna. ǃAmku ǀgaub ǃnâ aiǂhomîhesa xu da ǃgâiba a ǀama ǁkhā ǀgaub xa du a ǂâi ǁkhā?

⁴ ǃHūbaib aib ge hâ ī ob ge ǁîb saosabena aiǂhomi khamib ge Jesuba nētsēs tsîna Elob khoena ra aiǂhomi. Nē ǁkhāǁkhāǃâs ǃnâ da ge Jesub ge mā aiǁgausa nî ǃhoaǃgao tsî matis sida ǀapeǂhomisa ǁnā aiǁgausa ra saosa. Mati da ǁnā ǃgôaǃgâsiba Jehovab ǀapeǂhomisa nî ǁgaus tsîna da ge nî ǃhoaǃgao.

SIDA ǀAPEǂHOMIS GE JESUB AIǁGAUSA RA SAO

5. Mâpa a ǀgui ǀgau Jesub aiǁgausa da ra saoba? (Johaneb 8:28)

⁵ Jesub ge ǁîb di ǀhomsi ǁGûba xu ge ǁkhāǁkhāsen tae-eb nî dīs tsî tae-eb nî mîsa. Jesub aiǁgausa ǁgaes ǃnâ-ūs ge Jehovab ǀapeǂhomisa ǁkhāǁkhāsen da ra xūn tsî daoǁgaudi tsîna Elobmîs ai ra ǃgaoǃgao (Khomai re Johaneb 8:28 sa; 2 Tim. 3:​16, 17) ǃNās hoasa da ge ra hōhōǃnâhe î da Elobmîsa khomai tsî khomai da ra xūna ûiǂui. Mati da ǃgâiba ra ǀama nē daoǁgausa da ga sao o?

6. Mâ ǂhâǂhâsa ǀgaub ǃnâ da Elobmîs ǁkhāǁkhāsa xu ǃgâiba ra ǀama?

⁶ ǃGâiba da ge ra ǀama Elobmîs ai ǃgaoǃgaosa ǂkhanin sida dina xu da ga ǁkhāǁkhāsen o. Aiǁgause da ge Elobmîs ǁkhāǁkhāde a ǀgōpeǀnō ǁkhā, sida ǀapeǂhomisa xu da ra hō daoǁgaudi ǀkha. Elobmîs ai ǃgaoǃgaosa daoǁgaude da ga mû, o i ge Jehovab ǀapeǂhomis ǃnâ da ūhâ ǂgomǃgâsib ra ǀgai.—Rom. 12:2.

7. Mâ haisi-amsab ge Jesuba aoǁnâ tsî matis Jehovab ǀapeǂhomisa ǁîb aiǁgausa ra sao?

⁷ Jesub ge “ǃgâiǂhôas Elob Gaosib disa” gere aoǁnâ. (Luk. 4:​43, 44) Jesub ge ǁîb ǁkhāǁkhāsaben tsîna gere mîmā în Gaosib xa aoǁnâ. (Luk. 9:​1, 2; 10:​8, 9) Nētsēn ge Jehovab ǀapeǂhomis ǃnâ hân hoana Gaosib haisi-amsa ra aoǁnâ. Mâpa ǀguin ga hâ tamas ka io ǂgui ǃereamden ga ūhâ xawes tsîna.

8. Mâ aiǂhanuba da mā-e hâ?

⁸ Kai aiǂhanub ge nauna Elob Gaosib xa mîbasa. Hoa khoe taman ge ǁnā aiǂhanuba ūhâna. Aiǁgause, Jesub ge ǃhūbaib ai hâ i ob ge ge mā-am tama hâ i, în ǂkhaba gāgāde ūhâna tā ǁîb xa aoǁnâ. (Luk. 4:41) Nētsē i ge khoe-e Jehovab ǃoaba-aon ǀkha-i nî aoǁnâ tsoatsoas aiǃâ Jehovaba ra ǂkhîǂkhî ǀgaub ǃnâ nî ûi. Nē aiǂhanuba da kaise ra ǃgôaǃgâsa da ge ra ǁgau, khoen ǀkha Elob Gaosib xa hō da ra ǃē-i hoa-i ai ǃhoasa. Jesub khami da ge ra mîǁgui î da Gaosib amaba khoen di ǂgaogu ǃnâ ǃhana tsî ǂnâ.—Mat. 13:​3, 23; 1Kor. 3:6.

9. Matis ǀapeǂhomisa Elob ǀonsa ra ǂanǂan?

⁹ Jesub ge Elob ǀonsa ge ǂanǂan. ǀGores ǃnâb ge Jesuba ǁîb di ǀhomsi ǁGûba ǃoa ge mî: “Tita ge sa ǀonsa ǁîna ge ǂanǂan.” (Jhn. 17:26) Jehovab ǀapeǂhomis ge Jesub aiǁgausa ra ǁgae tsî ǁkhān a xūn hoana ra dī în nauna hui Elob ǀonsa ǂansa. ǀGui ǀgaub sida ǀapeǂhomis ge nēsa dīs ge New World Translation of the Holy Scriptures ǃnâ-ū. Nē ǂnûiǃkhunis ge  Elob di ǀonsa xoaǃnâhe ge gowagu ǃnâ i ge hâ i ǃkhais ai ge ǂgā-oa. Nē Elobmîs ǂnûiǃkhunis ge ǃâb tamas ka io ǀoasase 270 gowagu ǃnâ a hō-e ǁkhā. Appendixes A4 tsî A5 nē ǂnûiǃkhunis dis ǃnâ du ge ǃnāsa ǃgāsasiba Elob ǀons ǂgā-oahe hâ ǀgaus xa a hō ǁkhā. Study Bible Appendixes C dawa i ge Elob ǀonsa Xristeǁî Xrike xoadi ǃnâ 237 ǃnāde ǂgā-oahe hâs di ǁgauǁgaude hâ.

10. Myanmars ǃnâ ǁân hâ kaikhoes ge mî xūna xu da tae-e ra ǁkhāǁkhāsen?

¹⁰ Jesub khami da ge ǂgui khoena ra hui ǂgao în Elob di ǀonsa ǂan. Elob ǀonsa ūhâsas ge ǁkhāǁkhāsen os ge 67 kurixa kaikhoesa Myanmars ǃnâ ge ā tsoatsoa tsî ge mî: “Nēs ge ti ûib ǃnâ ǂguro ǃnās ǁnâu ta kosa Elob ǀons a Jehovasa. . . . Kaise ǂhâǂhâsa xū-e du ge go ǁkhāǁkhāte.” Nē aiǁgausa xu da ge ra mû khoe-i ga Elob ǀonsa ǁkhāǁkhāsen, o i ǁî-i ûiba a dawa ǁkhāsa.

AIǃGÛ RE SIDA ǀAPEǂHOMISA ǃGÔAǃGÂSIBA ǁGAUSA

11. ǀHaohâb ǃûi-aoga mati ra ǁgau Jehovab ǀapeǂhomisa gu ra ǃgôaǃgâ ǃkhaisa? (Ai-īsiba mû re.)

¹¹ Mâpa a ǀgui ǀgau ǀhaohâb ǃûi-aogu a ǁgau ǁkhāba Elob ǀapeǂhomisa gu ra ǃgôaǃgâsa? ǀHaohâb ǃûi-aogu ga ǀapeǂhomisa xu daoǁgaude ǃkhōǃoa, o gu ge ǁîde ǂōrisase khomai tsî ǁkhā gu a i hoa-e nî dī ǁîde dīǀoaǀoasa. Aiǁgause, ǁîgu ge mati gu ǀhaodi ǃâga nî dīs daoǁgaudi ǀguide ǃkhōǃoa tama tsî mati gu ǀhaohâb ǃnâ hân hoana nî ǀgoreba ǀgaus tsîna. Xawe daoǁgaudi tsîna ra māhe mati gu Xristub di gūn tsîna nî kōǃgâ ǀgausa. ǀHaohâb ǃûi-aogu ga ǀapeǂhomisa xu gu ra hō daoǁgaude sîsen-ū, on ge ǃgâsana Jehovab xan a ǀnamhe tsî ra kōǃgâhesa ra hōǃâ.

12. (a) Tae-i ǃaroma da ǀhaohâb ǃûi-aogu ǀkha nî sîsenǀhao? (Hebreǁîn 13:​7, 17) (b) Tae-i ǃaroma da ǀhaohâb ǃûi-aogu di ǃgâi ǀgaugu ai nî kō?

¹² ǀHaohâb ǃûi-aoga xu da ga daoǁgaude hō, o da ge māsenxase nî sao. ǁNāti du ga dī o du ge ǀhaohâb ǃûi-aogu ra dī sîsen-e ra supusupu. Elobmîs ge ra ǂkhâǃnâ da î da ǀhaohâb ǃûi-aoga ǁnâuǀnam tsî ǁîgu ǃnāga ǃgamǃgamsen. (Khomai re Hebreǁîn 13:​7, 17 sa.) ǁNāsa dīs ge ǀnî ǁaega ǃgom ǁkhā. Tae-i ǃaroma? Nē khoegu ǀoasa kurusa ūhâ tama amaga. Xawe da ga ǁîgu di ǁgai ǀgaugu ai ǀgui kō tsî ǁîgu ǃgâi ǀgauga mû tama io, o da ge sada khākhoena ra ǂkhâǃnâ. Tae-i ǃaroma da ti ra mî? Sida khākhoen ge ra ǂhâba î da tā ǂgom Elob ǀapeǂhomis ta daoǁgauda ǃkhaisa. ǁNā-amaga da ga ǀhaohâb ǃûi-aogu xa ǃgâi tamase ǂâi, o da ge ǀapeǂhomis xas tsîna ǃgâi tamase a ǂâi tsoatsoa ǁkhā tsî ǁîs ǃnâ nî ǂgomǃgâ ǀû. Tae-e da a dī ǁkhā î da khākhoen di ǂhomina mûǂan tsî ǁîna xu ǂgōsen?

TĀ ǂGOMǃGÂSIBA ǀAPEǂHOMIS ǃNÂ ǂOAǃNÂ

13. Elob khākhoena mati ǁîb ǀapeǂhomisa ǃgâi tama ǀgaub ǃnâ ra mûsen kai?

¹³ Elob mâǃoa-aon ge ra dītsâ în ǃgâi xūn Jehovab ǀapeǂhomis ra mā da na ǁgai xūn ase mûsen. Aiǁgaus ase da ge xoade xu ge ǁkhāǁkhāsen Jehovab ra ǃâubasensa î da sida sorode ǃanuse ūhâ, ǃanu ǀgaub ǃnâ tanisen tsî ǁîb ra ūǃoa ǀgaub ǃnâ ǁîba ǃoaba. Aiǁgause khoe-i hîna ǁgai xūna dī tsî ǀû ǂgao tama i ge ǀhaohâba xu nî ǂnûiǂuihe. (1 Kor. 5:​11-13; 6:​9, 10) Xoas ai ǃgaoǃgaosa mîmās ǁnāsa da ge ra ǁnâuǀnam. Nē mîmāsa da ra ǁnâuǀnam amaga i ge sida ra mâǃoana ra mî, khoena ǀnam tama ī tsî da ǁîna ra ǀgoraǃgâ ti. Tsî da sida ǂgom ǀgaub xa ra ǀkhara khoena ra mâǃoasa.

14. Ham-e ǂhomi ǂhôana ǀapeǂhomis xa ra ǃhoa?

 ¹⁴ ǀApeǂhomis ǁnāǂam-aona mûǂan re. Satanni ge nē ǂhomigu ǀapeǂhomis ǃoagu hâ ga ra ǂkhâǃnâ. ǁÎb ge a “ǂhomib di î.” (Jhn. 8:44; Gen. 3:​1-5) ǁNā-amaga da ge a ǃâubasen ǁkhā Satanni sida khākhoena nî sîsen-ūsa, în ǂhomi ǂhôana Jehovab ǀapeǂhomis xa ǃhoa tsî khoraǂui. Nēs ge Jesub tsî ǂgurokam ǁaeb Xristeǁîn ǀkha ge ī.

15. ǂGomdi ǂgaeǂgui-aona tae-e Jesub tsî ǁîb saosaben ǃoagu ge dī?

¹⁵ Elob ǀgôab Jesub ge ǀoasa kurusa ge ūhâ ī tsî buruxa dīna gere dī, xaweb ge ǁGâuaba ǀnî khoena gere sîsen-ū în ǂgui ǂhomi ǂhôana Jesub xa mî. Aiǁgaus ase kherkhen di ǂgaeǂgui-aogu ge khoena gere mîba, Jesub ǁîb ǀgaib demonga khoena xu ǃnora kaib diba “ǁgâuagu di danaǂgaeǂgui-aoga” xu gere hōsa. (Mrk. 3:22) Jesub di ǀgoraǃgâs ǃnâ gu ge ǂgomdi ǂgaeǂgui-aoga Jesuba gere ǂgāri-am, Elobab ǃgôasi-e ūhâba tama tsî ra ǃhōbi ti. Tsî gu ge khoena gere ǂkhâǃnâ îb Jesuba ǁōb ǁkharaba māhe. (Mat. 27:20) Jesub saosaben ge ǃgâiǂhôasa gere aoǁnâ, on ge ǁîna gere mâǃoa khoena ge “khâikhâiǃnâ” în ǁnā Xristeǁîna ǁgâiǀā. (ǃNǃkh. 14:​2, 19) ǃKhē xu ǂgō-ommi Desemberi 1, 1998, dib ge ǃNaeǃkhaidi 14:​2, xa sao rase ra ǁguiǃā: “Satanni di ǂkhâǃnâ-aon ge Xristeǁîn haisi-amsa gere mâǃoa. Tsî ǁnās ǂam-ai kaise tsū xūna ǁîn xa gere ǃhoa în khoena ǁîna ta ǃgâ tsî ǃhui.”

16. Tae-e da ǂâis ǃnâ nî ūhâ ǂhomi ǂhôana da ga ǁnâu o?

¹⁶ Satanni di ǂhomib ge ǂgurokam ǁaeb Xristeǁîn ǁaeb ǃnâ ǀgui ge hâ tama hâ i. Satanni ge noxoba nētsē ‘hoaraga ǃhūbaiba ra ǂgaeǂhapu.’ (J.ǂHa. 12:9) ǃGâi  tama ǂhôana du ga ǀapeǂhomis tamas ka io ǂgaeǂguisa ra ū ǃgâsagu xa ǁnâu, o ǂâis ǃnâ ūhâ re Elob khākhoen ge Jesub tsî ǂgurokam ǁaeb Xristeǁîna gere mâǃoa ǀgausa. Jesub ge ge mî khoen Jehovab ǃoaba-aona mâǃoa tsî ǁîb xa ǂhomiba nî ǃhoasa. Tsî nēs ge amabes ǃnâ nētsē ra dīǀoaǀoahe. (Mat. 5:​11, 12) ǂHomi ǂhôana da ge ǂgom tide mâpa xun ra hāsa da ga ǁnâuǃā tsî ǁkhā ǁaeb ai ǁkhaubasen o. Mati da a ǁkhaubasen ǁkha?

17. Mati da ǂgōbasen ǁkhā î da tā ǂhomi ǂhôan xa tsûtsû-e? (2 Timoteub 1:13) (Boksisa mû re “ ǂHomi ǂhôana xūts mati nî ǁkhaubasen.”)

¹⁷ ǂHomi ǂhôana mâǃoa. Apostle Paulub ge ǃgāsase ge ǁguiǃā tae-e da nî dīsa ǂhomi ǂhôana da ga ǁnâu o. ǁÎb ge Timoteuba ge mîba, în naun tsîna mîba în “tā ǂgobesen ǁau ǃhoa-ain tsî xū-e harebe tama ǀgaruben ǀkha.” (1 Tim. 1:​3, 4; 4:7) Nēs xa ǂâi re, babakiro i ge ǀurixa xū-e ūkhâi tsî a ǂû ǁkhā xawe kai khoen ge ǁnāti dī tide. ǁNâuǃā ī ra amaga ǁnā xū-e ǂûs ǀaesen kai ni ǁkhāsa. ǂHomi ǂhôana da ge ra mâǃoa, mâpa xu i ra hāsa da ra mûǂan amaga. Amaba xu da ge “ǁkhāǁkhāsen ǂuru ǁkhāǁkhāsa” da ge ra ǃkhōǀgara.—Khomai re 2 Timoteub 1:13 sa.

18. Mati du a ǁgau ǁkhā Jehovab ǀapeǂhomisa du ra ǃgôaǃgâ ǃkhaisa?

¹⁸ Nēpa da ge ǃnona ǀgaugu ǀguiga go ǃhoaǃgao, Elob ǀapeǂhomis Jesub aiǁgausa ra ǁgae ǀgausa. Elobmîsa du ra ǁkhāǁkhāsen khami ǂguiǃnâgu ǀgauga ôa re ǀapeǂhomis Jesub aiǁgausa ra saosa. ǃGâsana ǀhaohâb ǃnâ hui re în ǁîn ǂgomǃgâsiba ǀapeǂhomis ǃnâ omkhai. Tsî aiǃgû re ǃgôaǃgâsiba Jehovaba ǁgau tsî ǂgomǂgomsase ǃoabasa. Tsî ǁîb ra sîsen-ū ǀapeǂhomis ǀgūse hâ, ǁîb ǂâisa ra dīǀoaǀoasa. (Psa. 37:28) Hā re î da ganganxase aiǃgû tsî Jehovab ǀnamxaǃnâ tsî ǂgomǂgomxa khoen ǀkha da ūhâ aiǂhanuba ǃgôaǃgâ.