1. ¿Ajkia inijuantij kiyakanayayaj Jehová itlanechikol ipan achtoui siglo?

 KEMA Jehová kintekimaka itekipanojkauaj, nochipa kineki ma kichiuakaj nopa tekitl kej kinamiki (1 Cor. 14:33). Ya kineki nopa kuali tlamachtili ma momoyaua ipan nochi Tlaltipaktli (Mat. 24:14). Uan Jehová kikajtok Jesús ma kiyakana nopa tekitl. Jesús kichijtok nochi ma mochiua kej kinamiki. Ipan achtoui siglo, se keski apóstoles uan ueuejtlakamej tlen Jerusalén, kitlapejpeniyayaj tlen mochiuaskia uan kiniljuiyayaj toikniuaj tlen sejse tlanechikoli (Hech. 15:2; 16:4). Ipan sejse tlanechikoli, kintlapejpeniyayaj se keskij ueuejtlakamej katli kinyakanaskiaj toikniuaj uan kiniljuiskiaj tlen kichiuaskiaj (Hech. 14:23). Uan pampa toikniuaj kinneltokayayaj, “ipan sejse tlanechikoli toikniuaj nojua kuali tlaneltokatiajkej uan mojmostla momiakilijtiauiyayaj” (Hech. 16:5).

2. ¿Kenijkatsa Jehová pejki kinyakana itekipanojkauaj ipan xiuitl 1919?

² Jehová nojua kiyakana itlanechikol ipan ni tonali. Ipan xiuitl 1919, Jesús kintekimakak se keskij toikniuaj katli tlapejpenilmej ma kiyakanakaj tlajtolmoyaualistli uan ma kinmachtikaj toTeotsij itekipanojkauaj tlen Biblia kiijtoua (Luc.  12:42). a Uan Jehová kiteochiua nochi nopa tekitl tlen kichiuaj (Is. 60:22; 65:13, 14).

3, 4. 1) Xikijto kenijkatsa techpaleuia pampa tijchiuaj se keski tlamantli kej kinamiki. 2) ¿Tlake tikitasej ipan ni tlamachtili?

³ Tlaj amo techiljuiskiaj kenijkatsa kinamiki tijchiuasej se keski tlamantli, amo ueliskia tijchiuasej tlen Jesús technauatik (Mat. 28:19, 20). Se neskayotl, tlaj toikniuaj tlen totlanechikol amo techiljuiskiaj kanke titlajtolmoyauaskiaj, sejse tlen tojuantij titlajtolmoyauaskiaj kampa tijnekiskiaj uan uelis nochipa tiaskiaj kampa ipa uan amo sejkanok. Tlauel techpaleuia pampa toikniuaj techiljuiaj kenijkatsa tijchiuasej sejse tlamantli kej kinamiki.

⁴ Ipan ni tonali, Jesús kiyakana Jehová itlanechikol kej kinyakanki itokilijkauaj kema itstoya ipan Tlaltipaktli. Ipan ni tlamachtili tikitasej tlen Jesús kichijki uan kenijkatsa Jehová itlanechikol nojkia kichiua kej ya. Nojkia, tikitasej tlake moneki tijchiuasej uan kiampa tijnextisej timotemachiaj ipan Jehová itlanechikol.

JEHOVÁ ITLANECHIKOL KICHIUA KEJ JESÚS

5. ¿Kenijkatsa Jehová itlanechikol kichiua kej Jesús? (Juan 8:28).

⁵ Jesús kiyekok tlen itata tlake monekiyaya kichiuas uan kiijtos. Jehová itlanechikol nojkia kichiua kej Jesús (xijpoua Juan 8:28; 2 Tim. 3:16, 17). Yeka, miakpa techilnamikiliaj ma tijpouakaj Biblia uan ma tijchiuakaj tlen techmachtia. ¿Kenijkatsa techpaleuia kema kiampa tijchiuaj?

6. ¿Kenijkatsa techpaleuia kema timomachtiaj Biblia?

⁶ Kema timomachtiaj Biblia uan amatlajkuiloli tlen techmaka Jehová itlanechikol, tlauel techpaleuia. Kiampa ueli tikitaj tlen Biblia tlamachtia uan tlen Jehová itlanechikol techiljuia ma tijchiuakaj. Kema tikitaj tlen techiljuia mouika ika tlen kiijtoua Biblia, kichiua más ma timotemachikaj ipan Jehová itlanechikol (Rom. 12:2).

7. ¿Tlake tlamachtili kimoyajki Jesús uan kenijkatsa Jehová itlanechikol nojkia kiampa kichiua?

⁷ Jesús kimoyajki “nopa kuali tlamachtili tlen iTlanauatijkayo Dios” (Luc. 4:43, 44). Uan kinnauatik itokilijkauaj nojkia kiampa ma kichiuakaj (Luc. 9:1, 2; 10:8, 9). Ipan ni tonali nochi katli itstokej ipan Jehová itlanechikol, maske kampa ueli euaj o kipiaj se keski tekitl ipan tlanechikoli, kimoyauaj nopa kuali tlamachtili tlen iTlanauatijkayo Dios.

8. ¿Tlake tekitl tlen tlauel ipati techmakatokej?

⁸ Eli se ueyi tlateochiualistli pampa ueli tikinmachtiaj sekinok maseualmej tlen toTeotsij iTlanauatijkayo kichiuas, pampa amo nochi uelij kiampa kichiuaj. Kema Jesús itstoya ipan Tlaltipaktli amo kinkajki amo kuali ajakamej ma kiijtojtinemikaj tlen ya kichiuayaya (Luc. 4:41). Ipan ni tonali, tlaj se akajya kineki tlajtolmoyauas ininuaya Jehová itlajtoltemakauaj, achtoui moneki kichiuas se keski tlamantli. Tijnextiaj tlauel tijpatiitaj tijchiuasej ni tekitl, kema tlauel titlajtolmoyauaj. Sanse kej Jesús, tojuantij tijchiuaj kampeka nochipa titlajtolmoyauasej uan tikinmachtisej sekinok tlen melauak (Mat. 13:3, 23; 1 Cor. 3:6).

9. ¿Tlake kichijtok Jehová itlanechikol pampa kineki sekinok ma kimatikaj itoka toTeotsij?

⁹ Jesús kiniljuik sekinok toTeotsij itoka. Se tonali kema momaijtok, kiiljuik iTata: “Nikinnextilijtok motoka” (Juan 17:26). Jehová itlanechikol nojkia kichiua kej Jesús pampa kichiua nochi tlen moneki uan kiampa maseualmej uelis kimatisej itoka toTeotsij. Uan  Traducción del Nuevo Mundo tlauel tepaleuia pampa kitlajtolkueptokej nochi o san se keski libros ipan kipano 270 tlajtoli. Ipan ni Biblia sampa kitlalijtokej itoka toTeotsij kampa kinamiki. Ipan apéndices A4 uan A5 kiixtoma kenke sampa kitlalijkej itoka toTeotsij. Uan ipan apéndice C, tlen uala ipan Biblia de estudio, kiijtoua kenke ipan iTlajkuilol Dios ika Griego moneki nesis toTeotsij itoka se 237 imiakpa.

10. ¿Tlake kinextia tlen kipanok se siuatl tlen Myanmar?

¹⁰ Sanse kej Jesús, tijnekij nochi maseualmej ma kimatikaj toTeotsij itoka. Ipan Myanmar, se tosiuaikni kimachtik itoka toTeotsij, se siuatl katli kipixtoya 67 xiuitl. Nopa siuatl tlauel yolpajki kema kimatki, pejki choka uan kiiljuik: “Amo kema nijkaktoya toTeotsij itoka [ . . . ] tlen tinechmachtik tlauel ipati”. Tlen kipanok nopa siuatl kinextia kema se akajya kiyekoua itoka toTeotsij, tlauel kipaleuia.

NOCHIPA MA TIJNEXTIKAJ TIMOTEMACHIAJ IPAN JEHOVÁ ITLANECHIKOL

11. ¿Kenijkatsa ueuejtlakamej uelis kinextisej motemachiaj ipan toTeotsij itlanechikol? (Nojkia xikita tlaixkopinkayomej).

¹¹ Ueuejtlakamej kinextiaj motemachiaj ipan toTeotsij itlanechikol, kema kuali kipouaj uan kichiuaj tlen Jehová itlanechikol kiniljuia. Se neskayotl, Jehová itlanechikol kiniljuia kenijkatsa moneki mopanoltis tlamachtili, kenijkatsa moneki mochiuas tlamaijtoli ipan tlanechikoli uan kenijkatsa moneki kinmokuitlauisej toikniuaj. Kema ueuejtlakamej kichiuaj nochi tlen Jehová itlanechikol kiniljuia, toikniuaj kiita kenijkatsa Jehová kiniknelia uan kinmokuitlauia.

12. 1) ¿Kenke kinamiki ma tikinneltokakaj katli techyakanaj? (Hebreos 13:7, 17). 2) ¿Kenke moneki timosentlalisej san ipan nopa kuajkuali tlamantli tlen kinextiaj?

¹² Kema ueuejtlakamej techiljuisej kenijkatsa kinamiki tijchiuasej se tekitl, moneki tikinneltokasej uan tijchiuasej tlen techiljuiaj ika pakilistli. Kiampa tikinpaleuisej kuali ma kichiuakaj ininteki. Biblia kiijtoua moneki tikintlepanitasej uan tikinneltokasej katli techyakanaj (xijpoua Hebreos 13:7, 17). Kemantika uelis ouij tijmatisej pampa ueuejtlakamej elij tlajtlakolejkej. Pero moneki ma tikilnamikikaj tlaj san tikitaj kema mokuapolouaj, uajka tijchiuaskiaj tlen tokualankaitakauaj kinekij.¿Kenke kiampa tikijtouaj? Pampa tlaj amo kuali tikinitaj ueuejtlakamej, uelis kichiuas ayokmo ma timotemachikaj ipan toTeotsij itlanechikol uan tokualankaitakauaj ya nopa kinekij. Yeka, ¿tlake tlamantli techpaleuis amo ma tijneltokakaj nopa istlakatili tlen kiijtouaj tokualankaitakauaj?

NOCHIPA XIMOTEMACHI IPAN JEHOVÁ ITLANECHIKOL

13. ¿Kenijkatsa tokualankaitakauaj kinekij sekinok amo kuali ma kiitakaj Jehová itlanechikol?

¹³ Tokualankaitakauaj kinekij sekinok ma moiljuikaj Jehová itlanechikol kichiua tlen amo kuali. Biblia kiijtoua Jehová kineki itekipanojkauaj kuali ma monejnemiltikaj, kuali ma tlaneltokakaj uan ma kiueyichiuakaj kej kinamiki. Nojkia kiijtoua tlaj se akajya tlajtlakolchiua uan amo moyolkuepa, moneki kikixtisej tlen tlanechikoli (1 Cor. 5:11-13; 6:9, 10). Tojuantij tijchiuaj tlen Biblia kiijtoua, yeka tokualankaitakauaj kiijtouaj amo titeikneliaj uan timoiljuiaj tlauel topati.

14. ¿Ajkia kichiua ma momoyaua istlakatili tlen Jehová itlanechikol?

¹⁴ Ma tikilnamikikaj ajkia kichiua ma techkualankaitakaj. Satanás eli se istlakatiketl uan “nochi istlakatili peua ipan ya”, ya kichiua ma momoyaua istlakatili tlen Jehová itlanechikol (Juan 8:44; Gén. 3:1-5). Amo timosentlachiliaj kema kichiua se keski  maseualmej ma kimoyauakaj istlakatili, pampa kiampa kichijki ipan achtoui siglo.

15. ¿Tlake kichijkej katli tlayakanayayaj ipan religión tlen amo melauak pampa kinkualankaitayayaj Jesús uan itokilijkauaj?

¹⁵ Maske Jesús eliyaya iKone toTeotsij, amo kipiayaya tlajtlakoli uan kichiuayaya milagros, Satanás kichijki se keskij maseualmej ma kiistlakauikaj. Se neskayotl, katli tlayakanayayaj ipan religiones tlen amo melauak, kiniljuiyayaj maseualmej Jesús kinkixtiyaya amo kuali ajakamej pampa kipaleuiyaya “katli kinyakana amo kuali ajakamej” (Mar. 3:22). Teipa kema kitlajtolsenkajkej Jesús, katli tlayakanayayaj ipan religiones tlen amo melauak, kiijtojkej kiixpanotoya toTeotsij ika tlen kiijtok uan kichijkej maseualmej ma kiijtokaj monekiyaya ma kimiktikaj (Mat. 27:20). Teipa, kema Jesús itokilijkauaj pejkej tlajtolmoyauaj, ininkualankaitakauaj “kinajkomankej” maseualmej, kichijkej “ma kinkualankaitakaj” uan ma kintlatsakuiltikaj (Hech. 14:2, 19). La Atalaya diciembre 1, 1998, kiixtonki tlen kiijtoua Hechos 14:2 uan kiijtok judíos katli kinkualankaitayayaj Cristo itokilijkauaj amo kiselijkej tlen Jesús tlamachtiyaya uan “pejkej kimoyauaj istlakatili” pampa kinekiyayaj maseualmej tlen sekinok altepemej nojkia ma kinkualankaitakaj.

16. ¿Tlake moneki tikilnamikisej tlaj tijkakij sekinok kiijtouaj istlakatili tlen toTeotsij itlanechikol?

¹⁶ Satanás nochipa istlakati uan ipan ni tonali “kinkajkayaua nochi tlakamej tlen itstokej kampa ueli ipan tlaltipaktli” (Apoc. 12:9). Yeka, tlaj tijkakij sekinok tepouiliaj istlakatili tlen Jehová itlanechikol o tlen toikniuaj katli techyakanaj, ma tikilnamikikaj tlen kichijkej ikualankaitakauaj toTeotsij ika Jesús uan ika itokilijkauaj tlen achtoui siglo. Ipan ni tonali maseualmej kintlatsakuiltiaj  Jehová itlajtoltemakauaj uan kinistlakauiaj, kej Jesús ipa kiijtojtoya panoskia (Mat. 5:11, 12). Tokualankaitakauaj amo techkajkayauasej tlaj nochipa tikilnamikij ajkia kichiua ma kiijtokaj istlakatili uan tlaj amo tikintlakakiliaj. ¿Tlake uelis tijchiuasej?

17. ¿Tlake moneki tijchiuasej tlaj sekinok kiijtouaj istlakatili tlen Jehová itlanechikol? (2 Timoteo 1:13; nojkia xikita nopa recuadro “ ¿Tlake moneki tijchiuas tlaj mitstitlaniliaj tlen amo melauak?”).

¹⁷ Amo ma tikintlakakilikaj. Apóstol Pablo kiijtok tlake moneki tijchiuasej tlaj maseualmej kiijtouaj istlakatili tlen Jehová itlanechikol. Ipan 1 Timoteo 1:3, 4 kiijtok amo ma tijtlakakilikaj “cuentos”. Uan kiiljuik Timoteo: “Amo xijtlakakili uiui tlajtoli uan tlajtoli tlen axipati” (1 Tim. 4:7). Ma timoiljuikaj ipan ni tlamantli: Tlaj se okichpil kipantia se tlamantli ipan piso, uelis kitlananas uan kikamatlalis; pero se akajya katli tlalnamiktojka amo kema kichiuaskia nopa, pampa kimati ueliskia kipanos tlen amo kuali. Tojuantij nojkia amo tijtlakakiliaj tlen amo melauak uan san tijtlakakiliaj nopa “kuali tlajtoli” tlen melauak (xijpoua 2 Timoteo 1:13).

18. ¿Kenijkatsa uelis tijnextisej timotemachiaj ipan Jehová itlanechikol?

¹⁸ Ipan ni tlamachtili tikitstokej eyi tlamantli tlen kinextia Jehová itlanechikol kichiua kej Jesús, pero onka sekinok tlamantli. Kej timomachtijtias Biblia tikitas sekinok tlamantli. Nojua xikinpaleui toikniuaj más ma motemachikaj ipan Jehová itlanechikol. Nojua xijtekipano Jehová uan amo xijkaua yon se tlamantli ma mitsuejkatlali tlen itlanechikol (Sal. 37:28). Tlauel tijpatiitaj pampa ueli tijtekipanouaj Jehová ipan itlanechikol kampa timoikneliaj uan amo timotlauelkauaj. ¡Eli se ueyi tlateochiualistli!