1. Vandhu va Jehovha vainga vakarongeswa kudini mu zana ro kutanga?

 MUKUVO wese Jehovha waanogaja vandhu vake kuti vaite basa, iyena anovetera kuti variite ngo njira yakarongeka. (1 Vakorinte 14:33) Inga muezaniso, i cido ca Jehovha kuti masoko akanaka acumaehwe ku vandhu vese. (Mateu 24:14) Jehovha wakapa Jesu mutoro wokutugamirira basa iri. Cimwenizve, Jesu ari kuita zvese zvaanokwanisa kuti basa iri riithwe ngo njira yakarongeka. Mu zana rokutanga, ungano jakarongwa nokutizve vakuru vakagajwa kuti vape ndhungamiriro. (Mabasa o Vapostori 14:23) Ku Jerusarema mu zana rokutanga, cikwata cainga cakarongwa no vakuru no vapostori, ivona vakatema zvivaringo zvokuti ungano jizotevere. (Mabasa o Vapostori 15:2; 16:4) Inga muviyo wokuzwira kwavo, “ungano jaivangiswa rutendo hwajo, jecikura njiku no njiku.”—Mabasa o Vapostori 16:5.

2. Kutangira mu gore ra 1919, Jehovha ari kuitenyi kuti ape zvokuha zvo ku mujimu no ndhungamiriro ku vandhu vake?

² Nyamasi uno Jehovha ari kwenderera mberi ecironga vandhu vake. Kutangira mu gore ra 1919, Jesu ari kushandisa cikwata co vanarume vakazojwa kuti vape vateveri vake zvokuha zvo ku mujimu. a (Ruka 12:42) Zvakajeka kuti Jehovha ari kukomborera basa ro cikwata ici.—Isaia 60:22; 65:​13, 14.

3-4. (a) Tinobesereka kudini ngo kuva vandhu vakarongeka? (b) Ngozvapi zvatinozovona mu cijijo cino?

³ Kudari nokwainga kuti atizivi kurongwa aticaizokwanisa  kuita basa ratakagajwa ndi Jesu. (Mateu 28:​19, 20) Amborangariranyi basi kudari notainga ticina ndima, umwe nga umwe waizocumaera ku ndau kwaaida. Ndau jimweni jaizocumaehwa maningi. Makamborangarira ngo makomborero amweni atinawo ngo kuva vandhu vakarongeka?

⁴ Inga manera Jesu akaronga vateveri vake paainga ari pasi pano, nyamasi unovo ari kwenderera mberi ecironga vandhu va Mwari. Mu cijijo cino, ngatende tivone muezaniso wotakasiihwa ndi Jesu. Nokuvona kuti sangano redu riri kutevejeresa kudini muezaniso wondhowo, tiri kuda kuvonazve kuti tingakhombijisa kudini nderemejo no kuthemba sangano ra Jehovha.

SANGANO REDU RINOTEVEJERA MUEZANISO WA JESU

5. Ngoyapi njira imweni yatingaita kuti titevejere muezaniso wa Jesu? (Johani 8:28)

⁵ Jesu wakajijiswa ndi Baba wake zvaaidikana kuita no zvaaidikana kubhuya. Recitevejera muezaniso wa Jesu, sangano ra Jehovha rinoshandisa Bhaibheri kuitira kutijijisa zvakanaka no zvakashata no kupona mukuzwirana no zvinodakajisa Mwari. (Verenganyi Johani 8:28; 2 Timoti 3:​16, 17) Sangano rinoticeukija mukuvo wese kuti tiverenge Bhaibheri nokushandisa zvatinojijaro. Kuita zvondhozvo zvinotibeseresa kudini?

6. Ngoyapi njira imweni yatinobesereka ndiyona ngokujija Bhaibheri?

⁶ Itusu tinobesereka maningi patinojija Bhaibheri tecishandisa mabhuku edu. Inga muezaniso, tinoezanisa zvatinoverenga mu Bhaibheri no ndhungamiriro yatinonga taashira yecivha ku sangano. Cimwenizve, patinonga tavona kuti ndhungamiriro yataashiraya yakacijikira mu Matahwa, kuthemba kwedu sangano ra Jehovha kunovanga maningi.—Varoma 12:2.

7. Masoko api akacumaehwa ndi Jesu nokuti sangano ra Jehovha riri kutevejeresa kudini muezaniso wake?

⁷ Jesu waizivisa “masoko akanaka o Umambo hwa Mwari.” (Ruka 4:​43, 44) Kusiyapo zvondhozvo, Jesu wakananga kuti vateveri vake vaidikana kucumaera masoko akanaka o Umambo. (Ruka 9:​1, 2; 10:​8, 9) Nyamasi uno, itusu tinoteverera ndhungamiriro inovha ku sangano ra Jehovha, tinocumaera masoko akanaka o Umambo azvinenyi no kwapi kwatinogara kana no mutoro jatinonga tinajo.

8. Ngocapi cidakajiso catinaco?

⁸ I cidakajiso cikuru kucumaera masoko akanaka o Umambo hwa Mwari ku vandhu vamweni. Cidakajiso ici asipi co vandhu vese. Inga muezaniso, Jesu paainga ari pasi pano iyena aazivi kutendera kuti mujimu iji jakashata jiverekete ngo pamusoro pake. (Ruka 4:41) Na nyamasivo, mundhu acito abatana no Zvapupu zva Jehovha kuti acumaere masoko akanaka, iyena anodikana kuva no zvikwaniriso kuti aite basa rondhoro. Itusu tinokhombija kuti tinoreremeja basa rokucumaera ngokupa ucapupu paya pazvinodikana. Kudari inga ndi Jesu, cido cedu ngo cokusima mbeu yo Umambo mu mwoyo mo vandhu.—Mateu 13:​3, 23; 1 Vakorinte 3:6.

9. Sangano ra Jehovha rinoitisa kudini kuti zina ra Mwari rizivike?

⁹ Jesu wakajijisa vamweni zina ra Mwari. Pa mukumbiro waakaita kuna Baba wake, Jesu wakati: “Ndakavazivisa zina renyu.” (Johani 17:26) Recitevejera muezaniso wa Jesu, sangano ra Jehovha rinoita zvese zvarinokwanisa pakubesera vandhu kuti vazive ngo pamusoro po zina ra Mwari. Imwe njira yokuita izvi ngo yokushandisa Bhaibheri Sandujo yo Nyika Imbza yo Matahwa Akacena. Bhaibheri iri riri kuwanika rese ramutero mu ndumi jinokwana kuita 270. Apendise A4 no Apendise A5 o sandujo iyi anotipa masoko okuti ngenyi  nokutizve kuitisa kudini zina ra Mwari rakadihwa mu Bhaibheri. Apendise C, inowanika mu Bhaibheri Rokujija, inosanangura mathwangwe manganani okuti ngenyi zina ra Mwari rinowanika mu Matahwa o Cikristu o Cigiriki kunokwana kuita 237.

10. Tinojijenyi kuvha ku zvakanangwa ngo mwanakaji umweni anogara ku Myanmar?

¹⁰ Kudari inga ndi Jesu, tinoda kubesera vandhu vese vatinowana kuti vazive zina ra Mwari. Mwanakaji umweni ano makore anokwana kuita 67, anogara ku Myanmar, paakajija kuti zina ra Mwari ndi Jehovha iyena wakatanga kucema onanga kudari: “Inini ndainga ndicikarizivi zina ra Mwari mu upenyu hwangu hwese . . . Imwimwi mandijijisa ciro cinosisira maningi kupinda zvese.” Inga zvatazwari pa ciitiko ici, patinojijisa vandhu zina ra Mwari zvingacinja upenyu hwavo.

ENDERERANYI MBERI MECITHEMBA SANGANO RA JEHOVHA

11. Vakuru vanokhombijisa kudini kuti vanothemba sangano ra Jehovha? (Vonanyi foto.)

¹¹ Ngo njira yapi vakuru vangakhombija kuti vanothemba sangano ra Jehovha? Vakuru pavanoashira ndhungamiriro, vanonasa kuiverenga nokuita zvese zvavanokwanisa kuti vaishandise. Inga muezaniso, avaashiri basi ndhungamiriro kuitira kuziva manera avangaita mativi avo pamusongano nokuitira mukumbiro ungano, asi vanoashiravo ndhungamiriro yokuti vangatajisa kudini mavhuta a Kristu. Vakuru pavanotevejera ndhungamiriro javanoashira jecivha ku sangano, hama jinojizwa jecidiwa no kutajwa ndi Jehovha.

12. (a) Ngenyi tinodikana kushanda na vaya vanotungamirira pakati pedu? (Vahebheru 13:​7, 17) (b) Ngenyi tinodikana kubatikana pa mugariro jaushoni ja vaya vanotungamirira pakati pedu?

¹² Patinoashira ndhungamiriro yecivha ku vakuru, tinodikana kuva takanasiririka kuti tiitevere. Tikaita kudaro, zvinozova zvakareruka ku vakuru kuti vaite basa ravo nokutungamirira ungano. Bhaibheri rinotivangisa kuti itusu tizwire vaya vanotungamirira pakati pedu. (Verenganyi Vahebheru 13:​7, 17.) Asi mukuvo umweni izvi zvinganesa. Ngenyi? Ngokuti vanarume vanotungamirirari avazivi kukwana. Asi itusu tikabatikana pa zviro zvavanoposa, kusiyapo kubatikana pa mugariro javo jaushoni, kunasa kunanga, tinozova tecibesera vavengi. Ngo njira yapi? Vavengi vedu vanoda kuti itusu tikane-kane kuti Jehovha ari kushandisa sangano rake kuti atitungamirire. Kudari itusu tikagara tecibatikana ngozvinoposwa ngo hama jinotitungamirira, tinonga tecirangarira zvakashata ngo pamusoro po sangano redu nokutamazve kurithemba.

NGOZVAPI ZVATINGAITA KUTI TIVANGISE KUTHEMBA KWEDU NO KURAMBA MANYEPO ANONANGWA NGO VAVENGI VEDU?

13. Kuitisa kudini vavengi va Mwari vanoeja kuita kuti sangano rake rivoneke inga kuti rakashata?

¹³ Mucasiya kuti vamweni varembese kuthemba kwamunoita sangano ra Jehovha. Inga muezaniso, itusu tinojija Matahwa kuti Jehovha anovetera kuti vanamati vake vave vakacena ku divi ro kunyama, mu murangariro no ku mujimu. Iyena anonanga kuti mundhu akaita cishaishi otama kukhauya aavhiri kwenderera mberi naari mu ungano. (1 Vakorinte 5:​11-13; 6:​9, 10) Ngokuti itusu tinozwira mbhangiro iyi, vavengi vedu vanonanga kuti itusu atidi vandhu vecinanga kuti itusu tiri vandhu vacina pena, vanotonga vamweni no vacina rudo.

14. Ndiani mutongi wo manyepo anobhuiwa ngo pamusoro po sangano ra Jehovha?

¹⁴ Zwisisanyi kuti ndiyani ari kutihwisa. Sathana ndiyena ari kundha-ndhanisa masoko o kunyepa ngo pamusoro po sangano. Ndiyena ‘baba wo manyepo.’ (Johani 8:44; Genesi  3:​1-5) Atikani-kani kuti Sathana ndiyena ari kushandisa vandhu kuti vandha-ndhanise masoko o kunyepa ngo pamusoro po sangano. Ndizvona zvakaitikira Jesu no Makristu o kutanga.

15. Vatungamiriri vo zviara vakaitirenyi Jesu no vateveri vake?

¹⁵ Jesu Mwana wa Mwari wainga akakwana, iyena wakaita mushamaiso jakakura maningi, pikija zvakadaro, Sathana wakashandisa vandhu kuti vandha-ndhanise manyepo ngo pamusoro pake. Inga muezaniso, vatungamiriri vo zviara vaivhunja vandhu kuti Jesu waigogomera madhimoni ngo “zina ro mutongi wo madhimoni.” (Marko 3:22) Jesu paaitongwa, vatungamiriri vo zviara vakamushora vecituka Jehovha no kuvangisa vandhu kuti vakumbire kuti iyena aurawe. (Mateu 27:20) Perapo, vateveri va Jesu pavaicumaera masoko akanaka, vavengi vavo vacizivi kutenda “vakakukumijira vandhu vo majinja kuti vamukire hama jedu.” (Mabasa o Vapostori 14:​2, 19) Ngo pamusoro po Mabasa o Vapostori 14:​2, Murindiri wo 1 wa Dezembro wo 1998 wakadurujira kuti: “Vaya vaibesera Sathana vakaramba masoko aicumaehwa ngo Makristu nokutonanga zvakashata ngo pamusoro pawo nokuita kuti vandhu vamweni vatame kuvapurukira nokuvazonda.”

16. Tinodikana kuceukijenyi patinozwa masoko o kunyepa?

¹⁶ Sathana na nyamasi uno ari kwenderera mberi ecindha-ndhanisa masoko okunyepa. Iyena ari “kucengeja vandhu vese vanogara pasi pano.” (Apokaripsi 12:9) Kudari mukazwa masoko o kunyepa ngo pamusoro po sangano no hama jinotungamirira ceukijanyi vavengi va Mwari manera avakataja Jesu no vajiji vake. Inga Bhaibheri zvarinonanga, vavengi vari kuteverera vandhu va  Jehovha no kuvataja mu njira iciripi iyona. (Mateu 5:​11, 12) Itusu atizopurukiri manyepo kudari tikaziva kwaanovha nokutema zvivaringo ngokukasika. Ngozvapi zvatinodikana kutema?

17. Tinodikana kuitenyi kuti titame kupurukira masoko o kunyepa? (2 Timoti 1:13) (Vonanyi bhokiso rinoti: “ Ngozvapi Zvatingaita Patinozwa Masoko o Kunyepa?”)

¹⁷ Mucapurukira masoko o kunyepa. Mupostori Pauro wakapa ndhungamiriro yakajeka ngo pamusoro po zvatinodikana kuita kudari tikazwa masoko okunyepa. Iyena wakavhunja Timoti kuti “avhunje vamweni kuti . . . avadikani kupurutana ngano jokunyepa.” (1 Timoti 1:​3, 4; 4:7) Zvakajeka kuti mwana wavha kubahwa wari, angaboja ciro pasi odira pamuromo, asi mundhu wakura anoziva ngozi iripo, aacaizoita kudaro. Itusu tinoramba kupurukira masoko akashata ngokuti tinoziva kuti ndiani ari kumaitisa. Kusiyapo zvondhozvo, “masoko aya akacena” ngookadi.—Verenganyi 2 Timoti 1:13.

18. Tingakhombijisa kudini kuti tinothemba sangano ra Jehovha?

¹⁸ Mu cijijo cino, takwanisa kuvona njira ndhatu jinoshandiswa ngo sangano kuti ritevejere muezaniso wa Jesu. Pamunonga mecijija Bhaibheri, sotesesanyi njira jimweni jamungaita kuti mutevejere muezaniso wa Jesu. Beseranyi vamweni mu ungano mwenyu kuti vajizwe vecireremejwa no kuthemba sangano ra Jehovha. Endereranyi mberi mecikhombija nderemejo pakushadira kwenyu Jehovha ngo kubatana pamwepo no sangano rake raanoshandisa kuti akwanirise kuda kwake. (Nduyo 37:28) Tese tinodikana kuva tecireremeja cidakajiso cikuru catinaco cokushanda pamwepo inga mbhuri ino rudo ya Jehovha.