1. Ti mwawiihai achu a Yehova yaaryaaya ooreheryeya mu nsana noopacerya?

 Ilukuluku soothene Yehova onaavaheiye achu awe murici, owo onnawehererya wi awo epake mmukhalelo wooreheryeya. (1 Ako. 14:33) Ntoko yootakiherya, yookhwela ya Muluku tiyawi michaka yaphaama ilaleiwe veelaponi yoothene ya vathi. (Mat. 24:14) Yehova omvaha Yesu murici wa ohoolela muteko yoola. Yesu onnoona wi muteko owo onnapakiwa mmukhalelo wooreheryeya. Mu nsana noopacerya, vaavaa miloko saatikitheryiwaaya mmapuro oohiyanahiyana, atokweene yaathanliwa wi evahereryeke ohoolela. (Saw. 14:23) O Yerusalemu, nikhuuru nenlo naaphitaanyerya arummwa ni atokweene, yaahipaka soolakelela saphaama seiyo saaphwanela ochariwa mmiloko soothene. (Saw. 15:2; 16:4) Ntoko yookhumelela ya wiiwelela ohoolela yoowo yaakhelaaya, “miloko saanalipihiwa mu nroromelo nave nihiku nnihiku saanaaceereryeya.”—Saw. 16:5.

2. Tiheeni Yehova onapakeiye ovinyerya mu 1919 wi avahererye ohoolela ni yoolya yoomunepani achu awe?

² Yehova onnatitelela waarehererya achu awe ophiyerya olelo. Ovinyerya mu 1919, Yesu onnapharihela nikhuuru nikhaani na alopwana oothanliwa wi erehererye muteko woolaleerya ni ovahererye yoolya yoomunepani wa oomuchara awe. a (Luka 12:42) Yehova onnareeliha chiryene muteko wa nikhuuru nenla.—Yes. 60:22; 65:13, 14.

3-4. (1) Mphwanaphwanihe mukhalelo nnaphuraahu moorweela wa okhala achu ooreheryeya. (2) Tiheeni nnahaalaahu ohuserya mmwaha yoola?

³ Waakhanle wi hinreheryen’ye, hinaahaala ophwanelela opaka muteko yoowo Yesu onivaherenryeiye wi nipake. (Mat. 28:19, 20) Ntoko yootakiherya, mwaanyiherye waakhanle wi hasikaiwe ikulucu, mmoha ti mmoha aanwerya olaleerya weiwo onachuneiyewo. Ikulucu ikina inanwerya olampwa mwawuuluulela ni alaleeryi  oohiyanahiyana, eniiha makupa makina a ikulucu ehilaleeryiwe. Apwanne munnuupuwela mikhalelo mikina nnahaalaahu ophura vaavaa nnakhalaahu ooreheryeya?

⁴ Hiiha ntoko Yesu aareherenryeiye oomuchara awe vaavaa aareiye veelaponi ya vathi, owo onnatitelela waarehererya achu a Muluku mmahiku ahu yaala. Mmwaha yoola, nnahaala othokororya yootakiherya yeeyo Yesu ovanheiye ni mukhalelo marehereryo awe anacharihaaya yootakiherya yeela. Nave tho nnahaala othokororya mukhalelo nnahaalaahu wooniherya wi ninnathamalela marehereryo a Yehova.

MAREHERERYO AHU ANNACHARIHA YOOTAKIHERYA YA YESU

5. Mukhalelo taani mmoha wa ochariha yootakiherya ya Yesu? (Yohani 8:28)

⁵ Yesu ahusenrye ni atiithi awe echu ya weera ni yooloca. Marehereryo a Yehova, annachariha yootakiherya ya Yesu, epharihelaka Masu a Muluku wi enikhaviherye osuwela yeeyo eri yaphaama ni yoonanara, ni onivaha ohoolela mookumini mwahu. (Mwaalakhanye Yohani 8:28; 2 Tim. 3:16, 17) Wiiliwiili marehereryo annanuupuserya omwaalakhanya Piipiliya ni opharihela yeeyo nihusenryaahu. Nnaphura hai vaavaa nnacharihaahu ohoolela yoola?

6. Tuuvi ori mukhalelo mmoha woochuneya onaneeriha ophura mu yoohuserya ya Piipiliya?

⁶ Hiyaano ninnaphura vancipale vaavaa nnamuhuseryaaryaahu Piipiliya nipharihelaka soolaleeryiwa sahu. Ntoko yootakiherya, nnanwerya olikanyiha yeeyo Piipiliya onaloceiye ni ohoolela yoowo nnaakhelaahu mmarehereryo. Vaavaa nnoonaahu wi ohoolela yoowo nnaakhelaahu onathipeleya mu Soorempwa, ororomela wahu marehereryo a Yehova onannuwa.—Aro. 12:2.

7. Muchaka taani Yesu aalaleenryeiye nave ti mwawiihai marehereryo a Yehova anacharihaaya yootakiherya awe?

⁷ Yesu aahilaleerya “michaka saphaama sa Omwene wa Muluku.” (Luka 4:43, 44) Ohiya yeeyoru, Yesu aahaaleela oomuchara awe wi elaleerye vooloca sa Omwene. (Luka 9:1, 2; 10:8, 9) Mmahiku ahu, oothene yaale ari mmarehereryo a Yehova annalaleerya michaka saphaama sa Omwene moohipwacha nipuro anakhalaaya naari murici aryaayano mmarehereryo.

8. Ekari taani nryaahuno?

⁸ Ekari etokweene wa hiyaano waaleela akina vooloca sa Omwene wa Muluku! Tahi wi achu oothene aakhalano ekari yeela. Ntoko yootakiherya, vaavaa Yesu aaryeiye veelaponi yavathi, owo haawemerenrye wi minepa soonanara seerele onamoona ntakhara yoowo. (Luka 4:41) Mmahiku ahu yaala tho, muchu ahaakumve opaka makupa mmuteko woolaleerya ni achu a Yehova, owo onachuneya toko ophwanelela ntakhara murici yoowo. Nave hiyaano ninnooniherya othamalela wahu ekari yeela ya olaleerya moorweela wa ovaha onamoona ophiyerya vaavaa nnaweryelaahuvo. Hiiha ntoko Yesu yoolakelela ahu ori waala ni ohelela mmiso wa eparipari ya Omwene mmurimani mwa achu.—Mat. 13:3, 23; 1 Ako. 3:6.

9. Ti mwawiihai marehereryo a Yehova anasuwelihaaya nsina na Muluku?

⁹ Yesu aaheeriha wi nsina na Muluku nsuweliwe. Mu nivekelo wa Atiithi awe, Yesu aahi: “Kohaasuweliha yaawo nsina nanyu.” (Yoh. 17:26) Mwawiiwanana ni yootakiherya ya Yesu, marehereryo a Yehova annapaka owetha waya wi yaakhaviherye achu akina osuwela nsina na Muluku. Mukhalelo mmoha marehereryo aneerayano yeeyo ori moorweela wa Otaphuleliwa wa Piipiliya a Soorempwa Saweela, Piipiliya ene yoola nookookiheryiwamo nsina na Muluku mmapuro yaawo naaphwanyeyaayamo woopaceryani mu elocelo yeeyo aarepeliwe Piipiliya. Otaphuleliwa wa Piipiliya yoola vano onnaphwanyeya anteero naari makupa aya opwaha ilocelo 270. Wakhala wi moomvarerya Apentisi A4 ni A5 a Piipiliya yoola, munahaala ophwanya sooleeliherya vooloca sa okookiheryiwa wa nsina na Muluku Mpiipiliyani. Apentisi C yoowo onaphwanyeya  mu Piipiliya Oomuhuserya, onnavahererya sawooniherya sincipale vooloca sa ntakhara heeni nsina na Muluku nnaphwanelaaya ophwanyeya mu Soorepa sa Ekriki Seekristu ikwaha 237.

10. Tiheeni nnahuseryaahu ni yeeyo muthiyana onakhala o Miyanmar olonceiye?

¹⁰ Hiiha ntoko Yesu, nnachuna waakhaviherya achu ancipale wakhala wooweryeya osuwela nsina na Muluku. Vaavaa muthiyana mmoha o Miyanmar yoowo aarino iyaakha 67, aahusereiye wi nsina na Muluku ti Yehova aahipacerya wunla, nave owo ooloca: “Ela ekwaha aka yoopacerya mookumini mwaka wiiwa wi nsina na Muluku ti Yehova. . . . Nyuwaano mookihusiha echu yoochuneyaxa yeeyo kaaphwanelaaaka ohuserya.” Ntoko yaweereya yeela enooniheryaaya, vaavaa achu anahuseryaaya nsina na Muluku, eyo enanwerya otoroka ikumi saya.

MUTITELELE WOONIHERYA WI MUNNAROROMELA MAREHERERYO

11. Ti mwawiihai atokweene anahalaaya wooniherya ororomela marehereryo a Yehova? (Moone tho eruku.)

¹¹ Tuuvi ori mukhalelo mmoha wi atokweene a mmulokoni yooniherye wi annaroromela marehereryo a Muluku? Vaavaa anaakhelaaya ohoolela, atokweene anaphwanela waalakhanya moopwacha nave voocharela epharihela muteko mmukhalelo waphaama wakhala wooweryeya. Ntoko yootakiherya, awo annaakhela ohoolela ohiya pahiru mmukhalelo wa operekha miyaha mmithukumano naari mmukhalelo wa opaka mavekelo mmulokoni, nyenya tho vooloca sa mukhalelo wa okhapelela ipucepuche sa Kristu. Vaavaa atokweene a mmulokoni anacharihaaya malakiheryo yaawo anaakhelaaya mmarehereryo, anna anniisoona okhala oosiveliwa ni ookhapeleliwa phaama ni Yehova.

12. (1) Ntakhara heeni nnaphwanelaahu owiiwelelaka yaale anahoolela? (Ahepri 13:7, 17) (2) Ntakhara heeni nnaphwanelaahu otikitheryeyaka mmikhalelo saphaama sa yaale anahoolela?

¹² Vaavaa nnaakhelaahu ohoolela wa anna ari atokweene, nnaphwanela ocharihaka mmukhalelo waphaama. Mwa weerano yeela, nnahaala okhweiha muteko wa yaale anahoolela mmulokoni. Piipiliya onnanleela wi nnaphwanela owiiwelela yaale anahoolela. (Mwaalakhanye Ahepri 13:7, 17.) Ikwaha ikina onanwerya okhala woovila. Ntakhara heeni? Nthowa nawi alopwana yaala toohiphaameya. Wakhala wi nnatikitheryeya mu soohesa saya ohiya mmikhalelo saya saphaama, mweeparipari nni naakhaviheryeke amwiicani ahu. Mmukhalelo taani? Amwiicani ahu annachuna oneeriha okhwaaka minikwa waakhanle wi Muluku onnapharihela marehereryo awe wi enihoolele, mwawiihiiha, wakhala wi ninnuupuwela mooheseya vooloca sa atokweene, nnanwerya opacerya wuupuwelaka mooheseya vooloca sa marehereryo ni oyeleela ororomela wahu yaawo. Tiheeni nnaphwanelaahu weera wi nisuwele ni okhooca sawootha sa amwiicani ahu?

MUHEEMERERYE WI AKINA EWEERIHEENI OYELEELA OROROMELA MAREHERERYO A YEHOVA

13. Ti mwawiihai amwiicani a Muluku yeerenryaaya onanariha marehereryo?

¹³ Amwiicani a Muluku ananwerya weererya weeriha wi ichu saphaama sa marehereryo a Yehova ikhaleke ntoko wi ti soonanara. Ntoko yootakiherya, noohuserya orweela mu Soorempwa wi Yehova onaweherya wi alapeli awe ekhale aweela omwiilini, mmeecelo ni omunepani. Owo ooloca wi muchu vyakala onahaala otitelela opaka ichu soonanara nave ahinachuna otoroka muupuwelo awe, hanaphwanela otitelela okhala mmulokoni. (1 Ako. 5:11-13; 6:9, 10) Ninniiwelela nlamulo nenla na Mpiipiliya. Nto woona wi ninniiwelela nlamulo nenla, amwiicani ahu analoca wi hannaasivela achu, ninnaathoriha yaawo nave wi hannamutumerya muchu ori oothene onapaka yoonanara.

14. Taani ori ehime ya miyaha sawootha vooloca sa marehereryo a Yehova?

¹⁴ Mweererye wiiwexexa taani chiryene onanihiphela.  Satana Musaserya, tonamwaramwaxa sawootha vooloca sa marehereryo a Yehova. Nave owo “tiithi a sawootha.” (Yoh. 8:44; Map. 3:1-5) Mwawiihiiha, tahi yootikhiniha wi Satana onamwaapharihela achu akina wi emwaramwaxe miyaha sawootha vooloca sa marehereryo a Yehova. Ti yeeyo yeeren’ye ni Yesu vamoha ni Akristu a mu nsana noopacerya.

15. Tiheeni ahooleli a malapelo yeenraaya wa Yesu ni oomuchara awe?

¹⁵ Naamwi Mwaana a Muluku, Yesu, aari oophaameya nave aapanke sootikhiniha sincipale, Satana aahaapharihela achu akina wi emwaramwaxe sawootha sincipale vooloca sa yoowo. Ntoko yootakiherya, ahoololeli a malapelo yaaloca wa achu wi Yesu iikara masololo “nnikhaviheryo na mutokweene a masololo.” (Mar. 3:22) Vaavaa Yesu aathorihiweiye, ahooleli a malapelo yaahimootherya wi aahimuruwana Yehova nave yaaheererya waalekecha achu wi eveke wiiphiwa wawe. (Mat. 27:20) Voocharela, vaavaa oohuserya a Yesu yaalaleeryaaya michaka saphaama, amwiicani aya “yaahiweeriha achu” owiikaraka Akristu yaale. (Saw. 14:2, 19) Atharihaka yoorepa ya Saweeriwa ti Arummwa 14:2 Mulipeleli a 1 a Tesempru a 1998 ooloca wi: “Yaale yaapaka makupa a Satana yaanakhooca michaka seiho Akristu yalaleeryaaya nave yaanaloca ichu soonanara vooloca sa yaawo wi eweerihe achu ohaawiriyana ni owiica yaawo.”

16. Tiheeni nnaphwanelaahu wuupuwela wakhala wi nohiiwa miyaha sawootha?

¹⁶ Satana tahi wi pahiru oonthe mu nsana noopacerya. Ophiyerya olelo, owo ‘onnawoka elapo yoothene yavathi.’ (Wup. 12:9) Wakhala wi mohiiwa michaka soonanara vooloca sa marehereryo naari anna yaawo anahoolela, muupuwele mukhalelo amwiicani a Muluku yaamukhalinhaaya Yesu ni oomuchara awe a mu nsana noopacerya. Olelo, achu a Yehova annahoolela wiikariwa ni oruwaniwa hiiha ntoko Piipiliya aalohenryeiye. (Mat. 5:11, 12) Hiyaano  hineemererya sawootha wakhala wi nohiiwexexa taani onahoolela sawootha seiho nave tho napaka yeeyo eri yoochuneya wi niikhapelele mwawaakuveya. Tiheeni nnaphwanelaahu weera wi niikhapelele?

17. Tiheeni nnaphwanelaahu weera wi nikhooce miyaha sawootha? (2 Timotiyu 1:13) (Moone tho ekaaxa “ Tiheeni Munaphwanelaanyu Weera Wakhala wi Mohiiwa Miyaha Sawootha?”)

¹⁷ Mukhooce miyaha sawootha. Murummwa Paulo ooloca mookwakwaleya yeeyo nnaphwanelaahu weera wakhala wi nohiiwa miyaha sawootha. Owo aahimuleela Timotiyu wi ‘aalopole achu akina wi . . . ehiwiryiyaneke miyaha sawootha’ nave ‘akhooce miyaha satheru.’ (1 Tim. 1:3, 4; 4:7) Eparipari wi mwaana mukhaani onanwerya ococa echu vachayani nave akerihe mwaano mwawe, nyenya muchu mutokweene yoowo onasuwela yaawoopiha ene harwa eerano yeeyo. Ninnakhooca miyaha sawootha nthowa nawi ninnamusuwela phaameene yoowo onahoolela sawootha. Hiyaano pahiru nnawiriyana ‘masu a mphurelo’ eeparipari.—Mwaalakhanye 2 Timotiyu 1:13.

18. Nni nooniherye hai wi ninnaroromela marehereryo a Yehova?

¹⁸ Mmwaha yoola, noonne pahiru mikhalelo miraru sa mukhalelo marehereryo a Yehova anamutakiheryaaya Yesu. Vaavaa nyuwaano munamuhuseryaanyu Piipiliya, mweererye wiiwexexa mikhalelo mikina mmukhalelo hiyaano nnacharihaahu yootakiherya ya Yesu. Mwaakhaviherye achu akina mmuloko anyu waaceererya ororomela waya marehereryo. Nave mutitelele ororomela ni omurumeela Yehova moomalela, moorweela wa olapa vamoha ni marehereryo yaawo owo onaphariheleiye wi apake yookhwela awe. (Sal. 37:28) Ntitelele oothene ahu ovaha esisapo ekari etokweene nryaahuno ya olapa vamoha ni achu oosivela ni oororomeleya a Yehova.