1. Abaheereza ba Yehova ab’ekyasha ky’okubanza bakaba batebeekanisiibwe bata?

 YEHOVA ku arikuha abaheereza be obujunaanizibwa, naaba naayenda ngu babuhikiirize omu buteeka. (1 Kor. 14:33) Nk’eky’okureeberaho, naayenda ngu amakuru marungi gaabuurirwe omu nsi yoona. (Mat. 24:14) Yehova akaha Yesu obujunaanizibwa bw’okwebembera omurimo ogwo. Kandi naahamya ngu gwakorwa omu buteeka. Omu kyasha ky’okubanza, hakatandikwaho ebibiina omu myanya etari emwe, kandi abareeberezi bakatooranwa kuha obuhabuzi, n’okubyebembera. (Byak. 14:23) Akakiiko k’abareeberezi omuri Yerusaalemu kakaba kariho entumwa, n’abakuru abaabaire nibacwamu ebi ebibiina byona biine kukuratira. (Byak. 15:2; 16:4) Ab’eishe-emwe ku baabaire boorobera obuhabuzi obu baaheebwa, ebibiina bikaba ‘bigumibwa omu kwikiriza, abantu baayongyera kukanya obutoosha.’—Byak. 16:5.

2. Kuruga 1919, Yehova atwire naayebembera ata abaheereza be, kandi akabaha n’eby’okurya by’omwoyo?

² Na hati Yehova naagumizamu kutebeekanisa abantu be. Kuruga 1919, Yesu atwire naakoresa guruupu nkye y’abashaija entoore, kutebeekanisa omurimo gw’okubuurira n’okuha abakuratsi be eby’okurya by’omwoyo. a (Luk. 12:42) Kandi nikireebwa butunu ngu Yehova naabaha emigisha omu bi barikukora.—Isa. 60:22; 65:​13, 14.

3-4. (a) Ha eky’okureeberaho ekirikworeka oku turikugasirwa ahabw’okugira ngu tutebeekanisiibwe gye. (b) Nituza kushwijuma ki omu kicweka eki?

 ³ Ku ogire ngu titutebeekanisiibwe gye, titwakubaasize kuhikiiriza omurimo ogu Yesu yaatuhaire. (Mat. 28:​19, 20) Nk’eky’okureeberaho, kuri noogira ngu tituhairwe bicweka by’okubuuriramu, buri omwe akaabaire naabuurira ahu arikwenda. Ebicweka ebimwe bikaabuurirwe emirundi mingi ababuurizi batari bamwe, kandi ebindi biburwa kubuurirwa na kakye. Noobaasa kuteekateeka aha miringo endiijo oku turikugasirwa ahabw’okugira ngu tutebeekanisiibwe gye?

⁴ Ebi Yesu yaakozire ari omu nsi nibituhwera kwetegyereza oku arikugumizamu naatutebeekanisa. Omu kicweka eki, nituza kushwijuma eky’okureeberaho kya Yesu, n’oku ekibiina kyaitu kirikumutooreza. Nituza n’okureeba oku turikubaasa kworeka ngu nitwesiga ekibiina kya Yehova.

EKIBIINA KYAITU NIKIKURATIRA EKY’OKUREEBERAHO KYA YESU

5. Ni muringo ki gumwe oku turikubaasa kukuratira eky’okureeberaho kya Yesu? (Yohaana 8:28)

⁵ Yesu akeegyera ahari Ishe ow’omu iguru ebi yaakozire n’ebi yaagambire. Ekibiina kya Yehova nikikuratira eky’okureeberaho kya Yesu, nikyegamiza enyegyesa zaakyo n’obuhabuzi oburikukwata aha micwe aha Kigambo kya Ruhanga. (Shoma Yohaana 8:28; 2 Tim. 3:​16, 17) Nitukira kwijukibwa kushoma Baibuli, n’okugyendera aha bi twashoma. Nitugasirwa tuta twakuratira obuhabuzi obwo?

6. Ni muringo ki gumwe oku turikugasirwa twayeyegyesa Baibuli?

⁶ Nitugasirwa munonga twayeyegyesa Baibuli turikukoresa ebitabo by’ekibiina. Nk’eky’okureeberaho, nitubaasa kugyeragyeranisa ebi turikwega omu Baibuli n’obuhabuzi obu turikuheebwa ekibiina kya Yehova. Twareeba obuhabuzi obu turikuheebwa burikwegamira aha Byahandiikirwe, nitwongyera kwesiga ekibiina kya Yehova.—Rom. 12:2.

7. Yesu akabuurira aha butumwa ki, kandi ekibiina kya Yehova nikikuratira kita eky’okureeberaho kye?

⁷ Yesu akabuurira amakuru marungi ‘g’Obukama bwa Ruhanga.’ (Luk. 4:​43, 44) Kandi, akagambira abeegi be kubuurira aha Bukama. (Luk. 9:​1, 2; 10:​8, 9) Obunaku obu, boona abari omu kibiina kya Yehova nibabuurira obutumwa bw’Obukama hoona ahu barikutuura, n’obu barikuba baine bujunaanizibwa bwingi.

8. Tuhairwe mugisha ki?

⁸ Ka n’omugisha gw’omuhendo kwejumba omu kugambira abandi amazima agarikukwata aha Bukama bwa Ruhanga! Tiburi omwe ngu naaheebwa omugisha ogwo. Nk’eky’okureeberaho, obu Yesu yaabaire ari omu nsi taraikiriize emyoyo mibi kugamba ebirikumukwataho. (Luk. 4:41) Obunaku obu, omuntu atakeejumbire omu buheereza n’Abajurizi ba Yehova aine kubanza yaahikiiriza ebirikwetengyesa. Nitworeka ngu nitusiima omugisha ogwo, turikukoresa buri mugisha gwona kubuurira. Nka Yesu, ekigyendererwa kyaitu n’okubiba, kandi tukaitirira embibo z’amazima omu mitima y’abantu.—Mat. 13:​3, 23; 1 Kor. 3:6.

9. Ekibiina nikimanyisa kita abandi eiziina rya Ruhanga?

⁹ Yesu akamanyisa abandi eiziina rya Ruhanga. Obu Yesu yaabaire naashaba Ishe akagira ati: “Nkabamanyisa eiziina ryawe.” (Yoh.17:26) Nka Yesu, ekibiina kya Yehova nikikora kyona ekirikubaasika kumanyisa abandi eiziina rya Ruhanga. Baibuli eya New World Translation of the Holy Scriptures ekozire kihango omu kuhikiiriza ekigyendererwa ekyo erikugarura eiziina rya Ruhanga  omu mwanya gwaryo oguhikire. Envunuura ya Baibuli egi eriho yoona nari omu bicweka omu ndimi ezirikurenga 270. Waashoma ebiri omu Appendixes A4 na A5 omu Baibuli egi, noija kwetegyereza omu bwijwire ebikwatiraine n’okugarura eiziina rya Ruhanga omu Baibuli. Appendix C, erikushangwa omu Study Bible, erimu obuhame obundi bwingi oburikworeka ngu eiziina rya Ruhanga riine kuba riri omu Byahandiikirwe eby’Orugriika emirundi 237.

10. Nooyegyera ki aha bigambo by’omukazi orikutuura omuri Myanmar?

¹⁰ Nka Yesu, nitwenda kuhwera abantu baingi nk’oku kirikubaasika kumanya eiziina rya Ruhanga. Omukazi omwe omuri Myanmar oine emyaka 67 ku yaamanyire ngu Ruhanga aine eiziina akarira yaagira ati: “Ogu n’omurundi gwangye gw’okubanza kuhurira ngu eiziina rya Ruhanga ni Yehova. . . . Mwanyegyesa ekintu kikuru munonga.” Nk’oku eky’okureeberaho eki kirikworeka, abantu ab’emitima eshemeire ku barikwega eiziina rya Ruhanga nibakwatwaho munonga.

GUMIZAMU ORIKWOREKA NGU NOOYESIGA EKIBIINA

11. Abareeberezi nibooreka bata ngu nibeesiga ekibiina kya Yehova? (Reeba n’ekishushani.)

¹¹ Ni mu muringo ki gumwe oku abareeberezi abarikubaasa kworeka ngu nibeesiga ekibiina? Baaheebwa obuhabuzi nibaba baine kubushoma n’obwegyendesereza, kandi bakateeraho kubugyenderaho. Nk’eky’okureeberaho, nibaheebwa obuhabuzi oburikukwata aha ku baine kuha ebicweka by’enteerane, kushaba omu kibiina, n’oku baine kureeberera entaama za Kristo. Abareeberezi baakuratira obuhabuzi bw’ekibiina nibahwera abari ahansi y’obushoboorozi bwabo kuhurira nibakundwa, kandi baine oburinzi.

12. (a) Ahabw’enki twine kukwatanisa n’abarikureeberera ekibiina? (Abaheburaayo 13:​7, 17) (b) Ahabw’enki twine kuta omutima aha mitwarize mirungi y’abarikutureeberera omu kibiina?

¹² Abareeberezi baatuha obuhabuzi twine kubugyenderaho twekundiire. Twakora tutyo, nitureetera abarikutureeberera kworoberwa kuhikiiriza obujunaanizibwa bwabo. Baibuli neetuhiga kworobera abareeberezi. (Shoma Abaheburaayo 13:​7, 17.) Obumwe nikibaasa kuguma kukikora. Ahabw’enki? Ahabw’okuba abashaija abo tibahikiriire. Kwonka, twata omutima aha mitwarize yaabo mibi omu mwanya gw’okuguta aha mirungi, nituba nitushagika abazigu baitu. Mu muringo ki? Nitwija kubura kwesiga ekibiina kya Ruhanga, kandi ekyo nikyo abazigu baitu bamaririire kukora. Nitubaasa kukora ki kumanya pokopoko z’abazigu baitu, kandi tukazanga?

OTAIKIRIZA ABANDI KUTUUBYA OBWESIGYE BWAWE OMU KIBIINA

13. Abazigu ba Ruhanga nibateeraho bata kushiisha ekibiina kye?

¹³ Abazigu ba Ruhanga nibateeraho kureetera ebirungi ebi ekibiina kirikukora kureebeka nka bibi. Nk’eky’okureeberaho, twegire omu Byahandiikirwe ngu Yehova naayenda abarikumuramya boona babe abeecumi omu by’omubiri, eby’emicwe, n’omu by’omwoyo. Kandi naagira ngu weena orikwejumba omu bikorwa ebitashemeire, akanga kweteisa abingwe omu kibiina. (1 Kor. 5:​11-13; 6:​9, 10) Nituhamira aha ki Ebyahandiikirwe birikugamba aha nshonga egyo. Kwonka abarikutuhakanisa nibakoresa ekyo kutwomesereza, barikugira ngu titurikwemera abatarikutwaza nkaitwe, nitucwera abandi orubanja, kandi ngu titwine rukundo.

14. N’oha obukomooko bw’ebitebyo bitahikire ebirikukwata aha kibiina kya Yehova?

 ¹⁴ Manya obukomooko bw’okutaahirirwa. Sitaane Omuregi niwe ari enyima y’ebitebyo byona ebitahikire. Niwe “ishe w’ebishuba.” (Yoh. 8:44; Kut. 3:​1-5) N’ahabw’ekyo, twine kumanya ngu Sitaane naija kukoresa abarikumushagika kujanjaaza ebitebyo ebitahikire ebirikukwata aha kibiina kya Yehova. Eki kikareebwa butunu omu kyasha ky’okubanza.

15. Abeebembezi b’ediini bakatwariza bata Yesu n’abakuratsi be?

¹⁵ Omu kyasha ky’okubanza, Sitaane akakoresa abashagiki be kujanjaaza ebishuba ebirikukwata aha Mwana wa Ruhanga owaabaire naakora eby’okutangaaza. Nk’eky’okureeberaho, abeebembezi b’ediini bakagambira abantu ngu Yesu akaba naakoresa amaani ga ‘mukama wa baadaimoni’ kubinga baadaimoni. (Mak. 3:22) Obu Yesu yaabaire naahozesibwa, abeebembezi b’ediini bakamutaho orubanja rw’okurogota, kandi baareetera omutwe gw’abantu kugira ngu aitwe. (Mat. 27:20) Bwanyima, abakuratsi ba Yesu ku baabaire nibabuurira amakuru marungi, abahakanisa bakagyemesereza abantu kuhiiganisa Abakristaayo abo. (Byak.14:​2, 19) Omunaara gw’Omurinzi ogwa Desemba 1, 1998, gukashoboorora Ebyakozirwe 14:2 gurikugira guti: “Abahakanisa Abayudaaya tibaraagire obutumwa kyonka, kureka bakataho ehururu y’okureetera Abanyamahanga kwanga Abakristaayo.”

16. Twine kwijuka ki twahurira ebitebyo ebitahikire?

¹⁶ N’obunaku, Sitaane n’omubeihi. Kandi, ‘naagobeza ensi yoona.’ (Kush. 12:9) Waahurira ebitahikire ebirikukwata aha kibiina nari ab’eishe-emwe abarikutureeberera, ijuka oku abazigu ba Ruhanga baatwariize  Yesu n’abakuratsi be ab’ekyasha ky’okubanza. Obunaku obu, Abaheereza ba Yehova nibahiiganisibwa, kandi babeihererwa nk’oku kyagambirwe omu Baibuli. (Mat. 5:​11, 12) Tituraahabisibwe ebitebyo ebitahikire twamanya obukomooko bwabyo, kandi tukagira eki twakora ahonaaho. Twine kukora ki kwerinda?

17. Nitubaasa kwetantara kutahabisibwa ebitebyo bitahikire? (2 Timoseo 1:13) (Reeba n’akabokusi “ Oku Orikubaasa Kutwaza Waahurira Ebitahikire.”)

¹⁷ Yangira ebitebyo bitahikire. Entumwa Paulo akagamba butunu eki twine kukora twahurira ebitebyo bitahikire. Akagambira Timoseo ‘kuhana abantu bamwe kureka. . . kuhugira aha nfumu z’ebigunjano’ n’okutaikiriza “ebiteekyerezo by’ebigunjano.” (1 Tim. 1:​3, 4; 4:7) N’obu omwana arikubaasa kutorotoora ekintu ahansi akakita omu kanwa, omuntu okuzire kandi orikumanya akabi akarikubaasa kurugamu tarikukikora. Nitwangira ebitebyo bitahikire ahakuba nitumanya obukomooko bwabyo. Nituhamira aha ‘bigambo by’amazima.’—Shoma 2 Timoseo 1:13.

18. Nitubaasa kworeka tuta ngu nitwesiga ekibiina kye?

¹⁸ Twareeba emiringo eshatu yonka oku ekibiina kya Yehova kirikutooreza Yesu. Waaba nooyeyegyesa Baibuli, yetegyereze emiringo endiijo oku ekibiina kirikutooreza Yesu. Hwera abandi kwongyera kwesiga ekibiina. Kandi gumizamu kworeka ngu nooyesiga Yehova n’ekibiina eki arikukoresa kuhikiiriza ebi arikwenda, orikumuheereza omuhamiireho. (Zab. 37:28) Ka tugumizemu nitusiima omugisha gw’okuba n’abaheereza ba Yehova abaine rukundo, kandi abarikwesigwa.