1. Ngyehyɛleɛ boni a bɛyɛle bɛmaanle Gyihova menli mɔɔ ɛnee wɔ ɛvoya mɔɔ limoa la anu a?

 MEKƐ biala mɔɔ Gyihova bamaa ye menli ne gyimalilɛ bie la, ɔ nye la kɛ bɛbalua ngyehyɛleɛ zo a bɛayɛ a. (1 Kɔl. 14:33) Kɛ neazo la, ɔle Nyamenle ɛhulolɛdeɛ kɛ bɛbabɔ edwɛkpa ne nolo wɔ azɛlɛ ye azo amuala. (Mat. 24:14) Gyihova ɛva Gyisɛse ɛdo gyima zɔhane anloa. Na Gyisɛse ɛlɛmaa bɛalua ngyehyɛleɛ zo a bɛayɛ a. Ɛnee mgbanyima eku bie mɔɔ ɛzoanvolɛma nee mrenyia mgbanyinli bie a wɔ nu la wɔ Gyɛlusalɛm, na ɛnee bɛsisi kpɔkɛ mɔɔ ɔwɔ kɛ asafo ne mɔ amuala di zo a. (Gyi. 15:2; 16:4) Mekɛ mɔɔ bɛlɛtete asafo wɔ ɛleka ngakyile wɔ ɛvoya mɔɔ limoa la anu la, bɛkpale mgbanyima wɔ asafo biala anu kɛ bɛva adehilelɛ ɛhye mɔ bɛmaa mediema ne mɔ na bɛli gyima ne anyunlu. (Gyi. 14:23) Kɛmɔ bɛlile adehilelɛ mɔɔ bɛvale bɛmaanle bɛ la azo la ati, “asafo ne mɔ anwo hɔle zo yɛle se wɔ diedi ne anu na bɛ dodo ne hɔle ɔ nyunlu.”—Gyi. 16:5.

2. Kɛzi Gyihova ɛhile ye menli ne adenle na yemaa bɛ sunsum nu aleɛ ɔvi 1919 mɔɔ ba la ɛ?

² Ɛnɛ bɔbɔ, Gyihova tɛkɔ zo tɛyɛ ngyehyɛleɛ tɛmaa ye menli ne. Ɔvi 1919 mɔɔ ba la, Gyisɛse ɛlua mrenyia ekpunli ekyi bie mɔɔ bɛkpokpa bɛ la anwo zo ɛyɛ edwɛkɛhanlɛ gyima ne anwo ngyehyɛleɛ na yemaa ye ɛdoavolɛma sunsum nu aleɛ. a  (Luku 12:42) Ɔda ali wienyi kɛ, Gyihova ɛlɛyila ekpunli zɔhane gyima ne azo.—Aye. 60:22; 65:​13, 14.

3-4. (a) Maa kɛzi yɛdua ngyehyɛleɛ zo yɛyɛ ninyɛne a yɛnyia zolɛ nvasoɛ la anwo neazo. (b) Duzu a yɛbazuzu nwo wɔ edwɛkɛ ɛhye anu a?

³ Saa yɛanlua ngyehyɛleɛ zo yɛanyɛ ninyɛne a, yɛnrɛhola yɛnrɛyɛ gyima mɔɔ Gyisɛse vale maanle yɛ kɛ yɛyɛ la. (Mat. 28:​19, 20) Kɛ neazo la, saa bɛangile azɛlɛsinli mɔɔ ɔwɔ kɛ asafo biala yɛ nuhua gyima a, anrɛɛ awie biala baha edwɛkɛ ne wɔ ɛleka biala mɔɔ ɔkulo la. Anrɛɛ wɔ azɛlɛsinli bie mɔ anu, nolobɔlɛma ngakyile dɔɔnwo bayɛ gyima wɔ ɛkɛ ne fane dɔɔnwo noko bɛnrɛyɛ azɛlɛsinli bie mɔ anu gyima fee. Ɛbahola wɔadwenle nvasoɛ gyɛne mɔɔ yɛdua ngyehyɛleɛ zo yɛyɛ ninyɛne a yɛbanyia la anwo ɔ?

⁴ Ngyehyɛleɛ mɔɔ Gyisɛse yɛle maanle ye ɛdoavolɛma wɔ mekɛ mɔɔ ɔwɔ azɛlɛ ye azo la a ɔlɛtoa zo yeayɛ yeamaa yɛ ɛnɛ a. Wɔ edwɛkɛ ɛhye anu, yɛbazuzu neazo mɔɔ Gyisɛse yɛle nee kɛzi yɛ ahyehyɛdeɛ ne ɛlɛdi ye neazo ne anzi la anwo. Eza yɛbazuzu kɛzi yɛbahile kɛ yɛ nye sɔ Gyihova ahyehyɛdeɛ ne la anwo.

YƐ AHYEHYƐDEƐ NE DI GYISƐSE NEAZO NE ANZI

5. Adenle ko mɔɔ yɛ ahyehyɛdeɛ ne dua zo di Gyisɛse neazo ne anzi la a le boni? (Dwɔn 8:28)

⁵ Gyisɛse zukoale mɔɔ ɔbayɛ nee mɔɔ ɔbaha la vile ye anwuma Selɛ ne ɛkɛ. Gyihova ahyehyɛdeɛ ne gyinla Nyamenle Edwɛkɛ ne azo kilehile yɛ ɛbɛlabɔlɛ kpalɛ nwo debie na ɔmaa yɛ adehilelɛ ɔfa ɔdi Gyisɛse neazo ne anzi. (Kenga Dwɔn 8:28; 2 Tim. 3:​16, 17) Ɔta ɔkakye yɛ kɛ yɛgenga Nyamenle Edwɛkɛ ne na yɛva yɛli gyima. Saa yɛdi folɛdulɛ ɛhye azo a, kɛzi ɔboa yɛ ɛ?

6. Saa yɛsukoa Baebolo ne a, nvasoɛ kpole ko boni a yɛnyia a?

⁶ Saa yɛdua yɛ mbuluku ne mɔ nee ninyɛne gyɛne zo yɛsukoa Baebolo ne a, yɛnyia zolɛ nvasoɛ kpole kpalɛ. Kɛ neazo la, yɛkola yɛfa mɔɔ Baebolo ne kilehile la yɛtoto adehilelɛ mɔɔ yɛnyia yɛfi ahyehyɛdeɛ ne ɛkɛ la anwo. Saa yɛnwu kɛ adehilelɛ mɔɔ yɛnyia la gyi Ngɛlɛlera ne azo a, ɔmaa anwodozo mɔɔ yɛlɛ wɔ Gyihova ahyehyɛdeɛ ne anu la yɛ kpole.—Wlo. 12:2.

7. Edwɛkɛ boni a Gyisɛse bɔle ye nolo a, na kɛzi Gyihova ahyehyɛdeɛ ne di ye neazo ne anzi ɛ?

⁷ Gyisɛse bɔle “Nyamenle Belemgbunlililɛ ne anwo edwɛkpa ne nolo.” (Luku 4:​43, 44) Eza Gyisɛse hanle hilele ye ɛdoavolɛma ne kɛ bɛbɔ Belemgbunlililɛ ne nolo. (Luku 9:​1, 2; 10:​8, 9) Ɛnɛ, bɛdabɛ mɔɔ bɛwɔ Gyihova ahyehyɛdeɛ ne anu la amuala bɔ Belemgbunlililɛ ne anwo edwɛkpa ne nolo ɔnva nwo ɛleka mɔɔ bɛde anzɛɛ ɛzonlelilɛ ngakyile mɔɔ bɛlɛ wɔ ahyehyɛdeɛ ne anu la.

8. Kɛzi bɛli yɛ eni ɛ?

⁸ Yɛnwu ye kɛ ɔle nwolɛ adenle mɔɔ yɛnyia kɛ yɛbaha Nyamenle Belemgbunlililɛ ne anwo nɔhalɛ ne yɛahile awie mɔ a! Tɛ awie biala a nyia nwolɛ adenle ɛhye bie a. Kɛ neazo la, mɔɔ Gyisɛse wɔ azɛlɛ ye azo la, yeammaa sunsum ɛtane ne mɔ adenle kɛ bɛbali ɔ nwo daselɛ. (Luku 4:41) Ɛnɛ, kolaa na awie ahola ɔ nee Gyihova menli ne abɔ nu aha edwɛkpa ne la, ɔwɔ kɛ ɔbɔ ɛbɛla mɔɔ sɔ Gyihova anye la. Yɛdi daselɛ wɔ ɛleka biala mɔɔ yɛwɔ nee mekɛ biala mɔɔ yɛbanyia la yɛfa yɛkile kɛ yɛ nye sɔ nwolɛ adenle mɔɔ yɛnyia yɛlɛbɔ edwɛkpa ne nolo la. Kɛ mɔɔ Gyisɛse yɛle la, yɛ bodane a le kɛ yɛbagua Belemgbunlililɛ ne anwo nɔhalɛ ma ne wɔ menli ahonle nu na yɛagugua zolɛ nzule.—Mat. 13:​3, 23; 1 Kɔl. 3:6.

9. Kɛzi ahyehyɛdeɛ ne maa menli nwu Nyamenle duma ne ɛ?

⁹ Gyisɛse maanle menli nwunle Nyamenle duma ne. Wɔ Gyisɛse asɔneyɛlɛ bie anu, ɔzele ye anwuma Selɛ ne kɛ: “Memaa bɛnwu wɔ  duma.” (Dwɔn 17:26) Gyihova ahyehyɛdeɛ ne yɛ biala mɔɔ ɔbahola la boa awie mɔ maa bɛnwu Nyamenle duma ne fa di Gyisɛse neazo ne anzi. Ahyehyɛdeɛ ne ɛlua Ngɛlɛlera Nwuanzanwuanza—Ewiade Fofolɛ Ngilebɛbo ne azo titili ɛyɛ ɛhye. Wɔ Baebolo ngilebɛbo ɛhye anu, bɛvale Nyamenle duma ne bɛwulale ɛleka biala mɔɔ ɛnee ɔfinde wɔ mɔlebɛbo Ngɛlɛlera ne mɔ anu la. Ɛnɛ, Ewiade Fofolɛ Ngilebɛbo ne amuala anzɛɛ ye foa bie wɔ aneɛ mɔɔ bo 270 la anu. Wɔ Mokanwo A4 nee A5 ne anu a, ɛbanwu deɛmɔti bɛvale Nyamenle duma ne bɛziale bɛwulale ɛleka mɔɔ ɔwɔ kɛ ɔfinde la anwo edwɛkɛ dɔɔnwo. Appendix C ne mɔɔ wɔ Nrelenza Study Bible ne anu la maa yɛnyia daselɛ kpole mɔɔ kile kɛ ɔwɔ kɛ Nyamenle duma ne finde Kilisiene Giliki Ngɛlɛlera ne anu fane 237 la.

10. Duzu a ɛsukoa ɛfi edwɛkɛ mɔɔ raalɛ bie mɔɔ vi Myanmar la hanle la anu a?

¹⁰ Kɛ mɔɔ Gyisɛse yɛle la, yɛdayɛ noko yɛkulo kɛ yɛboa menli dodo biala mɔɔ yɛbahola la yɛmaa bɛnwu Nyamenle duma ne. Mɔɔ raalɛ bie mɔɔ vi Myanmar mɔɔ ɛli ɛvolɛ 67 nwunle kɛ Nyamenle lɛ duma la, ɔhanle ye ɔmaanle ɔzunle na ɔhanle kɛ: “Ɛnɛ a le mekɛ mɔɔ limoa wɔ me ɛbɛlabɔlɛ nu mɔɔ mede kɛ Nyamenle duma a le Gyihova a. . . . Bɛhilehile me debie mɔɔ hyia kpole tɛla biala a.” Kɛ mɔɔ anwubielɛ ɛhye maa yɛnwu ye la, saa menli mɔɔ lɛ ahonle kpalɛ la nwu Nyamenle duma ne a, ɔkakyi bɛ ɛbɛlabɔlɛ.

KƆ ZO KILE YƐ AHYEHYƐDEƐ NE ANWO ANYEZƆLƐ

11. Kɛ ɔkɛyɛ na asafo nu mgbanyima ahile Gyihova ahyehyɛdeɛ ne anwo anyezɔlɛ ɛ? (Eza nea nvoninli ne.)

¹¹ Adenle ko mɔɔ asafo nu mgbanyima balua zo ahile kɛ bɛ nye sɔ Nyamenle ahyehyɛdeɛ ne la a le boni? Saa bɛ sa ka adehilelɛ bie a, ɔhyia kɛ bɛtɔ alagye bɛkenga ye kpalɛ na bɛyɛ biala mɔɔ bɛbahola la bɛfa bɛdi gyima. Kɛ neazo la, tɛ kɛzi bɛbayɛ gyimalilɛ bie wɔ debiezukoalɛ bo nee kɛzi bɛbagyinla asafo ne agyakɛ anu bɛayɛ asɔne la anwo adehilelɛ ala a bɛfa bɛmaa bɛ a, emomu eza bɛfa kɛzi bɛbanlea Kelaese mboane ne la anwo adehilelɛ bɛmaa bɛ. Mgbanyima mɔɔ bɛdi ahyehyɛdeɛ ne adehilelɛ zo la boa bɛdabɛ mɔɔ bɛlɛnea bɛ nwo zo la bɛmaa bɛte nganeɛ kɛ Gyihova kulo bɛ yɛɛ ɔlɛbɔ bɛ nwo bane.

12. (a) Duzu ati a ɔwɔ kɛ yɛ nee menli mɔɔ li yɛ nyunlu la yɛ ko a? (Hibuluma 13:​7, 17) (b) Duzu ati a ɔwɔ kɛ yɛfa yɛ adwenle yɛsie bɛ subane kpalɛ ne mɔ azo a?

¹² Saa mgbanyima ne mɔ maa yɛ adehilelɛ a, ɔwɔ kɛ yɛfi yɛ ɛhulolɛ nu yɛdi zo. Yɛyɛ ye zɔ a, yɛnrɛmaa ɔnrɛyɛ se ɔnrɛmaa bɛdabɛ mɔɔ bɛli yɛ nyunlu la kɛ bɛbayɛ bɛ gyima ne. Baebolo ne maa yɛ anwosesebɛ kɛ yɛdie bɛdabɛ mɔɔ bɛli yɛ nyunlu la na yɛbɛlɛ yɛ nwo aze yɛmaa bɛ. (Kenga Hibuluma 13:​7, 17.) Ɔyɛ a ɛhye ɛyɛlɛ ɛnla aze. Duzu ati ɔ? Ɔluakɛ mrenyia ɛhye mɔ ɛnli munli. Noko saa yɛanva yɛ adwenle yɛanzie bɛ subane kpalɛ ne mɔ azo na yɛfa yɛsie bɛ subane mɔɔ ɛnle kpalɛ la azo a, ɛnee yɛlɛboa yɛ agbɔvolɛ. Wɔ adenle boni azo? Ɔbamaa anwodozo mɔɔ yɛlɛ kɛ Nyamenle ɛlɛdua ye ahyehyɛdeɛ ne azo ahile yɛ adenle la aha aze, na adwenle mɔɔ menli mɔɔ dwazo tia yɛ la kulo kɛ yɛnyia la ɛne. Duzu fɔɔnwo a yɛbahola yɛayɛ amaa yɛanwu yɛ agbɔvolɛ adalɛ edwɛkɛ ne mɔ na yɛahwe yɛ nwo yɛavi nwo a?

MMAMAA AWIE MƆ SƐKYE ANYEZƆLƐ MƆƆ ƐLƐ LA

13. Kɛzi Nyamenle agbɔvolɛ ɛbɔ mɔdenle kɛ bɛsɛkye ye ahyehyɛdeɛ ne duma ɛ?

¹³ Nyamenle agbɔvolɛ bɔ mɔdenle kɛ bɛmaa ninyɛne mgbalɛ mɔɔ ye ahyehyɛdeɛ ne yɛ la ayɛ kɛ asɛɛ nvonleɛ wɔ nwo. Kɛ neazo la, yɛzukoa wɔ Ngɛlɛlera ne anu kɛ, Gyihova kulo kɛ ye azonvolɛ di bɛ nwo eni, bɛbɔ ɛbɛla kpalɛ na bɛsonle ye wɔ adenle mɔɔ ɔdie ɔto nu la ala azo. Ɔkulo kɛ bɛtu awie biala mɔɔ kɔ zo bɔ ɛbɛla mɔɔ nwolɛ ɛnde na ɔnnu ɔ nwo la bɛfi asafo ne  anu. (1 Kɔl. 5:​11-13; 6:​9, 10) Yɛdi mɛla zɔhane mɔɔ wɔ Ngɛlɛlera ne anu la azo. Noko menli mɔɔ dwazo tia yɛ la bɔ mɔdenle kɛ bɛgyinla mɛla zɔhane azo bɛabɔ yɛ somolɛ kɛ yɛle kyengye, yɛbua menli ndɛne yɛɛ yɛnlɛ ɛlɔlɛ.

14. Nwane a gyi adalɛ edwɛkɛ mɔɔ bɛkeha ye wɔ ahyehyɛdeɛ ne anwo la anzi a?

¹⁴ Nwu ɛleka mɔɔ ɛtetalɛ ne vi la. Seetan Abɔnsam a gyi adalɛ edwɛkɛ biala anzi a. Ɔdaye a ɔle “adalɛ kɔsɔɔti bɛ ze” a. (Dwɔn 8:44; Gyn. 3:​1-5) Ɔti ɔwɔ kɛ yɛmaa yɛ nye da kɛ Seetan balua menli mɔɔ gyi ɔ nzi la anwo azo aheha Gyihova ahyehyɛdeɛ ne anwo adalɛ edwɛkɛ. Ɛhye bie zile wɔ alimoa Kilisienema ne mekɛ zo.

15. Duzu a ɛzonlenlɛ nu mgbanyima ne mɔ vale yɛle Gyisɛse nee ye ɛdoavolɛma ne a?

¹⁵ Wɔ alimoa Kilisienema ne mekɛ zo, menli mɔɔ gyi Seetan anzi la hehanle Nyamenle Ara ne mɔɔ di munli na ɔyɛ nwanwane ninyɛne la anwo adalɛ edwɛkɛ. Kɛ neazo la, ɛzonlenlɛ nu mgbanyima ne mɔ hanle hilele menli kɛ Gyisɛse nyianle tumi mɔɔ ɔfa ɔtu sunsum ɛtane la vile “sunsum ɛtane ne mɔ kpanyinli ne” ɛkɛ. (Maake 3:22) Mɔɔ bɛlɛdi Gyisɛse edwɛkɛ la, ɛzonlenlɛ nu mgbanyima ne mɔ bɔle ye somolɛ kɛ yedendɛ yetia Gyihova na eza bɛlile menli dɔɔnwo ne adwenle kɛ bɛha kɛ bɛhu Gyisɛse. (Mat. 27:20) Nzinlii mɔɔ Kelaese ɛdoavolɛma ne ɛlɛbɔ edwɛkpa ne nolo la, bɛdabɛ mɔɔ bɛdwazo bɛtia bɛ la “lile wulale maanle maanle ne anu amra” bɛmaanle bɛyɛle zɔhane Kilisienema ne kpɔdekpɔde. (Gyi. 14:​2, 19) December 1, 1998, The Watchtower ne hilehilele edwɛkɛ mɔɔ wɔ Gyima ne 14:2 la anu kɛ: “Dwuuma mɔɔ dwazo tia Kilisienema ne la mumua ne andie bɛ edwɛkɛ ne yɛɛ eza bɛhehanle bɛ nwo adalɛ edwɛkɛ amaa maanle maanle ne anu amra andie edwɛkɛ mɔɔ Kilisienema ne ɛlɛbɔ ye nolo la na eza bɛakpɔ bɛ.”

16. Saa yɛte adalɛ edwɛkɛ bie a, duzu a ɔwɔ kɛ yɛkakye a?

 ¹⁶ Seetan angyakyi adalɛbɔlɛ wɔ alimoa Kilisienema ne mekɛ zo. Ɛnɛ noko, ɔtɛkɔ zo ‘ɔtɛbɛlɛbɛla azɛlɛ ye azo amra amuala.’ (Yek. 12:9) Saa ɛte ahyehyɛdeɛ ne anzɛɛ mediema mɔɔ li yɛ nyunlu la anwo adalɛ edwɛkɛ bie a, kakye mɔɔ Nyamenle agbɔvolɛ vale yɛle Gyisɛse nee alimoa Kilisienema ne la. Ɛnɛ, bɛyɛ Gyihova menli kpɔdekpɔde na bɛka bɛ nwo adalɛ edwɛkɛ ngakyile kɛ mɔɔ Baebolo ne hanle dole ɛkɛ ne la. (Mat. 5:​11, 12) Saa yɛnwu ɛleka mɔɔ adalɛ edwɛkɛ ɛhye mɔ vi la na yɛyɛ nwolɛ debie ndɛndɛ a, bɛnrɛhola bɛnrɛbɛlɛbɛla yɛ. Duzu a ɔwɔ kɛ yɛyɛ yɛbɔ yɛ nwo bane a?

17. Kɛ ɔkɛyɛ na yɛammaa adalɛ edwɛkɛ annyia yɛ nwo zo tumi ɛtane ɛ? (2 Timote 1:13) (Eza nea ɛlɛka, “ Mɔɔ Ɔwɔ Kɛ Ɛyɛ Wɔ Adalɛ Edwɛkɛ Nwo La.”)

¹⁷ Mmatie adalɛ edwɛkɛ. Ɛzoanvolɛ Pɔɔlo maanle yɛ mɔɔ ɔwɔ kɛ yɛyɛ wɔ adalɛ edwɛkɛ nwo la anwo adehilelɛ fɔɔnwo. Ɔhanle ɔhilele Timote kɛ ‘ɔha ɔhile bie mɔ kɛ bɛmmatie adalɛ edwɛkɛ’ nee “adalɛ edwɛkɛ mɔɔ ɛbulɛ ɛnle nu” la. (1 Tim. 1:​3, 4; 4:7) Kakula ekyi mɔɔ ɛnze ɛhwee la bahola ava debie wɔ azɛlɛ nwo awula ɔ nloa anu ɛdeɛ, noko kpanyinli mɔɔ ɔze esiane mɔɔ wɔ nu la ɛnrɛyɛ zɔ ɛlɛ. Yɛndie adalɛ edwɛkɛ biala ɔluakɛ yɛze ɛleka mɔɔ ɔvi a. Yɛsɔ nɔhalɛ ne anwo “edwɛkɛ kpalɛ” ne anu.—Kenga 2 Timote 1:13.

18. Kɛ ɔkɛyɛ na yɛahile kɛ yɛ nye sɔ Gyihova ahyehyɛdeɛ ne ɛ?

¹⁸ Yɛzuzu ndenle dɔɔnwo mɔɔ Nyamenle ahyehyɛdeɛ ne dua zo di Gyisɛse neazo ne anzi la anu nsa ala anwo. Mekɛ mɔɔ ɛlɛsukoa Baebolo ne la, bɔ mɔdenle yɛ ndenle gyɛne mɔɔ ahyehyɛdeɛ ne dua zo di Gyisɛse neazo ne anzi la nzonlɛ. Boa menli gyɛne mɔɔ wɔ wɔ asafo ne anu la maa bɛnyia ahyehyɛdeɛ ne anwo anyezɔlɛ kpole. Sonle Gyihova nɔhalɛ nu na beta ahyehyɛdeɛ ne mɔɔ ɔlɛdua zo yeayɛ ye ɛhulolɛdeɛ la fa da wɔ anyezɔlɛ ne ali. (Edw. 37:28) Maa yɛbu nwolɛ adenle mɔɔ yɛlɛ kɛ yɛboka Gyihova menli mɔɔ lɛ ɛlɔlɛ na bɛdi nɔhalɛ la anwo la kɛ ɔsonle bolɛ.