1. ¿Hanja mi ꞌmu̱i organisado nuꞌu̱ yä mu̱di kristianu?

 NUꞌMU̱ rä Zi Dada Jeoba umbäbi nꞌa rä ꞌme̱fi yä amigo, näꞌä to̱ꞌmi ge nuyu̱ dä ja näꞌä ꞌme̱fi en orden hingä haräza (1 Cor. 14:33). Por ejemplo, Jeoba ne ge nuꞌu̱ yä hogä notisia de rä Gobiernu, dä tꞌungä ntꞌo̱de po gatꞌho rä Xiꞌmhai (Mat. 24:14). ¿Pe gi pädi toꞌo xä hñutsꞌi pa dä diriji nunä ꞌme̱fi? Rä Hesu. Po geꞌä rä Hesu xä nkargo dä hyandi ge gatꞌho nunä ꞌme̱fi dä mꞌu̱i organisado. Ha yä pa nuꞌu̱ yä mu̱di kristianu, ha Jerusalén bi thutsꞌi yä apostol ꞌne yä anciano nuꞌu̱ mi tomä yä desision de näꞌä mi debe dä me̱fi yä mhuntsꞌi (Hech. 15:2; 16:4). Ha kada nꞌa rä mhuntsꞌi xki thutsꞌi yä anciano nuꞌu̱ mi diriji yä ku ꞌne mi thoꞌtsi nuꞌu̱ yä desision xki tomä yä apostol ꞌne yä anciano de Jerusalén (Hech. 14:23). Koꞌmu̱ nuꞌu̱ yä ku myä yꞌo̱de, rä Mäkä Tꞌofo enä ge ngu «bi thogi yä pa mänꞌa bi te yä mhuntsꞌi» (Hech. 16:​5, TNM).

2. ¿Hanja di gia rä Zi Dada Jeoba rä hnini mäpaya?

² Mäpaya rä Zi Dada Jeoba sigi di organisa rä hnini. Dende rä je̱ya 1919, rä Hesu bi usa nꞌa rä tꞌu̱kä grupo de nuꞌu̱ yä kristianu to̱ꞌmi dä ma ha mähetsꞌi, pa go geꞌu̱ dä organisa hanja dä tꞌungä ntꞌo̱de rä Noya Äjuä, ꞌne ko rä Mäkä Tꞌofo go geꞌu̱ dä umbäbi rä gia rä hnini rä Zi Dada Jeoba (Luc. 12:42). a ¡Otho rä duda ge rä Zi Dada Jeoba di jäpi nuꞌu̱ yä kristianu di dirijibi rä hnini! (Is. 60:22; 65:​13, 14).

3, 4. a) ¿Por hanja ja ndunthi yä benefisio ora di ꞌmu̱ihu̱ organisado? b) ¿Te ma gä pädihu̱?

 ³ Mu̱ hingrä ꞌmu̱ihu̱ organisado, hindä za gä kumplihu̱ näꞌä bi nkargogihu̱ rä Hesu (Mat. 28:​19, 20). Por ejemplo, mu̱ yä ku hindä organisa te mä territorio ma gä predikahu̱, kada nꞌa de gekhu̱ ma gä predikahu̱ habu̱ go gä nehu̱. Pe, ¿te ma dä thogi? Rꞌabu̱ ma gä maha gä predikahu̱ mismo yä luga habu̱ ya xä predika märꞌa yä ku, o ma dä nja yä territorio habu̱ nunka ma gä predikahu̱. ¿Gi da ngue̱nda por hanja xa mähyoni gä mꞌu̱ihu̱ organisado?

⁴ Mäpaya rä Hesu di organisa rä hnini rä Zi Dada Jeoba ja ngu bi organisa nuꞌu̱ yä de̱ni mi mꞌu̱kua ha rä Xiꞌmhai. Ha nunä ntꞌudi di nxadihu̱, ma gä handihu̱ hanja rä hnini rä Zi Dada Jeoba de mäpaya, de̱ni näꞌä rä ejemplo bi hñutsꞌi rä Hesu nuꞌmu̱ bi mꞌu̱kua ha rä Xiꞌmhai. ꞌNehe ma gä pädihu̱ te di debe gä pe̱fihu̱ pa njabu̱ mänꞌa gä pe̱ꞌspäbihu̱ rä komfiansa rä hnini rä Zi Dada Jeoba.

RÄ HNINI RÄ ZI DADA JEOBA PE̱FI NÄꞌÄ BI ME̱FI RÄ HESU NUꞌMU̱ BI MꞌU̱KUA HA RÄ XIꞌMHAI

5. ¿Te mä ejemplo de̱ni rä hnini rä Zi Dada Jeoba? (Juan 8:28).

⁵ Rä Hesu mi pädi te dä me̱fi ꞌne te dä mää, ngeꞌä Jeoba go geꞌä xki ꞌñuti. Ja ngu bi me̱fi rä Hesu, rä hnini rä Zi Dada Jeoba nzäntho usa rä Mäkä Tꞌofo pa dä maxkägihu̱ gä pädihu̱ ndaꞌä xä ñho ꞌne ndaꞌä hinä. ꞌNehe, rꞌakägihu̱ rä gia de hanja di debe gä mꞌu̱ihu̱ (hñeti Juan 8:​28, TNM; 2 Tim. 3:​16, 17). Pe hingä ho̱nse̱ꞌä, njatꞌä xikägihu̱ gä nxadihu̱ rä Mäkä Tꞌofo ꞌne gä pe̱fihu̱ ha mä mꞌu̱ihu̱ näꞌä di pädihu̱. ¿Hanja di benefisiagihu̱ ora di jamäsuhu̱ nunä konseho?

6. ¿Te mä benefisio di hänihu̱ ora di nxadihu̱ rä Mäkä Tꞌofo?

⁶ Ora di nxadihu̱ rä Mäkä Tꞌofo, di hänihu̱ ndunthi yä benefisio. Por ejemplo, di handihu̱ ge näꞌä hutsꞌi ha rä Mäkä Tꞌofo, geꞌä rä gia rꞌakägihu̱ rä hnini rä Zi Dada Jeoba. Njabu̱, mä komfiansahu̱ po rä hnini rä Zi Dada Jeoba mänꞌa di te ꞌne hindi dudahu̱ de geꞌä (Rom. 12:2).

7. ¿Te bi me̱fi rä Hesu ꞌne te pe̱fibye̱ rä hnini rä Zi Dada Jeoba?

⁷ Rä Hesu bi «ungä ntꞌo̱de yä hogä notisia de rä Tsꞌu̱tꞌhui Äjuä» (Luc. 4:​43, 44, TNM). ꞌNehe, rä Hesu bi mändabi nuꞌu̱ yä de̱ni dä ꞌñudi de rä Tsꞌu̱tꞌhui Äjuä (Luc. 9:​1, 2; 10:​8, 9). Ja ngu rä Hesu ꞌne nuꞌu̱ yä de̱ni, mäpaya gatꞌho yä testigo rä Jeoba ꞌnehe ungä ntꞌo̱de de rä Tsꞌu̱tꞌhui Äjuä hindi mporta habu̱ ꞌmu̱i o te mä responsabilida pe̱ꞌtsi ha rä hnini rä Zi Dada Jeoba.

8. ¿Te mä däta nsu xä tꞌakägihu̱?

⁸ ¡Xi nꞌa rä däta nsu gä utihu̱ yä jäꞌi de rä Tsꞌu̱tꞌhui Äjuä! Hingä cualquiera rä jäꞌi pe̱ꞌtsi nunä däta nsu. Por ejemplo, mi mꞌu̱kua rä Hesu ha rä Xiꞌmhai rꞌa yä u̱xjua mi po̱ni de yä jäꞌi ꞌne mi embäbi: «Nuꞌi go geꞌi rä Tꞌu̱ꞌi Äjuä». Pe rä Hesu bi zu̱i nuꞌu̱ yä u̱xjua ꞌne himbi hyopäbi dä ñä de geꞌä (Luc. 4:41). Mäpaya, mu̱ nꞌa rä jäꞌi ne dä bo̱ni ko yä testigo rä Jeoba pa dä predika, pe̱ꞌtsi te dä kumpli rꞌa yä rekisito. Hänge nuju̱ ya di po̱nihu̱ di predikahu̱, di udihu̱ ge di balorahu̱ ndunthi nunä däta nsu ora di probechahu̱ gatꞌho yä oportunida pa gä predikabihu̱ yä jäꞌi. Ja ngu bi ja rä Hesu, nuju̱ di o̱thu̱ ntsꞌe̱di po gä potꞌihu̱ ha yä koraso yä jäꞌi näꞌä rä semilla de rä Noya Äjuä ꞌne gä xitꞌihu̱ pa dä te (Mat. 13:​3, 23; 1 Cor. 3:6).

9. ¿Te xä me̱fi rä hnini rä Zi Dada Jeoba pa uti yä jäꞌi de Geꞌä ꞌne de rä thuhu?

⁹ Rä Hesu bi mää ndaꞌä rä thuhu Äjuä. Nꞌa rä pa bi xatuäbi rä Zi Dada Jeoba ꞌne bi ꞌñembäbi: «Nuga xtä utiyu̱ ndaꞌä ri thuhu» (Juan 17:​26, TNM). Rä hnini rä Zi Dada Jeoba de̱mbäbi rä ejemplo rä Hesu ꞌne o̱tꞌe ntsꞌe̱di po dä ꞌñuti gatꞌho yä jäꞌi ndaꞌä rä thuhu Äjuä. Pa geꞌä di usa rä Mäkä Tꞌofo Traducción del Nuevo Mundo. ¿Por hanja xa xä ñho nunä erramienta? Ngeꞌä  ha nunä Mäkä Tꞌofo xä thutsꞌi rä thuhu Äjuä ja ngu mi hutsꞌi ha näꞌä rä Mäkä Tꞌofo rä original. Nunä Mäkä Tꞌofo ja mäxo̱ge o nꞌa xe̱ni de gehnä ha thogi de 270 yä idioma. Ha yä apéndice A4 ꞌne A5, ma gi tini mä nꞌa tu̱i rä imformäsio de por hanja bi thutsꞌi mänꞌaki rä thuhu Äjuä ha nunä Mäkä Tꞌofo. ꞌNe ha rä Traducción del Nuevo Mundo (edición de estudio), ha rä apéndice C uni mä ndunthi yä prueba de ke rä thuhu Äjuä debe dä nja 237 yä mꞌiki ha yä Escrituras Griegas Cristianas, fädi mäpaya ngu rä Rꞌayꞌo Testamento.

10. ¿Te utkägihu̱ näꞌä bi thogi nꞌa rä zi ꞌme̱hñä ha rä dähni Myanmar?

¹⁰ Ja ngu bi me̱fi rä Hesu, nuju̱ di o̱thu̱ ntsꞌe̱di po gä utihu̱ gatꞌho yä jäꞌi ndaꞌä rä thuhu Äjuä. Ha rä dähni Myanmar nꞌa rä testigo bi ꞌñuti nꞌa rä zi ꞌme̱hñä ge Äjuä rä thuhu Jeoba. Nunä zi ꞌme̱hñä pe̱ꞌtsi 67 yä je̱ya. Ora bi yꞌo̱de ndaꞌä rä thuhu Äjuä, asta bi nzoni ꞌne bi ꞌñenä: «Nunka änte xti o̱de ndaꞌä rä thuhu Äjuä. De gatꞌho nuꞌu̱ yä tꞌo̱tꞌe di debe gä pädi, nubye̱ xkä utkägi näꞌä mänꞌa xa mähyoni». Nunä esperiensia utkägihu̱ hängu dä za dä patuäbi rä mꞌu̱i nꞌa rä jäꞌi ora tꞌuti ndaꞌä rä thuhu Äjuä.

SIGI PE̱ꞌSPÄBI RÄ KOMFIANSA RÄ HNINI RÄ ZI DADA JEOBA

11. ¿Hanja udi yä anciano ge pe̱ꞌspäbi ndunthi rä komfiansa rä hnini rä Zi Dada Jeoba? (Hyandi ꞌnehe yä foto).

¹¹ ¿Hanja dä za dä ꞌñudi yä anciano pe pe̱ꞌspäbi rä komfiansa rä hnini rä Zi Dada Jeoba? Ora heti xä ñho näꞌä rä gia häni de geꞌä ꞌne pe̱fi ja ngu mängä nuꞌu̱ yä instrucción. Rä hnini rä Zi Dada Jeoba umbäbi rä gia yä anciano desde hanja di debe dä tꞌuni nuꞌu̱ yä thoꞌtsi ꞌne rä sadi ha rä mhuntsꞌi. Pe hingä ho̱nse̱ꞌä, ꞌnehe xipäbi hanja di debe dä supäbi rä zi taxo rä Kristo. Ora yä anciano pe̱fi ja ngu näꞌä rä gia tꞌumbäbi, yä ku de rä mhuntsꞌi senti hängu di mädi rä Zi Dada Jeoba ꞌne di jamäsu.

12. a) ¿Por hanja di debe gä hopäbihu̱ dä giagihu̱ nuꞌu̱ yä ku gu̱tꞌi rä ꞌñuu ha rä mhuntsꞌi? (Hebreos 13:​7, 17). b) ¿Por hanja hindi debe gä e̱ntꞌihu̱ ha mä mfenihu̱ nuꞌu̱ yä defecto yä anciano?

¹² Rä Mäkä Tꞌofo di mändagihu̱ gä o̱tehu̱ nuꞌu̱ gu̱tꞌi rä ꞌñuu ha rä mhuntsꞌi. Hänge ora yä anciano rꞌakägihu̱ rä gia ꞌne xikägihu̱ te di debe gä pe̱fihu̱, mähyoni ge mäntꞌä gä o̱tehu̱ ko rä johya hingä de mala ganä. Njabu̱, nuꞌu̱ hingä ma dä japäbi xä ñhei dä kumpli ko yä responsabilida de dä sugägihu̱ (hñeti Hebreos 13:​7, 17). Pe rꞌabu̱ dä za dä jakägihu̱ xä ñhei ngeꞌä yä anciano hingä yä perfecto. Pe ora di handihu̱ ho̱nse̱ nuꞌu̱ yä defecto pe̱ꞌtsi ꞌne hindi häkihu̱ de ha mä mfenihu̱, di udihu̱ ge go di fatsꞌihu̱ nuꞌu̱ mä nkontrahu̱. ¿Por hanja? Ngeꞌä ora di u̱tsahu̱ yä anciano, ko rä tiempo ma gä u̱tsabihu̱ ꞌnehe rä hnini rä Zi Dada Jeoba. Mu̱ gä pe̱fihu̱ njabu̱, xa ma dä johya rä Zithu ꞌne nuꞌu̱ mä nkontrahu̱. ¿Pe te debe gä pe̱fihu̱ pa njabu̱ hindä kadigihu̱ nuꞌu̱ yä nhemhñä ꞌne yä nkꞌuamba ju̱tsꞌi nuꞌu̱ mä nkontrahu̱?

OGI HOPI TOꞌO DÄ JAꞌI GI DUDA

13. ¿Te mää nuꞌu̱ di u̱tsabi rä hnini Jeoba?

¹³ Nuꞌu̱ yä kontra Äjuä ne dä kombensegihu̱ ge hinxä ñho näꞌä pe̱fi rä hnini rä Zi Dada Jeoba. Por ejemplo, rä Mäkä Tꞌofo udi ge rä Zi Dada Jeoba ne ge nuꞌu̱ yä amigo dä mꞌu̱i xä ntꞌaxi tanto yä ndoyꞌo, yä mfeni, näꞌä rä bida tsitsꞌi ꞌne näꞌä rä so̱kämbeni umbäbiꞌä. ꞌNehe, rä Mäkä Tꞌofo udi ge toꞌo tsitsꞌi nꞌa rä bida xä ntsꞌo ꞌne hindi arrepenti, debe drä espulsa de rä mhuntsꞌi (1 Cor. 5:​11-13; 6:​9, 10). Koꞌmu̱ nuju̱ di pe̱fihu̱ näꞌä di mända rä Mäkä Tꞌofo, nuꞌu̱ yä nkontra Äjuä enä ge hindi mädihu̱ yä jäꞌi, ge di juzgahu̱ ꞌne mää ge hindi mädihu̱ nuꞌu̱ hingi ꞌmu̱i ja ngu nuju̱.

14. ¿De habu̱ bi ehe yä nkꞌuamba?

¹⁴ Ma gä benihu̱ habu̱ bi ehe yä nkꞌuamba ꞌne yä nhemhñä. Rä Mäkä Tꞌofo mää ge rä Zithu  «go geꞌä rä dada de yä nkꞌuamba ꞌne yä nhemhñä». Hää, rä Zithu go geꞌä di xani yä nkꞌuamba de rä hnini rä Zi Dada Jeoba (Juan 8:​44, TNM; Gén. 3:​1-5). Hänge hindi sorprendegihu̱ ora di handihu̱ ge di usa yä jäꞌi pa xani yä nkꞌuamba de gekhu̱ ja ngu bi ja ha yä pa nuꞌu̱ yä mu̱di kristianu.

15. ¿Te bi me̱fi rꞌa yä jäꞌi kontra rä Hesu ꞌne nuꞌu̱ yä de̱ni?

¹⁵ Koꞌmu̱ rä Hesu go geꞌä rä Tꞌu̱ Äjuä, mi mꞌu̱kua ha rä Xiꞌmhai bi za bi ja rꞌa yä milagro. Pe rä Zithu, bi usa rꞌa yä jäꞌi pa bi mede rꞌa yä tꞌo̱tꞌe näꞌä hingä mäjuäni de rä Hesu ꞌne de näꞌä mi pe̱fi. Por ejemplo, nuꞌu̱ yä jäꞌi mi gu̱tꞌi yä ꞌñuu ha yä nijä, bi xipäbi yä jäꞌi ge rä Hesu mi e̱ni yä u̱xjua ko rä mfatsꞌi näꞌä «rä ndä de yä tsꞌondähi» (Mar. 3:22). ꞌNepu̱, nuꞌmu̱ mi mꞌai ante Pilato, nuꞌu̱ yä jäꞌiꞌu̱ bi mää ge rä Hesu xki zani Äjuä ꞌne bi kombense yä jäꞌi pa dä yꞌadi ge dä tho rä Hesu (Mat. 27:20). Mi thogi rꞌa yä pa nuꞌmu̱ ya xki tho rä Hesu, nuꞌu̱ yä de̱ni bi mu̱di bi predika. Pe ora nuꞌu̱ yä nkontra bi hyandi, xa bi nkue̱ ꞌne bi kombense yä jäꞌi pa te dä yꞌo̱tuäbi (Hech. 14:​2, 19). Ha rä revista La Atalaya de rä 1 de diciembre de 1998 esplika näꞌä udi Hechos 14:2. Nunä testo mää ge nuꞌu̱ yä judío mi u̱tsa nuꞌu̱ yä de̱ni rä Hesu, himbi komformä ko dä rechaza näꞌä mi udi nuꞌu̱ yä kristianuꞌu̱, sino ke xa bi yꞌo̱tꞌe ntsꞌe̱di po dä kombense yä jäꞌi de märꞌa yä hnini pa dä nju̱tsꞌi kontra geꞌu̱.

16. ¿Te debe gä benihu̱ mu̱ gä o̱dehu̱ toꞌo no̱ni rä hnini rä Zi Dada Jeoba o nuꞌu̱ yä ku gu̱tꞌi rä ꞌñuu?

¹⁶ Rä Zithu sigi mängä yä nkꞌuamba ꞌne yä nhemhñä, ꞌne po gatꞌho rä Xiꞌmhai hatꞌä yä jäꞌi (Apoc. 12:9). Hänge mu̱ gä o̱dehu̱ toꞌo no̱ni rä hnini rä Zi Dada Jeoba o nuꞌu̱ yä ku gu̱tꞌi rä ꞌñuu, mähyoni gä benihu̱ te bi me̱fi rꞌa yä jäꞌi ko rä Hesu ꞌne ko nuꞌu̱ yä de̱ni. Ja ngu hutsꞌi ha  rä Mäkä Tꞌofo, yä jäꞌi di u̱tsa yä testigo rä Jeoba ꞌne mää yä nkꞌuamba kontra gehyu̱ (Mat. 5:​11, 12). Mu̱ gä benihu̱ xä ñho habu̱ bi ehe nuꞌu̱ yä nkꞌuamba, hinto ma dä logra dä hyakägihu̱ ꞌne nguntꞌä ma gä nsuhu̱. Pe, ¿te mähyoni gä pe̱fihu̱ pa gä nsuhu̱?

17. ¿Te debe gä pe̱fihu̱ mu̱ dä zo̱kägihu̱ nuꞌu̱ yä kuento hingä mäjuäni? (2 Timoteo 1:13; hyandi ꞌnehe rä recuadro « ¿Te mähyoni gi pe̱fi mu̱ dä zo̱ꞌi nꞌa rä kuento hingä mäjuäni?»).

¹⁷ Ma gä rechazahu̱ nuꞌu̱ yä kuento hingä mäjuäni. Rä apostol Pablo bi ꞌñenä ge hindi debe gä jamäsuhu̱ nuꞌu̱ yä kuento hingä mäjuäni (1 Tim. 1:​3, 4). ꞌNehe rä apostol Pablo bi umbäbi Timoteo nunä konseho: «Ogi ho gi yꞌo̱de nuꞌu̱ yä tsꞌo ꞌmede» (1 Tim. 4:7). ¿Xkä handi hanja yä zi tꞌu̱kä bätsi ju̱u̱ ꞌne e̱ntꞌi ha yä ne gatꞌho näꞌä tini? Pe nuju̱ di pe̱päbihu̱ rä Zi Dada Jeoba hingä ma gä pe̱fihu̱ njabu̱. Koꞌmu̱ xä ñätsꞌi mä jamfrihu̱, hingä ma gä ne gä o̱dehu̱ gatꞌho näꞌä dä sikägihu̱ ꞌne menu ma gä e̱ntꞌihu̱ ha mä mfenihu̱. ¿Por hanja? Ngeꞌä di pädihu̱ ge nuꞌu̱ yä nkꞌuamba dä za dä yꞌo̱tkägihu̱ ndunthi rä dañu ꞌne dä tsꞌoni näꞌä rä tsitsꞌi di pe̱ꞌtsihu̱ ko rä Zi Dada Jeoba. Po geꞌä, nuju̱ di u̱tsahu̱ gatꞌho nuꞌu̱ yä kuento hingä mäjuäni ꞌne di jamäsuhu̱ ho̱nse̱ nuꞌu̱ yä hogä noya ehe ha rä Mäkä Tꞌofo (hñeti 2 Timoteo 1:​13, TNM).

18. ¿Hanja dä za gä udihu̱ ge di pe̱ꞌspäbihu̱ rä komfiansa rä hnini rä Zi Dada Jeoba?

¹⁸ Dä handihu̱ hñuu yä forma de hanja rä hnini rä Zi Dada Jeoba de mäpaya, de̱mbäbi rä ejemplo rä Hesu. Pe nu xki nxadi rä Mäkä Tꞌofo, ma gi da ngue̱nda ge ja märꞌaa hingä ho̱nse̱ya. Pe, ¿te dä za gi pe̱fi pa gi ꞌñudi ge gi pe̱ꞌspäbi rä komfiansa rä hnini rä Zi Dada Jeoba? Sigi gi fatsꞌi yä ku pa dä japäbi dä ze̱di näꞌä rä komfiansa pe̱ꞌspäbi rä hnini rä Zi Dada Jeoba, ꞌne sigi gi yꞌo mänjuäntho ha rä ꞌñuu. Ogi hopäbi toꞌo dä ꞌuekꞌäꞌi de rä hnini rä Zi Dada Jeoba, ꞌne beni ge Näꞌä usa rä hnini pa dä kumpli rä bolunta (Sal. 37:28). ¿Hänge xi nꞌa rä däta nsu näꞌä di pe̱ꞌtsihu̱ de gä pertenesehu̱ ha rä hnini rä Zi Dada Jeoba habu̱ di nheki näꞌä rä mhäte xa mäjuäni?