1. Kon Yehova su sirbidónan tabata organisá den promé siglo?

 SEMPER ku Yehova duna su sirbidónan un trabou pa hasi, e ta ferwagt pa nan hasié na un manera organisá. (1 Kor. 14:33) Por ehèmpel, el a pone Hesus na kabes dje trabou di prediká e bon notisia den henter e tera habitá. (Mat. 24:14) Anto Hesus na su turno ta hasi sigur ku tur kos ta bon organisá. Durante promé siglo, na Herúsalèm tabatin un grupo formá pa ansiano i apòstel ku tabata enkargá ku tumamentu di desishon i mandamentu di instrukshon pa tur kongregashon. (Echo. 15:2; 16:4) Segun ku kongregashonnan tabata lanta, ansianonan di e kongregashonnan ei tabata informá e rumannan di e desishonnan. (Echo. 14:23) Komo ku e rumannan tabata obedesé e instrukshonnan, “fe di e rumannan den e kongregashonnan a bira mas fuerte, i e kantidat di disipel a sigui oumentá.”​—Echo. 16:5.

2. Kon Yehova desde 1919 a bin ta guia i duna su pueblo kuminda spiritual?

² Awe ainda Yehova ta sigui organisá su pueblo. Desde 1919, Hesus a kuminsá usa un grupo chikitu di ruman ungí pa organisá e trabou di prediká i di duna su siguidónan kuminda spiritual. a (Luk. 12:42) Anto ta bisto ku Yehova ta bendishonando e trabou di e grupo chikitu ei.​—Isa. 60:22; 65:13, 14.

3-4. (a) Duna un ehèmpel pa mustra kon nos ta benefisiá debí ku nos ta organisá. (b) Di kiko nos lo papia den e artíkulo akí?

 ³ Si nos no tabata organisá, nos lo no por a hasi e trabou ku Hesus a duna nos. (Mat. 28:19, 20) Por ehèmpel, imaginá si no a organisá teritorionan pa prediká. Kada ken por prediká kaminda nan haña ta bon. Lo traha algun teritorio yen di biaha i tin otro ku lo no traha mes. Bo por pensa di otro benefisio ku nos tin debí ku nos ta organisá?

⁴ Mesun manera ku Hesus a organisá su siguidónan tempu ku e tabata riba tera, asina tambe e ta organisá Dios su pueblo awe. Den e artíkulo akí, nos lo analisá e ehèmpel ku Hesus a pone i lo wak kon nos organisashon ta hasi meskos. Tambe nos lo papia tokante loke nos por hasi pa konfia Yehova su organisashon.

NOS ORGANISASHON TA SIGUI HESUS SU EHÈMPEL

5. Kon nos ta sigui Hesus su ehèmpel? (Huan 8:28)

⁵ Hesus a siña di su Tata den shelu loke e tabatin ku hasi i bisa. Meskos ku Hesus, Yehova su organisashon ta usa Beibel pa duna nos guia i pa yuda nos sa loke ta bon i malu. (Lesa Huan 8:28; 2 Tim. 3:16, 17) Ademas, regularmente nos ta haña rekordatorio pa studia Beibel. Kon nos ta benefisiá ora nos hasi esei?

6. Ki benefisio importante nos ta haña ora nos studia Beibel?

⁶ Ora nos studia Beibel, nos por konektá e instrukshonnan ku nos haña den nos publikashonnan ku loke Beibel ta bisa. Ora nos mira ku e instrukshonnan ei ta basá riba Beibel, nos ta haña mas konfiansa den Yehova su organisashon.​—Rom. 12:2.

7. Ki mensahe Hesus a prediká, i kon Yehova su organisashon ta sigui su ehèmpel?

⁷ Hesus a prediká “e bon notisia di e Reino di Dios.” (Luk. 4:​43, 44) El a manda su disipelnan hasi meskos. (Luk. 9:1, 2; 10:​8, 9) Awe, tur hende ku ta forma parti di Yehova su organisashon ta prediká e mensahe di Reino sin importá unda nan ta biba òf kuantu responsabilidat nan tin den e organisashon.

8. Ki onor nos tin?

⁸ Pa nos ta un onor di por konta otro hende tokante Dios su Reino! No ta tur hende tin e privilegio ei. Por ehèmpel, ora Hesus tabata riba tera, e no a permití e demoñonan duna testimonio tokante dje. (Luk. 4:41) Awe, promé ku un hende por kuminsá prediká ku Testigunan di Yehova, e mester kualifiká pa e privilegio ei. Nos ta mustra kuantu nos ta balorá e privilegio di prediká ora nos ta probechá tur momento pa papia tokante e Reino di Dios. Meskos ku Hesus, nos meta ta pa planta i muha e simia di e bèrdat den kurason di hende.​—Mat. 13:3, 23; 1 Kor. 3:6.

9. Kon e organisashon ta hasi Dios su nòmber konosí?

⁹ Hesus a hasi Dios su nòmber konosí. Den un orashon na su Tata den shelu, Hesus a bisa: “Mi a hasi bo nòmber konosí.” (Huan 17:26) Yehova su organisashon ta imitá Hesus hasiendo tur loke ta posibel pa yuda hende konosé Dios su nòmber. Un manera ku e organisashon a hasi esaki ta mediante Tradukshon di Mundu Nobo di e Santu Skritura, ku ta disponibel kompleto òf en parte na  mas ku 270 idioma. E tradukshon di Beibel akí a pone Dios su nòmber bèk na e lugánan ku e tabata aparesé originalmente. Den Sekshon 1 i 2 dje foyeto Yudansa pa Studia e Palabra di Dios, lo bo haña sa mas tokante dikon i kon a pone Dios su nòmber bèk den Beibel. Sekshon 2 tambe ta splika dikon Dios su nòmber mester aparesé den Skritura Griego Kristian 237 biaha.

10. Kiko e eksperensia di un señora na Myanmar ta siña bo?

¹⁰ Meskos ku Hesus, nos ke yuda mas tantu hende posibel konosé Dios su nòmber. Ora un señora di 67 aña na Myanmar a haña sa ku Dios tin un nòmber, su wowo a yena ku awa i el a bisa: “Esaki ta e promé biaha den mi bida ku m’a tende ku e nòmber di Dios ta Yehova. . . . B’a siña mi e kos di mas importante ku m’a siña den mi bida.” Manera e eksperensia akí ta mustra, ora hende siña Dios su nòmber, esei por kambia nan bida.

SIGUI MUSTRA KONFIANSA DEN NOS ORGANISASHON

11. Kon ansianonan por mustra ku nan ta konfia Yehova su organisashon? (Wak e plachi.)

¹¹ Kon ansianonan por mustra ku nan ta konfia Dios su organisashon? Ora nan haña instrukshon, nan tin ku les’é ku atenshon i hasi tur nan posibel pa aplik’é. Por ehèmpel, aparte di haña instrukshon tokante kon pa duna parti i hasi orashon na reunion, nan ta haña guia tambe tokante kon pa kuida e karnénan di Kristu. Ora ansianonan ta sigui tur instrukshon ku e organisashon duna, e rumannan ta sinti ku Yehova stima nan i ta kuida nan.

12. (a) Dikon nos mester ta obedesidu i sumiso na e ansianonan? (Hebreonan 13:7, 17) (b) Dikon nos mester focus riba e kosnan bon ku e ansianonan ta hasi?

¹² Ora ansianonan duna nos instrukshon, nos mester ta kla pa obedesé. Esei lo pone ku ta hopi mas fásil pa nan hasi nan trabou. Beibel ta animá nos pa nos ta obedesidu i sumiso na nan. (Lesa Hebreonan 13:7, 17.) Pero no ta tur ora esei ta fásil. Dikon? Pasó nan ta imperfekto. Pero si nos ta bai focus riba nan puntonan ménos fuerte na lugá di e kosnan bon ku nan ta hasi, nos ta hasiendo e trabou di Yehova su enemigunan mas fásil. Kon asina? Wèl, si nos pensa malu di e ansianonan, nos por kuminsá pensa malu tambe tokante e organisashon, i asina nos mes ta pone ku nos ta pèrdè konfiansa den dje. Awor kiko presis nos por hasi pa rekonosé i rechasá e mentiranan di nos enemigunan?

NO LAGA OTRO HENDE PONE BO PÈRDÈ KONFIANSA

13. Kon Dios su enemigunan ta purba di pinta Dios su organisashon malu?

¹³ Dios su enemigunan ta pinta kosnan bon den Dios su organisashon malu. Por ehèmpel, Beibel ta bisa ku Yehova ke pa su adoradónan ta limpi den sentido físiko, moral i spiritual. Tambe e ta bisa ku si un hende sigui kometé un piká anto no ke kambia, e no por keda den e kongregashon. (1 Kor. 5:11-13; 6:9, 10) Nos ta pega na loke Beibel ta bisa tokante esei. Pero nos enemigunan ta usa esei pa akusá nos di ta fanátiko, kla pa husga i sin kurason.

14. Ken ta tras di tur e mentiranan tokante Dios su organisashon?

¹⁴ Rekonosé e berdadero fuente di e  atakenan. Esun ku ta tras di tur e mentiranan ku tin tokante Dios su organisashon ta Satanas e Diabel. Beibel mes ta yam’é “tata di mentira.” (Huan 8:44; Gén. 3:1-5) P’esei no ta nada straño ku e ta usa algun hende pa plama mentira. Ta esei el a hasi den promé siglo. Ban wak kon.

15. Kiko lidernan religioso a hasi ku Hesus i su siguidónan?

¹⁵ Aunke Hesus, e Yu di Dios, tabata perfekto i a hasi milagernan maravioso, Satanas a usa algun hende pa plama mentira tokante dje. Por ehèmpel, e lidernan religioso a bisa hende ku Hesus tabata “saka demoño ku yudansa di e gobernante di demoño.” (Mar. 3:22) Durante Hesus su huisio, e lidernan religioso a akus’é di a papia malu tokante Dios i a konvensé e multitut pa pidi pa laga mat’é. (Mat. 27:20) Algun tempu despues, ora Kristu su disipelnan tabata prediká, nan enemigunan a instigá i influensiá hende pa persiguí e kristiannan ei. (Echo. 14:2, 19) Tokante Echonan 14:2, E Toren di Vigilansia di 1 di desèmber 1998 a splika ku e enemigunan hudiu no a djis rechasá e mensahe ku e kristiannan tabata prediká pero “nan a kuminsá un kampaña di difamashon” pa hasi sigur ku otro hende lo no kier a skucha e kristiannan i haña rabia riba nan.

16. Ki nos tin ku kòrda ora nos haña nos ku informashon falsu?

¹⁶ Te dato dia djawe Satanas “ta gaña henter e tera habitá.” (Rev. 12:9) P’esei, si bo haña bo ku historia negativo tokante e organisashon òf e ansianonan,  kòrda loke Dios su enemigunan a hasi den promé siglo ku Hesus i su disipelnan. Hesus a bisa ku hende lo persiguí esnan ku ta adorá Yehova i lo papia mentira kontra nan. Anto esei ta presis loke ta pasa awe. (Mat. 5:11, 12) Nos lo no kere niun informashon falsu, si nos kòrda ken ta esun ku ta tras di nan i si nos protehá nos mes mesora. Pero kon nos por protehá nos mes?

17. Ki nos por hasi si nos haña nos ku informashon falsu? (2 Timoteo 1:13) (Wak e kuadro “ No Hasi Kaso na Informashon Falsu.”)

¹⁷ Rechasá informashon falsu. Apòstel Pablo a splika bon kla loke nos tin ku hasi si nos haña nos ku historia falsu. El a bisa Timoteo pa “duna òrdu na sierto personanan pa nan no . . . presta atenshon na kuenta falsu” i “rechasá kuentanan falsu ku ta menospresiá loke ta santu.” (1 Tim. 1:3, 4; 4:7) Por ehèmpel, un mucha chikitu kisas lo hinka un kos ku e haña abou den su boka. Pero un adulto hamas lo hasi esei pasó e sa ku ta peligroso. Nos ta rechasá informashon falsu pasó nos sa nan orígen. P’esei e úniko kos ku nos ta skucha ta e “palabra sano” dje bèrdat.​—Lesa 2 Timoteo 1:13.

18. Kon nos por mustra ku nos ta konfia Yehova su organisashon?

¹⁸ Nos a papia di tres manera ku Dios su organisashon ta imitá Hesus, pero tin mas. Ora bo ta studia Beibel purba di mira otro manera mas ku e organisashon ta imitá Hesus su ehèmpel. Yuda bo rumannan den kongregashon pa haña mas konfiansa den e organisashon. I sigui sirbi Yehova lealmente i keda pegá ku e organisashon ku e ta usa pa kumpli ku su boluntat. (Sal. 37:28) Laga nos semper balorá e privilegio ku nos tin di forma parti di Yehova su organisashon kaminda tin amor i lealtat.