1. Woo haud Jehowa daut ieeschtemma fa siene Deena enjerecht?

 WAN Jehowa siene Deena eene Oabeit oppjeft, dan well hee, daut dee daut ordentlich doonen (1. Kor. 14:33). Gott well biejlikj, daut de goode Norecht oppe gaunze Ieed jeprädicht woat (Mat. 24:14). Jehowa haft Jesus äwa dit Woakj aunjestalt. Un Jesus haft doano jeseenen, daut dit Woakj opp eene ordentliche Wajch derchjefieet woat. To de Aposteltiet wia en Jerusalem eene Grupp Apostel un Eltestasch, waut eenje Sachen entscheiden deeden, wua aule Vesaumlungen sikj no rechten sullen (Apj. 15:2). Doa worden uk Eltestasch aunjestalt toom dise Aunwiesungen wiedajäwen un de Leidunk äwanämen enne Vesaumlungen, waut lota oppjestalt worden (Apj. 14:23; 16:4). Wiels de Breeda un Sestren de Aunwiesungen nokjeemen, waut see kjrieejen, worden “de Vesaumlungen doa wieda em Gloowen jestoakjt un neemen jieda Dach too” (Apj. 16:5).

2. Woo haft Jehowa siene Deena vonne 1919 aun jeleit un jeisteljet Äten jejäft?

² Jehowa haft daut fa siene Deena vondoag dän Dach uk fein enjerecht. Vonne 1919 aun haft Jesus eene kjliene Grupp jesaulwde Breeda jebrukt, om daut Prädichtwoakj to plonen un siene Nofolja jeisteljet Äten to jäwen (Luk. 12:42). a Dauts dietlich, daut Jehowa de Oabeit von dise Grupp Breeda jesäajent haft (Jes. 60:22; 65:13-14).

3-4. (a) Waut von Biespel wiest, daut et goot utkjemt, wan aules fein jeplont es? (b) Von waut woa wie en disen Artikjel räden?

 ³ Wan daut nich fein enjerecht wia, wudd wie daut Prädichtwoakj, waut Jesus ons oppjeef, nich derchfieren kjennen (Mat. 28:19-20). Toom Biespel: Wan daut nich jeplont wort, woo wie daut Jebiet von onse Vesaumlunk derchprädjen sullen, wudd jieda eena doa prädjen, wua dee wull. Bie eenje Städen wudd veleicht emma wada jeprädicht woaren un bie aundre wudd veleicht kjeenmol wäa prädjen. Faulen die noch aundre Sachen bie, waut fein utkomen, wäajen dee emma goot jeplont woaren?

⁴ Jesus sitt doano, daut fa Gott siene Deena vondoag dän Dach aules fein enjerecht es, krakjt soo aus hee daut deed, aus hee oppe Ieed wia. En disen Artikjel woa wie daut Biespel seenen, waut Jesus hinjaloten haft un woo onse Organisazion sikj no sien Biespel recht. Wie woaren uk doaräwa räden, woo wie ons Vetruen opp Jehowa siene Organisazion stoakjen kjennen.

ONSE ORGANISAZION RECHT SIKJ NO JESUS SIEN BIESPEL

5. Opp waut vonne Wajch recht wie ons no Jesus sien Biespel? (Johanes 8:28).

⁵ Jesus lieed daut von sienen Voda, waut hee sajen un doonen sull. Jehowa siene Organisazion recht sikj no Jesus sien Biespel un brukt Gott sien Wuat toom ons weeten loten, waut Rajcht un Orrajcht es un toom ons Rot jäwen fa ons Läwen (läs Johanes 8:28; 2. Tim. 3:16-17). Wie kjrieen uk emma wada denkjen jeholpen, daut wie Gott sien Wuat studieren sellen. Woo kjemt ons daut togood, wan wie daut doonen?

6. Woo kjemt ons daut togood, de Bibel to studieren?

⁶ Ons kjemt daut sea togood, daut wie onse Bieekja to Help nämen, wan wie de Bibel studieren. Doaderch kjenn wie biejlikj de Aunwiesungen, waut wie von de Organisazion kjrieen, met daut vejlikjen, waut de Bibel sajcht. Wan wie seenen, daut dis Rot sikj oppe Bibel stett, woat ons Vetruen opp Jehowa siene Organisazion noch jrata (Reem. 12:2).

7. (a) Äwa waut deed Jesus prädjen? (b) Woo recht Jehowa siene Organisazion sikj no sien Biespel?

⁷ Jesus prädicht “de goode Norecht von Gott sien Kjennichrikj” (Luk. 4:43-44). Jesus jeef siene Nofolja uk daut Jeboot, von daut Kjennichrikj to prädjen (Luk. 9:1-2; 10:8-9). Aul dee, waut vondoag dän Dach Poat von Jehowa siene Organisazion sent, prädjen de goode Norecht von daut Kjennichrikj, krakjt endoont wua dee wonen ooda woo väl Veauntwuatunk dee haben.

8. Waut vonne Iea hab wie?

⁸ Fa ons es daut eene groote Iea, daut wie to aundre kjennen äwa de Woarheit von Gott sien Kjennichrikj räden. Dise Iea haft nich irjentwäa! Biejlikj aus Jesus oppe Ieed wia, leet hee daut nich too, daut de beese Jeista to aundre von am räden kunnen (Luk. 4:41). Daut een Mensch bie dise Tiet met Jehowa siene Deena toop kaun prädjen gonen, mott dee ieescht doano läwen, waut Jehowa fa Rajcht talt. Wie wiesen, waut vonne groote Iea daut fa ons es, wan wie de Menschen aulawäajen un soo foaken aus mäajlich prädjen. Wie wellen soo sennen aus Jesus un ons Bastet doonen, om aundre de Woarheit to prädjen un to lieren (Mat. 13:3, 23; 1. Kor. 3:6).

9. Woo moakt Jehowa siene Organisazion Gott sienen Nomen bekaunt?

⁹ Jesus muak Gott sienen Nomen bekaunt. Aus Jesus to sienen himlischen Voda bäd, säd hee: “Ekj hab dienen Nomen bekauntjemoakt” (Joh. 17:26). Jehowa siene Organisazion, waut sikj no Jesus sien Biespel recht, deit soo väl aus mäajlich, om aundre  met Gott sienen Nomen bekaunttomoaken. Eene goode Wajch, woo dee daut doonen es, derch De Bibel – Niee-Welt-Äwasatunk. En dise Bibel es Gott sien Nomen wada aulawäajen bennen, wua dee hanjehieet. Dise Bibel es gaunz ooda Poatwies opp mea aus 270 Sproaken äwasat. En daut Heft Help fa daut Bibelstudium, Sied 1-11 kaust du mea doaräwa lieren, wuarom un woo Gott sien Nomen wada en de Bibel nennjemoakt wort. Doa woat daut uk utjelajcht, wuarom Gott sien Nomen en de Christelje Griechische Schreften 237 Mol bennen stonen saul.

10. Waut kaust du von daut lieren, waut eene Fru säd?

¹⁰ Wie wellen krakjt soo aus Jesus soo väl Menschen aus mäajlich met Gott sienen Nomen bekauntmoaken. Aus eene Fru en Myanmar, waut 67 Joa wia, lieed, waut Gott sien Nomen es, funk see aun to roaren un säd: “Dits daut ieeschte Mol en mien Läwen, daut ekj jehieet hab, daut Gott sien Nomen Jehowa es. . . . Jie haben mie daut Wichtichste jelieet, waut een Mensch jeemols lieren kaun.” Soo aus wie aun dise Jeschicht seenen kjennen, kaun daut opprechtje Menschen äa Läwen endren, wan dee lieren, waut Gott sien Nomen es.

DOO WIEDA OPP JEHOWA SIENE ORGANISAZION VETRUEN

11. Woo kjennen de Eltestasch wiesen, daut see opp Jehowa siene Organisazion vetruen? (See uk daut Bilt.)

¹¹ Woo kjennen de Eltestasch wiesen, daut see opp Jehowa siene Organisazion vetruen? Dee sellen de Aunwiesungen, waut see kjrieen, fein studieren un dee soo goot aus mäajlich nokomen. Biejlikj kjrieen dee Aunwiesungen, woo dee de veschiedne Poats biem Toopkomen leiden sellen, woo dee äare Jebäda sellen sennen, wan dee ver de Vesaumlunk bäden, un woo dee fa Christus siene Schop sorjen sellen. Wan de Eltestasch de Aunwiesungen nokomen, waut dee von de Organisazion kjrieen, dan feelen de Breeda un Sestren sikj secha un von Jehowa jeleeft.

12. (a) Wuarom sell wie met dee toopschaufen, waut de Leidunk haben? (Hebräa 13:7, 17). (b) Wuarom sell wie no dee äare goode Sieden kjikjen?

¹² Wan wie von de Eltestasch Rot kjrieen, dan sell wie daut wellich nokomen. Wan wie daut doonen, dan moak wie dee äare Oabeit leichta. De Bibel rot ons too, no deejanje to horchen un unjadon to sennen, waut de Leidunk haben (läs Hebräa 13:7, 17, NW). Wuarom kaun daut eenjemol schwoa sennen? Wäajen dise Mana onvolkomen sent. Wan wie no dee äare schlajchte Sieden kjikjen enne Städ no dee äare goode, dan unjastett wie en Werkjlichkjeit onse Jäajna. Opp waut vonne Wajch? Wan wie bloos no de Eltestasch äare schlajchte Sieden kjikjen wudden, dan kunn wie uk aunfangen, schlajcht äwa de Organisazion to denkjen un nich mea opp dee to vetruen; dauts krakjt, waut onse Jäajna wellen. Woo kjenn wie weeten, woont Läajes von onse Jäajna sent un dee aufwiesen?

LOT DIE DIEN VETRUEN OPP JEHOWA SIENE ORGANISAZION NICH SCHWAK MOAKEN

13. Woo proowen Gott siene Jäajna de Organisazion eenen schlajchten Nomen to moaken?

¹³ Gott siene Jäajna proowen, de goode Sachen von Jehowa siene Organisazion soo hantodreien, daut et no waut Schlajchtet lat. Biejlikj hab wie von de Schreft jelieet, daut Jehowa velangt, daut wie sellen em kjarpalichen rein sennen, een reinet Läwen fieren un am soo deenen, aus hee daut haben well. Hee sajcht, daut soone, waut Schlajchtet doonen un nich doamet opphieren, sellen ut de Vesaumlunk utjeschloten  woaren (1. Kor. 5:11-13; 6:9-10). Wie hoolen ons aun dit Jeboot ut de Bibel. Oba onse Jäajna sajen, daut wie de Menschen nich leewen, daut wie dee hunjsch rechten un daut wie nuscht met dee to doonen haben, waut een kjlienet bät aundasch sent aus wie.

14. Von wäm komen de oppjemoakte Jeschichten äwa Jehowa siene Organisazion?

¹⁴ Denkj doaraun, wäa de Organisazion schoden well. De Soton vebreet de Läajes äwa Jehowa siene Organisazion. Hee es “de Voda von de Läajes” (Joh. 8:44; 1. Mo. 3:1-5). Soo, wie kjennen doamet räakjnen, daut de Soton siene Menschen brucken woat, om oppjemoakte Jeschichten äwa Jehowa siene Organisazion to vebreeden. Daut wia aul bie Jesus un de ieeschtemmasche Christen soo.

15. Waut deeden de Gloowesleidasch to Jesus un siene Nofolja?

¹⁵ Jesus wia volkomen un deed groote Wunda, oba de Soton brukt dan noch eenje Menschen, om Läajes von am to vebreeden. Biejlikj säden de Gloowesleidasch, daut Jesus de beese Jeista utdriewen kunn derch “dän Harscha von de beese Jeista” (Mar. 3:22). Aus Jesus verem Jerecht wia, säden de Gloowesleidasch, daut Jesus jelastat haud un beräden de Menschen, daut dee sullen froagen, Jesus doottomoaken (Mat. 27:20). Lota, aus Jesus siene Nofolja de goode Norecht prädjen deeden, räajden de Jäajna de “Menschen von de Velkja opp un hitzen dee en”, de Christen to vefoljen (Apj. 14:2, 19). De Woaktorm vom 1. Dezamba 1998 räd von Aposteljeschicht 14:2 un säd, daut deejanje, waut dän Soton unjastetten, de Christen äare Norecht aufwiesen deeden. Un dee säden uk schlajchte Sachen von de Christen, soo daut de Menschen nich wudden no dee horchen ooda dee soogoa schlajcht lieden kjennen.

16. Aun waut sell wie denkjen, wan wie oppjemoakte Jeschichten hieren?

 ¹⁶ De Soton vebreet noch emma Läajes; dee deit noch emma “de gaunze Welt” veleiden (Opb. 12:9). Wan du schlajchte Jeschichten hieescht äwa de Organisazion ooda äwa de Breeda, waut de Leidunk haben, dan denkj doaraun, daut Gott siene Jäajna daut bie Jesus un bie de ieeschtemmasche Christen uk deeden. Jehowa siene Deena woaren vondoag dän Dach vefolcht un von dee woat Läajes vetalt, krakjt soo aus de Bibel daut verutsäd (Mat. 5:11-12). Wan wie doaräwa nodenkjen, wäa doahinja stakjt, dan woa wie soone oppjemoakte Jeschichten nich jleewen un woaren fuaz waut doonen toom ons beschitzen. Woo kjenn wie daut krakjt doonen?

17. Waut kjenn wie doonen, daut de onwoare Jeschichten ons nich schoden kjennen? (2. Timotäus 1:13). (See uk daut Hock “ Waut saust du doonen, wan du oppjemoakte Jeschichten hieescht?”)

¹⁷ Wies oppjemoakte Jeschichten auf. De Apostel Paulus säd gaunz kloa, waut wie doonen sellen, wan wie oppjemoakte Jeschichten hieren. Hee säd to Timotäus, daut hee eenje woarnen sull, de “windje Jeschichten . . . auntsied [to] lajen”, aulsoo nich no onwoare Jeschichten horchen, un daut see dise “onwoare Jeschichten” aufwiesen sullen (1. Tim. 1:3-4; 4:7, NW). Een Bäbe nemt sikj veleicht irjentwaut von oppe Flua un stopt sikj daut em Mul. Oba een groota Mensch wudd daut kjeenmol doonen, wiels dee weet, daut et kaun jefäadlich sennen. Wie wiesen oppjemoakte Jeschichten auf, wiels wie weeten, von wua dise Läajes häakomen. Wie hoolen ons leewa “aun de heelsome Wieed” von de Woarheit (läs 2. Timotäus 1:13).

18. Woo kjenn wie wiesen, daut wie opp Jehowa siene Organisazion vetruen?

¹⁸ Wie haben noch mol bloos dreeatlei jeseenen, woo Jehowa siene Organisazion sikj no Jesus sien Biespel recht. Wan du de Bibel studieescht, dan kjikj doano, opp waut vonne Wajch dee daut noch deit. Halp aundre en diene Vesaumlunk, een jratret Vetruen opp de Organisazion to kjrieen. Un wies, daut du de Organisazion vetruen deist, doaderch daut du Jehowa met dee toop tru deenst, wiels Jehowa brukt dise Organisazion, om sienen Wellen derchtofieren (Psa. 37:28). Well wie dise Iea sea schazen, daut wie kjennen Poat von Jehowa siene leeftolje un true Famielje sennen.