1. Mu luholo lutshi akombeledi a Yehowa akhalele mutuamezewa mu siekle ya thomo?

 GULA Yehowa wahana akombeledi enji mudimo, wana tshigina egi a ukalagale mu luholo luatagana. (1 Kol. 14:33) Ha gufezegesa, Nzambi wana tshigina egi lukuma luabonga lulongesewe ha mavu agasue. (Mat. 24:14) Yehowa wahanele Yesu ginemo gia gutuameza mudimo wene wa gulongesa. Yesu walondele ndaga hagula mudimo wene ukalegewe mu luholo luabonga. Tangua ahagele mahungu mu mafundo agudisha mu siekle ya thomo, atombele nji akulu ha gutuameza mahungu ene. (Makal. 14:23) Hunji dia akulu atuameji dia gu Yelusalema diakhalele mutuamezewa gudi apostolo nu akulu. Ene akhalele muzula badesizio ako athu agasue mu hungu akhalele naye gutumagela. (Makal. 15:2; 16:4) Luholo akhalele mutumagela malongo a hunji dia akulu atuameji, ‘gutshigina guawo guakhalele mukola. Athu avula akhalele mubua alandudi.’​—Makal. 16:5.

2. Sendese mu 1919, mu luholo lutshi Yehowa wana tuameza akombeledi enji nu guahana ima ya gudia ya mu nyuma?

² Mangino nji Yehowa wana landula gutuameza akombeledi enji. Sendese mu 1919, Yesu wana watombele hunji dia zonda dia Aklisto a mbiwe maji mu nyuma ha gutuameza mudimo wa gulongesa nu guhana ima ya gudia ya mu nyuma mu tangua diatagana gudi alandudi enji. a (Luka 12:42) Yehowa wana shimbiga  diago mudimo aphangi ene ana tshita.​—Yesh. 60:22; 65:13, 14.

3-4. a) Hana gifezegeselo gidi mumonesa gubonga tuana heta luholo tudi mu ulondegi wa Yehowa. b) Itshi tuza muzuelela mu longo edi?

³ Gula nga tuakhalelego nu athu a gututuameza, nga yana khala lamba ha gukalaga mudimo Yesu watuhanele ha gutshita. (Mat. 28:19, 20) Ha gufezegesa, gula nga hungu nu hungu diana khalago nu terituare yenji, nga muthu wagasue wana longesa fundo diatshigina muene. Ngenyi, nga terituare jiko jiana longesewa muavula uvi jiko ndo. Gubonga gutshi guko tuajiya guheta mu luholo tuana khala mu ulondegi wa Yehowa?

⁴ Hakhalele Yesu ha mavu, walondele ndaga muabonga mukunda nu alandudi enji. Mangino nji, wana landula gulondega ndaga mukunda nu akombeledi a Nzambi. Mu longo edi, tuza mutadila gifezegeselo giabembele Yesu, nu luholo ulondegi wetu wana landula gifezegeselo giene. Tuza mumona nji luholo tuajiya gumonesa egi tuana shila ulondegi wa Yehowa mutshima.

ULONDEGI WETU WANA LANDULA GIFEZEGESELO GIA YESU

5. Mu luholo lutshi tudi naye gulandula gifezegeselo gia Yesu? (Yone 8:28)

⁵ Yesu walanduile gifezegeselo gia Sh’enji mu luholo luenji lua gutshita ndaga nu lua guzuela. Ulondegi wa Yehowa wana landula gifezegeselo gia Yesu, tangua wana kalegela Mbimbi ya Nzambi ha gutukuatesa ha gujiya ndaga jiabonga nu jiabola, nu ha gututuameza mu monyo wetu. (Tanga Yone 8:28; 2 Tim. 3:16, 17) Ana gutuwunguluisa tangua diagasue ha gutanga Mbimbi ya Nzambi nu ha guyitumagela. Gubonga gutshi tuajiya guheta gula tualandula malongo awa?

6. Mu luholo lutshi tuajiya guheta gubonga tangua tudi mulonguga Biblia?

⁶ Tuana heta gubonga guavula tangua tuana longuga Biblia mu njila ya mikanda yetu. Ha gufezegesa, tuana fuanesa malongo a Biblia nu utuameji wana gutuhana ulondegi wa Yehowa. Tangua tuana kotelesa egi utuameji wene wana katuga mu Mbimbi ya Nzambi, yana gutukuatesa ha gushila diago ulondegi wa Yehowa mutshima.​—Roma 12:2.

7. Lukuma lutshi Yesu walongesele? Luholo lutshi ulondegi wa Yehowa wana landula gifezegeselo gienji?

⁷ Yesu walongesele “lukuma luabonga lua Ufumu wa Nzambi.” (Luka 4:43, 44) Watumile nji alandudi enji ha gulongesa lukuma lua Ufumu wa Nzambi. (Luka 9:1, 2; 10:8, 9) Mangino, akombeledi a Yehowa agasue ana longesa lukuma luabonga mu mafundo agasue ana jinga ikhale adi nu inemo yavula mu ulondegi.

8. Luendu lutshi Nzambi watuhanele?

⁸ Tudi diago nu luendu lua gulongesa athu ako lukuma luabonga lua Ufumu wa Nzambi! Nzambi gahanelego luendu luene gudi muthu wagasue. Ha gufezegesa, tangua Yesu wakhalele ha mavu, gabembelego egi bademo azuelele ndaga jidi gumutadila. (Luka 4:41) Mangino, hagula egi muthu ahete luendu lua gulongesa lukuma luabonga hamoshi nu akombeledi a Yehowa, udi naye gukhala nu makalegelo ana suanguluisa Nzambi. Tuana monesa egi tuana suanguluga nu luendu luene, tangua tuana longesa lukuma luabonga fundo diagasue tudi, nu tangua diagasue tuaheta okazio. Tuana landula gifezegeselo gia Yesu tangua tuana tshita ngolo ha gulongesa giamatshidia gia Ufumu wa Nzambi gudi athu ako.​—Mat. 13:3, 23; 1 Kol. 3:6.

9. Luholo lutshi ulondegi wa Yehowa wana kuatesa athu ako ha gujiya jina dia Nzambi?

⁹ Yesu walongesele athu jina dia Nzambi. Yesu wawambelele Sh’enji mu gisambu egi: “Ngaajiyishile jina diaye.” (Yone 17:26) Ulondegi wa Yehowa wana zola ikadigilo yavula yana kuatesa athu ako ha gujiya jina dia Nzambi. Mu Biblia Gubalumuna gua Mavu Ahe-ahe, jina dia Nzambi diavutudiwe mu mafundo agasue diakhalele  thomo. Biblia yene yazolewa gale ya mudidi nga ndambo mu mazuelelo hehi nu 270. Ha gujiya mukunda natshi avutuile jina dia Nzambi mu Biblia yene, tanga Appendice A4 nu A5. Mu Appendice C adi mu Bible d’étude, mudi nu ijiyishilo idi mumonesa egi jina dia Nzambi didi naye gukhala mahugo 237 mu Gitshinyi gia Biblia Giasonegewe mu Greke.

10. Longo ditshi wazula mu ndaga jiazuelele phangi wa mukhetu wana khala gu Birmanie?

¹⁰ Esue nji, tuana tshigina gukuatesa athu avula ha gujiya jina dia Nzambi gifua luholo Yesu wakalegele. Phangi mumoshi wa mukhetu gu Birmanie udi nu ivo 67; walongugile egi Nzambi wana khala nu jina; havile muene ngenyi, wadidile, wazuelele egi: “Idi mbala yami ya thomo ya guvua egi jina dia Nzambi Yehowa. . . . Wangulongesa ndaga imoshi ya ndando ngakhalelego mujiya.” Gifua luholo eksperianse eyi yayimonesa, gula athu ajiya jina dia Nzambi, yajiya gusombegesa monyo wawo.

LANDULA GUMONESA EGI WANA SHILA ULONDEGI WETU MUTSHIMA

11. Luholo lutshi akulu ajiya gumonesa egi ana shila ulondegi wa Nzambi mutshima? (Tala nji gifuanesa.)

¹¹ Luholo lutshi akulu ajiya gumonesa egi ana gushila ulondegi wa Nzambi mutshima? Gula ulondegi wa Yehowa wahana akulu malongo, adi naye guatanga muabonga nu adi naye gutshita yagasue ha guatumagela. Ha gufezegesa, ana guahana malongo ana monesa luholo lua gutuameza gudibungisa nu gukombelela mukunda nu aphangi mu hungu. Malongo ene ana guamonesa nji luholo lua gubamba imeme ya Klisto. Gula akulu adi mutumagela malongo adi guahana ulondegi, ana kuatesa aphangi ha gudivua egi Yehowa wana guazumba nu wana gudisagesa mukunda nu ene.

12. a) Mukunda natshi tudi naye gutumagela athu ana gututuameza? (Hebelu 13:7, 17) b) Mukunda natshi tudi naye phamba gutala makalegelo awo abonga?

¹² Gula akulu atuhana malongo, tudi naye guatumagela nu mutshima umoshi. Gula tuatshita ngenyi, mbatuakuatesa ha gukalagala mudimo wawo muabonga. Biblia yana gututoga ha gutumagela athu ana gututuameza. (Tanga Hebelu 13:7, 17.) Mukunda natshi yajiya gukhala lamba mu matangua ako ha gutumagela akulu? Handaga ashigo athu atagana. Uvi gula tudi mutala phamba ndaga jiabola ana tshita ha fundo dia gutala makalegelo awo abonga, mbatuhana njila gudi mbalagaji jietu ha gutubinga. Mu luholo lutshi? Mbatushigo luko muhagela ulondegi wa Yehowa mutshima, gifua luholo mbalagaji jietu jiana tshigina. Itshi tuajiya nji gutshita ha gujiya ndaga jia mambo jiana zuela mbalagaji jietu nu gujituna?

UBEMBIGO EGI ATHU AGUTUME HA GUTUNA GUSHILA ULONDEGI WA YEHOWA MUTSHIMA

13. Mu luholo lutshi mbalagaji jia Nzambi jiana monesa egi ndaga jiana kalagala ulondegi wa Yehowa jidi jiabola?

¹³ Mbalagaji jia Nzambi, jiana tshita yagasue ha gumonesa egi ndaga jiana kalagala ulondegi wa Yehowa jidi jiabola. Ha gufezegesa, Mbimbi ya Nzambi yana monesa egi Yehowa wana tshigina egi akombeledi enji akhale aphelegeta mu muila, mu makalegelo nu mu nyuma. Wana zuela nji egi muthu wagasue watuna gubalumuna mutshima gu ndaga jiabola jidi muene mutshita, udi naye guzolewa mu hungu. (1 Kol. 5:11-13; 6:9, 10) Tuana tumagela mukhuala wene wa Biblia. Uvi luholo tuana guwutumagela, mbalagaji jietu jiana zuela egi tuana zumba ndo athu ako nu tuana guasophesa. Ana zuela nji egi tuanago gutshigina athu adi yagudisha nu esue.

14. Nanyi udi ha gishina gia ndaga jiabola athu ana zuela mukunda nu ulondegi wa Yehowa?

¹⁴ Tshita ngolo ha gujiya muthu udi diago mbalagaji wetu. Satana Diabulu wana zuela ndaga jia mambo mukunda nu ulondegi wetu. Muene udi “sha mambo.” (Yone 8:44; Gis. 3:1-5) Hene tudi naye gujiya egi Satana mbawukalegela  mbalagaji jietu ha guzuela ndaga jia mambo mukunda nu ulondegi wa Yehowa. Wakalegele ndaga jia luholo elu mu siekle ya thomo.

15. Itshi mafumu a ikombelelo ya mambo atshitshile Yesu nu alandudi enji?

¹⁵ Yesu wakhalele muthu wa tagana nu wakhalele mukalagala ndaga jia gushimana, uvi Satana wakalegele athu ha guzuela ndaga jia mambo mukunda nu muene. Ha gufezegesa, mafumu a ikombelelo akhalele muwambela athu egi ngolo Yesu wakhalele muzolela athu bademo jiakhalele mukatuga gudi “fumu wa bademo.” (Mako 3:22) Tangua Yesu wakhalele mumona malamba, mafumu a ikombelelo amufundjile egi udi mushinga Nzambi, hene ashinjigile athu ha gutoga egi ashiyiwe. (Mat. 27:20) Gungima, alandudi a Klisto akhalele mulongesa lukuma luabonga, uvi athu anyi akhalele mutuna lukuma luene “ashinjigile enya ifutshi iko” ha gusagesa Aklisto ene. (Makal. 14:2, 19) Inzo Yaleha ya Mutaledi ya 1 Decembre 1998 yakhalele muzuela mukunda nu mukanda wa Makalegelo 14:2 egi: “Athu anyi akhalele gukhanda ya Satana, akhalele mutuna lukuma luabonga Aklisto akhalele mulongesa. Akhalele nji muzuela ndaga jiabola mukunda nu ene hagula egi athu a ategelelago nu a abuise mbalagaji jiawo.”

16. Itshi tudi naye guwunguluga gula tuavua mene jia mambo?

¹⁶ Satana gabembelego mambo ene phamba mu siekle ya thomo. Mangino nji wana landula ‘guhuiga athu a ha mavu agasue.’ (Gumo. 12:9) Gula wavua mene jia mambo mukunda ulondegi wa Yehowa nga mukunda nu aphangi ana gutuameza, wunguluga luholo mbalagaji jia Nzambi jiakalegele Yesu ndaga nu alandudi enji mu siekle ya thomo. Mangino akombeledi a Yehowa ana tagana nu usageshi, athu ana guasegulula nji gifua luholo Biblia yadiangele  guyizuela. (Mat. 5:11, 12) Gula tudi mujiya muthu udi ha gishina gia ndaga jia mambo athu ana zuela mukunda nu esue nu tuadibamba gu mambo ene, mbatushigo mubemba egi ndaga jiene jituhuige. Itshi tudi naye gutshita ha gudibamba?

17. Itshi tuajiya gutshita hagula tuhuigiwago gu mene jia mambo? (2 Timote 1:13) (Tala nji galuandaga “ Itshi Wajiya Gutshita Gula Wavua Mene jia Mambo.”)

¹⁷ Tuna mene jia mambo. Mupostolo Phaula wamonesele haphelo ndaga tudi naye gutshita, gula tuavua athu muzuela ndaga jia mambo mukunda nu esue. Walezele Timote ha ‘guwambela athu ako hagula alongesago . . . nu alandulago mene jia mambo handaga’ “jianago gunemesa Nzambi.” (1 Tim. 1:3, 4; 4:7) Mona wazonda wajiya gunona gima mu mavu agimbi mukano dienji, uvi muthu wa gukula gajiyilego gutshita ngenyi handaga wana jiya egi yajiya gumubatela misongo. Tuana tuna mene jia mambo handaga tuana jiya fundo mene jiene jiana katuga. Tudi naye gujiya egi phamba “mbimbi jiabonga” nu jia giamatshidia tudi naye gutegelela.​—Tanga 2 Timote 1:13.

18. Luholo lutshi tuajiya gumonesa egi tuana shila ulondegi wa Yehowa mutshima?

¹⁸ Mu longo edi, tuazuelela phamba maluholo thathu ulondegi wa Yehowa wana landula gifezegeselo gia Yesu. Tangua udi mulonguga Biblia, tshita ngolo ha gumona maluholo ulondegi wetu wana landula gifezegeselo gia Yesu. Khala mukuatesa athu ako a mu hungu dienu ha gulandula gushila ulondegi wa Yehowa mutshima. Gula udi mulandula gukombelela Yehowa nu guzumba guagasue, nu udi yagujinginyina gu ulondegi wana kalegela muene ha gutagenesa gutshigina guenji, mbawumonesa egi wana gumushila mutshima. (Ngi. 37:28) Mukut’etu agasue, tulandulenu guhana Yehowa mersi mukunda nu luendu lua gumukalegela hamoshi nu akombeledi enji ana gumuzumba nu ana gumukombelela nu mutshima umoshi.