1. Akapeea te iti tangata o Iehova te akaaereia anga i te anere mataiti mua?

 ME ORONGA a Iehova i tetai angaanga ki tona iti tangata, ka inangaro aia kia rave ratou i te reira ma te tu mako e te meitaki. (1 Kori. 14:33) Ei akaraanga, ko te anoano o te Atua kia tutu aereia te evangeria e kako rava ake te ao katoa nei. (Mata. 24:14) Kua iki a Iehova ia Iesu ei arataki i teia angaanga, e kua akapapu a Iesu e te raveia ra te reira ma te tu mako e te meitaki. I te anere mataiti mua, te akamata anga te au putuputuanga i te au enua ke, kua ikiia te aronga pakari kia oronga i te aratakianga. (Anga. 14:23) Ko te pupu aronga pakari i Ierusalema, tei kapiti mai i te au apotetoro e te aronga pakarikari, na ratou e rave i te au ikianga na te au putuputuanga. (Anga. 15:2; 16:4) Tei tupu, kua “tinamou atura te au ekalesia i te akarongo anga i te tuatua, tupu atura i te maata anga, kare e rā i tivata.”—Anga. 16:5.

2. Mei te 1919, akapeea a Iehova te arataki anga e te oronga anga i te kai pae vaerua ki tona iti tangata?

² Te akaaere nei rai a Iehova i tona iti tangata i teia rā. Mei te mataiti 1919, kua taangaanga a Iesu i tetai pupu meangiti o te au taeake akatainuia kia akaaere i te angaanga tutu aere e te oronga i te kai pae vaerua na tana au pipi. a (Luka 12:42) Mea papu, te akameitaki nei a Iehova i ta ratou angaanga.—Isa. 60:22; 65:​13, 14.

3-4. (a) Akatutu akapeea tatou e puapinga ai me akaaere meitakiia tatou. (e) Eaa ta tatou ka uriuri i roto i teia atikara?

³ Me kare tatou i akaaere meitakiia, kare i reira e rauka ia tatou i te rave i te angaanga ta Iesu i akaue kia rave  tatou. (Mata. 28:​19, 20) Penei ei akaraanga, me kare e ngai i akanooia no te angaanga tutu aere ka tutu aere ua tatou i te au ngai ta tatou ka inangaro. Te ka tupu, ka tutu aere te au papuritia ki taua ngai rai e kare i atoroia tetai au ngai ke. Ka rauka ainei ia koe i te akamanako i te au akameitakianga no tei akaaere meitakiia tatou?

⁴ Mei ta Iesu akaaere anga i tana au pipi iaia i te enua, te akaaere katoa nei aia i te iti tangata o te Atua i teia rā. I teia atikara, ka uriuri tatou i te akaraanga ta Iesu i akanoo e akapeea te akaaerenga me aru i te reira. Ka uriuri katoa tatou akapeea me akaari i to tatou irinaki i te akaaerenga a Iehova.

KA ARU TA TATOU AKAAERENGA I TE AKARAANGA O IESU

5. Eaa tetai ravenga ka aru tatou i te akaraanga o Iesu? (Ioane 8:28)

⁵ Kua apii a Iesu mei tona Metua i te rangi eaa tana ka rave e tana ka tuatua. Te aru nei te akaaerenga a Iehova i te akaraanga o Iesu na te akatumu anga i ta ratou au apiianga e te aratakianga ki runga i te Tuatua a te Atua. (E tatau ia Ioane 8:28; 2 Timo. 3:​16, 17) Ka akamaara te reira ia tatou kia tatau i te Pipiria e kia taangaanga i ta tatou i apii mai. Akapeea tatou e puapinga ai mei teia ako?

6. Akapeea tatou e puapinga ai mei te apii anga i te Pipiria?

⁶ Ka puapingaia tatou me apii i te Pipiria ma te tauturu a ta tatou au puka. Ei akaraanga, ka akaaite tatou i te au apiianga Pipiria ki te aratakianga a te akaaerenga. Me kite tatou e kua akatumuia te reira ki runga i te au irava, ka tupu maata to tatou irinaki ki roto i te akaaerenga a Iehova.—Roma 12:2.

7. Eaa te karere ta Iesu i tutu aere, e akapeea ta Iehova akaaerenga te aru anga i tona akaraanga?

⁷ Kua tutu aere a Iesu i “te evangelia o te basileia o te Atua.” (Luka 4:​43, 44) Pera katoa, kua akaue a Iesu i tana au pipi kia tutu aere i te karere Patireia. (Luka 9:​1, 2; 10:​8, 9) I teia rā, te tutu aere nei te katoatoa i roto i ta Iehova akaaerenga i te karere Patireia noatu to ratou ngai e noo ra e ta ratou au apainga.

8. Eaa te tikaanga ngateitei tei orongaia mai kia tatou?

⁸ E tikaanga ngateitei kia akakite i te tuatua mou no te Patireia o te Atua ki tetai ke! Kare te reira akameitakianga i orongaia ki tetai ua atu. Ei akaraanga ia Iesu i te enua, kare aia i akatika ana i te au temoni kia tutu aere no runga iaia. (Luka 4:41) I teia rā, i mua ake ka tutu aere ei tetai tangata ma te Au Kite o Iehova, ka anoanoia aia kia rave i te au tauianga kia rauka iaia te reira tikaanga. Ka akaari tatou i te tu āriki rekareka no te tikaanga kia tutu aere na te akakite anga i te nuti meitaki i tetai ua atu ngai e i tetai ua atu taime. Mei ta Iesu i rave, ko to tatou akakoroanga ko te tatanu e te pīpī i te ua o te tuatua mou ki roto i te ngakau o te tangata.—Mata. 13:​3, 23; 1 Kori. 3:6.

9. Akapeea te akaaerenga te akakite anga i te ingoa o te Atua?

⁹ Kua akakite a Iesu i te ingoa o te Atua. I roto i tana pure ki tona Metua i te rangi, karanga a Iesu: “E akakite atu rai au, i toou ingoa.” (Ioa. 17:26) Kia aru i to Iesu akaraanga, kua tauta te akaaerenga a Iehova i te tauturu i tetai ke kia kite i te ingoa o te Atua. Kua akaoki mai te New World Translation of the Holy  Scriptures i te ingoa o te Atua ki tona ngai tikai. Kua uriia te katoaanga me kore tetai tuanga o te Pipiria ki roto i te 270 au reo. I roto i te Appendix A4 e te A5 o teia Pipiria, ka kite maata atu tatou akapeea te ingoa o te Atua te akaokiia mai anga ki roto i te Pipiria. Akamārama mai te Appendix C i roto i te Study Bible e ko te tikaanga tikai, ka kiteaia te ingoa o te Atua i roto i te au Tuatua Tapu Ereni Kerititiano e 237 taime.

10. Eaa taau i kite mai mei ta tetai vaine i Myanmar i tuatua?

¹⁰ Mei ia Iesu, ka inangaro tatou i te tauturu i te maataanga o te tangata kia kite i te ingoa o te Atua. Te apii anga tetai vaine i Myanmar e 67 ona mataiti i te ingoa o te Atua, kua karanga aia ma te aue: “Ko te taime mua teia i rongo ei au ko Iehova te ingoa o te Atua. . . . Kua apii mai koe iaku i te mea puapinga rava atu.” Mei teia tupuanga, ka akakeu maataia te ngakau o te tangata me kite ratou i te ingoa o te Atua.

AKAARI UA RAI I TE TU IRINAKI NO TA TATOU AKAAERENGA

11. Akapeea te aronga pakari me akaari i to ratou irinaki i te akaaerenga? (Akara katoa i te tutu.)

¹¹ Eaa tetai ravenga ka akaari te aronga pakari e te irinaki ra ratou i ta te Atua akaaerenga? Me oronga mai te akaaerenga i te aratakianga na te aronga pakari, ka anoanoia ratou kia tatau meitaki e kia taangaanga i te reira. Ei akaraanga, ka orongaia kia ratou te aratakianga akapeea me rave i te au tuanga no te uipaanga, akapeea me oronga i te pure, e akapeea me akono i te au mamoe a Karaiti. Me aru te aronga pakari i te aratakianga a te akaaerenga, ka kite te au taeake e te au tuaine i to Iehova aroa e tana akono anga ia ratou.

12. (a) Eaa tatou ka akarongo ei ki te aronga e arataki ra ia tatou? (Ebera 13:​7, 17) (e) Eaa tatou ka akamou ei ki runga i te au tu meitaki o te aronga e arataki ra?

¹² Me oronga te aronga pakari i te aratakianga, kia aru puareinga ua tatou i te reira. Me pera tatou, ka māmā ua i te aronga e arataki ra ia tatou i te rave i ta ratou angaanga. Te akamaroiroi maira te Pipiria ia tatou kia akarongo e kia kauraro ki te aronga pakari. (E tatau ia Ebera 13:​7, 17.) Tetai taime e ngatā i te rave i te reira. Eaa te tumu? No te mea e aronga apa ua ratou. Inara, me akamou tatou ki runga i to ratou tu tarevake e kare i to ratou tu meitaki, te tauturu ra tatou i to tatou au enemi. Akapeea ra? Ka akatupu te reira i te manako ekoko no te akaaerenga a te Atua. Ko ta te aronga patoi teia e tauta nei i te rave. Eaa i reira ta tatou ka rave kia patoi i te pikikaa a te au enemi?

AURAKA E TUKU I TETAI KE KIA AKAPARUPARU I TOOU TU IRINAKI

13. Akapeea to te Atua au enemi te akakino anga i tana akaaerenga?

¹³ Ka tauta te aronga patoi i te akakino i te akaaerenga a Iehova. Ei akaraanga, kua apii mai tatou mei te Pipiria e te anoano maira a Iehova i te aronga akamori iaia kia mā i te pae kopapa, pae manako e te pae vaerua. Karanga aia e ko tetai tei rave i te ara kino e kare i tataraara, ka akaateaia mei te putuputuanga. (1 Kori. 5:​11-13; 6:​9, 10) Ka akarongo tatou ki teia akauenga Pipiria. Inara te akaapa ra te aronga patoi e kare tatou e aroa ana i te tangata, te akaapa e te akavaavaa ra tatou ia ratou.

14. Koai te akatupu ra i te au tua pikikaa no te akaaerenga?

 ¹⁴ Kia kite i te tumu o te kino. Ko Satani te Tiaporo e akakite nei i te au tua pikikaa. Koia te ‘metua no te pikikaa.’ (Ioa. 8:44; Gene. 3:​1-5) No reira ka taangaanga a Satani i tona aronga turuturu kia akatotoa i te au tua pikikaa no runga i ta Iehova akaaerenga. Ko teia tei tupu i te anere mataiti mua.

15. Eaa ta te au arataki akonoanga i rave kia Iesu e tana au pipi?

¹⁵ Noatu e tu apa kore to Iesu te Tamaiti a te Atua e kua rave aia i te au temeio, kua taangaanga a Satani i tona au tavini kia akakite aere i te au pikikaa no runga iaia. Ei akaraanga, kua akakite te au arataki akonoanga e ko te mana o Iesu i te tuaru i te au temoni, no ko mai i “taua demoni maata ra.” (Mare. 3:22) Te akava angaia a Iesu, kua akaapa te au arataki akonoanga iaia ei tangata pikikaa e kua māro ratou i te urupu tangata kia tamate iaia. (Mata. 27:20) I muri mai i te tutu aere anga te au pipi a Karaiti i te nuti meitaki, ko te aronga tei patoi ia ratou kua “taoriori atura ratou i te au etene, e akaki atura oki i to ratou ngakau ki te riri i te au taeake” Kerititiano. (Anga. 14:​2, 19) Kia tau kia Angaanga 14:​2, akamārama mai Te Punanga Tiaki o Titema 1, 1998: “Kare i mareka i ta ratou uaorai kopaeanga i te tuatua ra, kua rave atu te au ngati Iuda patoi ra i tetai ravenga tairo anga, i te tauta anga kia akariri i te aronga Kenitara ra ki te au Kerititiano.”

16. Eaa ta tatou ka akamaara me rongo tatou i te au akakiteanga pikikaa?

¹⁶ Kare a Satani i akamutu ana i tana au pikikaa i te anere mataiti mua. I teia  tuatau, koia “tei pikikaa i to te ao katoatoa nei.” (Apo. 12:9) Me akarongo koe i tetai au akakiteanga kino no runga i te akaaerenga me kore no te au taeake e arataki nei, e akamaara i ta te Atua au enemi i rave kia Iesu e te au pipi i te anere mataiti mua. I teia rā, te takinokinoia e te pikikaaia ra te iti tangata o Iehova mei tei totouia i roto i te Pipiria. (Mata. 5:​11, 12) Kare tatou e vare i te au akakiteanga pikikaa me kite tatou e koai te akatupu ra i te reira, ka viviki ua tatou i te paruru ia tatou uaorai. Akapeea tatou me rave i te reira?

17. Akapeea tatou me kopae i te au akakiteanga pikikaa? (2 Timoteo 1:13) (Akara katoa i te pia “ Taau ka Rave no te au Akakiteanga Pikikaa.”)

¹⁷ Patoi i te au akakiteanga pikikaa. Akakite te apotetoro ko Paulo eaa ta tatou ka rave me rongo tatou i te au akakiteanga pikikaa. Akakite aia kia Timoteo “kia ako atu koe i tetai pae, auraka ratou e apii i te tuatua ke” e “auraka e akono i te tuatua taeke ua.” (1 Timo. 1:​3, 4; 4:7) Penei ka mou tetai pepe i te apinga repo e ka tāru ki roto i tona vaa. Kare ra tetai tangata mamaata e rave i te reira no te mea kua kite aia i te kino ka tupu. Mei te reira rai, ka patoi tatou i te au akakiteanga pikikaa no te mea kua kite tatou noea mai te reira. Ka akarongo ua tatou ki “te akonoanga tuatua tikai” o te tuatua mou.—E tatau ia 2 Timoteo 1:13.

18. Akapeea tatou me akaari e te irinaki ra tatou i ta Iehova akaaerenga?

¹⁸ Kua uriuri tatou e toru ravenga te aru nei te akaaerenga o te Atua i te akaraanga o Iesu. Ia koe e apii ra i te Pipiria, e kimi eaa tetai atu au ravenga te aru nei te akaaerenga ia Iesu. E tauturu i tetai ke i roto i taau putuputuanga kia irinaki ua atu rai i te akaaerenga. E akaari ua rai i toou irinaki na te tavini tiratiratu anga ia Iehova e e noo vaitata ki te akaaerenga te akatupu ra i tona anoano. (Sala. 37:28) Kia akaperepere ua rai tatou i te tikaanga kia piri atu ki to Iehova iti tangata aroa e te tiratiratu.