1. Сар сине организириме е Јеховаскере слуге ко прво веко?

 СЕКОГАШ кеда о Јехова дела пле слугенге несави задача, ов очекујнела лендар те керен адава ко јекх организиримо начин (1. Кор. 14:33). На пример, е Девлескири волја тани о шукар хабери те овел проповедимо ки цели пхув (Мат. 24:14). О Јехова денѓа и одговорност е Исусеске те водинел акаја задача. О Исус денѓа пестар са те шај акаја задача те керел пе ко јекх организиримо начин. Ко прво веко, кеда сине керде собранија ко различна тхана, сине именујме старешине те шај те предводинен хем те ден упатствија (Апо. 14:23). О водечко тело ко Ерусалим, коте со сине о апостолија хем несаве искусна старешине, анѓе несаве одлуке кола со са о собранија ваљани сине те поштујнен лен (Апо. 15:2; 16:4). Адалеске со сине послушна ко упатствија со добинѓе лен „о собранија понадари да овена сине зорале ки вера хем бајрона сине таро диве ко диве“ (Апо. 16:5).

2. Ко саво начин о Јехова панда таро 1919 берш, дела духовно храна пле народоске хем водинела ле?

² О Јехова авдиве да организиринела пле народо. Таро 1919 берш, о Исус користинѓа јекхе тикне група помазаникон те шај те организиринел о проповедибе хем те дел духовно храна пле следбениконге a (Лука 12:42). Јасно дикхела пе кај о Јехова благословинела адава со керела акаја група (Иса. 60:22; 65:13, 14).

3-4. а) Вакер пример кова со сикавела сар користинела аменге адава со сием организириме? б) Со ка дикха ки акаја статија?

 ³ Ако на сием организириме, ка нашти те кера и задача која со денѓа ла аменге о Исус (Мат. 28:19, 20). На пример, замислин те на овен амен сине подрачја сведочибаске. Тегани секој ка проповединел сине коте со мангела. Несаве подрачја шај ка обработина лен сине повише пути, а ко јавера подрачја шај никогаш нане сине те џа. Шај ли те сетине тут ко саве јавера начинија иси амен корист таро адава со сием организириме?

⁴ О Исус понадари да организиринела е Девлескере народо исто сар со керела сине адава пле следбениконцар ко прво веко. Ки акаја статија, ка дикха саво пример денѓа амен о Исус хем сар амари организација џала пало адава пример. Исто аѓаар ка дикха сар шај те сикава кај иси амен доверба ки е Јеховаскири организација.

АМАРИ ОРГАНИЗАЦИЈА ЏАЛА ПАЛО Е ИСУСЕСКОРО ПРИМЕР

5. Кова тано јекх таро начинија сар џаја пало пример е Исусескоро? (Јован 8:28).

⁵ О Исус сиклило таро пло небесно Дад сар те постапинел хем со те вакерел. Е Јеховаскири организација џала пало пример е Исусескоро аѓаар со користинела е Девлескоро Лафи те шај те поможинел аменге те џана сој тано исправно, а сој погрешно хем те дел амен водство. (Читин Јован 8:28; 2. Тим. 3:16, 17.) Бут пути сием потсетиме те читина е Девлескоро Лафи хем те применина адава со читинаја. Сар користинела аменге адава со шунаја акава совет?

6. Соске тано амаре шукарипаске кеда користинаја амаре публикацие џикоте проучинаја и Библија?

⁶ Амаре шукарипаске тано кеда користинаја амаре публикацие џикоте проучинаја и Библија. На пример, шај те споредина адава со читинаја ки Библија е упатствонцар со добинаја лен тари амари организација. Кеда дикхаја кај о водство со добинаја ле темелинела пе ки Библија, амари доверба ки е Јеховаскири организација панда повише бајрола (Рим. 12:2).

7. Кова хабери проповединѓа о Исус, хем сар е Јеховаскири организација џала пало лескоро пример?

⁷ О Исус проповединѓа „о шукар хабери башо е Девлескоро Царство“ (Лука 4:43, 44). Исто аѓаар, ов денѓа заповед пле учениконге те проповединен башо Царство (Лука 9:1, 2; 10:8, 9). Авдиве, сарине сој тане дело тари е Јеховаскири организација проповединена о хабери башо Царство, бизи разлика коте живинена или кобор одговорностија иси лен.

8. Сави чест иси амен?

⁸ Аменге тани бари чест те вакера е јаверенге о чачипе башо е Девлескоро Царство! Ама нане саринен акаја чест. На пример, кеда о Исус сине ки пхув, ов на дозволинѓа е демоненге те сведочинен баши лесте (Лука 4:41). Авдиве, англедер некој те почминел те џал ки служба заедно е Јеховаскере сведоконцар, ов мора те живинел сар о Јехова со мангела. Амен сикаваја кобор бут ценинаја и чест те проповедина аѓаар со сведочинаја сегде хем секогаш кеда шај. Амен мангаја те ова сар о Исус, адалеске даја амендар са те проповедина е јаверенге хем те сикава лен башо чачипе (Мат. 13:3, 23; 1. Кор. 3:6).

9. Сар амари организација вакерела е јаверенге башо е Девлескоро анав?

⁹ О Исус вакерела сине е јаверенге е Девлескоро анав. Ки јекх прилика, кеда о Исус молинѓа пе пле небесно Дадеске, ов вакерѓа: „Вакерѓум ленге тло анав“ (Јован 17:26). Е Јеховаскири организација џала пало е Исусескоро пример аѓаар со керела са со шај те поможинел е јаверенге те џанен е Девлескоро анав. Јекх начин сар амари организација  керела адава, тано преку и Библија — превод Нево свето. Ко акава превод е Библијакоро, е Девлескоро анав тано ирамо ко са о тхана коте со сине пишимо ко оригинално тексти. Акава превод тари Библија тано преведимо целосно или делија лестар, ко повише таро 270 чхибја. Ки брошура Да ја истражуваме Божјата Реч ко стране 1-13, шај те аракхе повише информацие башо адава сар сине ирамо е Девлескоро анав ки Библија. Исто аѓаар, адатхе тано објаснимо соске е Девлескоро анав ваљани те овел ко 237 тхана ко Христијанска грчка списија.

10. Со сикљовеа таро адава со вакерѓа јекх ромни таро Мјанмар?

¹⁰ Исто сар о Исус, амен да мангаја те поможина со повише манушенге те шунен башо е Девлескоро анав. Кеда јекх ромни таро Мјанмар кола со иси ла 67 берш шунѓа кај е Девле иси ле анав, рунѓа хем е пхењаке со проучинела сине лаја вакерѓа: „Прво пути ко мло живото шунѓум кај е Девлескоро анав тано Јехова... Вакерѓан манге и најважно бути ко мло живото“. Сар со дикхаја таро акава искуство, кеда о искрена мануша шунена е Девлескоро анав, адава шај те менинел ленгоро живото.

ПОНАДАРИ ДА СИКАВ ДОВЕРБА КИ АМАРИ ОРГАНИЗАЦИЈА

11. Сар шај о старешине те сикавен кај иси лен доверба ки е Јеховаскири организација? (Дикх хем и слика.)

¹¹ Кова тано јекх начин сар шај о старешине те сикавен кај иси лен доверба ки е Девлескири организација? Кеда добинена упатствија, о старешине ваљани шукар те читинен лен хем те ден пестар са те шај те применинен лен. На пример, ола добинена упатствија на само башо адава сар ваљани те икерен пумаре точке ко состанокија хем саве ваљани те овен ленгере молитве кеда молинена пе англо собрание, него хем сар ваљани те грижинен пе башо е Христосескере бакхре. Кеда о старешине применинена са о упатствија тари организација, тегани о пхраља хем о пхења осетинена е Јеховаскоро мангипе хем лескири грижа.

12. а) Соске ваљани те соработина околенцар со предводинена? (Евреија 13:7, 17). б) Соске ваљани те концентририна амен ко позитивна особине околенгере со предводинена?

¹² Кеда ка добина несаво упатство таро старешине, ваљани спремно те шуна ле. Ако кераја аѓаар, тегани ка поможина околенге со предводинена полокхе те керен пумари задача. И Библија поттикнинела амен те ова послушна хем подложна околенге со предводинена. (Читин Евреија 13:7, 17.) Ама акава нане секогаш локхо. Соске? Адалеске со ола тане несовршена. Ама ако концентриринаја амен ко ленгере негативна особине наместо ко ленгере позитивна стране, тегани уствари амен поможинаја амаре душманенге. Соске вакераја акава? Адалеске со аѓаар ка почмина те сумнина амен ки е Девлескири организација, а баш адава мангена амаре противникија. Со посебно ваљани те кера те шај те пенџара хем те отфрлина о ховајба со ширинена лен о душмања?

МА МУКХ О ЈАВЕРА ТЕ СЛАБОНКЕРЕН ТЛИ ДОВЕРБА

13. Сар е Девлескере душмања пробинена те керен лескири организација те изглединел лошно?

¹³ Е Девлескере душмања мангена те керен о позитивна буќа тари лескири организација те дикхјон сар негативна. На пример, таро е Девлескоро Лафи сиклилем кај о Јехова очекујнела таро пле слуге те овен чиста ко физичко, морално хем духовно поглед. Ов вакерѓа кај секој со на чхинавела те керел адава сој погрешно хем на мангела те менинел пе, ваљани те овел цидимо таро собрание (1. Кор. 5:11-13; 6:9, 10). Амен шунаја акаја  библиско заповед. Ама, амаре душмања мангена те користинен акава против аменде аѓаар со вакерена кај на сием толерантна, кај на мангаја е манушен хем кај осудинаја лен.

14. Котар авена о ховајба баши е Девлескири организација?

¹⁴ Хаљов кој чаче нападинела амаре организација. О ховајба баши е Девлескири организација авена таро Сатана. Ов тано „дад е ховајбаскоро“ (Јован 8:44; 1. Мој. 3:1-5). Адалеске, ваљани те очекујна кај ов ка користинел амаре душманен те шај те ширинел ховајба баши е Јеховаскири организација. Акава случинѓа пе хем ко прво веко.

15. Со керѓе о религиозна водачија е Исусеске хем лескере следбениконге?

¹⁵ Иако е Девлескоро Чхаво, о Исус, сине совршено хем керѓа бут чудија, о Сатана користинѓа несаве манушен те ширинен бут ховајба баши лесте. На пример, о религиозна водачија вакерена сине е манушенге кај о Исус палдела е демонен „адалеске со поможинела ле о владетели е демоненгоро“ (Мар. 3:22). Кеда судинела пе сине е Исусеске, о религиозна водачија кривинѓе ле кај бунинела пе против о Девел хем теринѓе е народо те родел те овел мудардо (Мат. 27:20). Покасно, џикоте е Христосескере следбеникија проповединена сине о шукар хабери, окола со противинена пе сине ленге вознемиринѓе е народо хем теринѓе ле те прогонинел е христијанен (Апо. 14:2, 19). Поврзимо е стихоја таро Апостолија 14:2, ки Стражарско кула таро 1 декември 1998 берш, сине објаснимо кај окола со поддржинена е Сатана отфрлинѓе о хабери со проповединена сине о христијања хем исто аѓаар вакерѓе бут лошна буќа баши ленде те шај о народо те на шунел лен хем те мрзинел лен.

16. Ко со ваљани те сетина амен ако шунаја ховајба баши организација или башо пхраља со предводинена?

 ¹⁶ Исто сар ко прво веко, о Сатана понадари да ховавела. Ов понадари да „ховавела цело свето“ (Отк. 12:9). Ако шунеа негативна буќа баши организација или башо пхраља со предводинена, сетин тут сар е Девлескере душмања постапинѓе е Исусеа хем лескере учениконцар ко прво веко. Авдиве, баш сар со сине пророкујмо ки Библија, е Јеховаскере слуге тане прогониме хем вакерена пе ховајба баши ленде (Мат. 5:11, 12). Амен нане те верујна ко адала ховајба ако сием свесна кастар авена хем ако одма кераја нешто те шај те заштитина амен. Со ваљани те кера?

17. Сар шај те заштитина амен таро ховавне информацие? (2. Тимотеј 1:13; дикх хем и рамка „ Сар те реагирине ко ховавне информацие“.)

¹⁷ Отфрлин о ховавне информацие. О апостол Павле јасно вакерѓа со ваљани те кера ако шунаја измислиме буќа баши аменде или ховавне информацие. Ов вакерѓа е Тимотееске: „Поттикнинава тут те заповедине несавенге... ма те на шунен измислиме парамиса“ хем „избегин о измислиме парамиса“ (1. Тим. 1:3, 4; 4:7). Јекх тикно чхаво шај те лел несави бути со пели теле хем те чхивел ко муј, ама јекх зрело личност која со хаљовела кобор тано адава опасно никогаш нане те керел адава. Слично, амен отфрлинаја о ховавне информацие адалеске со џанаја котар авена. Наместо адава, амен шунаја само о „састе лафија“ е чачипаскере. (Читин 2. Тимотеј 1:13.)

18. Сар шај те сикава кај иси амен доверба ки е Јеховаскири организација?

¹⁸ Дикхлем само трин таро бут начинија сар е Девлескири организација џала пало е Исусескоро пример. Џикоте проучинеа и Библија, пробин те аракхе јавера да начинија ко кола со е Девлескири организација џала пало пример е Исусескоро. Поможин е јаверенге таро тло собрание те бајрарен пумари доверба ки организација. Хем понадари да сикав тли доверба аѓаар со ка служине верно е Јеховаске хем нане те циде тут тари организација која со ов користинела ла те шај те исполнинел пли волја (Пс. 37:28). Понадари да те ценина и чест со сием дело таро е Јеховаскоро верно народо колесте со иси мангипе.