1. Sar sine organizirime e Jehovaskere sluge ko prvo veko?

 SEKOGAŠ keda o Jehova dela ple slugenge nesavi zadača, ov očekujnela lendar te keren adava ko jekh organizirimo način (1. Kor. 14:33). Na primer, e Devleskiri volja tani o šukar haberi te ovel propovedimo ki celi phuv (Mat. 24:14). O Jehova dengja i odgovornost e Isuseske te vodinel akaja zadača. O Isus dengja pestar sa te šaj akaja zadača te kerel pe ko jekh organizirimo način. Ko prvo veko, keda sine kerde sobranija ko različna thana, sine imenujme starešine te šaj te predvodinen hem te den upatstvija (Apo. 14:23). O vodečko telo ko Erusalim, kote so sine o apostolija hem nesave iskusna starešine, angje nesave odluke kola so sa o sobranija valjani sine te poštujnen len (Apo. 15:2; 16:4). Adaleske so sine poslušna ko upatstvija so dobingje len „o sobranija ponadari da ovena sine zorale ki vera hem bajrona sine taro dive ko dive“ (Apo. 16:5).

2. Ko savo način o Jehova panda taro 1919 berš, dela duhovno hrana ple narodoske hem vodinela le?

² O Jehova avdive da organizirinela ple narodo. Taro 1919 berš, o Isus koristingja jekhe tikne grupa pomazanikon te šaj te organizirinel o propovedibe hem te del duhovno hrana ple sledbenikonge a (Luka 12:42). Jasno dikhela pe kaj o Jehova blagoslovinela adava so kerela akaja grupa (Isa. 60:22; 65:13, 14).

3-4. a) Vaker primer kova so sikavela sar koristinela amenge adava so siem organizirime? b) So ka dikha ki akaja statija?

 ³ Ako na siem organizirime, ka našti te kera i zadača koja so dengja la amenge o Isus (Mat. 28:19, 20). Na primer, zamislin te na oven amen sine podračja svedočibaske. Tegani sekoj ka propovedinel sine kote so mangela. Nesave podračja šaj ka obrabotina len sine poviše puti, a ko javera podračja šaj nikogaš nane sine te dža. Šaj li te setine tut ko save javera načinija isi amen korist taro adava so siem organizirime?

⁴ O Isus ponadari da organizirinela e Devleskere narodo isto sar so kerela sine adava ple sledbenikoncar ko prvo veko. Ki akaja statija, ka dikha savo primer dengja amen o Isus hem sar amari organizacija džala palo adava primer. Isto agjaar ka dikha sar šaj te sikava kaj isi amen doverba ki e Jehovaskiri organizacija.

AMARI ORGANIZACIJA DŽALA PALO E ISUSESKORO PRIMER

5. Kova tano jekh taro načinija sar džaja palo primer e Isuseskoro? (Jovan 8:28).

⁵ O Isus siklilo taro plo nebesno Dad sar te postapinel hem so te vakerel. E Jehovaskiri organizacija džala palo primer e Isuseskoro agjaar so koristinela e Devleskoro Lafi te šaj te pomožinel amenge te džana soj tano ispravno, a soj pogrešno hem te del amen vodstvo. (Čitin Jovan 8:28; 2. Tim. 3:16, 17.) But puti siem potsetime te čitina e Devleskoro Lafi hem te primenina adava so čitinaja. Sar koristinela amenge adava so šunaja akava sovet?

6. Soske tano amare šukaripaske keda koristinaja amare publikacie džikote proučinaja i Biblija?

⁶ Amare šukaripaske tano keda koristinaja amare publikacie džikote proučinaja i Biblija. Na primer, šaj te sporedina adava so čitinaja ki Biblija e upatstvoncar so dobinaja len tari amari organizacija. Keda dikhaja kaj o vodstvo so dobinaja le temelinela pe ki Biblija, amari doverba ki e Jehovaskiri organizacija panda poviše bajrola (Rim. 12:2).

7. Kova haberi propovedingja o Isus, hem sar e Jehovaskiri organizacija džala palo leskoro primer?

⁷ O Isus propovedingja „o šukar haberi bašo e Devleskoro Carstvo“ (Luka 4:43, 44). Isto agjaar, ov dengja zapoved ple učenikonge te propovedinen bašo Carstvo (Luka 9:1, 2; 10:8, 9). Avdive, sarine soj tane delo tari e Jehovaskiri organizacija propovedinena o haberi bašo Carstvo, bizi razlika kote živinena ili kobor odgovornostija isi len.

8. Savi čest isi amen?

⁸ Amenge tani bari čest te vakera e javerenge o čačipe bašo e Devleskoro Carstvo! Ama nane sarinen akaja čest. Na primer, keda o Isus sine ki phuv, ov na dozvolingja e demonenge te svedočinen baši leste (Luka 4:41). Avdive, angleder nekoj te počminel te džal ki služba zaedno e Jehovaskere svedokoncar, ov mora te živinel sar o Jehova so mangela. Amen sikavaja kobor but ceninaja i čest te propovedina agjaar so svedočinaja segde hem sekogaš keda šaj. Amen mangaja te ova sar o Isus, adaleske daja amendar sa te propovedina e javerenge hem te sikava len bašo čačipe (Mat. 13:3, 23; 1. Kor. 3:6).

9. Sar amari organizacija vakerela e javerenge bašo e Devleskoro anav?

⁹ O Isus vakerela sine e javerenge e Devleskoro anav. Ki jekh prilika, keda o Isus molingja pe ple nebesno Dadeske, ov vakergja: „Vakergjum lenge tlo anav“ (Jovan 17:26). E Jehovaskiri organizacija džala palo e Isuseskoro primer agjaar so kerela sa so šaj te pomožinel e javerenge te džanen e Devleskoro anav. Jekh način sar amari organizacija  kerela adava, tano preku i Biblija — prevod Nevo sveto. Ko akava prevod e Biblijakoro, e Devleskoro anav tano iramo ko sa o thana kote so sine pišimo ko originalno teksti. Akava prevod tari Biblija tano prevedimo celosno ili delija lestar, ko poviše taro 270 čhibja. Ki brošura Da ja istražuvame Božjata Reč ko strane 1-13, šaj te arakhe poviše informacie bašo adava sar sine iramo e Devleskoro anav ki Biblija. Isto agjaar, adathe tano objasnimo soske e Devleskoro anav valjani te ovel ko 237 thana ko Hristijanska grčka spisija.

10. So sikljovea taro adava so vakergja jekh romni taro Mjanmar?

¹⁰ Isto sar o Isus, amen da mangaja te pomožina so poviše manušenge te šunen bašo e Devleskoro anav. Keda jekh romni taro Mjanmar kola so isi la 67 berš šungja kaj e Devle isi le anav, rungja hem e phenjake so proučinela sine laja vakergja: „Prvo puti ko mlo životo šungjum kaj e Devleskoro anav tano Jehova... Vakergjan mange i najvažno buti ko mlo životo“. Sar so dikhaja taro akava iskustvo, keda o iskrena manuša šunena e Devleskoro anav, adava šaj te meninel lengoro životo.

PONADARI DA SIKAV DOVERBA KI AMARI ORGANIZACIJA

11. Sar šaj o starešine te sikaven kaj isi len doverba ki e Jehovaskiri organizacija? (Dikh hem i slika.)

¹¹ Kova tano jekh način sar šaj o starešine te sikaven kaj isi len doverba ki e Devleskiri organizacija? Keda dobinena upatstvija, o starešine valjani šukar te čitinen len hem te den pestar sa te šaj te primeninen len. Na primer, ola dobinena upatstvija na samo bašo adava sar valjani te ikeren pumare točke ko sostanokija hem save valjani te oven lengere molitve keda molinena pe anglo sobranie, nego hem sar valjani te grižinen pe bašo e Hristoseskere bakhre. Keda o starešine primeninena sa o upatstvija tari organizacija, tegani o phralja hem o phenja osetinena e Jehovaskoro mangipe hem leskiri griža.

12. a) Soske valjani te sorabotina okolencar so predvodinena? (Evreija 13:7, 17). b) Soske valjani te koncentririna amen ko pozitivna osobine okolengere so predvodinena?

¹² Keda ka dobina nesavo upatstvo taro starešine, valjani spremno te šuna le. Ako keraja agjaar, tegani ka pomožina okolenge so predvodinena polokhe te keren pumari zadača. I Biblija pottikninela amen te ova poslušna hem podložna okolenge so predvodinena. (Čitin Evreija 13:7, 17.) Ama akava nane sekogaš lokho. Soske? Adaleske so ola tane nesovršena. Ama ako koncentririnaja amen ko lengere negativna osobine namesto ko lengere pozitivna strane, tegani ustvari amen pomožinaja amare dušmanenge. Soske vakeraja akava? Adaleske so agjaar ka počmina te sumnina amen ki e Devleskiri organizacija, a baš adava mangena amare protivnikija. So posebno valjani te kera te šaj te pendžara hem te otfrlina o hovajba so širinena len o dušmanja?

MA MUKH O JAVERA TE SLABONKEREN TLI DOVERBA

13. Sar e Devleskere dušmanja probinena te keren leskiri organizacija te izgledinel lošno?

¹³ E Devleskere dušmanja mangena te keren o pozitivna bukja tari leskiri organizacija te dikhjon sar negativna. Na primer, taro e Devleskoro Lafi siklilem kaj o Jehova očekujnela taro ple sluge te oven čista ko fizičko, moralno hem duhovno pogled. Ov vakergja kaj sekoj so na čhinavela te kerel adava soj pogrešno hem na mangela te meninel pe, valjani te ovel cidimo taro sobranie (1. Kor. 5:11-13; 6:9, 10). Amen šunaja akaja  biblisko zapoved. Ama, amare dušmanja mangena te koristinen akava protiv amende agjaar so vakerena kaj na siem tolerantna, kaj na mangaja e manušen hem kaj osudinaja len.

14. Kotar avena o hovajba baši e Devleskiri organizacija?

¹⁴ Haljov koj čače napadinela amare organizacija. O hovajba baši e Devleskiri organizacija avena taro Satana. Ov tano „dad e hovajbaskoro“ (Jovan 8:44; 1. Moj. 3:1-5). Adaleske, valjani te očekujna kaj ov ka koristinel amare dušmanen te šaj te širinel hovajba baši e Jehovaskiri organizacija. Akava slučingja pe hem ko prvo veko.

15. So kergje o religiozna vodačija e Isuseske hem leskere sledbenikonge?

¹⁵ Iako e Devleskoro Čhavo, o Isus, sine sovršeno hem kergja but čudija, o Satana koristingja nesave manušen te širinen but hovajba baši leste. Na primer, o religiozna vodačija vakerena sine e manušenge kaj o Isus paldela e demonen „adaleske so pomožinela le o vladeteli e demonengoro“ (Mar. 3:22). Keda sudinela pe sine e Isuseske, o religiozna vodačija krivingje le kaj buninela pe protiv o Devel hem teringje e narodo te rodel te ovel mudardo (Mat. 27:20). Pokasno, džikote e Hristoseskere sledbenikija propovedinena sine o šukar haberi, okola so protivinena pe sine lenge voznemiringje e narodo hem teringje le te progoninel e hristijanen (Apo. 14:2, 19). Povrzimo e stihoja taro Apostolija 14:2, ki Stražarsko kula taro 1 dekemvri 1998 berš, sine objasnimo kaj okola so poddržinena e Satana otfrlingje o haberi so propovedinena sine o hristijanja hem isto agjaar vakergje but lošna bukja baši lende te šaj o narodo te na šunel len hem te mrzinel len.

16. Ko so valjani te setina amen ako šunaja hovajba baši organizacija ili bašo phralja so predvodinena?

 ¹⁶ Isto sar ko prvo veko, o Satana ponadari da hovavela. Ov ponadari da „hovavela celo sveto“ (Otk. 12:9). Ako šunea negativna bukja baši organizacija ili bašo phralja so predvodinena, setin tut sar e Devleskere dušmanja postapingje e Isusea hem leskere učenikoncar ko prvo veko. Avdive, baš sar so sine prorokujmo ki Biblija, e Jehovaskere sluge tane progonime hem vakerena pe hovajba baši lende (Mat. 5:11, 12). Amen nane te verujna ko adala hovajba ako siem svesna kastar avena hem ako odma keraja nešto te šaj te zaštitina amen. So valjani te kera?

17. Sar šaj te zaštitina amen taro hovavne informacie? (2. Timotej 1:13; dikh hem i ramka „ Sar te reagirine ko hovavne informacie“.)

¹⁷ Otfrlin o hovavne informacie. O apostol Pavle jasno vakergja so valjani te kera ako šunaja izmislime bukja baši amende ili hovavne informacie. Ov vakergja e Timoteeske: „Pottikninava tut te zapovedine nesavenge... ma te na šunen izmislime paramisa“ hem „izbegin o izmislime paramisa“ (1. Tim. 1:3, 4; 4:7). Jekh tikno čhavo šaj te lel nesavi buti so peli tele hem te čhivel ko muj, ama jekh zrelo ličnost koja so haljovela kobor tano adava opasno nikogaš nane te kerel adava. Slično, amen otfrlinaja o hovavne informacie adaleske so džanaja kotar avena. Namesto adava, amen šunaja samo o „saste lafija“ e čačipaskere. (Čitin 2. Timotej 1:13.)

18. Sar šaj te sikava kaj isi amen doverba ki e Jehovaskiri organizacija?

¹⁸ Dikhlem samo trin taro but načinija sar e Devleskiri organizacija džala palo e Isuseskoro primer. Džikote proučinea i Biblija, probin te arakhe javera da načinija ko kola so e Devleskiri organizacija džala palo primer e Isuseskoro. Pomožin e javerenge taro tlo sobranie te bajraren pumari doverba ki organizacija. Hem ponadari da sikav tli doverba agjaar so ka služine verno e Jehovaske hem nane te cide tut tari organizacija koja so ov koristinela la te šaj te ispolninel pli volja (Ps. 37:28). Ponadari da te cenina i čest so siem delo taro e Jehovaskoro verno narodo koleste so isi mangipe.