1. Σαρ ισινέ οργανωμέ ο λαός ι Ιεχωβάσκο κο πρώτος αιώνας;

 ΚΑΝΑ ο Ιεχωβά ντέλα πι υπηρετόντε εκ διορισμός, ατσσικιαρέλα λένταρ τι κερέν-λες οργανωμέ τροπόσαρ. (1 Κορ. 14:33) Για παράδειγμας, ο Ντεβέλ μανγκέλα τι μουτθάντιβεν ο λατσσέ αμπέρια σαρί κι πφουβ. (Ματθ. 24:14) Ο Ιεχωβά διοριντάς ι Ιησούς τι αβέλ υπεύθυνος ανταλέ εργόστε. Ο Ιησούς κερέλα ο πο λατσσό για τι αβέλ ανταβά έργος οργανωμέ τροπόσαρ. Κι Ιερουσαλήμ κο πρώτος αιώνας, ισινέ εκ ομάδα αποστολόντζαρ ντα πρεσβυτερόντζαρ σο λέλας αποφάσεις, ντα σαρέ ο κχανγκιριά ακολουθίνενας-λεν. (Πράξ. 14:23) Καζόμ κερντιόνας νεβέ κχανγκιριά σε διάφορες πόλεις, ο πρεσβύτεροι κι κάθε κχανγκιρί βακερένας κο πφραλά ντα κο πφενιά ο αποφάσεις σο λιντάς ανταγιά ομάδα. (Πράξ. 15:2· 16:4) Επειδή ο πφραλά ντένας καν κο οδηγίες σο λένας, «ο κχανγκιριά συνεχίνενας τι αβέν πο σταθερά κι πίστη ντα τι αβγατίντιβεν κάθε ντιβές».—Πράξ. 16:5.

2. Κατά 1919, σαρ οδηγίνελα-αμέν ο Ιεχωβά ντα σαρ ντέλα-αμέν πνευματικός χαμπέ;

² Ο Ιεχωβά συνεχίνελα τι οργανώνελ πι λαός αντιβές-ντα. Κατά 1919, ο Ιησούς χρησιμοποιήνελα χάνικ χρισμέ τζενέν για τι οργανώνελ ο έργος ντα τι ντελ πνευματικός χαμπέ οντουλέντε σο τζάνα παλά-λέστε. a (Λουκ. 12:42) Ισί ξεκάθαρος ότι ο Ιεχωβά ευλογίνελα λένγκο έργος.—Ησ. 60:22· 65:13, 14.

3, 4. (α) Σικαβέν εκχέ παραδειγμάσαρ σαρ ντικχάσα λατσσιπέ επειδή ισινάμ οργανωμέ. (β) Σο κα εξετάνας ανταλέ μαθημάστε;

³ Άμα να κα αβάας οργανωμέ, να κα μπορίναας τι κεράς ο έργος  σο ντινάς-αμέν ο Ιησούς. (Ματθ. 28:19, 20) Για παράδειγμας, βακερέν ότι να τθεράσα τομείς, ντα ο κάθε πφραλ μπορίνελα τι κερέλ έργος κάι-ντα μανγκέλα. Μερικά πφραλά μπορεί τι τζαν συνέχεια κο ίδιος τομέας, ενώ σε εκ γιαβέρ τομέας μπορεί μα τι γκιλό καέκ για έργος. Μπορίνενα τι σκεφτίνεν γιαβερά-ντα τρόπους σο ντικχάσα λατσσιπέ επειδή ισινάμ οργανωμέ;

⁴ Σαρ ο Ιησούς οργανώνελας πι μαθητέν κάνα ισινέ κι πφουβ, αντικάς-ντα συνεχίνελα τι οργανώνελ ι Ντεβλέσκε λαός αντιβές. Ανταλέ μαθημάστε, κα εξετάνας ο παράδειγμας σο μουκχλάς αμένγκε ο Ιησούς ντα σαρ αμαρί οργάνωση ακολουθίνελα ανταβά παράδειγμας. Κα ντικχάς επίσης σαρ μπορίνασα τι σικαβάς ότι εκτιμίνασα ι οργάνωση ι Ιεχωβάσκι.

ΑΜΑΡΙ ΟΡΓΑΝΩΣΗ ΑΚΟΛΟΥΘΙΝΕΛΑ Ο ΠΑΡΑΔΕΙΓΜΑΣ Ι ΙΗΣΟΥΣΚΟ

5. Καβά ισί εκ τρόπος σο ακολουθίνασα ο παράδειγμας ι Ιησούσκο; (Ιωάννης 8:28)

⁵ Ο Ιησούς σικλιόλας πι Νταντέσταρ σο τι κερέλ ντα σο τι βακερέλ. Η οργάνωση ι Ιεχωβάσκι ακολουθίνελα ο παράδειγμας ι Ιησούσκο επειδή χρησιμοποιήνελα ο Λάφι ι Ντεβλέσκο για τι βοηθίνελ-αμέν τι τζανάς σο ισί σωστός ντα σο ισί λάθος ντα τι οδηγίνελ-αμέν αμαρέ ζωγιάτε. (Διαβάνεν Ιωάννης 8:28· 2 Τιμ. 3:16, 17) Η οργάνωση βακερέλα αμένγκε μπουτ φαρ τι διαβάνας ο Λάφι ι Ντεβλέσκο ντα τι κεράς οντουλά σο ισί οτθέ. Σαρ ντικχάσα λατσσιπέ κάνα κεράσα ανταγιά συμβουλή;

6. Καβά ισί εκ σημαντικός τρόπος σο ντικχάσα λατσσιπέ καζόμ σικλιαράσα-αμέν κατά Αγία Γραφή;

⁶ Ντικχάσα μπουτ λατσσιπέ καζόμ χρησιμοποιήνασα αμαρέ έντυπα για τι σικλιαράς-αμέν κατά Αγία Γραφή. Για παράδειγμας, αγαβάσα σαρ ταιριάνενα οντουλά σο σικλιαρέλα η Γραφή με το οδηγίες σο λάσα κατά οργάνωση. Κάνα ντικχάσα ότι ο οδηγίες σο λάσα βασίντιβενα κι Γραφή, ντάσα ατζέ πο μπαρί μπέσα κι οργάνωση κι Ιεχωβάσκι.—Ρωμ. 12:2.

7. Σο μουτθαβέλας ο Ιησούς, ντα σαρ ακολουθίνελα λέσκο παράδειγμας η οργάνωση ι Ιεχωβάσκι;

⁷ Ο Ιησούς μουτθαβέλας «ο λατσσέ αμπέρια ι Ντεβλέσκε Βασιλειάκερε». (Λουκ. 4:43, 44) Ντινάς πι μαθητέντε-ντα ι εντολή τι κερέν λάφι ι Βασιλειάκε. (Λουκ. 9:1, 2· 10:8, 9) Αντιβές, σαρέ οντουλά σο ισί αντρέ κι οργάνωση κι Ιεχωβάσκι μουτθαβένα ο λατσσέ αμπέρια ι Βασιλειάκε, κάι-ντα τι τζουβντιόνα ή καμπόρ ευθύνες-ντα τι τθερένα.

8. Καβά προνόμιος ντιντιλό-αμέν;

⁸ Ισί μπαρό προνόμιος αμένγκε τι κεράς λάφι κο γιαβερά για τη Βασιλεία ι Ντεβλέσκι! Να τθερένα σαρέ ο τζενέ ανταβά προνόμιος. Για παράδειγμας, κάνα ο Ιησούς ισινέ κι πφουβ, να μουκχέλας κο δαίμονες τι ντεν μαρτυρία λέσκε. (Λουκ. 4:41) Αντιβές, πριν τι αρχίνελ εκ τζενό τι κερέλ έργος ι Ιεχωβάσκε λαόσαρ, πρέπει τι τζουβντιόλ εκχέ τροπόσαρ σο κερέλα ι Ιεχωβάσκο γκι. Αμέν σικαβάσα καζόμ μπουτ εκτιμίνασα ανταβά προνόμιος κάνα κεράσα έργος κάι-ντα τι αβάς ντα κάθε φαρ σο ντιντιόλα-αμέν η ευκαιρία. Σαρ ο Ιησούς, αντικάς αμέν-ντα τθεράσα στόχος τι φυτίνας ντα τι ποτίνας ο σπόροι ι αληθειάκε κο γκιά κι τζενένγκε.—Ματθ. 13:3, 23· 1 Κορ. 3:6.

9. Σαρ σικλιαρέλα η οργάνωση ο ναβ ι Ντεβλέσκο;

⁹ Ο Ιησούς σικλιαρέλας ι γιαβερέν ι Ντεβλέσκε ναβέσκε. Κάνα κερντάς προσευχή πι Νταντέστε σο ισί κο ουρανός, ο Ιησούς βακερντάς: «Σικλιαρντόμ-λεν τι ναβέσκε». (Ιωάν. 17:26) Η οργάνωση ι Ιεχωβάσκι ακολουθίνελα ο παράδειγμας ι Ιησούσκο ντα κερέλα ο πο λατσσό σο μπορίνελα για τι βοηθίνελ ι γιαβερέν τι σικλιόν ο ναβ ι Ντεβλέσκο. Εκ τρόπος σο η οργάνωση κερντάς-λες ανταβά ισί η Μετάφραση Νεβέ Ντουνιάσκι. Ανταγιά μετάφραση τσσουντάς πάλι ι Ντεβλέσκο ναβ οτθέ σο έπρεπε τι αβέλ. Αντιβές, ανταγιά μετάφραση, σαστί ή εκ μέρος λάκο, ισί 270 ντα πο μπουτ τσσιμπέντε. Άμα κα ντικχέν κο Λεξικός ι Λαφίνγκο σο Ισί κι Αγία Γραφή κι μετάφραση ανταγιά, κο  λάφι «Ιεχωβά», κα αρακχέν μπουτ αποδείξεις σο σικαβένα ότι ο ναβ ι Ντεβλέσκο πρέπει τι υπαρχίντιβελ κι Αγία Γραφή.

10. Σο σικλιόνα κατά λάφια σο βακερντάς εκ τζουβέλ κατά Μιανμάρ;

¹⁰ Σαρ ο Ιησούς, αντικάς αμέν-ντα μανγκάσα τι βοηθίνας καζόμ πο μπουτ τζενέν αβέλα-πες τι σικλιόν ι Ντεβλέσκο ναβ. Κάνα εκ τζουβέλ 67 μπρεσένγκι κατά Μιανμάρ σικλιλί ότι ο Ντεβέλ τθερέλα ναβ, αρχισάλι τι ροβέλ ντα βακερντάς κι πφεν σο κερέλας λάσαρ μελέτη: «Πρώτη φαρ μι ζωγιάτε ασουντόμ ότι ο ναβ ι Ντεβλέσκο ισί Ιεχωβά. . . . Σικλιαρντάν-μαν ο πο σημαντικός πράγμας σο κα μπορίναβας τι σικλιάβ». Ανταγιά εμπειρία σικαβέλα αμένγκε ότι, κάνα ο λατσσέ τζενέ σικλιόνα ο ναβ ι Ντεβλέσκο, ανταβά μπορίνελα τι αλλάνελ λένγκι ζωή!

ΣΥΝΕΧΙΝΕΝ ΤΙ ΣΙΚΑΒΕΝ ΕΚΤΙΜΗΣΗ ΑΜΑΡΕ ΟΡΓΑΝΩΣΙΑΚΕ

11. Σαρ μπορίνενα ο πρεσβύτεροι τι σικαβέν εκτίμηση ι Ιεχωβάσκε οργανωσιάκε; (Ντικχέν ι φωτογραφία-ντα)

¹¹ Καβά ισί εκ τρόπος σο μπορίνενα ο πρεσβύτεροι τι σικαβέν πουμαρί εκτίμηση ι Ντεβλέσκε οργανωσιάκε; Κάνα λένα εκ οδηγία, ο πρεσβύτεροι χρειαζίντιβελα τι διαβάνεν-λα προσεκτικά ντα σοράν τι κερέν-λα καζόμ πο λατσσές μπορίνενα. Φιρειπείν, λένα οδηγίες σο βακερένα λένγκε, όχι σάντε σαρ τι κερέν πουμαρέ μέρη κι συνάθροιση, αλλά ατζέ-ντα σαρ τι κερέν προσευχές ανγκλάλ κι κχανγκιρί, ντα σαρ τι αρακχαβέν ι μπρακέν ι Χριστόσκε. Κάνα ο πρεσβύτεροι ακολουθίνενα σαρέ ο οδηγίες κατά οργάνωση, ο πφραλά ντα ο πφενιά νιωθίνενα ότι ο Ιεχωβά φροντίνελα-λεν ντα μανγκέλα-λεν.

12. (α) Σόσκε πρέπει τι ντας καν οντουλέντε σο οδηγίνενα-αμέν; (Εβραίους 13:7, 17) (β) Σόσκε πρέπει τι ντας πο μπουτ προσοχή κο λατσσέ ιδιότητες σο τθερένα οντουλά σο οδηγίνενα-αμέν;

¹² Κάνα ντένα-αμέν εκ οδηγία ο πρεσβύτεροι, πρέπει τι ακολουθίνας-λα αμαρέ γκίσαρ. Άμα κερντάμ-λες ανταβά, κα αβέλ πο εύκολος οντουλένγκε σο οδηγίνενα-αμέν τι κερέν πουμαρό έργος. Η Γραφή βακερέλα αμένγκε τι ασουνάς οντουλέν σο οδηγίνενα-αμέν ντα τι ντας-λεν καν. (Διαβάνεν Εβραίους 13:7, 17) Ανταβά μερικές φορές μπέκιμ τι αβέλ δύσκολος. Σόσκε; Επειδή ανταλά μουρσά ισί ατελείς. Αλλά άμα ντάσα πο μπουτ προσοχή κο ατέλειες λένγκε ντα όχι κο λατσσέ ιδιότητες σο τθερένα, κι πραγματικότητα κα βοηθίνας αμαρέ ντουσμανίν. Σόσκε βακεράσα-λες ανταβά; Αμαρέ ντουσμάνια μανγκένα τι κερέν-αμέν μα τι αβάς σίγουροι ότι ο Ντεβέλ χρησιμοποιήνελα ι οργάνωση για τι οδηγίνελ-αμέν. Οτθάρ, άμα σκεφτίνασα αρνητικά ι πρεσβυτερόνγκε, μπορεί τι αρχίνας τι σκεφτίνας αρνητικά εμ ι οργανωσιάκε, ντα μα τι ντας-λα μπέσα. Σο μπορίνασα τι κεράς για τι αγαβάς ο ψέματα αμαρέ ντουσμανίνγκε ντα μα τι πακιάς-λεν;

ΜΑ ΜΟΥΚΧΕΝ Ι ΓΙΑΒΕΡΕΝ ΤΙ ΚΕΡΕΝ-ΤΟΥΜΕΝ ΜΑ ΤΙ ΣΙΚΑΒΕΝ ΕΚΤΙΜΗΣΗ

13. Σαρ προσπαθίνενα ο ντουσμάνια ι Ντεβλέσκε τι κερέν λέσκι οργάνωση τι ντικχίντιβελ ότι ισί μπουτ αυστηρή;

¹³ Ο ντουσμάνια ι Ντεβλέσκε προσπαθίνενα τι κερέν ο λατσσέ πράγματα σο τθερέλα η οργάνωση ι Ιεχωβάσκι τι ντικχίντιβεν γκεραλέ. Για παράδειγμας, σικλιλάμ κατά Γραφή ότι ο Ιεχωβά μανγκέλα τι αβάς πάκι εμ κο σώμας εμ κο πράγματα σο κεράσα, ντα τι ντας-λες λατρεία ι τροπόσαρ σο μανγκέλα Βοβ. Ο Ιεχωβά βακερέλα ότι, κάνα εκ τζενό κερέλα γκεραλέ πράγματα ντα να μετανιώνελα, να αβέλα-πες τι ατσσόλ κι κχανγκιρί. (1 Κορ. 5:11-13· 6:9, 10) Επειδή αμέν κεράσα ανταγιά εντολή κατά Γραφή, αμαρέ ντουσμάνια βακερένα ότι να δεχτίνασα κας ισί διαφορετικός, ότι κρίνασα σκληρέ τροπόσαρ ντα ότι να σικαβάσα αγάπη.

14. Κον γκεράντιβελα παλάλ κατά ψεύτικες ιστορίες ι Ιεχωβάσκε οργανωσιάκε;

¹⁴ Τι αγαβέν κον κερέλα επίθεση κι οργάνωση. Ο Μπενγκ γκεράντιβελα παλάλ κατά ψεύτικες ιστορίες. Βοβ ισί «ο ντατ ι ψεμάσκο». (Ιωάν. 8:44· Γέν. 3:1-5) Οτθάρ, να κερέλα αμένγκε  εντύπωση σο ο Μπενγκ χρησιμοποιήνελα αμαρέ ντουσμανίν για τι βακερέν ψέματα ι Ιεχωβάσκε οργανωσιάκε. Ανταβά ισί κάτι σο αβέλας-πες κο πρώτος αιώνας-ντα.

15. Σο κερντέ ο παπάζια κο Ιησούς ντα κο μαθητές λέσκε;

¹⁵ Παρόλο σο ο Τσσαβό ι Ντεβλέσκο, ο Ιησούς, ισινέ τέλειος ντα κερέλας αζόμ μπουτ θαύματα, ο Μπενγκ χρησιμοποιηντάς μερικέ τζενέν κο πρώτος αιώνας για τι βακερέν μπουτ ψέματα λέσκε. Για παράδειγμας, ο παπάζια βακερένας κο τζενέ ότι η ζορ σο τθερέλας ο Ιησούς τι νασκιαρέλ δαιμονέν ντέλας-λα λέστε «ο αρχηγός ι δαιμονένγκο». (Μάρκ. 3:22) Κάνα ο Ιησούς ισινέ κο δικαστήριος, ο παπάζια κατηγοριντέ-λες ότι τζάλας κόντρα κο Ντεβέλ πι λαφίντζαρ ντα κερντέ ι τζενέν τι μανγκέν κατά Πιλάτος τι μουνταρέλ ι Ιησούς. (Ματθ. 27:20) Σοράν, καζόμ ο μαθητές ι Χριστόσκε βακερένας ο λατσσέ αμπέρια, οντουλά σο τζάνας λέντζαρ κόντρα «επηρεαντέ ι γκοντί ι τζενένγκι κατά γιαβερά τθεμά ντα κερντέ-λεν τι νευριάνεν» για τι τζαν βον-ντα κόντρα ι πφραλέντζαρ. (Πράξ. 14:2, 19) Η Σκοπιά 1 Δεκεμβρίου 1998 εξηγιντάς ο εδάφιος Πράξεις 14:2 ντα βακερντάς ότι ο τζενέ σο τσσίντενας κατά Μπενγκ, όχι σάντε να δεχτίνενας ο λατσσέ αμπέρια, αλλά βακερένας-ντα μπουτ μπέτι πράγματα ι Χριστιανόνγκε για τι κερέν ι τζενέν κατά γιαβερά τθεμά μα τι ασουνέν-λεν ντα τι μισίνεν-λεν.

16. Σο πρέπει τι ντας-αμέν γκοντί άμα κα ασουνάς ψεύτικες ιστορίες;

¹⁶ Ο Μπενγκ να βακερέλας ψέματα σάντε κο πρώτος αιώνας. Αντιβές, συνεχίνελα τι “χουχαβέλ σαρέ ι ντουνιάς”. (Αποκ. 12:9) Άμα κα ασουνέν ψεύτικες ιστορίες ι οργανωσιάκε ή ι πφραλένγκε σο οδηγίνενα-αμέν, ντεν-τουμέν γκοντί σαρ συμπεριφερίντιβενας ο ντουσμάνια ι Ντεβλέσκε κο Ιησούς ντα κο μαθητές λέσκε  κο πρώτος αιώνας. Ο Ιησούς βακερντάς ότι ο τζενέ κα τζάνας κόντρα κο λαός κι Ντεβλέσκο ντα κα βακερένας ψέματα λένγκε. Ντα ακριβώς ανταβά αβέλα-πες αντιβές. (Ματθ. 5:11, 12) Να κα χουχάντιβας κατά ψεύτικες ιστορίες άμα κα αγαβάς κον κερέλα επίθεση κι οργάνωση ντα άμα κα κεράς αμέσως κάτι για τι αρακχαβάς-αμέν. Σο μπορίνασα τι κεράς;

17. Σο πρέπει τι κεράς για μα τι κερέν αμένγκε ζιάνι ο ψεύτικες ιστορίες; (2 Τιμόθεο 1:13) (Ντικχέν ο πλαίσιος-ντα « Σο Πρέπει τι Κερέν Κάνα κα Ασουνέν Ψεύτικες Ιστορίες»)

¹⁷ Τι νασέν ντουρ κατά ψεύτικες ιστορίες. Ο απόστολος Παύλος βακερντάς ξεκάθαρα σο πρέπει τι κεράς άμα κα ασουνάς ψεύτικες ιστορίες. Βακερντάς κο Τιμόθεος τι “ντελ εντολή μερικέ τζενέν μα τι . . . ντεν προσοχή κο ψεύτικες ιστορίες” ντα τι “νασέλ ντουρ κατά μελαλέ ντα ψεύτικες ιστορίες”. (1 Τιμ. 1:3, 4· 4:7) Σκεφτίνεν ακαβά: Εκ μαξίμι μπορεί τι λελ κάτι μελαλό τελάλ ντα τι τσσουβέλ-λες πι μόστε, αλλά εκ μπαρό τζενό ποτές να κα κερέλας-λες ανταβά σόσκε αγαβέλα ότι ισί επικίνδυνος. Αντικάς αμέν-ντα νασάσα ντουρ κατά ψεύτικες ιστορίες επειδή αγαβάσα κον ισί παλάλ ανταλέ ψεματένταρ. Οτθάρ, ασουνάσα σάντε «ο λάφια σο κερένα λατσσιπέ».—Διαβάνεν 2 Τιμόθεο 1:13.

18. Σαρ μπορίνασα τι σικαβάς ότι εκτιμίνασα ι οργάνωση ι Ιεχωβάσκι;

¹⁸ Ντικχλάμ σάντε τριν κατά μπουτ τρόποι σο η οργάνωση ι Ντεβλέσκι κερέλα ο πράγματα σαρ κερέλας-λεν ο Ιησούς. Καζόμ σικλιαρένα-τουμέν κατά Γραφή, τι προσπαθίνεν τι αρακχέν γιαβερά-ντα τρόποι σο η οργάνωση ακολουθίνελα ο παράδειγμας ι Ιησούσκο. Τι βοηθίνεν ι γιαβερέν τουμαρέ κχανγκιριάτε τι μπαριαρέν πουμαρί εκτίμηση ι οργανωσιάκε. Επίσης, συνεχίνεν τι σικαβέν τουμαρί εκτίμηση καζόμ υπηρετίνενα πιστά ι Ιεχωβάς ντα καζόμ ατσσόνα πασέ κι οργάνωση σο βοβ χρησιμοποιήνελα για τι κερέλ πο θέλημας. (Ψαλμ. 37:28) Τι συνεχίνας τι ντικχάς πολύτιμος ο προνόμιος σο τθεράσα τι αβάς αντρέ κο λαός κι Ιεχωβάσκο, εκχέ λαόστε σο σικαβέλα αγάπη ντα ισί πιστός λέστε.