1. Sar sas organizime le manușa le Iehovasche ando iechto secolo?

 DE FIESAVI data cana o Iehova del pesche manușenghe te cheren iech buchi, vo ajucărel-pe te cheren-la ande iech modo organizato. (1 Cor. 14:33) Sar exemplo, vo camel ca i vestea lași te avel predichime pe sea i phuv. (Mat. 24:14) O Iehova șiutea le Isusos te lel sama pe cadai buchi. Hai o Isus sea o timpo lea sama te cherel-pe cadaia ande iech modo organizato. Ando iechto secolo, cana sas cărde mai but congregații ande mai but thana, sas numime phure cai te den îndrumări hai te aven angla i congregația. (Fap. 14:23) Ando Ierusalimo, sas iech corpo de guvernare, cărdo anda apostoli hai phure. Von cărde alosarimata cai sea le congregații trebunas te len-pe pala lende. (Fap. 15:2; 16:4). Anda codoia că lenas-pe pala cadal îndrumări, „le congregații zuriarenas-pe ando pachiamos hai lengo număro bariolas”. (Fap. 16:5)

2. Sar del o Iehova îndrumarea hai haben spiritualo pesche manușenghe anda o bărș 1919?

² O Iehova lel sama vi aghies ca lesche manușa te anen lesche închinarea ande iech modo organizato. Anda o bărș 1919, o Isus, prin iech țâno grupo creștinengo machle, organizil i lucrarea de predicare hai del haben spiritualo pesche continuatorenghe. a (Luca 12:42) Dichiol-pe claro că o Iehova silo lența hai del-len but miștimata anda lenghi buchi. (Is. 60:22; 65:13, 14)

3, 4. a) So miștimata si amen anda codoia că sam organizime? Den iech exemplo. b) So va avela te dichas mai dur?

³ Dacă ci avileamas organizime, ci daisardeamas te cheras i buchi cai dea-la amenghe o Isus. (Mat. 28:19, 20) Te gândisaras  amen so întâmplolas-pe dacă ci avelas te cheras le teritorii andi predicarea ande iech modo organizime. Fiesavo predichilas oricai camelas. Chichiva teritorii avenas cărde mai butivar, hai aver, niciechdata. Daștis te gândis tut vi ca aver miștimata cai si amen anda codoia că sam organizime?

⁴ Prin sea so cărdea o Isus ande peschi buchi cana sas-lo phuv, vo mechlea amenghe iech modelo anda sar te avas organizime aghies. Mai dur, va avela te dichas o exemplo cai mechlea-les o Isus hai sar amari organizația lel-pe pala leste. Sa cadea, va avela te hachiaras sar daisaras te sicavas că pachias amen andi organizația le Iehovaschi.

AMARI ORGANIZAȚIA LEL-PE PALA O ISUS

5. Savi si iech buchi cai sicavel că amari organizația lel-pe pala o Isus? (Ioan 8:28)

⁵ O Isus sichilea catar pesco Dad cerisco so te cherel hai so te phenel. Cadea sar o Isus, i organizația le Iehovaschi lel-pe pala o Lil le Devlesco caște ajutil amen te jianas so si mișto hai so si nasul hai caște sicavel amen so te cheras ande amari viața. (Citisar Ioan 8:28; 2 Tim. 3:16, 17) Anda codoia, sam zuriarde te citisaras ande fiesavo ghies anda o Lil le Devlesco hai te cheras so sichioas anda leste. So miștimata si amen cana las amen pala cado sfato?

6. Savo si iech anda le miștimata cai si amen cana sichioas andai Biblia?

⁶ Si amen but miștimata cana folosisaras amare publicații caște sichioas andai Biblia. Sar exemplo, daisaras te dichas că so phenel-pe andi Biblia arachel-pe vi ande le îndrumări cai si amenghe dine catar i organizația. Cadea, amaro pachiamos andi organizația le Iehovaschi bariol sea mai but. (Rom. 12:2)

7. So mesajo predichisardea o Isus hai sar lel-pe pala leste i organizația le Iehovaschi?

⁷ O Isus „predichisardea i vestea lași anda o Regato le Devlesco”. (Luca 4:43, 44) Vo phendea pesche discipolenghe te cheren vi von cadai buchi. (Luca 9:1, 2; 10:8, 9) Aghies, sea le manușa le Iehovasche phenen o mesajo anda o Regato hai predichin pe sea i phuv, oricai beșen sau orisavi avelas i buchi cai cheren-la andi organizația.

8. So bari pachiv sas amenghe dini?

⁸ Anda amende si iech bari pachiv te phenas le manușenghe o ciacimos anda o Regato le Devlesco! Tha na oricon daștil te cherel cadai buchi. Sar exemplo, cana sas-lo pi phuv, o Isus ci mechlea ca le spiritea nasul te șion mărturia anda leste. (Luca 4:41) Aghies, mai anglal ca iech manuș te astarel te predichil ande iech than le Martorența le Iehovasche, vo trebul te trail peschi viața cadea sar ciaiol le Devles. Sicavas că si cuci anda amende i predicarea cana das duma anda o Regato le Devlesco oricai hai oricana daisaras. Cadea sar o Isus, vi amen camas te șioas ando ilo le manușengo le semințea le ciacimasche anda o Regato hai te chinghiaras-len. (Mat. 13:3, 23; 1 Cor. 3:6)

9. Sar cherel prinjiando o anav le Devlesco amari organizația?

⁹ O Isus cărdea prinjiando o anav le Devlesco. Ande iech manglimos cai cărdea-les pesche Dadesche andal ceruri, o Isus phendea: „Cărdem lenghe prinjiando chio anav”. (Ioan 17:26) Cadea sar cărdea vi o Isus, i organizația le Iehovaschi del sea peschi zor caște cherel prinjiando o anav le Devlesco le manușenghe. Iech buchi prin savi cherel cadaia si i Traducerea la lumeachi nevi. Cadai traducerea la Bibliachi șiutea parpale o anav le Devlesco andel thana cai cado arachelas-pe vi andel șiba originalo ande save sas scriime i Biblia. Aghies, cadai Biblia daștil te avel citime cu sea sau cotora anda late ande mai but sar 270 șiba. Ando Apendice A4 hai A5 anda cadai traducerea, arachas informații cai sicaven sar sas șiuto parpale o anav le Devlesco andi Biblia. Ando  Apendice A5 sicavel-pe sostar trebulas ca o anav le Devlesco te arachel-pe 237-var andel Scripturi grecești creștine.

10. So sichios andal dumes cai phendea-len iech jiuvli anda Myanmar?

¹⁰ Cadea sar o Isus, vi amen camas te ajutisaras chichi mai bute manușen te prinjianen o anav le Devlesco. Sar exemplo, cana așundea că le Devles siles iech anav, iech jiuvli 67 bărșenghi anda Myanmar astardea te rovel hai phendea: „Si i dintuni data cana așunav că le Devlesco anav si Iehova. . . . Acana sichilem o mai baro ciacimos cai trebulas te prinjianav-les”. Cadea sar dichleam ande cadai experiența, cana le manușa prinjianen o anav le Devlesco, cadaia arăsăl ande lengo ilo hai daștil te paruvel sea lenghi viața.

TE SICAVAS CĂ PACHIAS AMEN MAI DUR ANDI ORGANIZAȚIA LE IEHOVASCHI

11. Sar daștin le phure te sicaven că pachian-pe andi organizația le Iehovaschi? (Dich vi le imagini.)

¹¹ Sar daștin le phure te sicaven că pachian-pe andi organizația le Devleschi? Cana si lenghe dine îndrumări, von trebun te citin-len atento hai pala codoia te den penghi zor te len-pe pala lende chichi mai mișto daștin. Sar exemplo, le îndrumări cai si lenghe dine, sicaven-len na numai sar te încăren teme ca le întruniri sau sar te manghen-pe andai congregația, tha vi sar te len sama pe le bacrea le Cristososche. Le phure cai len-pe pala le îndrumări cai aven catar i organizația cheren le phralen hai le pheian te simțon că o Iehova iubil-len hai că lel sama pe lende.

12. a) Sostar trebul te cheras buchi ande iech than codolența cai sile angla amende? (Evrei 13:7, 17) b) Sostar trebul te alosaras te dichas le șucar buchia cai cheren-len le phure?

¹² Cana le phure den amen îndrumări, amen trebulas te las amen pala lende pherde bucuria. Cana cheras cadea, va avela lenghe mai ușoro te cheren penghi buchi. I Biblia zuriarel amen te așunas codolendar cai sile angla amende hai te avas lenghe supuși. (Citisar Evrei 13:7, 17.) Tha, poiechdata, daștil te avel amenghe pharo. Sostar? Anda codoia că le phure sile imperfecți. Cu sea cadala, cana alosaras te dichas le buchia nasul anda lende ando than te dichas le șucar buchia cai cheren-len, daisaras, bi te camas, te bucurisaras o ilo amare dușmanengo. Sar? Amare dușmani camen te cheren amen te pachias că o Del ci folosil peschi organizația caște îndrumil amen. Cadea că, cana pachias buchia nasul anda le phure, daisaras te arăsas te hasaras vi amaro pachiamos andi organizația. Tha, so daisaras te cheras caște dichas save si le hohaimata phende catar amare dușmani hai sar te încăras-len dur amendar?

NA MECH AVEREN TE CHEREN TUT TE HASARES CHIO PACHIAMOS ANDI ORGANIZAȚIA

13. So cheren le dușmani le Iehovasche ca le coaver te dichen iachența nasul leschi organizația?

¹³ Le dușmani le Iehovasche camen te cheren amen te dichas iachența nasul le lașe buchia cai si ande amari organizația. Sar exemplo, amen sichileam andai Biblia că o Iehova camel te încăras amaro corpo hai phiraimos ujo hai te anas lesche închinarea cadea sar camel vo. Mai but, vo phenel că oricon cherel buchia nasul hai ci camel te paruvel-pe ci daștil te așel andi congregația. (1 Cor. 5:11-13; 6:9, 10) Anda codoia că amen încăras cado sicaimos andai Biblia, codola cai așen amenghe contra phenen anda amende că ci iubisaras le manușen, că doșaras-len hai că ci mechas mașcar amende codolen cai sile diferime amendar.

14. Castar aven le hohaimata phende anda amari organizația?

¹⁴ Te dichas castar aven le athaimata. O Satan si codo cai phenel buchia neciace anda amari organizația. O Beng si „o dad le hohaimasco”.  (Ioan 8:44; Gen. 3:1-5) Cadea că, amen ajucăras amen ca o Satan te folosil pesche manușen caște phenel buchia neciace anda amari organizația. Cadaia întâmplosardea-pe vi ando iechto secolo.

15. Sar phirade-pe le conducători religioși le Isusosa hai codolența cai lenas-pe pala leste?

¹⁵ Chiar cana o Șiav le Devlesco, o Isus, sas-lo perfecto hai cărdea bare miracolea, o Satan folosisardea-pe chichiva manușendar caște phenel but hohaimata anda leste. Sar exemplo, le conducători religioși phenenas că o Isus încalavelas le benghen le zuralimasa cai avelas catar „o rai le benghengo”. (Mar. 3:22) Hai cana sas-lo andino ca i cris, le rașaia hai le phure anda o poporo doșarde-les că prasadea o anav le Devlesco. Von chiar cărde le bute manușen chidine code te manghen o merimos le Isusosco. (Mat. 27:20) Pala codoia, vi aver așile contra codolenghe cai lenas-pe pala o Isus anda codoia că phenenas i vestea lași. Codola „cărde le manușen andal națiuni te holiaren-pe hai cărde-len te vazden-pe contra le phralenghe”. (Fap. 14:2, 19) Anda o verseto anda Fapte 14:2, O Turno de veghe anda 1 decembria 1998 phenel: „Le evrei cai așenas lenghe contra na numai că ci camenas te așunen i vestea lași, tha astarde te phenen vi hohaimata caște cheren le manușen te dichen iachența nasul le creștinen”.

16. So trebul te anas amenghe andi goghi cana așunas hohaimata anda amari organizația ?

¹⁶ O Satan ci phendea hohaimata numai ando iechto secolo. Vi aghies vo „athavel le manușen pa sea i phuv”. (Rev. 12:9) Dacă așunes buchia nasul anda amari organizația sau anda le phrala cai sile angla amende, an tuche andi goghi sar phirade-pe le dușmani le Devlesche le Isusosa hai lesche discipolența ando iechto secolo. Cadea sar sicavel i Biblia, vi le manușa le  Devlesche de aghies sile persecutime hai phenen-pe hohaimata anda lende. (Mat. 5:11, 12) Ci va avela te pachias cadal hohaimata dacă hachiaras castar aven hai cheras sea so daisaras caște ferisaras amen lendar. Sar daisaras te cheras cadaia?

17. So daisaras te cheras caște na pachias le paramicea hohamne? (2 Timotei 1:13) (Dich vi o chenarii „ So te cheras cana așunas dumes hohamne”.)

¹⁷ Te duriaras amendar le paramicea hohamne. O apostolo Pavel phendea amenghe so te cheras cana așunas buchia neciace. Vo scriisardea le Timoteiosche ‘te phenel caring chichiva nici te na așel lenghi goghi ca le paramicea hohamne’ hai ‘te duriaren pendar le paramicea hohamne cai ci sicaven pachiv caring so si sfânto’. (1 Tim. 1:3, 4; 4:7) Te gândisaras amen: iech țâno șiavorro șiol ando mui orisavi buchi melali cai arachel-la tele, tha iech baro manuș cai hachiarel că daștilas te cherel lesche nasul ci cherelas cadaia niciechdata. Sa cadea, amen duriaras amendar le paramicea hohamne anda codoia că hachiaras mișto castar aven. Amen așunas numai „le dumes sasteveste” le ciacimasche. (Citisar 2 Timotei 1:13.)

18. Sar daisaras te sicavas că si amen pachiamos andi organizația le Iehovaschi?

¹⁸ Ande cado articolo, dichleam numai trin buchia ande save i organizația le Iehovaschi lel-pe pala o Isus. Tha mai si but aver. Daștis te diches-len cana sichios andai Biblia corcoro. Ajutisar vi avere phralen andai congregația te avel-len mai but pachiamos andi organizația le Iehovaschi. Sicav mai dur că pachias tut ande cadai organizația. Daștis te cheres cadaia cana așes pașa late hai slujis loialo le Iehovasche. (Ps. 37:28) Cadea că, te dichas mai dur cuci i bari pachiv cai si amen te avas mașcar codola cai anen închinarea le Iehovasche.