1. Xana vhanu va Yehovha a va hleliwe hi ndlela yini a dzaneni dzra ku sungula?

 MINKAMA hinkwayu loko Yehovha a nyika vhanu ntizro, a yimela leswaku va wu hamba hi ndlela leyi hlelekiki. (1 Kor. 14:33) Hi xikombiso, i ku zrandzra ka Xikwembu Nkulukumba leswaku a madzrungula lamanene ma zrezriwa a misaveni hinkwayu. (Mat. 24:14) Yehovha a nyike Yesu ntizro wa ku kongomisa ntizro lowu nakone Yesu a yentxa hinkwaswu akuva ntizro lowu wu yentxiwa hi ku hleleka. Hi lembe xidzana dzra ku sungula loko mabandla ma simekiwile, ku bekiwe vakulu akuva va kongomisa ni ku zrangela. (Mint. 14:23) A Yerusalema, a ku ni ntlawa lowu a wu vumbiwa hi vapostola lowu a wu teka swiboho leswi mabandla a ma ta swi landzra. (Mint. 15:2; 16:4) Hi kuva ma landzra minkongomiso leyo, “a mabandla a ma ya mahlweni ma tiyisiwa a lipfumelweni ma tlhela ma yandzra siku ni siku”.—Mint. 16:5.

2. Xana i yini leswi Yehovha a swi yentxaka ku sukela hi 1919 akuva a nyikela minkongomiso ni swakuda swa moya ka vhanu vake?

² Ni namunhla Yehovha a ha tama a hlela vhanu vake. Ku sukela hi 1919, Yesu a tizrisa ntlawa wutsrongo wa vamakwezru lava totiwiki akuva va hlela ntizro wa ku zrezra ni ku nyika swakuda swa moya valandzreli vake. a (Luk. 12:42) Swi le livaleni leswaku Yehovha a tovokisa ntizro wa ntlawa lowu.—Eza. 60:22; 65:13, 14.

3-4. a) Nyikela xikombiso xa ndlela leyi hi buyeliwaka ha yone hi ku va vhanu lava hlelekiki. b) Hi ta kambisisa yini ka xidondzro lexi?

³ Loko a hi nga hlelekenga a hi nga ti swi kota ku yentxa ntizro lowu Yesu a hi nyikiki wone. (Mat. 28:19, 20) Hi xikombiso, yanakanya hi loko a hi nga yaveliwanga muganga wa ku tizrela ka  wone, mun’wana ni mun’wana a a ta zrezra lani a ku djulaka. Mimbangu yin’wana a yi ta zrezriwa hi ku phindhaphindha hi vazrezri va ku siyanasiyana, nakasi ka mimbangu yimbeni a ku nga ti zrezriwa. Xana wa ma yanakanya mabindzru man’wana lawa hi ma kumaka hi kuva hi hlelekile?

⁴ Swanga hi leswi Yesu a hleliki valandzreli vake nkama na a ha li lani misaveni, a ha tama a hlela vhanu va Xikwembu Nkulukumba ni namunhla. Ka xidondzro lexi, hi ta vona xikombiso lexi Yesu a hi siyeliki xone ni ndlela leyi nhlengeletanu yezru yi xi landzraka ha yone xikombiso lexo. Hi ta tlhela hi vona ndlela leyi hi nga kombisaka ha yone leswaku ha yi dumba ni ku yi hlonipha nhlengeletanu ya Yehovha.

NHLENGELETANU YEZRU YI LANDZRA XIKOMBISO XA YESU

5. He yini ndlela leyinene leyi hi nga landzraka xikombiso xa Yesu ha yone? (Yohane 8:28)

⁵ Yesu a dondzre ka xikombiso xa Papayi wake wa le matilweni leswi a fanelaka ku swi yentxa ni ku swi hlaya. Hi ku landzra xikombiso xa Yesu, a nhlengeletanu ya Yehovha yi tizrisa Bibele akuva yi hi dondzrisa leswi nga swinene ni leswi bihiki ni ku hanya hi ndlela leyi nyonxisaka Xikwembu Nkulukumba. (Dondzra Yohane 8:28; 2 Tim. 3:16, 17) Minkama hinkwayu nhlengeletanu yi hi dzrimuxa ku dondzra Bibele ni ku hanya hi leswi hi swi dondzraka. Xana ku yentxa leswo swi nga hi pfuna hi ndlela yini?

6. Xana he yini yin’we ya tindlela leti hi buyeliwaka ha tone loko hi dondzra Bibele?

⁶ Hi pfuneka ngopfu loko hi dondzra Bibele hi ku tizrisa mabuku yezru. Hi xikombiso, hi yelanisa leswi hi swi dondzraka a Bibeleni ni leswi hi swi kumaka ka mabuku yezru. Kutani loko hi vona leswaku a minkongomiso leyi hi yi yamukelaka yi seketeliwe Bibeleni, ndlela leyi hi yi dumbaka ha yone nhlengeletanu ya Yehovha ya kula.—Rom. 12:2.

7. Xana he dzrini dzrungula ledzri Yesu a dzri zrezriki, nakone nhlengeletanu ya Yehovha yi mu yetisela hi ndlela yini?

⁷ Yesu a a zrezra “madzrungula lamanene ya Mfumu wa Xikwembu Nkulukumba”. (Luk. 4:43, 44) Handle ka leswo, Yesu a hlaye leswaku valandzreli vake na vone a va fanela ku zrezra mayelanu ni Mfumu lowu. (Luk. 9:1, 2; 10:8, 9) Namunhla hinkwezru hi yingisetaka nkongomiso wa nhlengeletanu ya Yehovha, hi zrezra madzrungula ya Mfumu swi nge na mhaka leswaku hi tsrhama kwini kumbe he byini wutiyanguleli lebyi hi nga na byone.

8. He dzrini tovoko ledzri hi nga na dzrone?

⁸ I tovoko kwezru ku byela vhanu hi Mfumu wa Xikwembu Nkulukumba! Nakone tovoko ledzro a hi dzra mun’wana ni mun’wana. Hi xikombiso, loko Yesu a ha li lani misaveni, a nga pfumelelanga leswaku mimoya ya ku biha yi khanela mayelanu na yene. (Luk. 4:41) Ni namunhla, akuva mhunu a patsreka ka ku yentxa ntizro lowu ni vhanu va Yehovha, a fanela ku yentxa xa kukazri akuva a faneleka. Nakone hine hi kombisa ndlela leyi ha yone hi nyikaka lisima ntizro wa ku zrezra loko hi nyikela wumboni minkama hinkwayu, loko swi koteka. Ku fana na Yesu, nkongometo wezru i ku byala mbewu ya Mfumu a timbilwini ta vhanu ni ku dondzra na vone ntiyiso.—Mat. 13:3, 23; 1 Kor. 3:6.

9. Xana nhlengeletanu yi dzri twalisa hi ndlela yini vito dzra Yehovha?

⁹ Yesu a dondzrise van’wana vito dzra Xikwembu Nkulukumba. Loko a khongota ka Papayi wake, Yesu a hlaye leswi: “Ni va tivise vito dzraku.” (Yoh. 17:26) Hi ku landzra xikombiso xa Yesu, a nhlengeletanu ya Yehovha yi yentxa hinkwaswu akuva yi dondzrisa vhanu hi vito dzra Xikwembu Nkulukumba. Yin’we ya tindlela ta ku yentxa leswo, i ku tizrisa Wundzruluteli Bya Misava Leyimpshwa Bya Bibele Dzra Ku Xwenga. Wundzruluteli lebyi bya Bibele bya kumeka hi ku helela kumbe hi xiyenge hi tindzrimi leti tlulaka 270. A xiyengetela A4 ni  A5 xa wundzruluteli lebyi bya Bibele, xi ni wutsrhokotsrhoko mayelanu ni leswaku hi ndlela yini nakone ha yini vito dzra Xikwembu Nkulukumba dzri bekiwile a Bibeleni. Nakone a xiyengetela C, lexi kumekaka ka Bíblia de Estudo xi kombisa wumboni bya leswaku ha yini a vito dzra Xikwembu Nkulukumba dzri fanela ku humelela ka Matsralwa ya Wukriste ya Xigriki hi makhambi ya 237.

10. Hi nga dondzra yini ka leswi hlayiwiki hi wansati wa kukazri wa le Mianmar?

¹⁰ Ku fana na Yesu, hi djula ku pfuna vhanu vanyingi akuva va tiva vito dzra Xikwembu Nkulukumba. Wansati wa kukazri wa le Mianmar, lweyi a a ni 67 wa malembe loko a dondzre leswaku a vito dzra Xikwembu Nkulukumba i Yehovha, a sungule ku dzrila. Yene a te: “Ku sukela ni pswaliwa a ni ngi ngi dzri twa vito dzra Xikwembu Nkulukumba . . . phela u ni dondzrise ntxhumu wa lisima ku tlula mintxhumu hinkwayu.” Hi lani hi swi voniki ha kone ka mfambu lowu, vhanu va nga hamba ku ntxintxa a wuton’wini byavu loko va dondzra hi vito dzra Xikwembu Nkulukumba.

TAMA U KOMBISA LESWAKU WA YI DUMBA NHLENGELETANU

11. Xana vakulu va swi kombisa hi ndlela yini leswaku va yi dumba nhlengeletanu ya Yehovha? (Tlhela u vona ni mufoto.)

¹¹ Xana vakulu va nga kombisa hi ndlela yini leswaku va yi dumba nhlengeletanu ya Xikwembu Nkulukumba? Loko va yamukela nkongomiso wa kukazri, vakulu va wu dondzra ha hombe va tlhela va yentxa hinkwaswu akuva va wu landzra. A vo yamukela ntsena minkongomiso ya ndlela leyi va nga yi fambisaka ha yone mintlhanganu kumbe ndlela leyi va nga dzri khongotelaka ha yone bandla, kambe va tlhela va yamukela minkongomiso ya ndlela leyi va nga hlayisaka ha yone tihamba ta Kriste. Loko vakulu va landzra minkongomiso leyi va yi yamukelaka ka nhlengeletanu, vamakwezru va titwa na va zrandzriwa ni ku hlayisiwa ha Yehovha.

12. a) Ha yini hi fanela ku tizrisana ni vamakwezru lava zrangelaka? (Vaheberu 13:7, 17) b) Ha yini hi fanela ku lavisisa matsrhamela lamanene ka vamakwezru lava zrangelaka a nhlengeletanwini?

¹² Loko hi yamukela nkongomiso wa kukazri ka vakulu, hi fanela ku tiyimisela ku tekela ku wu landzra. Loko hi yentxa leswo, swi ta va nabyalela vakulu ku zrangela bandla hi ndlela leyinene. A Bibele dzri hlaya leswaku hi fanela ku tibeka hansi ni ku yingiseta lava va hi zrangelaka. (Dondzra Vaheberu 13:7, 17.) Kambe, leswo minkama yin’wana a swi nabyali. Ha yini? Hikusa vavanuna lava zrangelaka a va hetisekanga. Kambe loko hi beka miyanakanyu yezru ka swihoxo swavu ku nga li ka matsrhamela yavu lamanene, hi ta va na hi pfuna nala. Hi ndlela yini? A nala a djula ku va hi ganaganeka leswaku Yehovha hi yene a tizrisaka nhlengeletanu akuva a hi kongomisa. Loko hi tsrhamela ku vona swihoxo ka vamakwezru lava hi zrangelaka, hi ta va na hi pimisa swa ku biha mayelanu ni nhlengeletanu yezru nakone hi ta tsrhika ku yi dumba. Xana hi nga yentxa yini akuva hi ma tiva madzrimi lawa valala vezru va ma hlayaka ni kuva hi fambela kule na wone?

U NGA PFUMELELI VAN’WANA VA KU YENTXA U TSRHIKA KU DUMBA NHLENGELETANU YA YEHOVHA

13. Xana valala va Xikwembu Nkulukumba va zama ku ntxhimisa nhlengeletanu ya Yehovha hi ndlela yini?

¹³ Vakaneti va Xikwembu Nkulukumba va zama ku yentxa leswaku mintxhumu leyinene ka nhlengeletanu ya Yehovha yi yentxa ingi a hi yinene. Hi xikombiso, a Bibeleni hi dondzra leswaku Yehovha a yimela leswaku vagandzreli vake va va lava basiki hi tlhelo dzra nyama, a mahanyelweni ni hi tlhelo dzra moya. A tlhela a hlaya leswaku mhunu lweyi a yentxaka swa ku biha a tlhela a nga tisoli a nga fanelanga a tama a va bandleni. (1 Kor. 5:11-13; 6:9, 10) Kambe leswi  hi yingisetaka xileleto lexi, a vakaneti va li a hi na lizrandzru, ha va yavanyisa nakone a hi pfumeleli vhanu lava hambaniki na hine.

14. I mani lweyi a vangaka madzrimi mayelanu ni nhlengeletanu?

¹⁴ Twisisa leswaku i mani lweyi a hlaselaka nhlengeletanu hi ku kongoma. Sathana hi yene hi ku kongoma a hangalasaka madzrimi mayelanu ni nhlengeletanu. Yene i “papayi wa madzrimi”. (Yoh. 8:44; Gen. 3:1-5) Xileswo, a swi hlamalisi kuva Sathana a tizrisa vhanu va kukazri akuva va hangalasa swihitana swa madzrimi mayelanu ni nhlengeletanu ya Yehovha. Hi leswi yentxekeliki Yesu ni vakriste va ku sungula.

15. I yini leswi vazrangeli va wukhongoti va swi yentxiki ha Yesu ni valandzreli vake?

¹⁵ Yesu a a li n’wana wa Xikwembu Nkulukumba, a a hetisekile nakone a hambe mahlolana ya ku hlamalisa. Nambitasu, Sathana a tizrise vhanu va kukazri akuva va hangalasa madzrimi mayelanu na Yesu. Hi xikombiso, a vazrangeli va wukhongoti a va byela vhanu leswaku Yesu a a nyikiwa ntamu wa ku hlongola mademona hi “mufumi wa mademona”. (Mar. 3:22) Loko Yesu a le ku yavanyisiweni, a vazrangeli va wukhongoti va mu lumbete leswaku a zruketele Yehovha nakone va zame ku kutxetela xitsrhungu kuva xi kombela leswaku a dlayiwa. (Mat. 27:20) Ntsrhaku ka leswo, loko vadondzrisiwa va Yesu va zrezra madzrungula lamanene, a valala vavu a “va hlohlotela vhanu va matiko leswaku va lwisana ni vamakwezru”. (Mint. 14:2, 19) A Xihondzro Xa Ku Zrindzra xa 1 ka Dezembru wa 1998, loko xi tlhamuxela Mintizro 14:2 xi li: “Leswi a va nga yanelisekanga hi ku fulazrela dzrungula, vakaneti va Vayuda va tlhele va sungula tsima dzra ku hangalasa madzrimi, va zama ku yentxa vamatiko va nyenya vakriste.”

16. I yini leswi hi fanelaka ku swi dzrimuka loko hi twa madzrimi mayelanu ni nhlengeletanu ya Yehovha?

¹⁶ Ni namunhla Sathana a ha tama a hangalasa madzrimi. Hi yene a “kanganyisaka misava hinkwayu”. (Mpful. 12:9) Loko u yingela va khanela ku biha hi nhlengeletanu kun’we ni  vamakwezru lava zrangelaka, dzrimuka leswaku Sathana a same a hembela Yesu kun’we ni valandzreli vake hi lembe xidzana dzra ku sungula. Hi lani Bibele dzri profetiki ha kone, a vhanu namunhla a va ta xanisa ni ku vulavula ku biha hi vhanu va Xikwembu Nkulukumba. (Mat. 5:11, 12) A hi nge ti kholwa ka madzrimi lawo loko hi twisisa leswaku i mani hi ku kongoma a swi vangaka ni loko hi yentxa hinkwaswu leswi hi swi kotaka akuva hi tisizrelela hi ku kahlula. Xana hi nga yentxa yini akuva hi tisizrelela?

17. I yini leswi hi fanelaka ku swi yentxa akuva hi fambela kule ni swihitana swa madzrimi? (2 Timotewu 1:13) (Vona bokisi ledzri liki “ Leswi Hi Nga Swi Yentxaka Loko Hi Twa Swihitana Swa Madzrimi”.)

¹⁷ Fambela kule ni swihitana swa madzrimi. Mupostola Pawulo a nyikele minkongomiso ya ku khanya mayelanu ni leswi hi nga swi yentxaka loko hi yingela swihitana swa madzrimi. Yene a byele Timotewu leswaku a ‘nyika vhanu va kukazri xilayu akuva va nga . . . yingiseti swihitana swa madzrimi’ ni ku va va “fambela kule ni swihitana swa madzrimi”. (1 Tim. 1:3, 4; 4:7) Yanakanya hi leswi: Ntsrongwana hi ku pfumala wutivi a nga ha peta non’wini ntxhumu lowu a wu zroliki hansi, kambe mhunu lweyi a kuliki a nge swi yentxi leswo hikusa awa swi tiva leswaku swi ni nghozi. Na hine hi fambela kule ni swihitana swa madzrimi hikusa ha swi tiva leswaku i mani a swi vangaka. Hine hi yingiseta “mazritu lama pfunaka” ya ntiyiso.—Dondzra 2 Timotewu 1:13.

18. Hi nga swi kombisa hi ndlela yini leswaku ha yi dumba nhlengeletanu ya Yehovha?

¹⁸ Ka xidondzro lexi, hi vone tindlela tizrazru leti nhlengeletanu ya Yehovha yi yetiselaka xikombiso xa Yesu ha tone. Nkama lowu u dondzraka Bibele, xiyisisa tindlela tin’wana leti ha tone hi nga yetiselaka xikombiso xa Yesu. Pfuna van’wana a bandleni leswaku va hlonipha ni ku dumba nhlengeletanu ya Yehovha nakone minkama hinkwayu tama u tizrela Yehovha hi ku dumbeka hi kuva u tizrisana ni nhlengeletanu leyi a yi tizrisaka akuva a hetisisa ku zrandzra kwake. (Amaps. 37:28) Hinkwezru a hi tameni hi dzri nyika lisima tovoko ledzri hi nga na dzrone dzra ku tizra ni vhanu va Yehovha lava nga ni lizrandzru nakone va dumbekaka.