1. Atumiki a Yahova akhatsogolerwa tani mu ndzidzi wa apostolo?

 YAHOVA angapasa basa atumiki ace toera kucita, ndzidzi onsene iye asadikhira kuti iwo acite mwadidi. (1 Akor. 14:33) Mwacitsandzo, Mulungu asafuna kuti mphangwa zadidi ‘zimwazwe pa dziko yonsene yapantsi.’ (Mat. 24:14) Yahova apasa Yezu basa yakutsogolera basa yakumwaza mphangwa, pontho Yezu asatsogolera basa ineyi toera icitwe mwadidi. Mu ndzidzi wa apostolo, pidakhazikiswa mipingo, akulu a mpingo akhazikiswa toera kutsogolera mipingo ineyi. (Mabasa 14:23) Pontho mu Yerusalemu, apostolo pabodzi na akulu a mpingo akhacita pisankhulo mbapitumiza kuna abale na alongo. (Mabasa 15:2; 16:4) Na thangwi ineyi, “mipingo ikhapitiriza kuwangiswa mu cikhulupiro, pontho anyakupfundza akhathimizirika ntsiku zonsene.”— Mabasa 16:5.

2. Yahova asacitanji kutomera mu caka ca 1919 toera kutsogolera na kupasa cakudya cauzimu atumiki ace?

² Lero, Yahova ali kupitiriza kutsogolera gulu yace munjira yadidi. Kutomera mu caka ca 1919, mukutsogolerwa na Yahova, Yezu asaphatisira nsoka ung’ono wa amuna akudzodzwa toera kutsogolera basa yakumwaza mphangwa na kupasa cakudya cauzimu atowereri ace. a (Luka 12:42) Pisaoneka pakweca kuti Yahova ali kupasa nkhombo basa inacita nsoka unoyu wa Akristu akudzodzwa.— Iza. 60:22; 65:13, 14.

3-4. (a) Thangwi yanji ndi pyadidi kubvera pitsogolero pinapaswa ife? (b) Tinapfundzanji mu nsolo uno?

 ³ Mbidakhonda kukhala na pitsogolero, nee mbatidakwanisa kucita basa idatipasa Yezu. (Mat. 28:19, 20) Mwacitsandzo, nyerezerani kuti mpingo ubodzi na ubodzi nee wapaswa cisa cakumwaza mphangwa. Munthu mbadamwaza mphangwa mbuto zonsene zinafuna iye. Pisa pinango mbapidamwazirwa mphangwa kakamwe, mbwenye pinango nkhabe. Kodi musakwanisa kuona maphindu anango anakhala na ife thangwi yakuphatisira pitsogolero pinatambira ife?

⁴ Pikhali Yezu pa dziko yapantsi, iye atsogolera atowereri ace, pontho asapitiriza kutsogolera atumiki ace lero. Mu nsolo uno, tinaona citsandzo cidakhazikisa Yezu, pontho tinaona kuti gulu yathu isatowezera tani citsandzo cace. Tinaonambo kuti tinapangiza tani kuti tisalemedza na kunyindira gulu ya Yahova.

GULU YATHU ISATOWEZERA CITSANDZO CA YEZU

5. Gulu ya Yahova isatowezera tani citsandzo ca Yezu? (Juwau 8:28)

⁵ Yezu apfundza na Pai wace pinthu pikhafunika iye kucita na kulonga. Mukutowezera citsandzo ca Yezu, gulu ya Yahova isaphatisira Bhibhlya toera kutipfundzisa kusiyanisa cadidi na cakuipa mbatikhala m’maso munjira inakomeresa Yahova. (Lerini Juwau 8:28; 2 Tim. 3:16, 17) Ndzidzi onsene tisakumbuswa kufunika kwa kuleri Bhibhlya na kuphatisira pinapfundza ife. Kodi kucita pyenepi kusatiphedza tani?

6. Kupfundza Bhibhlya kunatiphedza tani?

⁶ Ife tisaphedzeka kakamwe tingapfundza Bhibhlya mukuphatisira mabukhu athu. Mwacitsandzo, tinakwanisa kulandanisa pitsogolero pinatambira ife mu gulu ya Yahova na pinalonga Bhibhlya. Natenepa, tingaona kuti pitsogolero pyenepi pisabverana na Malemba, kunyindira kwathu gulu ya Yahova kusathimizirika.—Aroma 12:2.

7. Ndi mphangwa zipi zikhamwaza Yezu, pontho gulu ya Yahova isatowezera tani citsandzo cace?

⁷ Yezu akhamwaza “mphangwa zadidi za Umambo wa Mulungu.” (Luka 4:43, 44) Kusiyapo pyenepi, Yezu alonga kuti anyakupfundzace akhafunikambo kumwaza mphangwa za Umambo. (Luka 9:1, 2; 10:8, 9) Lero, onsene anabvera pitsogolero pya gulu ya Yahova asamwaza mphangwa za Umambo, mwakukhonda tsalakana kunakhala iwo peno mabasa anacita iwo mu gulu ya Yahova.

8. Ndi mwai upi uli na ife?

⁸ Ndi mwai ukulu kakamwe kuna ife kudziwisa anango Umambo wa Mulungu. Thangwi mwai unoyu nee usapaswa anthu onsene. Pikhali Yezu pa dziko yapantsi, iye nee atawirisa kuti mizimu yakuipa ilonge thangwi ya iye. (Luka 4:41) Lero, munthu mbadzati kumwaza mphangwa pabodzi na atumiki a Yahova, iye asafunika kukhala wakuthema toera kucita basa ineyi. Ife tinapangiza kuti tisalemedza mwai unoyu tingawangisira toera kumwaza mphangwa ndzidzi onsene. Ninga Yezu, cifuniro cathu ndi kubzwala mbeu ya Umambo m’mitima ya anthu na kuapfundzisa undimomwene.—Mat. 13:3, 23; 1 Akor. 3:6.

9. Gulu ya Yahova isapangiza tani kuti dzina ya Mulungu ndi yakufunika?

⁹ Yezu apfundzisa anthu dzina ya Mulungu. Mu phembero idacita iye kuna Pai wace, Yezu alonga: “Ine ndaadziwisa dzina yanu.” (Juw. 17:26) Mukutowezera citsandzo ca Yezu, gulu ya Yahova isacita pyonsene pinakwanisa iyo toera kuphedza anthu kuti adziwe dzina ya Mulungu. Njira ibodzi yakucita pyenepi ndi kuphatisira Bhibhlya ya Dziko Ipswa. M’Bhibhlya ineyi musagumanika dzina ya Mulungu m’mbuto zonsene zikhagumanika iyo kale, pontho isagumanika yonsene peno m’makhundu anango  mu pilongero pyakupiringana 270. Ma Apendise A4 na A5 a Bhibhlya ineyi asafokotoza kuti dzina ya Yahova yaikhwa tani m’Bhibhlya ineyi. Apendise C anagumanika mu Bíblia de Estudo asapangiza kuti thangwi yanji dzina ya Mulungu isagumanika m’Malemba Acigerego Acikristu m’maulendo akukwana 237.

10. Mafala adalonga nkazi wa ku Mianmar asatipfundzisanji?

¹⁰ Ninga Yezu, ife tisafuna kuphedza anthu azinji kakamwe toera adziwe dzina ya Mulungu. Nkazi unango wa ku Mianmar wakuti akhali na pyaka 67 pyakubalwa, pidapfundza iye kuti dzina ya Mulungu ndi Yahova, atoma kulira. Iye alonga: “Ine cipo ndikhadabva kale dzina ya Mulungu mu umaso wanga. Ine ndapfundza cinthu cakufunika kakamwe.” Citsandzo ceneci cisapangiza kuti anthu angadziwa dzina ya Mulungu, pyenepi pinakwanisa kucinja umaso wawo.

PITIRIZANI KUPANGIZA KUTI MUSANYINDIRA GULU YATHU

11. Akulu a mpingo anapangiza tani kuti asanyindira gulu ya Yahova? (Onanimbo foto.)

¹¹ Akulu a mpingo anapangiza tani kuti asanyindira gulu ya Yahova? Angatambira pitsogolero, akulu a mpingo asapileri mwadidi, pontho asawangisira toera kupiphatisira. Kusiyapo kutambira pitsogolero pinalonga kuti anacita tani makhundu pa misonkhano na kucita phembero pa mpingo, iwo asatambirambo pitsogolero pinalonga kuti anatsalakana tani mabira a Kristu. Akulu a mpingo angabvera pitsogolero pinapaswa iwo na gulu yathu, abale na alongo asapibva kuti asafuniwa, pontho asatsalakanwa mwadidi na Yahova.

12. (a) Thangwi yanji tisafunika kubvera abale anatitsogolera mu gulu ya Yahova? (Ahebheri 13:7, 17) (b) Thangwi yanji tisafunika kuyang’ana basi ene makhaliro adidi a abale anewa?

¹² Tingatambira pitsogolero pya akulu a mpingo, tisafunika kupibvera. Tingacita pyenepi, pinakhala pyakukhonda nentsa kuna akulu a mpingo toera kutsogolera mpingo. Bhibhlya isatipanga toera tibvere na kulemedza ale anatitsogolera. (Lerini Ahebheri 13:7, 17.) Mbwenye pyenepi midzidzi inango pinakhala pyakunentsa. Thangwi yanji? Thangwi amuna anewa ndi akusowa ungwiro. Tingayang’ana basi ene madodo awo m’mbuto mwakuona makhaliro awo adidi, mwandimomwene tinaphedzera anyamalwa athu. Munjira ipi? Anyamalwa athu asafuna tipenule kuti Yahova nee asaphatisira gulu yace toera kutitsogolera. Mphapo tisafunika kucitanji toera tidzindikire na kukhonda uthambi unalonga anyamalwa athu?

LEKANI TAWIRISA KUTI ANANGO AKUCITISENI KUSIYA KUNYINDIRA GULU YA YAHOVA

13. Anyamalwa a Mulungu asayesera tani kulonga mwakuipa gulu ya Yahova?

¹³ Anyamalwa a Mulungu asayesera kuticitisa kuona pinthu pyadidi pinacitika mu gulu ya Yahova ninga pyakuipa. Mwacitsandzo, ife tisapfundza m’Bhibhlya kuti Yahova asafuna kuti alambiri ace akhale akucena mwakumanungo, m’makhaliro awo na mwauzimu. Pontho Yahova alonga kuti munthu anacita madawo mbakhonda kutcunyuka nee asafunika kupitiriza mu mpingo. (1 Akor. 5:11-13; 6:9, 10) Nakuti tisabvera ntemo unoyu, anyamalwa athu asalonga kuti nee tisafuna anthu, tisaatonga, pontho nee tisatawira kukhala na anthu anacita pinthu pyakusiyana na pinafuna ife.

14. Mbani anatsogolera anthu analonga uthambi thangwi ya gulu yathu?

¹⁴ Dziwani kuti mbani anatsogolera kutcingwa kwa gulu yathu. Sathani Dyabo ndiye anamwaza uthambi, thangwi iye ndi “baba wa uthambi.” (Juw. 8:44; Gen. 3:1-5) Natenepa, nee ndi pyakudzumatirisa kuna ife tingaona Sathani mbaphatisira anthu anango toera kumwaza uthambi thangwi ya gulu ya Yahova. Ndi pyenepi  pidacitikira Yezu na Akristu a mu ndzidzi wa apostolo.

15. Atsogoleri a mauphemberi acitanji kuna Yezu na kuna atowereri ace?

¹⁵ Yezu, Mwana wa Mulungu akhali waungwiro, pontho iye acita pirengo pyakudzumatirisa. Ngakhale tenepo, Sathani aphatisira anthu anango toera kumwaza uthambi thangwi ya iye. Atsogoleri a mauphemberi akhapanga anthu kuti Yezu asabulusa madimonyo na “mphambvu za ntongi wa madimonyo.” (Marko 3:22) Mu ndzidzi ukhatongwa Yezu, atsogoleri a mauphemberi ampambizira kuti atikana Yahova, pontho anyengerera mbumba toera iphembe kuti iye aphiwe. (Mat. 27:20) Buluka penepo, mu ndzidzi ukhamwaza mphangwa zadidi anyakupfundza a Yezu, anyamalwa awo “anyengerera anthu a madzindza anango toera kuida abale.” (Mabasa 14:2, 19) Mukufokotoza lemba ya Mabasa 14:2, Sentinela ya 1° de Dezembro de 1998 yalonga: “Nakuti Ayuda akhatcinga Akristu nee akhakomerwa na mphangwa zikhamwazirwa iwo, akhayeserambo kucitisa anango toera akhale na manyerezero akuipa thangwi ya Akristu.”

16. Tisafunika kukumbukanji tingabva mphangwa zauthambi thangwi ya gulu ya Yahova?

¹⁶ Sathani asapitiriza kumwaza uthambi lero. Iye “asanyengeza dziko yonsene yapantsi.” (Apok. 12:9) Natenepa, mungabva mphangwa zauthambi thangwi ya gulu yathu peno thangwi ya abale athu anatsogolera, kumbukani kuti anyamalwa a Mulungu atsalakana munjira ibodzi ene Yezu na anyakupfundzace. Ninga mudalonga Bhibhlya mwanyapantsi, lero anthu asatcinga na kulonga mwakuipa atumiki a Mulungu. (Mat. 5:11, 12) Ife nee tinanyengezwa na uthambi unoyu tingadziwa ule anatsogolera anthu toera kulonga uthambi unoyu, pontho tingacita pyonsene pinakwanisa ife toera  kutsidzikizika mwakucimbiza. Mphapo tinacita tani pyenepi?

17. Tisafunika kucitanji toera tikhonde mphangwa zauthambi? (2 Timoti 1:13) (Onanimbo bokosi ya nsolo wakuti “ Musafunika Kucitanji Mungabva Mphangwa Zauthambi?”)

¹⁷ Lekani kubvesera mphangwa zauthambi. Mpostolo Paulu apereka pitsogolero thangwi ya pinafunika ife kucita tingabva mphangwa zauthambi. Iye apanga Timoti toera ‘apange anthu anango kuti akhonde kubvesera pithankano pyapezi,’ pontho toera ‘akhonde pithankano pyapezi na pyakusowa basa pinapswipisa pinthu pyakucena.’ (1 Tim. 1:3, 4; 4:7) Mwacitsandzo, mwana wang’ono anakwanisa kulokota cinthu pantsi mbaciikha pamulomo. Mbwenye munthu wankulu anadziwa ngozwi ya pyenepi, cipo anapicita. Munjira ibodzi ene, ife tisakhonda mphangwa zauthambi thangwi tisadziwa kuti mbani anatsogolera uthambi unoyu. Ife tisabvesera basi ene “mafala adidi” a undimomwene.—Lerini 2 Timoti 1:13.

18. Tinapangiza tani kuti tisanyindira gulu ya Yahova?

¹⁸ Mu nsolo uno, taona basi ene njira zitatu zinapangiza kuti gulu ya Yahova isatowezera tani Yezu. Mu ndzidzi unapfundza imwe Bhibhlya, onani njira zinango zakuti tinakwanisa kutowezera citsandzo ca Yezu. Phedzani anango mu mpingo toera alemedze na kunyindira gulu ya Yahova. Pontho pitirizani kutumikira Yahova mwakukhulupirika na kubvera gulu inaphatisira iye toera kucita cifuno cace. Natenepa mbatipitirizeni kulemedza mwai ukulu uli na ife wakuphata basa pabodzi na mbumba yaufuni na yakukhulupirika ya Yahova.