1. Gurhi abantu ba Yehova bal’ipanzirwe omu myaka igana mirhanzi?

 NGASI mango erhi Yehova aha abantu bage mukolo mulebe, aba alonzize baguhikirize omu njira epanzirwe bwinja. (1 Kr. 14:33) Kwa lwiganyo, Nnâmahanga alonzize omwanzi mwinja guyalagazibwe omw’igulu lyoshi. (Mt. 24:14) Yehova ahizireho Yezu ayimangire ogo mukolo. Yezu ajijire ogo mukolo guhikirizibwe omu njira epanzirwe bwinja. Omu myaka igana mirhanzi, erhi ebigamba birhondezibwa omu maeneo gali lubero, abagula bahirwaho lyo bahâna obulongozi n’okuyimangira ogo mukolo. (Ebj. 14:23) Omu Yeruzalemu, embaraza eri yalongoza yal’ijijirwe n’abagula n’entumwa, yarhôzire mihigo milebe ebigamba byoshi byal’ihûnyirwe birhumikire. (Ebj. 15:2; 16:4) Bulya bene wirhu na bali birhu bakag’irhumikira obulongozi bahâbagwa, ‘emirhwe y’Abakristu [bigamba] byakomera omu bwemere na ngasi lusiku byakâyushuka.’—Ebj. 16:5, Mashi Bible.

2. Kurhondera omu mwaka gwa 1919, gurhi Yehova akag’ihamwo abantu bage obulongozi n’ebiryo by’ekiroho?

² Ciru n’ene, Yehova agendekire apanga abantu bage. Kurhondera omu mwaka gwa 1919, Yezu ali akolesa ecigusho cisungunu c’abalume bashige amavurha lyo bapanga omukolo gw’okuhubiri n’okuha abanafunzi bage ebiryo by’ekiroho. a (Lk. 12:42) Bibonekine n’obwalagale oku Yehova ali agisha omukolo gw’eco cigusho.—Iz. 60:22; 65:13, 14.

3-4. (a) Ohâne olwiganyo luyerekine gurhi rhuyungukamwo omu kuba bapange bwinja. (b) Bici rhwaganirira mw’eci cigabi?

 ³ Acibaga rhurhal’ipanzirwe bwinja, rhurhakabire n’obuhashe bw’okuhikiriza omukolo Yezu arhuhîre rhujire. (Mt. 28:19, 20) Kwa lwiganyo, orhanye erhi akaba amaeneo garhal’igabirwe; ngasi muntu akajire ahubiri aha analonzize. Abahubiri bali lubero bakajire bahubiri kanji-kanji omu maeneo malebe n’agandi maeneo gakayibagirwe loshi-loshi. Ka wanarhanya lugenda ezindi njira rhuyungukamwo omu kuba rhupanzirwe bwinja?

⁴ Oku Yezu al’ipanziremwo abanafunzi bage amango ali hanw’igulu, ko anagendekire apanga abantu ba Nnâmahanga ene. Mw’eci cigabi, rhwaganirira olwiganyo Yezu ayerekine na gurhi ikubuliro lirhu likulikiramwo olwiganyo lwage. Kandi rhwaganirira oku rhwakayerekanamwo oku rhulangalire ikubuliro lya Yehova.

IKUBULIRO LIRHU LINAKULIKIRE OLWIGANYO LWA YEZU

5. Njira nguma ehi ikubuliro lirhu likulikiramwo olwiganyo lwa Yezu? (Yowane 8:28)

⁵ Kugerera Ishe, Yezu ayizire eby’okujira n’eby’okuderha. Omu kukulikira olwiganyo lwa Yezu, enyigirizo z’amakanuni g’olugenzi n’obulongozi bw’ikubuliro lya Yehova, biba biyimangire oku Akanwa ka Nnâmahanga. (Osome Yowane 8:28; 2 Tm. 3:16, 17) Ngasi mango rhunakakengezibwa okusoma n’okukolesa Akanwa ka Mungu. Gurhi rhuyungukamwo omu kukulikira er’ihano?

6. Njira nguma ehi y’obulagirire rhuyungukamwo omu kuyiga Ebibliya?

⁶ Rhunayunguke bwenene erhi rhuyiga Ebibliya kugerera oburhabale bw’ebicapo birhu by’Ecikristu. Kwa lwiganyo, rhunabe n’obuhashe bw’okubona gurhi amakanuni g’Ebibliya gapatine n’obulongozi rhuhâbwa n’ikubuliro. Erhi rhubona oku obulongozi rhuhâbwa buyimangire oku Mandiko, obulangalire bwirhu omu ikubuliro lya Yehova bunayushuke.—Rm. 12:2.

7. Mwanzi guhi Yezu akag’ihubiri, na gurhi ikubuliro lya Yehova likulikiramwo olwiganyo lwage?

⁷ Yezu akag’ihubiri “emyanzi minja y’Obwami bwa Nnâmahanga.” (Lk. 4:43, 44) Kandi, Yezu arhegesire abanafunzi bage bahubiri lugenda Obwami. (Lk. 9:1, 2; 10:8, 9) Ene, abantu boshi bacilunzire n’ikubuliro lya Yehova banahubiri omwanzi mwinja gw’Obwami ciru akaba balamire ngahi erhi bagwerhe mikolo ehi omw’ikubuliro.

8. Lukengwa luhi rhugwerhe?

⁸ Rhunabone oku luli lukengwa lunene bwenene okuganirira abandi okuli lugenda Obwami bwa Nnâmahanga! Olo lukengwa lurhaba lwa ngasi muntu. Kwa lwiganyo, amango Yezu ali hanw’igulu, arhayemereraga abazimu bahâne obuhamirizi okubimuyerekire. (Lk. 4:41) Ene, embere omuntu arhondere okuhubiri haguma n’Abahamirizi ba Yehova, agwasirwe abe akola ali alama omu njira eshagalusize Yehova. Rhunayerekane kunganaci rhushagalukire olukengwa lw’okuhubiri omu kuhâna obuhamirizi ngasi hoshi na ngasi mango rhuhashire okujira ntyo. Aka Yezu, omuhigo gwirhu guba gwa kurhwera n’okudomera emburho z’okuli kw’Obwami omu mirhima y’abantu.—Mt. 13:3, 23; 1 Kr. 3:6.

9. Gurhi ikubuliro limanyisamwo izino lya Mungu?

⁹ Yezu amanyisize izino lya Mungu. Omw’isala asaliraga Ishe w’omu mpingu, Yezu aderha ntya: “Nabamanyisize izino lyawe.” (Yn. 17:26) Omu kukulikira olwiganyo lwa Yezu, ikubuliro lya Yehova linajire ngasi kantu kanahashikine lyo lirhabala abandi bamanye izino lya Mungu. E Biblia​—Tafsiri ya Ulimwengu Mupya yajijire omukolo gw’obulagirire bwenene muli oko omu kugalula izino lya Mungu ngasi hoshi ly’al’ishinganine libe. Ene, eyo mpindulo  y’Ebibliya ekola eri, yoshi ngumana erhi cigabi cayo, omu ndimi zilushire 270. Omu Nyongeza A4 na A5 y’eyo mpindulo y’Ebibliya, wanayiga binji lugenda bulya gurhi na gurhi izino lya Nnâmahanga lyagalwirwemwo omu Bibliya. E Nyongeza C eri omu Bibliya y’Ifunzo y’Ecifaransa, ehânyire mahugûlo manji gayerekine n’obwalagale oku izino lya Mungu lyal’ishinganine libe omu Mandiko g’Ecigiriki g’Ecikristu kali 237.

10. Ebi mukazi muguma w’omu Myanmar aderhaga, bici bikuyigirizize?

¹⁰ Aka Yezu, rhuba rhulonzize rhurhabale bantu banji nk’oku binahashikine bahikire okumanya izino lya Mungu. Erhi mukazi muguma w’omu Myanmar ogwerhe myaka 67 ayiga oku Mungu ajira izino, arhoza emirenge anabwira mwalimu wage w’Ebibliya ntya: “Obu bo burhanzi omu kalamo kani nayumva oku izino lya Mungu ye Yehova. . . . Wanyigirizize akantu k’obulagirire bwenene ntalisag’iyumva omu kalamo kani.” Nk’oku olo lwiganyo luyerekine, okumanya izino lya Mungu kwanahuma bwenene oku bantu bagwerhe emirhima minja.

OGENDEKERE WAYEREKANA OKU OLANGALIRE IKUBULIRO LIRHU

11. Gurhi abagula bakayerekanamwo oku balangalire ikubuliro lya Yehova? (Olole n’enfoto.)

¹¹ Omu njira ehi nguma abagula bakayerekanamwo oku balangalire ikubuliro lya Mungu? Amango bamahâbwa obulongozi, bashinganine babusome bwinja-bwinja n’okujira oku bakanahasha koshi lyo babukolesa. Kwa lwiganyo, banahâbwe obulongozi arhali lugenda oku bakajira ebigabi by’entimanano kone n’okusalira enyanya z’ecigamba, cikone kandi n’oku bakashibirira ebibuzi bya Kristu. Abagula bakulikira obulongozi bw’ikubuliro banarhabale aba bali bashibirira baciyumve bali omu bulanzi banazigirwe.

12. (a) Bulya gurhi rhushinganine rhulunge okuboko abali balongoza? (Abahabraniya 13:7, 17) (b) Bulya gurhi rhushinganine rhusegeze obwenge oku morherhe minja g’abali balongoza?

¹² Erhi rhwakahâbwa obulongozi kugerera abagula, rhushinganine rhuburhumikire buzira kusezibwa. Omu kujira ntyo, rhwanajira omukolo gw’abali balongoza egarhi kirhu gube mulembu. Ebibliya erhuhire omurhima rhukenge rhunarhumikire abali balongoza egarhi kirhu. (Osome Abahabraniya 13:7, 17.) Hali amango oko kakwaba kuzibu. Bulya gurhi? Bulya abo balume barhaba bimana. Lubero n’oko, erhi rhwakakasegeza obwenge bwirhu oku buzamba bwabo ahali h’okubusegeza oku morhere gabo minja, rhwanaba rhuli rhwarhabala abashombanyi birhu. Omu njira nci? Rhwanaheza obulangalire bwirhu omu ikubuliro lya Yehova na ntyo ko abashombanyi birhu balonzize rhujire. Bici rhwakajira by’obulagirire lyo rhumanya n’okuyaka emyanzi y’obunywesi abashombanyi birhu bayalagaza?

ORHALEKAGA ABANDI BARHUME WAHEZA OBULANGALIRE BWAWE OMU IKUBULIRO

13. Gurhi abashombanyi ba Mungu bahegezamwo ikubuliro lyage irenge?

¹³ Abashombanyi ba Mungu banacihangane okuyerekana nka kuno ebintu binja lugenda ikubuliro lya Yehova biba bibi. Kwa lwiganyo, rhwayizire omu Mandiko oku Yehova aba alonzize abakozi bage babe bacîre omu lugenzi, omu hali y’omubiri n’ey’ekiroho. Aba ahûnyire oku ngasi muntu yeshi wajijire ecaha arhanaciyunjuzizi akulwe omu cigamba. (1 Kr. 5:11-13; 6:9, 10) Rhunarhumikire er’irhegeko liri omu Mandiko. Bulya rhunarhumikire er’irhegeko, abantu barhushomba banakaderha oku rhurhazigira abantu, oku rhunakabatwira olubanja, n’oku rhurhayemera omuntu yeshi-yeshi oli lubero na nirhu.

14. Ndi oba nshoko y’emyanzi y’obunywesi lugenda ikubuliro lya Yehova?

 ¹⁴ Ohugûkwe bandi bahagalika ikubuliro. Shetani ye oba nshoko y’emyanzi y’obunywesi abantu baderhera ikubuliro. Ye oba “ishe w’obunywesi.” (Yn. 8:44; Murh. 3:1-5) Co cirhumire, rhushinganine rhumanye oku Shetani agendekera akolesa abashombanyi birhu lyo bagendekera bayalagaza emyanzi y’obunywesi lugenda ikubuliro lya Yehova. Oko kwahikire Yezu n’Abakristu b’omu myaka igana mirhanzi.

15. Bici ebirongozi by’amadîni byajirire Yezu n’abanafunzi bage?

¹⁵ Omu myaka igana mirhanzi, ciru akaba Yezu Mugala wa Mungu ali mwimana anakag’ijira ebisomerine, bambali ba Shetani baderha bunywesi bunji okubimuyerekire. Kwa lwiganyo, abakulu b’amadîni bakabwira abantu oku obuhashe Yezu ahivagamwo abazimu abuhâbagwa n’“omukulu w’abazimu.” (Mk. 3:22, Mashi Bible) Erhi Yezu ali omu malibuko, abakulu b’amadîni bamushobeka oku anajacire Nnâmahanga banashumya abantu oku bamuyirhe. (Mt. 27:20) Enyuma z’aho, amango abanafunzi ba Yezu bakag’ihubiri omwanzi mwinja, abakag’ibahagalika bashumika “abapagani [abarhali Bayahudi] banabazûsamwo enshombo” lyo balibuza abo Bakristu. (Ebj. 14:2, 19) Okubiyerekire Ebijiro by’Entumwa 14:2, Ilabiro ly’Akalalizi ly’omu lusiku 1/12/1998 lidesire ntya: “Balya boshi bal’ilunzire Shetani okuboko balahire omwanzi Abakristu bakag’ihubiri banakaderha ebintu bigalugalu okubibayerekire banashumya abantu, n’oko kwarhuma barhabayumvirhiza banabagaya.”

16. Bici rhushinganine rhukengere erhi rhwakayumva emyanzi y’obunywesi?

¹⁶ Shetani arhalekaga okuderha obunywesi omu myaka igana mirhanzi. Ene, acigendekire ‘arheba abantu boshi.’ (Maf. 12:9, Mashi Bible)  Erhi wakayumva emyanzi y’obunywesi lugenda ikubuliro erhi bene wirhu bali balongoza, okengere gurhi abashombanyi ba Nnâmahanga bajiriraga Yezu n’abanafunzi b’omu myaka igana mirhanzi. Ene abakozi ba Yehova bali balibuzibwa n’okuderherhwa obunywesi nk’oku Ebibliya yanalebaga. (Mt. 5:11, 12) Rhurhakarhebwa n’emyanzi y’obunywesi erhi rhwakahugûkwa ngahi erhenga n’erhi rhwakajira kantu kalebe buzira kulegama. Bicigi rhushinganine rhujire?

17. Gurhi rhwakayakamwo amazibu galerhwa n’emyanzi y’obunywesi? (2 Timoteyo 1:13) (Olole n’ecisanduku cidesire “ Ebi Rhushinganine Rhujire Erhi Rhwakayumva Emyanzi y’Obunywesi.”)

¹⁷ Rhulahire emyanzi y’obunywesi. Entumwa Paolo yayerekine n’obwalagale ebi rhushinganine rhujire erhi rhwakayumva emyanzi y’obunywesi. Abwizire Timoteyo ‘ahanze balya bandi . . . okuyemera emigani [myanzi y’obunywesi]’ n’“emigani erhagwerhi nda na mugongo.” (1 Tm. 1:3, 4; 4:7) Ciru akaba omwana murho anarhologola akantu n’okukahira omu kanwa buzira kurhanya, omuntu mukulu arhakajira ntyo ciru n’ehitya bulya ahugûsirwe amazibu oko kwakamulerhera. Rhunalahire emyanzi y’obunywesi bulya rhuhugûsirwe aha erhenga. Rhunayumvirize “ebinwa nkana” by’okuli byone.—Osome 2 Timoteyo 1:13.

18. Gurhi rhwakayerekanamwo oku rhulangalire bwenene ikubuliro lya Yehova?

¹⁸ Ikubuliro lya Nnâmahanga linashimbe olwiganyo lwa Yezu omu njira nyinji, rhwaganirire njira isharhu zone muli zo. Amango oli wayiga Ebibliya, okalonza ezindi njira ikubuliro likulikiramwo olwiganyo lwa Yezu. Orhabale abandi omu cigamba cinyu bazibuhye obulangalire bwabo omu ikubuliro lya Nnâmahanga. Onagendekere wayerekana oku olangalire bwenene ikubuliro lya Nnâmahanga omu kukolera Yehova n’obwishwekerezi n’okusêra bwenene oku ikubuliro ali akolesa ly’ahikiriza obulonza bwage. (Enna. 37:28) Rhugendekerage rhwashagalukira olukengwa rhugwerhe lw’okuba cigabi c’abantu ba Yehova b’obwishwekerezi n’obuzigire.