1. Umi xibbi diro Yihowa manni qinaawinohu hiittoonniiti?

 YIHOWA mannisira looso aanno woyite, isi mannisi qinaawino garinni loosara hasiˈranno. (1 Qor. 14:33) Lawishshaho Maganu dancha duduwo uulla woˈmate dudumbara hasiˈranno. (Mat. 24:14) Yihowa konne looso massaganno gede Yesuusa shoomino. Yesuusi kuni loosi qinaawino garinni loosamanno gede assanno. Umi xibbi diro addi addi basera songo xintantu yannara, biddishsha uyitanno gedenna massagganno gede cimeeyye shoommoonni. (Soq. 14:23) Hatte yannara cimeeyyete bisi wido ikkitinori Yerusaalamete noo soqqamaasinenna cimeeyye, baalanti songuwa harunsitanno biddishsha fushshitino. (Soq. 15:2; 16:4) Songuwa uyinoonninsa biddishshira hajajantuta, “ammanaanote mittimma jawaattu. Kiironsano barru barrunni lexxitu.”—Soq. 16:5.

2. Yihowa 1919 hanafe mannisira biddishsha uyinohunna ayyaanaamittete sagale qixxeessinohu hiittoonniiti?

² Yihowa xaa yannarano mannasi qineessanni no. Yesuusi 1919 hanafe, buurantinori giddonni boode labballo horoonsiˈre sabbakate looso qineessanninna harunsaanosira ayyaanaamittete sagale shiqishanni no. a (Luq. 12:42) Yihowa kuri labballi loossanno looso maassiˈranni nooti dihuluullissannote.—Isa. 60:22; 65:13, 14.

3-4. (a) Qinaamboommore ikka kaaˈlitinonke gara leellishanno lawishsha kuli. (b) Konni birxichira maa ronseemmo?

 ³ Qinaawa hoongoommoro Yesuusi loonsammora uyinonke looso umo fushsha didandiineemmo. (Mat. 28:19, 20) Lawishshaho qinaamboommore ikka hoongoommoro soqqanshote qoqqowi diheeˈrannonke; aye manchino hasiˈrinowa haˈre sabbakara dandaanno. Addi addi halashshaano duucha higge mittu qoqqowira calla sabbakkara dandiitanno; mitu qoqqowi horontanni sabbankikki gatara dandaanno. Hanni qinaamboommore ikka kaaˈlitannonketa wole dooggano laˈno.

⁴ Yesuusi uullate aana noo yannara assinori xaa yannara ninkeno qinaamboommore ikkineemmo gede assinonke. Konni birxichira, Yesuusi lawishsha ikkinonke garanna dirijjitenke isi lawishsha harunsitanno gara ronseemmo. Qoleno Yihowa dirijjite albinni roore naandeemmota leellisha dandiineemmo gara ronseemmo.

DIRIJJITENKE YESUUSI LAWISHSHA HARUNSITANNO

5. Yesuusi lawishsha harunsineemmoti mitte doogo hiittenneeti? (Yohaannisi 8:28)

⁵ Yesuusi maa assannoronna maa coyiˈrannoro iimi Annisiwiinni rosino. Yihowa dirijjite, garanna gara ikkinokkire bande anfeemmo gede kaaˈlatenna biddishsha aate Maganu Qaale horoonsidhe Yesuusi lawishsha harunsitanno. (Yohaannisi 8:28 nabbawi; 2 Xim. 3:16, 17) Maganu Qaale nabbambeemmo gedenna loosu aana hosiinseemmo gede woˈmanka woyite qaagiissinanninke. Tenne amaale harunsa kaaˈlitannonkehu hiittoonniiti?

6. Qullaawa Maxaafa xiinxallate borruwanke horoonsiˈnummoro afiˈneemmoti mitte horo maati?

⁶ Qullaawa Maxaafa xiinxallate borruwanke horoonsiˈra lowo geeshsha kaaˈlitannonke. Lawishshaho, Qullaawu Maxaafi rosiisanno roso dirijjite uyitannonke biddishshi ledo heewisiinse laˈˈa dandiineemmo. Uyinanninke biddishshi Qullaawa Borro aana xintaminoha ikkinota huwantummoro, Yihowa dirijjite albinni roore addaxxineemmo.—Rom. 12:2.

7. Yesuusi sabbakkino sokka maati? Yihowa dirijjite Yesuusi lawishsha harunsitannohu hiittoonniiti?

⁷ Yesuusi Maganu Gashshootiha “Dancha Duduwo” sabbakkino. (Luq. 4:43, 44) Qoleno isi rosaanosi Maganu Gashshooti daafira sabbakkanno gede hajajinonsa. (Luq. 9:1, 2; 10:8, 9) Xaa yannara Yihowa dirijjite wido ikkitinori heedhannowi ikkiwano ikkiro hattono noonsa qoosso ikkitutano ikkituro Maganu Gashshooti sokka sabbakanno.

8. Hiittenne qoosso afiˈnoommo?

⁸ Wolootaho Maganu Gashshooti halaale kula ninkera lowo ayirrinyeeti! Tenne qoosso afiˈrannohu baalanka manna diˈˈikkino. Lawishshaho Yesuusi uullate aana noo yannara agaaninte isi daafira farcidhara difajjinonsa. (Luq. 4:41) Xaa yannara mittu manchi Yihowa manni ledo soqqamara albaanni tenne qoossora ikkado ikka hasiissannosi. Aye woyiteno mannu heeˈrannowa baalawa sabbanke, tenne qoossonke naandeemmota leellinsheemmo. Yesuusinte gede ninke mixono Maganu Gashshooti halaale mannu wodani giddo wixatenna waa hayikkisate.—Mat. 13:3, 23; 1 Qor. 3:6.

9. Yihowa dirijjite mannaho Yihowa suˈma egensiissannohu hiittoonniiti?

⁹ Yesuusi mannaho Maganu suˈma egensiisino. Isi iimi Annisiwa huucciˈrino huuccattora togo yiino: ‘Insa ate [“suˈmakki” NW] egentanno gede assoommo.’ (Yoh. 17:26) Yihowa dirijjiteno Yesuusi lawishsha harunsite mannu Maganu suˈma afanno gede assate dandiiture baala assitanno. Qullaawa Borroti Haaro  Alame Tiro Maganu suˈmi galagale bayichosi higanno gede assite tennera lowore kaaˈlitino. Xaa yannara tenne tiro woˈma woy xea 270 saˈˈanno afiinni tirroonni. Maganu Qaale Xiinxalli yitanno buukileetera qoola 1-13 Maganu suˈma galagalle bayichosi qolloonnihu mayiraatiro xawinse kulloonni. Qoleno hatte borrora, Maganu suˈma Giriikete Afiite Qullaawa Borro giddo 237 basera worroonnihu mayiraatiro kulloonni.

10. Miyanimaari gobbara heedhanno mancho coyidhinorinni maa rosootto?

¹⁰ Yesuusi gede ninkeno dandaami deerrinni lowo manni Maganu suˈma afara hasiˈneemmo. Miyanimaari gobbara heedhannoti 67 diro ikkannose mancho, Maganoho suˈmu noosita affuti wiˈlitino; ise togo yitino: “Konni albaanni Maganu suˈmi Yihowa ikkinota macciishshe diegennoomma; . . . heeshshoˈya giddo rosoommare baala rooranno coye rosoomma.” Kuni woˈnaalshi leellishannonte gede, Maganu suˈma rosa suwashshu wodani noonsa manna lowo geeshsha kaaˈlitanno.

WOˈMANKA WOYITE YIHOWA DIRIJJITE NAADDINANNITA LEELLISHSHE

11. Songote cimeeyye Yihowa dirijjite naaddannota leellisha dandiitannohu hiittoonniiti? (Misileno lai.)

¹¹ Songote cimeeyye Maganu dirijjite naaddannota leellishshannoti mitte doogo hiittenneeti? Insa biddishsha uyinanninsa woyite, biddishsha seekkite nabbawanna loosu aana hosiisate dandiiture baala assa hasiissannonsa. Lawishshaho, insa gambooshshunniwa kifilla shiqishshannonna huuccatto assitanno gara calla ikkikkinni, Kiristoosi geˈreewo towaattanno gara lainohunnino biddishsha uyinanninsa. Songote cimeeyye uyinanninsa biddishsha harunsitannoha ikkiro, songote noo roduuwi Yihowa baxannonsatanna towaatannonsata huwattanno.

12. (a) Albisa ikkite soqqantanno roduuwi ledo kaaˈlamme loosa hasiissannonkehu mayiraati? (Ibiraawoota 13:7, 17) (b) Albisa ikkite soqqantanno roduuwiha dancha akata illachisha hasiissannonkehu mayiraati?

¹² Songote cimeeyye biddishsha uyitannonke woyite maahoyye yine harunsa hasiissannonke. Hatto assineemmoha ikkiro insa loosonsa danchu garinni loosa qarra diˈˈikkitannonsa. Qullaawu Maxaafi, albisa ikkite soqqantannorira hajajammeemmo gedenna maahoyye yine galleemmo gede jawaachishannonke. (Ibiraawoota 13:7, 17 nabbawi.) Tenne assa mito woyite qarra ikkitankera dandiitanno. Mayira? Korkaatuno kuri labballi guuntete xeˈne noonsareeti. Ikkirono dancha akattansa agurre gara ikkitinokki akattansa illachinsheemmoha ikkiro, diinnankera halammanni heeˈnoommohu gedeeti. Hiittoonni? Tini, Maganu dirijjite addaxxineemmokki gede assitannonke; gibbannonkeri qolte hatto assinammora hasidhanno. Diinnanke kapho bande afatenna giwate maa assa dandiineemmo?

WOLOOTU YIHOWA DIRIJJITE ADDAXXITINANNIKKI GEDE ASSITAˈNERA WODHITINOONTE

13. Maganu diinna dirijjitesi bushiishate woˈnaaltannohu hiittoonniiti?

¹³ Maganu diinna, dirijjitesi assitannoha dancha coye bushaho yine hendanni gede assate woˈnaaltanno. Lawishshaho, Yihowa iso magansidhannori bisunni, amanyootunninna ayyaanaamittetenni xuru noonsakkire ikkitara hasiˈrannota Qullaawa Borronni ronsoommo. Yihowa battaawino coye asse maaro eannokkihu aye manchino songotenni bohamannota kulino. (1 Qor. 5:11-13; 6:9, 10) Tenne Qullaawa Borro hajajora hajajammeemmo. Kayinni gibbannonkeri tenne hajo kayisse wolootu doorsha ayirrinseemmokkihu, mannaho yoo yineemmohu hattono  manna banxeemmokkihu gede assite coyidhanno.

14. Yihowa dirijjite daafira kapho tareessannohu ayeti?

¹⁴ Yihowa dirijjite daafira kapho tareessannohu ayetiro wodanche. Yihowa dirijjite daafira kapho tareessannohu Sheexaane Daawuloosiiti. Isi ‘kaphu annaati.’ (Yoh. 8:44; Kal. 3:1-5) Hakko daafira isi Yihowa dirijjite daafira kapho tareessate diinnanke horoonsiˈrannota anfoommo. Umi xibbi diro ikkinori tenne leellishanno.

15. Ammaˈnote massagaano Yesuusanna harunsaanosi ma assitino?

¹⁵ Maganu beetti Yesuusi guutanna addi addi maalale loosinoha ikkirono, Sheexaanu mitu manni Yesuusi daafira addi addi kapho tareessanno gede assino. Lawishshaho ammaˈnote massagaano mannaho, Yesuusi agaaninte fushshannohu “agaanintete roorrichi wolqanniiti yite” kultino. (Maq. 3:22) Yesuusa amandi yannara ammaˈnote massagaano isi Magano xonino yite kassassino; hattono iso shinanni gede manna kakkayissino. (Mat. 27:20) Gedensaanni Yesuusi harunsaano dancha duduwo sabbakkanni heedheenna, gibbannonsari insa darantanno gede assate ‘manna kakkayisse gibbo kalaqqino.’ (Soq. 14:2, 19) Sadaasa 1, 1998ti Agarooshshu Shae Soqqamaasinete Looso 14:2 noo hedo daafira kultanni togo yitanno: “Yihudu manni Yesuusi rosaano sabbakkanno sokka macciishsha giwino; wolu mannino sabbakkanno sokka macciishshannokki gedenna insa giwanno gede kakkayissino.”

16. Kapho macciishshinummoro maa qaaga hasiissannonke?

¹⁶ Sheexaanu umi xibbi dirinni kayise xaa geeshsha kaphanni no. Isi xaano ‘kalqe baala soˈrisiisanni no.’ (Aju. 12:9) Yihowa dirijjitenna albisa ikkite soqqantanno roduuwi daafira  gara ikkinokkire macciishshittoro, Maganu diinna umi xibbi diro Yesuusanna rosaanosi assitinore qaagi. Qullaawu Maxaafi balaxe kulinonte gede, xaa yannara Yihowa manna daramanno gede assinanni heeˈnoonni; hattono insa daafira kapho tareessinanni. (Mat. 5:11, 12) Kapho tareessanni noohu ayetiro anfummoronna bayichonkonni gimbeemmoha ikkiro, kuni kaphi didogannonke. Kapho qorophate maa assa hasiissannonke?

17. Kaphu mashalaqqe gawajjitannonkekki gede qoropha dandiineemmohu hiittoonniiti? (2 Ximootewoosi 1:13) (“ Kaphu Mashalaqqe Macciishshineemmo Woyite Maa Assa Hasiissannonke?” yitanno saaxineno lai.)

¹⁷ Kaphu mashalaqqe qorophe. Kaphu mashalaqqe macciishshineemmo woyite maa assa hasiissannonkero soqqamaasinchu Phaawuloosi xawise kulinonke. Isi Ximootewoosira mitootu ‘maattonna Maganittennire afiˈrinokki hasaawa’ qorophitanno gede hajajara kulinosi. (1 Xim. 1:3, 4; 4:7) Mittu bodhanno qaaqqi uullanni ishine haaˈre afooho wodhara dandaanno; kayinni busha dancha bade afino manchi gawajjannota afino daafira togoore diassanno. Kapho tareessannohu ayetiro anfoommo daafira ninkeno kaphu mashalaqqe qorophineemmo. ‘Hawaqiˈnanniha’ halaalu qaale calla macciishshineemmo.—2 Ximootewoosi 1:13 nabbawi.

18. Yihowa dirijjite naandeemmota leellisha dandiineemmohu hiittoonniiti?

¹⁸ Yihowa dirijjite Yesuusi lawishsha harunsitanno doogga giddo sasella laˈnoommo. Qullaawa Maxaafa xiinxallatto woyite Yihowa dirijjite Yesuusi lawishsha harunsitannota wole doogga huwatate woˈnaali. Songote giddo noo roduuwi albinni roore Yihowa dirijjite naaddanno gede kaaˈli. Yihowara ammanante soqqante hattono isi fajjosi wonshate horoonsiˈranni noo dirijjitesiwa gamba yite dirijjitesi naadattota leellishi. (Far. 37:28) Baxillunna mittimma noohu Yihowa manni wido ikka ninkera lowo ayirrinyeeti.