1. Na faapefea ona faamaopoopoina tagata o Ieova i le uluaʻi senituri?

 PO O ā lava faaeaga e tuuina mai e Ieova i ona tagata, e na te faatalitalia e latou te faia i se auala maopoopo. (1 Kori. 14:33) O se faataʻitaʻiga, e finagalo le Atua e talaʻiina atu le tala lelei i le lalolagi atoa. (Mata. 24:14) Na tofia e Ieova Iesu e taʻitaʻia lenā galuega. Na faamautinoa e Iesu e faataunuuina lenā galuega i se auala maopoopo. I le uluaʻi senituri, ina ua faavaeina faapotopotoga i vaipanoa eseese, na tofia toeaina e taʻimua ma tuuina atu taʻiala. (Galu. 14:23) I Ierusalema, na iai se vaega o tane na faia aʻe i le ʻauaposetolo ma toeaina, ma na latou faia faaiʻuga patino e tatau ona usitaʻia e faapotopotoga uma. (Galu. 15:2; 16:4) O le usiusitaʻi o nei faapotopotoga i faatonuga na latou maua, na “faaauau ai ona faamalosia le faatuatua o faapotopotoga, ma faatuputeleina.”—Galu. 16:5.

2. Talu mai le 1919, ua faapefea ona saunia mai e Ieova le taʻitaʻiga ma meaʻai faaleagaga?

² O loo faaauau ona faamaopoopo e Ieova ona tagata seʻia oo mai i aso nei. Talu mai le 1919, na faaaogā ai e Iesu se vaega toʻaitiiti o tane faauuina e faamaopoopoina le galuega talaʻi, ma saunia meaʻai faaleagaga mo ona soo. a (Luka 12:42) E mautinoa o loo faamanuia e Ieova a latou galuega.—Isa. 60:22; 65:​13, 14.

3-4. (a) Aumai se faataʻitaʻiga e iloa ai le tāua o le maopoopo. (e) O le ā o le a talanoaina i lenei suʻesuʻega?

 ³ Pe ana tatou lē maopoopo, e lē mafai ona tatou faataunuuina le galuega ua tofia i tatou e Iesu e fai. (Mata. 28:​19, 20) O se faataʻitaʻiga, seʻi faapea e lē tofia mai ni oganuu e tatou te galulue ai, semanū e pule lava le tagata i le mea e talaʻi ai. Atonu o le a galueaʻiina soo isi oganuu ae lē galueaʻiina ai isi vaipanoa. O ā isi aogā ua tatou maua ona o lo tatou maopoopo?

⁴ A o iai Iesu i le lalolagi, na ia faataatia ai se faaaʻoaʻoga o le auala e faamaopoopo ai tagata o le Atua seʻia oo mai i aso nei. O le a tatou iloiloina i lenei mataupu le faaaʻoaʻoga na faataatia e Iesu, ma le auala e mulimuli ai la tatou faalapotopotoga i lana faaaʻoaʻoga. O le a talanoaina foʻi le auala e tatou te faaalia ai le maufaatuatuaina o le faalapotopotoga a Ieova.

E MULIMULI LA TATOU FAALAPOTOPOTOGA I LE FAAAʻOAʻOGA A IESU

5. O le ā se tasi o auala e tatou te mulimuli ai i le faaaʻoaʻoga a Iesu? (Ioane 8:28)

⁵ Na aʻoaʻoina e Iesu mai i lona Tamā i le lagi mea e fai ma mea e aʻoaʻo atu. E mulimuli le faalapotopotoga a Ieova i le faaaʻoaʻoga a Iesu, e ala i le faavae o a latou aʻoaʻoga tauamio ma taʻiala i le Afioga a le Atua. (Faitau le Ioane 8:28; 2 Timo. 3:​16, 17) E tatou te maua pea faamanatu ina ia faitau ma faatatauina le Afioga a le Atua. O le ā se tasi o auala lelei e suʻesuʻe ai le Tusi Paia, ma o ā aogā e tatou te maua mai ai?

6. O le ā se tasi o aogā sili e tatou te maua pe a suʻesuʻe le Tusi Paia faatasi ma lomiga faale-Tusi Paia?

⁶ E tele aogā e tatou te maua pe a suʻesuʻe le Tusi Paia faatasi ai ma le fesoasoani a lomiga faale-Tusi Paia. O se faataʻitaʻiga, e mafai ona tatou faatusatusa aʻoaʻoga o le Tusi Paia ma taʻiala e tatou te maua mai i le faalapotopotoga. Pe a tatou iloa e faavae mai i le Tusi Paia na taʻiala, o le a atili ai ona tatou maufaatuatuaina le faalapotopotoga a Ieova.—Roma 12:2.

7. O le ā le feʻau na talaʻia e Iesu, ma e faapefea ona mulimuli le faalapotopotoga a Ieova i lana faaaʻoaʻoga?

⁷ Na talaʻia e Iesu “le tala lelei o le Malo o le Atua.” (Luka 4:​43, 44) Na faatonuina foʻi e Iesu ona soo e talaʻi atu le Malo. (Luka 9:​1, 2; 10:​8, 9) I aso nei, o loo talaʻia foʻi e i latou uma o loo iai i le faalapotopotoga a Ieova le feʻau o le Malo, e tusa lava po o fea e latou te nonofo ai ma po o le ā foʻi le tele o o latou tiute tauave i le faalapotopotoga.

8. O le ā le faaeaga ua tatou maua?

⁸ O se faaeaga mo i tatou le faailoa atu i isi le Malo o le Atua. E lē o tagata uma e mauaina lenei faaeaga. O se faataʻitaʻiga, a o iai Iesu i le lalolagi, e na te leʻi faataga agaga leaga e talaʻi atu e faatatau iā te ia. (Luka 4:41) I aso nei, a o leʻi auai se tasi i le talaʻiga faatasi ma Molimau a Ieova, e tatau ona agavaa o ia mo lenā faaeaga. E faaalia lo tatou matuā lotofaafetai e ala i le molimau atu i so o se nofoaga, ma po o le ā lava le taimi e mafai ai. E pei o Iesu, o lo tatou sini o le totō ma faasūsū fatu o le upu moni o le Malo i loto o tagata.—Mata. 13:​3, 23; 1 Kori. 3:6.

9. Ua faapefea ona faailoa atu e le faalapotopotoga le suafa o le Atua?

⁹ Na faailoa atu e Iesu le suafa o le Atua. Ina ua tatalo Iesu i lona Tamā i le lagi, na ia faapea atu: “Ua ou faailoa atu lou suafa.” (Ioa. 17:26) E mulimuli le faalapotopotoga a Ieova i le faaaʻoaʻoga a Iesu, e ala i le faia o mea uma e fesoasoani ai i isi ina ia latou iloa le suafa o le Atua. O se faataʻitaʻiga, ua toe faafoʻisia i le lomiga O le Tusi Paia—O le Faaliliuga a le Lalolagi Fou le suafa o le Atua i mau na muaʻi tusia ai. Ua maua lenei faaliliuga atoa po o se vaega  i le silia ma le 270 gagana. I le Faaopoopoga A4 ma le A5 o lenei faaliliuga, e te maua ai faamatalaga i le toe faafoʻisia o le suafa o le Atua i le Tusi Paia. O loo iai foʻi i le faaopoopoga A5 faamaoniga e iloa ai, e 237 taimi e tatau ona taʻua ai le suafa o le Atua i Tusitusiga Paia Eleni.

10. O le ā e te aʻoaʻoina mai i le faamatalaga a se tinā mai i Myanmar?

¹⁰ I le pei o Iesu, e tatou te mananaʻo e fesoasoani i le toʻatele o tagata ina ia latou iloa le suafa o le Atua. Ina ua aʻoaʻoina e se tinā e 67 tausaga mai i Myanmar le suafa o le Atua, na maligi ona loimata ma faapea atu i lē na faia lana suʻesuʻega: “O le taimi muamua lea ua ou faalogo ai o le suafa o le Atua o Ieova. . . . Ua e aʻoaʻoina aʻu i le mea e sili ona tāua.” Ua tatou aʻoaʻoina mai i lenei mea na tupu, e telē se aafiaga e oo i tagata lotofaamaoni pe a latou iloa le suafa o le Atua.

IA MAUFAATUATUAINA PEA LA TATOU FAALAPOTOPOTOGA

11. E faapefea ona faaalia e toeaina e latou te maufaatuatuaina le faalapotopotoga a Ieova? (Tagaʻi foʻi i le ata.)

¹¹ O le ā se tasi o auala ua faaalia ai e toeaina e latou te maufaatuatuaina le faalapotopotoga a le Atua? Pe a latou maua se taʻiala, e manaʻomia ona latou faitau lelei ma faia le mea sili ina ia faatatauina ai. O se faataʻitaʻiga, e latou te maua taʻiala i le auala e faia ai a latou vaega i sauniga, le auala e faia ai tatalo i le faapotopotoga, faapea le auala e tausia ai mamoe a Keriso. Pe a mulimuli toeaina i na taʻiala, o le a lagona e le faapotopotoga le malupuipuia ma le alofagia o i latou.

12. (a) Aiseā e tatau ai ona tatou lagolagosua iā i latou o loo taʻimua? (Eperu 13:​7, 17) (e) Aiseā e tatau ai ona tatou uaʻi i uiga lelei o i latou o loo taʻimua?

¹² Pe a tatou maua taʻiala mai i toeaina, e tatau ona tatou lotomalilie e mulimuli i ai. O le faia faapea, o le a faafaigofie ai galuega a i latou o loo taʻimua. Ua faalaeiauina i tatou i le Tusi Paia ina ia usiusitaʻi ma gauaʻi iā i latou o loo taʻimua. (Faitau le Eperu 13:​7, 17.) O se luʻi lenā mea i nisi taimi. Aiseā? Talu ai e lē lelei atoatoa nei tane. Pe afai la e tatou te uaʻi i o latou uiga lē lelei nai lo o latou uiga lelei, o lenā ua tatou lagolagoina o tatou fili. O le ā le uiga o lenā manatu? O le a amata ona tatou masalosalo po o le faalapotopotoga moni lea a le Atua, ma o le mea tonu lea e mananaʻo ai o tatou fili. O le ā e mafai ona tatou faia ina ia iloa ma teena ai faamatalaga taufaasesē a o tatou fili?

AUA NEʻI TAʻITAʻISESĒINA I TATOU I FAAMATALAGA SESĒ

13. Ua faapefea ona taumafai fili o le Atua e taʻuleagaina lana faalapotopotoga?

¹³ E taumafai fili o le Atua e faafoliga atu e leaga faatulagaga lelei o loo faia e le faalapotopotoga a le Atua. O se faataʻitaʻiga, ua tatou aʻoaʻoina mai i le Tusi Paia e faatalitalia e Ieova ona tagata tapuaʻi ina ia mamā i le itu faaletino, tauamio, ma le faaleagaga. Ua ia fetalai mai, o so o se tasi e faaauau ona faia amioga lē mamā e aunoa ma le salamō, e tatau ona faateʻaina mai i le faapotopotoga. (1 Kori. 5:​11-13; 6:​9, 10) E tatou te usiusitaʻi i lenā faatonuga mai i le Tusi Paia. Peitaʻi, ua taumafai o tatou fili e faaaogā lenā faatulagaga e tuuaʻia ai i tatou o ni ē e lē alolofa, faamasinosino, ma e faasāsā naʻuā.

14. O ai o loo faapogaia faamatalaga sesē e faatatau i le faalapotopotoga?

¹⁴ Ia iloa lē o loo faapogaia faamatalaga sesē. O Satani le Tiapolo le pogai o faamatalaga sesē, auā o ia o “le tamā o le pepelo.” (Ioa. 8:44; Kene. 3:​1-5) O lea, e tatou te faatalitalia o le a faaaogā e Satani ē o loo lagolagoina o ia, e faia faamatalaga sesē e faatatau  i le faalapotopotoga a Ieova. O le mea lenā na tupu i le uluaʻi senituri.

15. O le ā na faia e taʻitaʻi lotu iā Iesu ma ona soo?

¹⁵ I le uluaʻi senituri, na faia ai e i latou na lagolagoina Satani le tele o pepelo e faatatau i le Alo o le Atua, o lē e lelei atoatoa ma na faia vavega. O se faaaʻoaʻoga, na faapea atu taʻitaʻi lotu i tagata, o le mana lea na faaaogā e Iesu e tuliesea ai temoni, na tuuina atu iā te ia e “le pule o temoni.” (Mare. 3:22) Ina ua faia le faamasinoga o Iesu, na tuuaʻia o ia e taʻitaʻi lotu ua ia upuleaga i le Atua, ma latou faaoso i le motu o tagata e talosaga atu ina ia fasiotia o ia. (Mata. 27:20) Mulimuli ane, a o talaʻi atu e soo o Keriso le tala lelei, na “faaita ma faasesēina tagata” e ē na tetee ina ia sauāina na Kerisiano. (Galu. 14:​2, 19) Na faamatalaina i Le Olomatamata o Tesema 1, 1998, le uiga o le Galuega 14:2: ʻE leʻi faamalieina tagata tetee Iutaia i le tau ina teena o le feʻau, ae na latou faia foʻi se faufauga e faaleaga ai talaaga o Kerisiano, ina ia feita ai tagata o Nuu Ese i Kerisiano.’

16. O le ā e tatau ona tatou manatua pe a faalogo i faamatalaga sesē?

¹⁶ E leʻi gata ai i le uluaʻi senituri pepelo a Satani. Ua faapea mai le Faaaliga 12:​9, o loo faaauau pea ona ia “faasesēina le lalolagi atoa.” Pe a e faalogo i faamatalaga sesē e faatatau i le faalapotopotoga po o uso o loo taʻimua, ia manatua na faileagaina foʻi e fili o le Atua Iesu ma Kerisiano i le uluaʻi senituri. I aso nei, o loo sauāina ma taʻuleagaina tagata o Ieova, e pei ona valoia mai i le Tusi Paia. (Mata. 5:​11, 12) O le a lē taʻitaʻisesēina i tatou i faamatalaga sesē, pe a tatou iloa le pogai ma vave ona gaoioi e puipuia i tatou. O le ā le gaoioiga e tatau ona tatou faia?

17. E faapefea ona tatou ʻalofia le aafia i faamatalaga sesē? (2 Timoteo 1:13) (Tagaʻi foʻi i le pusa “ Le Auala e Tali Atu ai i Faamatalaga Sesē.”)

 ¹⁷ Ia teena faamatalaga sesē. E manino faatonuga na avatu e le aposetolo o Paulo i le mea e fai pe a faalogo i faamatalaga sesē. Na ia faapea atu iā Timoteo ina ia “poloaʻi atu i nisi e aua le . . . faalogo atu i tala sesē,” ma ia “teena tala sesē ua faaleagaina ai mea e paia.” (1 Timo. 1:​3, 4; 4:7) Seʻi mafaufau i lenei mea: E ono tuu e se tamaitiiti laʻitiiti i lona gutu se mea palapalā e tau i ai, ae e lē mafai e se tagata matua ona faia lenā mea auā e na te iloa e leaga. E tatou te teena faamatalaga sesē ona ua tatou iloa le pogai o na faamatalaga. Peitaʻi, e tatou te taofimau i “upu aogā” o le upu moni.—Faitau le 2 Timoteo 1:13.

18. E faapefea ona faaalia e tatou te maufaatuatuaina le faalapotopotoga a Ieova?

¹⁸ E tolu auala ua tatou talanoaina e faaaʻoaʻo ai le faalapotopotoga a le Atua iā Iesu. A o e suʻesuʻeina le Tusi Paia, ia mātau isi auala o loo mulimuli ai le faalapotopotoga i le faaaʻoaʻoga a Iesu. Ia fesoasoani i isi i le faapotopotoga ina ia faamalosia lo latou maufaatuatuaina o le faalapotopotoga. Ia faaauau ona faaalia lou maufaatuatuaina o le faalapotopotoga o loo faaaogā e Ieova e faataunuu lona finagalo, e ala i le pipiimau i ai ma auauna pea ma le faamaoni iā te ia. (Sala. 37:28) Tau ina ia tatou faatāua pea le faaeaga o le avea ma tagata o Ieova, o ni ē e alolofa ma faamaoni.