1. Fa a pipel fu Yehovah ben orga na ini a fosi yari hondro?

 IBRI TRON te Yehovah gi a pipel fu en wan wroko fu du, a e ferwakti taki den e du en na wan orga fasi (1 Kor. 14:33). Fu eksempre Yehovah wani taki a bun nyunsu musu preiki na heri grontapu (Mat. 24:14). Dati meki a gi Yesus a frantwortu fu tiri a wroko disi èn Yesus e sorgu taki a wroko disi e du na wan orga fasi. Na ini a fosi yari hondro, den owruman ben kisi a frantwortu fu tiri den gemeente èn fu teki fesi (Tori 14:23). Na ini Yerusalem a tiri skin ben e teki son besroiti èn ala den gemeente ben musu gi yesi na den besroiti dati. Den brada di ben de ini a tiri skin ben de den apostel nanga wan tu brada di ben abi ondrofeni (Tori 15:2; 16:4). Den brada nanga sisa ben e gi yesi na den rai di den ben kisi, èn a sani dati „tranga a bribi fu a gemeente trutru, èn . . . moro nanga moro sma ben e tron bribiman”.​—Tori 16:5.

2. Fa Yehovah tiri a pipel fu en èn fa a gi den leri fu Bijbel sensi 1919?

² Te nanga now Yehovah e tan orga a pipel fu en. Sensi 1919 Yesus e gebroiki wan pkin grupu salfu brada fu orga a preikiwroko èn fu gi den futuboi fu en leri fu Bijbel a (Luk. 12:42). A de krin taki Yehovah e blesi a wroko fu a grupu dati.​—Yes. 60:22; 65:13, 14.

3-4. (a) Gi wan eksempre di e sori fa wi e kisi wini fu di wi orga. (b) San wi o luku na ini na artikel disi?

³ Efu wi no ben e du sani na wan orga fasi, dan wi no ben o man du a wroko di Yesus gi wi fu du (Mat. 28:19, 20). Fu eksempre, efu den brada no ben orga wi fu preiki na ini ala den kontren fu wi gemeente, dan ibri Kotoigi ben o man  preiki pe a wani. Kande wi ben o preiki ibri leisi baka na ini son kontren, ma na ini tra kontren wi no ben o preiki srefsrefi. Na sortu tra fasi wi e kisi wini fu di wi orga?

⁴ Neleki fa Yesus orga den disipel fu en di a ben de na grontapu, na so a e tan orga a pipel fu Gado na ini a ten disi. Na ini na artikel disi wi o luku na eksempre fu Yesus èn fa wi leki organisâsi kan teki na eksempre fu en. Wi o luku tu fa wi kan sori taki wi e fertrow na organisâsi fu Yehovah.

NA ORGANISÂSI FU WI E TEKI NA EKSEMPRE FU YESUS

5. San na wan fasi fa na organisâsi fu wi e teki na eksempre fu Yesus? (Yohanes 8:28)

⁵ Yesus leri fu en P’pa na hemel san a ben musu du èn san a ben musu taki. Neleki Yesus, na organisâsi fu Yehovah e gebroiki Gado Wortu fu yepi wi fu kon sabi san bun èn san no bun èn fu sori wi fa fu libi (Leisi Yohanes 8:28; 2 Tim. 3:16, 17). Dati meki ibri tron baka den brada e memre wi fu leisi Gado Wortu èn fu fiti en na ini wi libi. Fa wi e kisi wini te wi e gi yesi na a rai disi?

6. San na wan prenspari fasi fa wi e kisi wini te wi e studeri Bijbel?

⁶ Wi e kisi furu wini te wi e gebroiki den buku fu wi fu studeri Bijbel. Fu eksempre, wi kan luku efu den rai di wi e kisi fu na organisâsi e kruderi nanga san Bijbel e leri. Te wi e si taki den rai di wi e kisi fu na organisâsi e kruderi nanga san Bijbel e leri, dan dati e yepi wi fu fertrow moro tapu Yehovah en organisâsi.​—Rom. 12:2.

7. San na a boskopu di Yesus ben e preiki èn fa na organisâsi fu Yehovah e teki na eksempre fu Yesus?

⁷ Yesus ben e preiki „a bun nyunsu fu Gado kownukondre” (Luk. 4:43, 44). Yesus ben taigi den bakaman fu en tu fu preiki a Kownukondre boskopu (Luk. 9:1, 2; 10:8, 9). Na ini a ten disi ala sma na ini a organisâsi fu Yehovah e preiki a Kownukondre boskopu awinsi pe den e tan èn awinsi o furu frantwortu den abi na ini na organisâsi.

8. Sortu grani wi abi?

⁸ Wi e si en leki wan grani fu ferteri trawan fu a Kownukondre fu Gado. Ma a no ala sma e kisi a grani disi. Fu eksempre, di Yesus ben de na grontapu a no ben gi pasi taki den ogri yeye ben e ferteri sma fu en (Luk. 4:41). Na ini a ten disi a de so taki fosi wan sma e teki prati na a preikiwroko, a musu libi kba na wan fasi di Yehovah feni bun. Te wi e ferteri trawan fu a Kownukondre fu Gado awinsi pe den de èn na iniwan okasi, dan wi e sori krin taki wi abi warderi gi a grani di wi abi fu teki prati na a preikiwroko. Neleki Yesus wi wani du ala san wi man fu preiki gi trawan èn fu yepi den fu kon sabi den tru tori fu Bijbel.​—Mat. 13:3, 23; 1 Kor. 3:6.

9. Fa na organisâsi e meki sma kon sabi Gado nen?

⁹ Yesus meki sma kon sabi Gado nen. Yesus ben taigi en hemel P’pa na ini begi: „Mi meki den kon sabi yu nen” (Yoh. 17:26). Neleki Yesus, na organisâsi fu Yehovah e du ala san a man fu yepi sma fu kon sabi a nen fu Gado. Wan fasi fa na organisâsi fu wi e du dati, na taki den tyari a Bijbel​—Nyun-Grontapuvertaling kon na doro. Na ini a Bijbel disi, a nen fu Gado de fu feni baka na den presi pe a musu de. A heri Bijbel disi noso pisi fu en de fu feni na ini moro leki 270 tongo. A brochure Studeri Gado Wortu moro fini, Pisi 1 nanga 2, o yepi yu fu kon sabi moro fini fu san ede a nen fu Gado poti baka  na ini Bijbel èn fa dati psa. Boiti dati, a brochure disi abi krin beweisi di e sori taki a nen fu Gado musu skrifi 237 leisi na ini den Kresten Griki Buku fu Bijbel.

10. San yu e leri fu a sani di wan uma na ini Mianmar taki?

¹⁰ Neleki Yesus, wi wani yepi so furu sma leki wi man fu kon sabi Gado nen. Wan uma fu 67 yari di e libi na ini Mianmar bigin krei di a kon leri sabi a nen fu Gado. A taki: „Disi na a fosi leisi di mi yere taki a nen fu Gado na Yehovah . . . Disi na a moro prenspari sani di mi oiti ben kan leri.” Na ondrofenitori disi e sori taki te reti’ati sma kon sabi a nen fu Gado, dan dati kan abi furu krakti na den tapu.

TAN SORI TAKI YU E FERTROW NA ORGANISÂSI FU YEHOVAH

11. Fa den owruman kan sori taki den e fertrow na organisâsi fu Yehovah? (Luku a prenki.)

¹¹ San na wan fasi fa den owruman kan sori taki den e fertrow na organisâsi fu Yehovah? Te den owruman e kisi rai fu na organisâsi, dan den musu du muiti fu ferstan den rai dati bun èn fu fiti den. Fu eksempre, den e kisi rai fa fu hori den difrenti pisi fu a konmakandra èn fa fu begi gi a gemeente. Ma den e kisi rai tu fa fu sorgu gi den skapu fu Krestes. Te den owruman e fiti ala den rai disi, dan den brada nanga sisa o firi taki Yehovah lobi den èn taki a e sorgu gi den.

12. (a) Fu san ede wi musu horbaka gi den brada di e teki fesi? (Hebrewsma 13:7, 17) (b) Fu san ede wi musu tan poti prakseri na den bun fasi fu den brada di e teki fesi?

¹² Te wi e kisi rai fu den owruman, dan wi musu de klarklari fu fiti den rai disi. Disi o meki en moro makelek gi den brada disi fu tyari den frantwortu fu den. Bijbel e gi wi a dek’ati fu gi yesi na den wan di e teki fesi èn fu saka wisrefi na den ondro. (Leisi Hebrewsma 13:7, 17.) Ma son leisi a sani disi no makelek. Fu san ede? Fu di den man disi na sondu libisma. Ma te wi e tan poti prakseri na den fowtu fu den na presi fu luku den bun fasi fu den, dan fu taki en leti wi e yepi den feanti fu wi. Fu san ede wi kan taki dati? Den feanti fu wi wani meki wi tweifri taki Gado e gebroiki en organisâsi fu tiri wi. Sobun, efu wi e denki takru fu den owruman, dan wi kan bigin denki takru fu na organisâsi tu èn te fu kba wi no o fertrow na organisâsi moro. Ma fa wi kan kon sabi san na den lei fu den feanti fu wi èn fa wi kan sori taki wi e weigri fu bribi den lei dati?

NO GI PASI TAKI TRAWAN MEKI YU LASI FERTROW NA INI NA ORGANISÂSI FU YEHOVAH

13. Fa den feanti fu Gado pruberi fu pori a nen fu en organisâsi?

¹³ Den feanti fu Gado e pruberi fu meki sma denki takru fu den bun sani di na organisâsi e leri wi. Soleki fa Bijbel e leri wi, dan Yehovah wani taki wi musu de krin, wi musu tyari wisrefi na wan fasi di fiti, èn wi musu anbegi en na a fasi di a feni bun. Yehovah e taki dati sma di e tan du ogri sondro fu sori berow, no mag tan na ini a gemeente (1 Kor. 5:11-13; 6:9, 10). Ma fu di wi e gi yesi na a komando disi, meki den feanti fu wi e taki dati wi no lobi sma. Den e taki dati wi e krutu sma èn taki wi e desko den wan di e tyari densrefi tra fasi leki wi.

14. Suma wani meki sma bribi lei fu na organisâsi fu Yehovah?

¹⁴ Kon ferstan suma na a sma di wani meki trawan bribi lei fu na organisâsi fu  Yehovah. A sma di wani meki sma bribi lei fu na organisâsi fu Yehovah, na Satan Didibri. En na „a tata fu ala lei” (Yoh. 8:44; Gen. 3:1-5). Sobun, wi musu ferwakti taki Satan o gebroiki den feanti fu wi fu ferteri lei fu Yehovah en organisâsi. Na disi ben miti Yesus nanga den fosi Kresten.

15. San den kerki fesiman ben taki fu Yesus nanga den bakaman fu en?

¹⁵ Aladi Yesus, a Manpikin fu Gado, ben de sondro sondu èn a ben e du wondru, tòg Satan ben e gebroiki sma fu ferteri furu lei fu en. Fu eksempre, den kerki fesiman ben e ferteri sma taki Yesus ben e puru ogri yeye na sma tapu nanga yepi fu a „tiriman fu den ogri yeye” (Mark. 3:22). Di Yesus ben de na fesi krutu, dan den kerki fesiman taki dati a ben taki ogri fu Gado èn den gi den ip’ipi sma drape deki’ati fu kiri Yesus (Mat. 27:20). Bakaten di den futuboi fu Krestes ben e preiki a bun nyunsu, dan den sma di ben e gens den „sutu faya gi den trakondre sma èn den kori den” fu ferfolgu den Kresten dati (Tori 14:2, 19). Luku san A Waktitoren fu 1 december 1998 e taki fu Tori fu den apostel 14:2: „Den sma di ben e horbaka gi Satan no ben wani arki a boskopu di den Kresten ben e preiki. Boiti dati, den ferteri ogri-ati lei fu den so taki sma no ben o arki den èn so taki sma ben o teige den.”

16. San wi musu hori na prakseri te trawan e ferteri lei fu na organisâsi?

¹⁶ Te nanga now Satan e ferteri lei èn a e tan „kori sma na heri grontapu” (Openb. 12:9). Efu yu e yere taki trawan e ferteri lei fu na organisâsi noso fu den brada di e teki fesi, dan hori na prakseri san den  feanti fu Gado ben du nanga Yesus èn nanga den disipel fu en. Yesus ben taki dati sma ben o ferfolgu a pipel fu Yehovah èn taki sma ben o ferteri lei fu den. Èn na dati e psa tu na ini a ten disi (Mat. 5:11, 12). Te wi e tan hori na prakseri taki den lei disi e komoto fu Satan, dan wi no o bribi den. Boiti dati, wi o man du wan sani wantewante fu sorgu taki den lei disi no abi krakti na wi tapu. Ma san wi kan du fu kibri wisrefi gi den lei fu Satan?

17. Fa wi kan sorgu taki wi no e bribi leitori? (2 Timoteyus 1:13) (Luku a faki „ San wi musu du te trawan e ferteri lei fu na organisâsi fu Yehovah”.)

¹⁷ No arki den lei di trawan e ferteri. Na apostel Paulus ben taki krin san wi musu du te trawan e ferteri lei fu na organisâsi. A ben taigi Timoteyus fu „warskow son sma taki den no musu . . . arki leitori” (1 Tim. 1:3, 4; 4:7). Fu eksempre, wan beibi kan teki wan fisti sani na gron èn poti en na ini en mofo. Ma wan bigisma no ben o du dati fu di a sabi taki a sani dati kan meki a kon siki. Dati meki wi e weigri fu bribi den lei di sma e ferteri fu na organisâsi fu Yehovah, fu di wi sabi pe den lei disi e kmoto. Na presi fu dati, wi e bribi den „soifri leri” fu Bijbel.​—Leisi 2 Timoteyus 1:13.

18. Fa wi kan sori taki wi e warderi na organisâsi fu Yehovah?

¹⁸ Na ini na artikel disi wi luku dri fasi nomo fa na organisâsi fu Gado e teki na eksempre fu Yesus. Te yu e studeri Bijbel, dan pruberi fu kon si na sortu tra fasi na organisâsi e teki na eksempre fu Yesus. Yepi trawan na ini a gemeente fu fertrow moro tapu na organisâsi. Boiti dati, tan dini Yehovah nanga yu heri ati èn tan krosibei na a organisâsi di a e gebroiki fu du a wani fu en. Na so yu e sori taki yu e fertrow na organisâsi disi (Ps. 37:28). Meki wi tan warderi a grani di wi abi fu de na ini a bigi famiri fu Yehovah di abi lobi èn di e tai hori na a Gado fu den.