1. Akore ty fomba nandaminagne ty vahoa i Jehovah tamy ty taonjato voaloha’e?

 NAHO fa magnomey asa o vahoa’eo ty Jehovah, le mitamà reke fa hanao izay mifagnarake amy ty zoton’arofo’e iareo. (1 Kor. 14:33) Zoton’arofon’Agnahare zao ohatse ty hitoriagne i talily soay amy ze kila ndaty ambone tane etoy. (Mat. 24:14) Nanendre i Jesosy mba hitarike o asa iohoe ty Jehovah. Natao i Jesosy azo antoke tie voalamigne soa o asa iohoe. Tamy ty taonjato voaloha’e naho fa niforogne tamy ty toeragne sambe hafa o fiangonagneo, le nisy androanavi-pagnahy tinendre mba hitarike naho hagnomey toromareke. (Asa. 14:23) Ta Jerosalema tao ty nisy ty filan-keve-pitantanagne tamy izay, agnisa izay o apostolio naho ty androanavi-pagnahy za-draha tamy izay. Nandrambe fanapahan-kevetse hoahy o fiangonagneo iaby iareo. (Asa. 15:2; 16:4) Voka’e naho fa nankatò ty toromareke niazo’e ty vahoa i Jehovah tamy izay, “le nihamafe ty finoa i fiangonagne rey sady nihamaro isan’andro ty ndaty tagnate’e ao.”​—Asa. 16:5.

2. Akore ty fomba nagnomea i Jehovah tari-dalagne naho hanegne ara-pagnahy ty vahoa’e nanomboke tamy 1919?

² Mbe manohy mandamigne ty vahoa’e avao ty Jehovah ndra amy hinane zao aza. Nanomboke tamy 1919, le nanendre rahalahy voahosotse tsiampeampe ty Jesosy mba handamigne ty asa fitoriagne naho hagnomey hanegne ara-pagnahy o mpanonjohy ty lia’eo. a (Lioka 12:42) Azo antoke fa mitahy ty asa atao iareo ty Jehovah.​—Isaia 60:22; 65:13, 14.

3-4. a) Magnomeza ohatse mampiseho ty fitahiagne azontika noho itika voalamigne. b) Ino ty raha hodinehentika ato?

 ³ Naho tsy nivoalamigne tikagne, le tsy ho niafake namita i asa nanendrea i Jesosy antikagney. (Mat. 28:19, 20) Naho tsy nandamigne ty faritane hitoriagne ohatse o rahalahio, le ho nitory amy ze tea’e hitoriagne avao o mpitorio. Va’e fa nitoria o mpitorio mateteke ohatse ty faritane ila’e fa ty ila’e mbe lia’e naho nitoriagne. Mahatrea soa hafa azontikagne ka vao rehe noho itikagne voalamigne soa?

⁴ Manahake ty fomba nandamina i Jesosy i mpiana taloha rey avao ka ty fomba andamina’e ty vahoan’Agnahare amy izao. Handineke ty ohatse nenga i Jesosy naho ty fomba anahafa i fandaminagne aze tikagne amy ty lahatsoratse toy. Hianarantikagne ka ty fomba hampisehoantikagne tie matoky ty fandamina i Jehovah tika.

MAGNORIKE TY MODELY I JESOSY TY FANDAMINAGNE

5. Ino ty fomba raike anahafa i fandaminagne i Jesosy? (Jaona 12:49)

⁵ I Jehovah ty nanoro i Jesosy ty raha hatao’e naho ty raha horehafe’e. Ho fanahafagne i Jesosy, le mioregne amy ty Saontsin’Andrianagnahare ty fampianaragne naho ty toromareke mea i fandaminagne. (Vakio ty Jaona 12:49; 2 Tim. 3:16, 17) Mateteke tika ro tiahivegne mba hamaky naho hampihatse ty Saontsin’Agnahare. Akore ty fomba hanoantika izay, le nagnino ty fanoagne izay ro mahasoa antika?

6. Ino ty soa lahibey horambesentika naho fa mianatse Baiboly tika?

⁶ Handrambe soa maro tika naho mampiasa i boke aman-gazetentika rey naho fa mianatse Baiboly. Azontika atao zao ohatse ty mampitaha ty raha rehafe ty Baiboly amy ty toromareke mea i fandaminagne antika amy ty alala o boke aman-gazeteo. Naho fa treantika tie mioregne amy ty Soratse Masigne ty tari-dalagne azontika, le hihamafe ty fatokisantika ty fandamina i Jehovah.​—Rom. 12:2.

7. Ino ty hafatse nitorie i Jesosy, le akore ty fomba anahafa ty fandamina i Jehovah ze ohatse nenga’e zay?

⁷ Nitory ty “talily soa miomba i Fanjakàn’Andrianagnaharey” ty Jesosy. (Lioka 4:43, 44) Nandily o mpiana’e reo ka reke mba hitory miomba i Fanjakagney. (Lioka 9:1, 2; 10:8, 9) Amy izao ka ze ndaty agnisa ty fandamina i Jehovah, le mitory ty hafatse miomba i Fanjakagney ndra aia ndra aia ty misy iareo sady ndra tie maro manao akore aza ty andraiky iareo.

8. Ino ty tombotsoa anagnantika?

⁸ Tombotsoa ho antika ty mitory ty hamarenagne miomba i Fanjakàn’Andrianagnaharey amy ty ndaty hafa! Tsy ze kila ndaty iaby ro managne ze tombotsoa zay. Tamy i Jesosy tan-tane etoỳ ohatse, le tsy nenga’e hirehake ty miomba aze o demoniao. (Lioka 4:41) Tsy maintsy mahafeno fepetse heike ka ty ndaty raike amy izao vaho izay afake mitory miarake amo o vahoa i Jehovah-o. Asehontikagne tie mankasitrake ze tombotsoa zay tika naho mitory avao ndra aia ndra aia sady ndra ombia ndra ombia ty ahafahantikagne manao izay. Te hanahake i Jesosy tika, le te hanao ze fara’e soa vitantikagne mba hitoriagne amy ty hafa naho hampianaragne iareo ty hamarenagne.​—Mat. 13:3, 23; 1 Kor. 3:6.

9. Akore ty fomba ampahafantare i fandaminagne ty tahinan’Andrianagnahare?

⁹ Nampahafantatse ty tahinan’Agnahare ty Jesosy. Hoe reke naho fa nivavake tamy i Rae’e an-dagnitse agney: “Fa nampahafantareko iareo ty tahina’o.” (Jaona 17:26) Mba  hagnorihagne ze ohatse nenga i Jesosy zay, le manao ze azo’e atao ty fandamina i Jehovah mba hagnampeagne ty hafa hahafantatse i tahinan’Agnaharey. Nanao izay ty fandaminagne naho fa nagneregne tamy ty toera’e indraike i tahinan’Agnaharey amy ty Baiboly Soratse Masigne Dikan-drehake Tontolo Vaovao ao. Fa misy amy ty firehake 270 o Baiboly iohoe iaby ndra ty ampaha’e ama’e ty amy izao. Trea amy ty Fagnazavagne Fagnampe’e A4 naho A5 amo o fandikan-drehake iohoe ao, ty anto’e naho ty fomba nagneregnagne i tahinan’Agnaharey. Trea amy ty Fagnazavagne Fagnampe’e A5 ka ty porofo magnamaregne fa toko’e hiseho in-237 amy i Soratse Masigne Grike Kristiana ao i tahinan’Agnaharey.

10. Ino ty raha ianara’o boake amy ty reha i ampela raike mitoboke a Myanmar agney?

¹⁰ Manahake i Jesosy, le te hagnampe ndaty maro arake ze azo atao tika mba hahafantatse i tahinan’Agnaharey. Nirovetse ze rakemba raike 67 taogne a Myanmar agne zay naho fa nahafantatse ty tahinan’Agnahare. Hoe reke: “Io ty fotoagne voaloha’e nahafantarako tie i Jehovah ty tahinan’Andrianagnahare. ... Tena lahibey ze raha nampianare’areo ahy zay.” Arake o fitantaragne iohoe, le misy voka’e bey amy ty ndaty managne toe-po soa ty fahafantaragne ty tahinan’Andrianagnahare.

ATORÒ AVAO FA MATOKY I FANDAMINAGNE REHE

11. Akore ty azo o androanavi-pagnahio anoroagne ty fatokisa’e ty fandamina i Jehovah? (Henteo i sarey.)

¹¹ Ino ty agnisa ty fomba raike azo o androanavi-pagnahio ampisehoagne tie matoky ty fandamina i Jehovah iareo? Naho fa mahazo toromareke o androanavi-pagnahio, le mila mamaky soa izay iareo sady manao ze fara ty heri’e mba hampiharagne aze. Tsy tihoe mahazo toromareke miomba ty fomba fanoagne anjara amy ty fivoriagne avao ohatse iareo ndra miomba ty atao naho fa misolo-tegna i fiangonagney amy ty vavake, fa eo ka ty fomba hikarakaragne o agnondry i Jesosio. Naho fa magnorike ty toromareke boake amy i fandaminagne o androanavi-pagnahio, le hahatsapa o rahalahy naho rahavaveo tie tea naho mikarakara iareo ty Jehovah.

12. a) Nagnino tika ro toko’e hanohagne o rahalahy mitarikeo? (Hebreo 13:7, 17) b) Nagnino tika ro toko’e hifantoke avao amy ty toetse soa o rahalahy mitarikeo?

¹² Naho fa mahazo toromareke boake amo o androanavi-pagnahio tikagne, le toko’e ho vognogne le avy le hagnorike izay. Naho manao izay tikagne, le ho mora amo o rahalahy mitarike reo ty hanao ty asa’e. Mandrisike antika mba hankatò naho hagneke ze ndaty mitarike ty Baiboly. (Vakio ty Hebreo 13:7, 17.) Tsy mora ty manao izay kindraike. Ino ty anto’e? Satria tsy voririke o lahilahy reo. Naho mifantoke amy ty toetse raty iareo tikagne fa tsy amy ty toetse soa’e, le magnomey vahagne i fahavalontikagney. Amy ty fomba akore? Hanjare tsy hatoky ty fandamina i Jehovah tikagne, ie amy izao izay ty tea o mpanohetseo hatao. Ino areke ty azontika atao mba hamantaragne naho handieragne ty vande atao o fahavalontikagne reo?

KO ENGAGNE HAMPIHEGNE TY FATOKISA’O TY NDATY HAFA

13. Akore ty fomba agnaratia o fahavalon’Andrianagnahareo i fandaminagne?

¹³ Mikezake o fahavalon’Andrianagnahareo hagnaraty ty raha soa atao i fandaminagne. Nianarantikagne boake tagnate ty Soratse Masigne tao zao ohatse tie tea i Jehovah naho malio ty vatantikagne, ty findesam-batantikagne naho ty ara-pagnahintikagne. Mandily reke fa ze mpanota tsy mibebake fa manohy  manao raha raty avao, le mila roahegne tsy ho agnisa ty fiangonagne. (1 Kor. 5:11-13; 6:9, 10) Mankatò ze lily zay tika. Mampiasa ze raha zay o fahavalontikagne reo mba hanoheragne antika, le mirehake iareo tie nao tsy mandefetse naho mitsaratsara vaho malaigne ndaty zao tika.

14. Ia ty foto ty vande miomba i fandaminagne?

¹⁴ Fantaro ty foto i fanafihagney. I Satana Devoly ty ambaly i vande miomba i fandaminagne rey. “Rae ty vande” reke. (Jaona 8:44; Gen. 3:1-5) Mino areke tika fa mampiasa o mpanohagne aze reo reke mba hampiparitahagne vande miomba i fandaminagne. Fa niseho zay tamy ty taonjato voaloha’e.

15. Ino ty raha natao ty mpitarike fivavahagne tamy i Jesosy naho tamo o mpanonjohy ty lia’eo?

¹⁵ Tamy ty taonjato voaloha’e, le nirehake vande sambe karaza’e miomba ty fahagagagne natao i Ana-dahin’Andrianagnahare voririkey o mpanohagne i Satana reo. Nirehake tamy i vahoakey zao ohatse o mpitarike fivavahagneo tie amy ty alala i ‘lahibey o demoniaoy’ ty androaha i Jesosy demonia. (Mar. 3:22) Naho fa nampijalegne ka ty Jesosy, le nanao kitomboke aze ho mpanivetive an’Agnahare o mpitarike fivavahagneo sady nandrisike i vahoakey mba hamono aze. (Mat. 27:20) Tafara izay naho fa nitory i talily soay o mpiana i Kristy reo, le ‘nitaogne naho nandrisike i vahoakey mba hagnenjeke’ i Kristiana rey i fahavalo iareo rey. (Asa. 14:2, 19) Izao ty hazavae ty Fitalakesan-davitse 1 Desambra 1998 miomba o Asan’ny Apostoly 14:2 iohoe tie: “Tsy nagneke ty hafatse nitorie i Kristiana rey o mpanohagne i Satana reo sady nirehake raha raty miomba i mpianatse rey iareo, amy izay o ndatio tsy mitsanogne naho malaigne iareo.”

16. Ino ty raha mila tadidientika naho fa maharey fagnaratiagne tika?

 ¹⁶ Tsy tihoe tamy ty taonjato voaloha’e avao ty Satana ro nampiparitake vande. Amy izao le mbe “mamitake ze tane misy ndaty” reke. (Apok. 12:9) Naho maharey fagnaratiagne miomba i fandaminagne ndra o rahalahy mitarikeo rehe, le ko haligno fa hoe izay ka ty natao i fahavalon’Andrianagnahare rey tamy i Jesosy naho i mpiana’e tamy taonjato voaloha’e rey. Fa nirehake mialoha ty Jesosy fa hanohetse ze ndaty manompo i Jehovah naho hirehake raha vande miomba iareo o ndatio. Fa tanterake zay ty amy izao. (Mat. 5:11, 12) Tsy ho voafita o fagnaratiagneo tika naho mamantatse mialoha ty foto’e sady le avy le manao raha mba hanoheragne izay. Ino areke ty raha toko’e hataontika?

17. Akore ty ahafahantika mandietse ty tantara tsy maregne? (2 Timoty 1:13) (Henteo ty efajoro tihoe “ Akore ty Hatao Naho fa Maharey Tantara Tsy Maregne?”)

¹⁷ Liero ty tantara tsy maregne. Nagnomey torohevetse mazava soa miomba ty raha toko’e hatao ty apostoly Paoly naho fa maharey fagnaratiagne. Nirehake i Timoty reke mba “handrara ty hafa ... tsy hitsanogne tantara tsy maregne” naho mba “handietse ty tantara tsy maregne.” (1 Tim. 1:3, 4; 4:7) Va’e hitsimoke raha fa nipoke amy ty tane maloto ohatse o ajajao le hihinagne izay, faie ty ndaty bey tsy hanao izay satria mahatakatse tie hamparare aze zay. Mandietse ty tantara tsy maregne ka tikagne satria mahafantatse ty nifotora i raha rey. Ty ataontikagne le mitsanogne “ty rehake mahasoa” miomba ty hamarenagne.​—Vakio ty 2 Timoty 1:13.

18. Akore ty azontika anoroagne fa tena matoky ty fandamina i Jehovah tika?

¹⁸ Ty telo avao amy ty fomba maro anahafa i fandaminagne i Jesosy ty nidinehentikagne tato. Naho fa mianatse Baiboly rehe, le dineho ty fomba hafa anahafa i fandaminagne ty modely nimea i Jesosy. Ampeo ze ndaty amy ty fiangona’areo ao mba hagnamafe ty fatokisa’e i fandaminagne, le atorò avao ka fa matoky i fandaminagne rehe. Mikezaha tsy hivalike amy i Jehovah naho hipiteke amy ty fandaminagne ampiasae’e mba hagnatanterahagne ty zoton’arofo’e. (Sal. 37:28) Lonike tika mba hankasitrake avao ty tombotsoantika ho agnisa ty vahoa i Jehovah.