1. Kumbi ŵanthu aku Yehova achitanga wuli vinthu mwandondomeku mu nyengu ya akutumika?

 ASANI Yehova waŵapaska ntchitu ŵanthu ŵaki, iyu wakhaza kuti ayigwirengi mwandondomeku. (1 Akori. 14:33) Mwakuyeruzgiyapu, Chiuta wakhumba kuti uthenga wamampha upharazgiki pacharu chosi chapasi. (Mate. 24:14) Yehova wakusankha Yesu kuti ndiyu walongozgengi pa ntchitu yeniyi. Yesu wawonesesa kuti ntchitu yeniyi yigwirikengi mwandondomeku. Pa nyengu yo mipingu yajalikiskikanga mumalu ngakupambanapambana mu nyengu ya akutumika, ŵara angusankhika kuti aperekengi ulongozgi kweniso alongozgengi mu mpingu. (Machi. 14:23) Mu wupu wa ŵara wo wenga ku Yerusalemu mwenga akutumika kweniso ŵara ndipu yiwu asankhanga vinthu vo mipingu yosi yakhumbikanga kulondo. (Machi. 15:2; 16:4) Chifukwa chakuti yiwu avwiyanga ulongozgi wo apaskikanga, vinguwovya kuti “mipingu yilutirizgi kuja ndi chivwanu chakukho ndipuso chiŵerengeru cha ŵanthu chasazgikiyangaku.”—Machi. 16:5.

2. Kwambiya mu 1919, kumbi Yehova watiŵalongozga wuli ŵanthu ŵaki kweniso kuŵapaska chakurya chauzimu?

² Yehova wechekuwovya ŵanthu ŵaki kuti achitengi vinthu mwandondomeku mazuŵa nganu. Kwambiya mu 1919, Yesu wagwiriskiya ntchitu kagulu ka Akhristu akusankhika kuti alongozgengi pa ntchitu yakupharazga kweniso kupereka chakurya chauzimu kwa akusambira ŵaki. a (Luka 12:42) Viwoneke limu kuti Yehova watumbika ntchitu ya kagulu kenaka.—Yesa. 60:22; 65:​13, 14.

3-4. (a) Kambani chakuyeruzgiyapu cho chilongo vinthu vamampha vo vichitika asani tichita vinthu mwandondomeku. (b) Kumbi tikambiskanengenji mu nkhani iyi?

 ³ Asani tachitanga vinthu mwandondomeku cha, tatingi tifiskengi cha kugwira ntchitu yo Yesu wakutipaska. (Mate. 28:​19, 20) Mwakuyeruzgiyapu, asani abali angugaŵikiya cha vigaŵa vakupharazgaku, ndikuti weyosi watingi wapharazgengi kwekosi ko wakhumba. Abali ndi azichi atingi alutengeku kaŵikaŵi ku vigaŵa vinyaki, penipo vigaŵa vinyaki atingi alutengi ndi kulutaku cha. Kumbi mungaŵanaŵaniya vinthu vinyaki vamampha vo vichitika chifukwa chakuti tipharazga mwandondomeku?

⁴ Nge mo Yesu wachitiyanga vinthu mwandondomeku ndi akusambira ŵaki pa nyengu yo wenga pacharu chapasi, walutirizga so kuchita venivi ndi ŵanthu aku Chiuta mazuŵa nganu. Mu nkhani iyi, tikambiskanengi vo Yesu wanguchita kweniso mo gulu lidu liyezge vo iyu wachitanga. Tikambiskanengi so vo tingachita kuti tilongo kuti titiligomezga ukongwa gulu laku Yehova.

GULU LIDU LIYEZGA VO YESU WACHITANGA

5. Kumbi tingamuyezga wuli Yesu? (Yohane 8:28)

⁵ Yesu wangusambira kwa Awisi akuchanya vo wakhumbikanga kuchita kweniso kukamba. Gulu laku Yehova liyezga vo Yesu wachitanga chifukwa ligwiriskiya ntchitu Mazu ngaku Chiuta kuti litiwovyi kuziŵa chamampha ndi chiheni kweniso kutipaska ulongozgi wo utitiwovya pa umoyu widu. (Ŵerengani Yohane 8:28; 2 Timo. 3:​16, 17) Nyengu zosi tilonde ulongozgi wakuti tiŵerengengi kweniso tigwiriskiyengi ntchitu Mazu ngaku Chiuta. Kumbi tiyanduwa wuli asani tivwiya ulongozgi wenuwu?

6. Kumbi tiyanduwa wuli asani tisambira Bayibolu mwakugwiriskiya ntchitu mabuku nga gulu lidu?

⁶ Tiyanduwa ukongwa asani tisambira Bayibolu mwakugwiriskiya ntchitu mabuku nga gulu lidu. Mwakuyeruzgiyapu, tiyananisa vo Bayibolu lisambiza ndi ulongozgi wo gulu lidu lititipaska. Asani tiwona kuti ulongozgi wo talonde utuwa mu Malemba titiligomezga ukongwa gulu laku Yehova.—Aro. 12:2.

7. Kumbi Yesu wapharazganga uthenga wuli, nanga gulu laku Yehova liyezga wuli vo Yesu wachitanga?

⁷ Yesu wapharazganga “uthenga wamampha wa Ufumu waku Chiuta.” (Luka 4:​43, 44) Yesu wangulamula so akusambira ŵaki kuti apharazgengi uthenga wa Ufumu. (Luka 9:​1, 2; 10:​8, 9) Mazuŵa nganu ŵanthu wosi wo ŵe mu gulu laku Yehova apharazga uthenga wa Ufumu kwali aja pani pamwenga ŵe ndi maudindu nganandi wuli mu gulu laku Yehova.

8. Kumbi tikupaskika mwaŵi wuli?

⁸ Ndi mwaŵi ukulu ukongwa kupharazgiya ŵanthu uneneska wakukwaskana ndi Ufumu waku Chiuta! Ndi weyosi cha yo wakupaskika mwaŵi wenuwu. Mwakuyeruzgiyapu, pa nyengu yo Yesu wenga pacharu chapasi, wanguzomereza cha kuti mizimu yiheni yipereki ukaboni wakukwaskana ndi iyu. (Luka 4:41) Mazuŵa nganu munthu wechendayambi kupharazga limoza ndi ŵanthu aku Yehova watenere kuchitanga vinthu vo vikondwesa Yehova. Tilongo kuti tiwonga mwaŵi wo tenawu wakupharazga asani tipharazga kwekosi ko tingaŵa kweniso nyengu yeyosi. Nge Yesu, chilatu chidu nkhupanda kweniso kudiriya mbewu za uneneska za Ufumu mumitima ya ŵanthu.—Mate. 13:​3, 23; 1 Akori. 3:6.

9. Kumbi gulu laku Yehova laŵawovya wuli ŵanthu kuti aziŵi zina laku Chiuta?

⁹ Yesu wanguwovya ŵanthu kuziŵa zina laku Chiuta. Pa nyengu yo wapempheranga kwa Awisi akuchanya, Yesu wangukamba kuti: “Ndaŵaziŵisa zina linu.” (Yoha. 17:26) Gulu laku Yehova liyezga vo Yesu wachitanga mwakuchita chechosi cho lingafiska kuti liwovyi ŵanthu kuziŵa zina laku Chiuta. Nthowa yimoza yo gulu laku Yehova lachitiya venivi nkhugwiriskiya ntchitu Bayibolu la Charu Chifya la Malemba Ngakupaturika lo akuweziyamu zina laku Chiuta pa  malu ngaki ngakwenere. Pasonu panu Bayibolu lenili, lamphumphu pamwenga chigaŵa chaki ŵaka, lisanirika mu vineneru vakujumpha 270. Asani mungawona Fundu Zakukumaliya A4 ndi A5 zo ze mu Bayibolu lenili, muwonengi chifukwa cho anguweziyamu zina laku Chiuta kweniso vo vinguchitika pakuweziyamu zina lenili. Fundu Zakukumaliya C zo zisanirika mu Bayibolu Lakusambiriya, zikonkhoska ukaboni wakusazgikiyapu wakulongo kuti zina laku Chiuta likhumbika kusanirika mu Malemba nga Chigiriki Ngachikhristu maulendu 237.

10. Kumbi mwasambiranji pa vo munthukazi yo waja ku Myanmar wangukamba?

¹⁰ Nge Yesu, nasi tikhumba kuwovya ŵanthu anandi kuti aziŵi zina laku Chiuta. Munthukazi munyaki wa ku Myanmar wa vyaka 67 wati wasambira zina laku Chiuta wangwamba kuliya. Iyu wangukamba kuti: “Yaka nkhakwamba pa umoyu wangu kuvwa kuti zina laku Chiuta ndi Yehova. . . . Mwandisambiza chinthu chakukhumbika ukongwa pa umoyu wangu.” Vo vinguchitikiya munthukazi uyu vilongo kuti asani ŵanthu asambira zina laku Chiuta vingasintha umoyu wawu.

LUTIRIZGANI KULONGO KUTI MUGOMEZGA GULU LIDU

11. Kumbi ŵara angalongo wuli kuti agomezga gulu laku Yehova? (Wonani so chithuzi.)

¹¹ Kumbi ŵara angalongo wuli kuti agomezga gulu laku Chiuta? Asani alonde ulongozgi, ŵara akhumbika kuwuŵerenga mwakuphwere kweniso kuchita vosi vo angafiska kuti awugwiriskiyi ntchitu. Mwakuyeruzgiyapu, alonde ulongozgi wa mo angakambiya nkhani pa maunganu, mo angapereke mapempheru mu mpingu kweniso mo angaphwere mbereri zaku Khristu. Asani ŵara agwiriskiya ntchitu ulongozgi wosi wo gulu litiŵapaska, abali ndi azichi mu mpingu atijivwa kuti Yehova watiŵayanja kweniso watiŵaphwere.

12. (a) Ntchifukwa wuli titenere kukoliyana ndi wo alongozga? (Aheberi 13:​7, 17) (b) Ntchifukwa wuli tikhumbika kuŵanaŵaniyanga ukongwa mijalidu yamampha ya abali wo alongozga?

¹² Asani talonde ulongozgi kutuwa ku ŵara, titenere kuwuvwiya ndi mtima wosi. Asani tichita viyo, titovya kuti wo alongozga ayigwirengi umampha ntchitu yawu. Bayibolu lititichiska kuti tivwiyengi kweniso tijithereskengi ku ŵanthu wo alongozga. (Ŵerengani Aheberi 13:​7, 17.) Kuchita venivi kungaŵa kwakusuzga nyengu zinyaki. Chifukwa wuli? Chifukwa chakuti abali ŵenaŵa mbambula kufikapu. Kweni asani tiŵanaŵaniya ukongwa vo anangisa mumalu mwakuŵanaŵaniya mijalidu yawu yamampha vituŵa kuti titovya arwani ŵidu. Mu nthowa wuli? Arwani ŵidu akhumba kuti tikayikiyengi kuti Chiuta wagwiriskiya ntchitu gulu laki kuti watilongozgengi. Mwaviyo, asani tijaliya ŵaka kuŵanaŵaniya vo ŵara anangisa tingayamba so kukayikiya gulu lidu ndipu tingaleka kuligomezga. Kumbi tingachita wuli kuti tiziŵi kweniso tikani maboza ngo arwani ŵidu akamba?

MUNGAZOMEREZANGA CHA KUTI ŴANTHU ANYAKI AKUCHITISKENI KUTI MULEKI KUGOMEZGA GULU LAKU CHIUTA

13. Kumbi arwani aku Chiuta achitanji kuti gulu laku Yehova liwonekengi nge ndiheni?

¹³ Ŵanthu wo asuska Chiuta atesesa kuchitiska kuti vinthu vamampha vakukwaskana ndi gulu laku Chiuta viwonekengi nge viheni. Mwakuyeruzgiyapu, kutuliya mu Malemba, tisambira kuti Yehova wakhaza kuti ŵanthu wo atimusopa ajengi akutowa mwakuliŵavu, mwauzimu kweniso ajengi ndi mijalidu yamampha. Iyu wakamba kuti weyosi yo walutirizga kuchita vinthu viheni ndipu wakhumba cha kulapa, watenere cha kulutirizga kuja mu mpingu. (1 Akori. 5:​11-13; 6:​9, 10) Isi tivwiya dangu la mu Malemba lenili. Chifukwa chakuti tivwiya dangu lenili, ŵanthu akususka akamba kuti te akukhwimisa  vinthu, tiyeruzga ŵanthu kweniso titiŵayanja cha anyidu.

14. Kumbi ndiyani yo wachitiska kuti ŵanthu akambengi maboza ngakukwaskana ndi gulu lidu?

¹⁴ Ziŵani yo wachitiska kuti gulu laku Yehova lisuskikengi. Satana Dyaboli ndiyu wachitiska kuti ŵanthu akambengi nkhani zaboza zakukwaskana ndi gulu lidu. Iyu “ndi wisi wa boza.” (Yoha. 8:44; Gene. 3:​1-5) Mwaviyo tikhazengi kuti Satana wagwiriskiyengi ntchitu ŵanthu wo atimulondo kuti akambengi nkhani zaboza zakukwaskana ndi gulu laku Yehova. Venivi ndivu vinguchitikiya Yesu kweniso Akhristu a mu nyengu ya akutumika.

15. Kumbi ndi vinthu wuli vo alongozgi a chisopa anguchitiya Yesu kweniso akusambira ŵaki?

¹⁵ Chinanga kuti Yesu yo wenga Mwana waku Chiuta wenga wakufikapu kweniso wanguchita vakuziziswa vinandi, Satana wagwiriskiyanga ntchitu ŵanthu anyaki kuti akambi maboza ngakukwaskana ndi iyu. Mwakuyeruzgiyapu, alongozgi a visopa angukambiya ŵanthu kuti nthazi zo Yesu wagwiriskiyanga ntchitu pakutuzga viŵanda, zatuliyanga kwa “mura wa viŵanda.” (Mariko 3:22) Pa nyengu yo Yesu amumbanga mulandu, alongozgi a visopa angumumba mulandu wakuti wanyoza Chiuta ndipu anguchichizga chigulu cha ŵanthu kuti chikambi kuti Yesu wabayiki. (Mate. 27:20) Pati pajumpha nyengu, pa nyengu yo akusambira aku Khristu apharazganga uthenga wamampha, ŵanthu wo aŵasuskanga “angukhuŵizga ŵanthu” kuti atombozgi Akhristu ŵenaŵa. (Machi. 14:​2, 19) Pakukonkhoska lemba la Machitidu 14:​2, Chigongwi cha Mlinda cha December 1, 1998, chingukamba kuti: “Ŵanthu wo ŵenga ku chigaŵa chaku Satana angukana uthenga wo Akhristu apharazganga kweniso akambanga vinthu viheni vakukwaskana ndi Akhristu ŵenawa kuti ŵanthu aleki kuvwisiya uthenga wawu ndipuso kuti aŵatinkhengi.”

16. Kumbi titenere kukumbukanji asani tavwa nkhani zaboza?

 ¹⁶ Satana walutirizga mbwenu kukamba maboza mazuŵa nganu. Mpaka sonu, iyu “walandizga charu chosi chapasi.” (Chivu. 12:9) Asani mwavwa nkhani yo yikamba vinthu viheni vakukwaskana ndi gulu lidu pamwenga abali wo alongozga, kumbukani vo arwani aku Chiuta anguchitiya Yesu kweniso akusambira a mu nyengu ya akutumika. Mwakukoliyana ndi vo Bayibolu lingukambiya limu, mazuŵa nganu ŵanthu aku Chiuta atombozgeka kweniso ŵanthu atiŵapusikiya. (Mate. 5:​11, 12) Isi tingalandizgika cha ndi nkhani zaboza asani tiziŵa ko zituliya kweniso asani tichitapu kanthu mwaliŵi. Kumbi titenere kuchitanji?

17. Kumbi tingachita wuli kuti tileki kulandizgika ndi nkhani zaboza? (2 Timote 1:13) (Wonani so bokosi lakuti “ Vo Mungachita Asani Mwavwa Nkhani Zaboza.”)

¹⁷ Mukanengi nkhani zaboza. Wakutumika Paulo wangukamba ulongozgi wakuvwika umampha wa vo titenere kuchita asani tavwa nkhani zaboza. Iyu wangukambiya Timote kuti walamuli “ŵanthu anyaki kuti aleki . . . kuvwisiya nkhani zaboza” kweniso kuti ‘akanengi nkhani zaboza.’ (1 Timo. 1:​3, 4; 4:7) Mwakuyeruzgiyapu, mwana wangawonapu suzgu cha kutondo chinthu chakunata ndi kuŵika mumulomu. Kweni munthu mura wangachita cha venivi chifukwa waziŵa kofya kwaki. Nasi tikana nkhani zaboza chifukwa tiziŵa ko nkhani zenizi zituliya. Mumalu mwaki tikoleska “mazu ngamampha” ngauneneska.—Ŵerengani 2 Timote 1:13.

18. Kumbi tingalongo wuli kuti titiligomezga gulu laku Yehova?

¹⁸ Mu nkhani iyi takambiskana nthowa zitatu pe zo gulu laku Chiuta liyezge Yesu. Muchisambira Bayibolu, saniyani nthowa zinyaki zo zilongo mo gulu laku Yehova liyezge Yesu. Wovyani ŵanthu anyaki mu mpingu winu kuti nawu aligomezgengi ukongwa gulu laku Yehova. Kweniso lutirizgani kulongo kuti mutiligomezga mwakulutirizga kuteŵete Yehova mwakugomezgeka ndipuso kukoliyana ndi gulu lo iyu watiligwiriskiya ntchitu kuti wafiski khumbu laki. (Salimo 37:28) Tiyeni tosi tilutirizgi kuwonga mwaŵi wo tenawu wakuja mu gulu la ŵanthu aku Yehova wo atanjana kweniso akugomezgeka.