1. Bakombi baJehova bakabambikene biyeni mumwaanda wamunyaka wakusaanguna?

 CHIINDI choonse, Jehova naapa bantu mulimu wakuti bachite, ulangilila kuti bawuchite munzila iibambikene. (1 Kor. 14:33) Muchikozyano, Leza uyanda kuti makani mabotu akambawukwe munyika yoonse. (Mt. 24:14) Jehova wakasala Jesu kuti azulwide mumulimu ooyu. Alubo Jesu wakaba aachoonzyo chakuti mulimu ooyu ulikuchitwa munzila iibambikene. Mumwaanda wamunyaka wakusaanguna, chiindi mbungano nizyakali kujulwa mundawu zisiyene-siyene, kwakasalwa baalu kuti bazulwide akuti bape bamumbungano malayilile. (Mil. 14:23) KuJerusalema, kabunga kabaalu kaswaanizya baapostoli abaalumi bapati, bakasala zintu nzibakalayilila kuti mbungano zyoonse ziswiilile akubelesya zintu eezyo. Mbungano nizyakali kujulwa mundawu zisiyene-siyene, baalu bamumbungano imwi ayimwi bakali kubuzya bakwesu abachizi zintu eezyo zyakali zyasalwa. (Mil. 15:2; 16:4) Akaambo kakuti bakwesu abachizi bakali kuswiilila malayilile ngibakali kupegwa, “mbungano zyakali kuyabusima mulusyomo alubo zyakali kuyungizya buzuba abuzuba.”—Mil. 16:5.

2. Kuzwa mu1919, Jehova ulikubazulwida biyeni bakombi bakwe alubo ulikubapa biyeni chakulya chamubukombi?

² Nikuba mazubaano, Jehova ulikwiinkilila kunembo kupa kuti bakombi bakwe babambikane. Kuzwa mu1919, Jesu ulikubelesya kabunga kaniini kabakwesu bananikidwe kuti bape kuti mulimu wakukambawuka uchitwe munzila iibambikene akuti bape batobeli bakwe chakulya chamubukombi. a (Lk. 12:42) Zilaantanganana kuti Jehova ulikulongezya mulimu wakabunga aako.—Is. 60:22; 65:​13, 14.

3-4. (a) Amba chikozyano chitondeezya mbutugwasigwa akaambo kakubambikana. (b) Tulalanga-langaanzi muchiiyo eechi?

 ³ Kaansinga tatubambikene, teetwayinookonzya pe kuchita mulimu ngwaakatupa Jesu. (Mt. 28:​19, 20) Muchikozyano, kaansinga bakwesu teebakabamba ndawu zyakuti mbungano kazikambawukila nkuko, nikuli muntu woonse walikunookambawuka kufumbwa nkwayanda. Zimwi ndawu zyalikunookambawukwa aabasikupupulula biingi alubo kwaziindi zyiingi mpawo zimwi ndawu taakwe nizyayinookambawukwa biya pe. Kuli zimwi nzila na nzwaayeeya zitugwasya akaambo kakuba bantu babambikene?

⁴ Jesu ulikwiinkila kunembo kugwasya batobeli bakwe kuti babambikane mbuli mbaakachita chiindi naakali aanyika. Muchiiyo eechi, tulabona chikozyano nchaakatusiila Jesu ambunga mbuyili kutobelezya chikozyano chakwe. Alubo tulalanga-langa nzitukonzya kuchita kuti tutondeezye kuti tulayisyoma mbunga yaJehova.

MBUNGA YESU ITOBELEZYA CHIKOZYANO CHAJESU

5. Njiili imwi nzila iitondeezya kuti tutobelezya chikozyano chaJesu? (Johane 8:28)

⁵ Jesu wakayiya nzyaakelede kuchita anzyaakelede kwaambuula kuzwa kuli Taateesu wakujulu. Mbunga itobelezya chikozyano chaJesu kwiinda mukubelesya Jwi lyaLeza kuti itugwasye kuziba zintu zilikabotu azitali kabotu akuti itupe malayilile aatugwasya mubuumi. (Bala Johane 8:28; 2 Tim. 3:​16, 17) Chiindi achiindi, tusungwaazigwa kuti tubale Jwi lyaLeza akubelesya nzitwiiya. Tugwasigwa biyeni akubelesya malayilile aaya?

6. Njiili imwi nzila iiyandikana iitondeezya mbutugwasigwa akwiiya Bbayibbili?

⁶ Tugwasigwa loko chiindi nitwiiya Bbayibbili katubelesya mabbuku eesu. Muchikozyano, tulakonzya kweezyanisya nzitwiiya muBbayibbili amalayilile ngitupegwa aambunga. Chiindi nitubona kuti malayilile ngitupegwa azwa muMagwalo, tulayungizya kusyoma mbunga yaJehova.—Rom. 12:2.

7. Jesu wakakambawuka atalaanzi alubo mbunga yaJehova ichitobelezya biyeni chikozyano chakwe?

⁷ Jesu wakakambawuka “makani mabotu aaBwaami bwaLeza.” (Lk. 4:​43, 44) Alubo Jesu wakalayilila basikwiiya bakwe kuti bakambawuke atala aBwaami. (Lk. 9:​1, 2; 10:​8, 9) Mazubaano, aabo boonse bali mumbunga yaJehova balikukambawuka mulumbe waBwaami kazitakwe ndaba kuti bakkala kuli naakuti bali aamilimu myiingi biyeni mumbunga.

8. Tuli aachilongezyo chanzi?

⁸ Tuchibona kachili chilongezyo kukambawukila bamwi kasimpe kali atala aBwaami bwaLeza. Eezi tazichitwi aakufumbwa muntu. Muchikozyano, Jesu naakali aanyika, taakazumizya myuuya mibi kuti ipe bukamboni atala anguwe. (Lk. 4:41) Mazubaano, muntu weelede kweelela kuti ajane chilongezyo eechi katanasaanguna kukambawuka. Chiindi nitukambawukila bantu atala aBwaami bwaLeza kufumbwa nkutubede naakuti chiindi nitwaambuulaabo, nga tuli kutondeezya kuti tuchibona kachiyandikana chilongezyo eechi. Mbuli Jesu, makanze eesu ngakubyala akutilila mbuto yakasimpe kaBwaami mumyoyo yabantu.—Mt. 13:​3, 23; 1 Kor. 3:6.

9. Niinzi zili kuchitwa aambunga kuti bantu bazibe zina lyaLeza?

⁹ Jesu wakagwasya bantu kuti bazibe zina lyaLeza. Naakakomba kuli Wisi, Jesu wakaamba kuti: “Ndapa kuti zina lyako lizibinkane.” (Joh. 17:26) Mbuli Jesu, mbunga yaJehova ichita zyoonse nziikonzya kuti igwasye bantu kuti bazibe zina lyaLeza. Mbunga yakagwisya Bbayibbili lyaBusanduluzi Bwanyika Mpya nkaambo muBbayibbili eeli mwakabweedezegwa zina lyaLeza mundawu mulyakabede  mumalembe aakusaanguna. Bbayibbili eeli lilajanika muzipaanzi naakuti kalizwide mumilaka yiinda ku270. MuMakani Aayungizyidwe A4 a-A5 muBbayibbili eeli, ulajana makani aali atala ambulyakabweedezegwa zina lyaLeza. MuMakani Aayungizidwe C muBbayibbili lyaKwiiya lyaChikuwa, muli bukamboni butondeezya kuti zina lyaLeza lyeelede kujanika kwaziindi zili 237 muMagwalo AachiKkristu AachiGrikki.

10. Wayiyaanzi kuzwa kumajwi akaambwa aamwanakazi wakuMyanmar?

¹⁰ Mbuli Jesu, tuyanda kugwasya bantu biingi, kuti kazikonzeka, kuti bazibe zina lyaLeza. Umwi mwanakazi wakuMyanmar uuli aaminyaka iili 67 wakalila chiindi naakaziba zina lyaLeza. Wakaamba kuti: “Aaka nkakusaanguna mubuumi bwangu kuziba kuti Leza ulaazina lyakuti Jehova. . . . Mwandiyiisya chintu chiyandikana loko mubuumi bwangu.” Zyakachitika eezi zitondeezya kuti bantu balakonzya kuchincha buumi bwabo kuti baziba zina lyaLeza.

YINKILILA KUNEMBO KUTONDEEZYA KUTI ULAYISYOMA MBUNGA YAJEHOVA

11. Baalu batondeezya biyeni kuti balayisyoma mbunga yaJehova? (Langa chifanikisyo.)

¹¹ Njiili imwi nzila baalu njibakonzya kutondeezyaayo kuti balayisyoma mbunga yaLeza? Chiindi nibatambula malayilile, baalu beelede kwaabala kabotu-kabotu mpawo baabelesye. Muchikozyano, bapegwa malayilile aabagwasya kuchita zipaanzi zyabo kumiswaangano, mbubakonzya kukomba kumiswaangano yambungano ambubakonzya kulangania mbelele zyaKkristu. Kuti baalu babelesya malayilile ngibapegwa aambunga, bakwesu abachizi balabona kuti Jehova ulabayanda akuti ulabalangania.

12. (a) Nkamboonzi nitweelede kuswiilila aabo batuzulwida? (Mahebberu 13:​7, 17) (b) Nkamboonzi nitweelede kulangisisisya zintu zibotu nzibachita aabo batuzulwida?

¹² Kuti twapegwa malayilile abaalu, tweelede kwaaswiilila. Chiindi nituchita oobo, ngatuli kuubisizya aabo batuzulwida kuti bachite mulimu wabo. Bbayibbili litusungwaazya kuti tuswiilile aabo batuzulwida alubo tulibombye kulimbabo. (Bala Mahebberu 13:​7, 17.) Chimwi chiindi, eezi zilakonzya kutuyumina. Nkamboonzi? Nkaambo bakwesu aaba ambabo bali aachibi. Nikuba oobo, kuti twalangisisisya zintu nzibapambanisya kwiinda kuti tulangisisisye zintu nzibachita kabotu, ngatuli kugwasilizya basinkondoma. Munzilaanzi? Basinkondoma bayanda kuti tutabi aachoonzyo chakuti Leza ubelesya mbunga yakwe kuti atuzulwide. Nkinkaako, kuti twaba aamaboneno aatali kabotu atala abaalu, tulasaanguna kutayisyoma mbunga. Niinzi nzitukonzya kuchita kuti tuzibe manwa aabasinkondoma akuti twaatantamuke?

UTAZUMIZYI BAMWI KUTI BAPE KUTI ULEKE KUSYOMA MBUNGA YAJEHOVA

13. Niinzi nzibali kuchita basinkondonyina baLeza kuti bape kuti zintu zibotu zichitwa aambunga zibonekaanga nzibi?

¹³ Basinkondonyina baLeza balikweezya kupa kuti zintu zibotu zichitwa aambunga yaLeza zibonekaanga nzibi. Muchikozyano, twakayiya kuzwa muMagwalo kuti Jehova uyanda kuti bakombi bakwe bakkale kabasalala kumubili, munkani yakulijata amubukombi. Jehova uyanda kuti muntu woonse uutasanduki akaambo kamichito yakwe iitasalali agwisigwe mumbungano. (1 Kor. 5:​11-13; 6:​9, 10) Tulawuswiilila mulawu ooyu wamuMagwalo. Pesi bantu batukazya babelesya nkani eeyi kabaamba kuti tuli aalunya, tatubayandi pe bantu akuti tubeteka bamwi.

14. Ngwani kasawu kamanwa woonse aali atala ambunga?

¹⁴ Ziba kuti ngwani loko ulikutulwana. Saatani Dyabbulosi usumpula manwa aali atala ambunga yaLeza. Bbayibbili lyaamba kuti “nguwisi  wababeji.” (Joh. 8:44; Matl. 3:​1-5) Nkinkaako, tweelede kulangilila kuti Saatani unoobelesya bantu kuti baambe manwa atala ambunga yaJehova. Eezi nzizyo zyakachitika kuli Jesu akumaKkristu bakusaanguna.

15. Niinzi nzibakachita bapati bazikombelo kuli Jesu akubatobeli bakwe?

¹⁵ Mumwaanda wamunyaka wakusaanguna, batobeli baSaatani bakaamba manwa miingi atala azigambyo zyakachitwa aaMwana waLeza, Jesu. Muchikozyano, bapati bazikombelo bakabuzya bantu kuti manguzu ngaakali kubelesya Jesu kuti atande madimoni akali kuzwa ‘kumweendelezi wamadimoni.’ (Mk. 3:22) Jesu naakasungwa, bapati bazikombelo bakaamba kuti Jesu wakali kusampawula Leza alubo bakakombelezya bantu kuti bakumbile kuti Jesu ajayigwe. (Mt. 27:20) Mukuya kwachiindi, batobeli baKkristu nibakali kukambawuka makani mabotu, aabo bakali kubakazya “bakakolongania bantu bazisi akubasungilizya kuti” bapenzye maKkristu aabo. (Mil. 14:​2, 19) Ngaziyakulinda yamuDecember 1, 1998 niyakapandulula atala alugwalo lwa Milimu 14:​2, yakaamba kuti: “Aabo batobela Saatani bakakaka mulumbe ngubakali kukambawuka maKkristu alubo bakaamba zintu zibi atala ambabo kuchitila kuti bantu batabaswiilili pe akuti babazonde.”

16. Niinzi nzitweelede kuyeeya kuti twamvwa makani aakubeja?

¹⁶ Saatani ulikwiinkilila kunembo kwaamba manwa atala abakombi baLeza. Mazubaano, uli kwiinkilila kunembo kweena “bantu boonse bakkala aanyika.” (Chi. 12:9) Kuti wamvwa makani aakubeja aali atala ambunga naakuti atala abakwesu bazulwida, yeeya nzibakachita basinkondonyina baLeza kuli Jesu akumaKkristu bakusaanguna. Mazubaano, bakombi baJehova balikupenzegwa alubo balikubejelezegwa  mbuli mbulyakaamba Bbayibbili. (Mt. 5:​11, 12) Kuti twaziba muntu ulikupa kuti bantu baambe manwa atala ambunga akuti twachita chimwi chintu kuti tulikwabilile, tatwaaswiilili pe manwa aayo. Pesi niinzi nzitukonzya kuchita kuti tulikwabilile?

17. Niinzi nzitukonzya kuchita kuti tutapambanisigwi aamakani aakubeja? (2 Timoti 1:13) (Langa kabbokesi kati “ Nzukonzya Kuchita Kuti Wamvwa Makani Aakubeja.”)

¹⁷ Kaka twaano twakubeja. Mwaapostoli Pawulu wakatupa malayilile aali aantanganana aali atala azintu nzitweelede kuchita kuti twamvwa makani aakubeja. Wakabuzya Timoti kuti ‘ulayilile bamwi kuti . . . bataswiilili twaano twakubeja’ akuti ‘bakake twaano twakubeja tutasalali.’ (1 Tim. 1:​3, 4; 4:7) Nikuba kuti mwana mutete ulakonzya kubweza kufumbwa chintu chili aansi kuti achilye, pesi muntu mupati tachiti oobo nkaambo ulizi kuti kuchita oobo kulakonzya kumuchisa. Tukaka twaano twakubeja nkaambo tulizi kuti twaano ooto tuzwa kuli. Tuswiilila ‘majwi mabotu’ aakasimpe kupela.—Bala 2 Timoti 1:13.

18. Niinzi nzitukonzya kuchita kuti tutondeezye kuti tulayisyoma mbunga yaJehova?

¹⁸ Twalanga-langa nzila zitatu kupela zitondeezya mbunga yaLeza mbuyitobelezya chikozyano chaJesu. Chiindi nuyiiya Bbayibbili akuyanduulisisya, yezya kuyanduula zimwi nzila ubone mbunga mbuyitobelezya chikozyano chaJesu. Gwasya bamwi bamumbungano kuti bayungizye kusyoma mbunga. Alubo yinkilila kunembo kutondeezya kuti ulayisyoma mbunga kwiinda mukubelekela Jehova kusyomeka akukkala kuswiilila malayilile aazwa kumbunga njaabelesya kuti achite kuyanda kwakwe. (Int. 37:28) Toonse atwiinkilile kunembo kuchibona kachili chilongezyo kuba aakati kabakombi baJehova bali aaluyando alubo basyomeka.