1. Kasi ŵanthu ŵa Yehova ŵakalongozgekanga wuli mu nyengo ya Ŵakhristu ŵakwambilira?

 PARA Yehova wakuŵapa ŵanthu ŵake mulimo, wakukhazga kuti ŵauchitenge mundondomeko yiwemi. (1 Kor. 14:33) Mwachiyelezgero, khumbo la Chiuta ndakuti makani ghawemi ghapharazgike pa charu chose chapasi. (Mat. 24:14) Yehova wali kusora Yesu kuti ndiyo wadangilirenge pa mulimo uwu. Ndipo Yesu wakuwoneseska kuti ukuchitika mundondomeko yakwenelera. Mu nyengo ya Ŵakhristu ŵakwambilira, apo mipingo yikapangikanga mu vigaŵa vyakupambanapambana, ŵalara ŵakimikikanga kuti ŵadangilirenge na kupeleka ulongozgi. (Mil. 14:23) Mu Yerusalemu, wupu wa ŵalara ŵachoko waka uwo mukaŵa ŵapositole na ŵanalume ŵalara, ndiwo ukapanganga vyakusankha ivyo mipingo yose yikeneranga kulondezga. (Mil. 15:2; 16:4) Chifukwa chakuti ŵabali na ŵadumbu ŵakapulikiranga ulongozgi uwo ŵakapokeranga, “mipingo yikalutilira kukhozgeka mu chipulikano ndipo zuŵa lililose ŵanthu ŵakasazgikiranga mu mpingo.”—Mil. 16:5.

2. Kwambira mu 1919, kasi Yehova wakupeleka wuli ulongozgi wake na chakurya chauzimu?

² Yehova wakulutilira kulongozga ŵanthu ŵake nanga ni mazuŵa ghano. Kwambira mu 1919, Yesu wakugwiliskira ntchito kagulu kachoko waka ka ŵanalume ŵakuphakazgika kuti kalongozgenge pa mulimo wa kupharazga na kupeleka chakurya chauzimu panyengo yake ku ŵalondezgi ŵake. a (Luka 12:42) Vikulongolerathu kuti Yehova wakutumbika mulimo wawo.—Yes. 60:22; 65:​13, 14.

3-4. (a) Longosorani umo tikusangira chandulo chifukwa chakuti tikulongozgeka. (b) Kasi tiwonenge vichi mu nkhani iyi?

 ³ Viŵenge kuti tikulongozgeka yayi, mphanyi tikufiska yayi mulimo uwo Yesu wali kutipa. (Mat. 28:​19, 20) Mwachiyelezgero, viŵenge kuti tindapike yayi vigaŵa vyakuti tipharazgengeko; mphanyi waliyose wakujipharazgira waka kulikose uko wakhumba. Vigaŵa vinyake mphanyi vikupharazgika mwakuwerezgawerezga na ŵapharazgi ŵakupambanapambana, apo vinyake mphanyi vikupharazgika yayi napachoko pose. Kasi mungaghanaghanira nthowa zinyake izo tikusangira chandulo chifukwa chakuti tikulongozgeka na gulu la Chiuta?

⁴ Ivyo Yesu wakachita apo wakaŵa pa charu chapasi ntchakuwonerapo cha umo wakutilongozgeraso mazuŵa ghano. Mu nkhani iyi, tiwonenge chiyelezgero icho Yesu wali kutilekera kweniso umo gulu lithu likulondezgera chiyelezgero chake. Tidumbiskanengeso umo tingalongolera kuti tikuligomezga chomene gulu la Yehova.

GULU LITHU LIKULONDEZGA CHIYELEZGERO CHA YESU

5. Kasi ni nthowa wuli yimoza iyo tikuyezgera Yesu? (Yohane 8:28)

⁵ Yesu wakasambira kwa Awiske ŵakuchanya umo wakwenera kuchitira vinthu kweniso umo wakwenera kuyowoyera. Pakulondezga chiyelezgero cha Yesu, visambizgo ivyo gulu lithu likusambizga na ulongozgi wake, vikufuma mu Mazgu gha Chiuta. (Ŵazgani Yohane 8:28; 2 Tim. 3:​16, 17) Nyengo na nyengo tikupokera ulongozgi wakuti tiŵazgenge na kulondezga ivyo tasambira mu Mazgu gha Chiuta. Kasi tikusanga chandulo wuli para tikulondezga ulongozgi uwu?

6. Kasi ni nthowa wuli yimoza yakuzirwa chomene iyo tikusangira chandulo para tikusambira Baibolo?

⁶ Tikusanga vyandulo vinandi para tikusambira Baibolo mwakugwiliskira ntchito mabuku ghithu. Mwachiyelezgero, tikuyaniska ivyo Baibolo likusambizga na ulongozgi uwo tikupokera kufuma ku gulu la Yehova. Para tawona kuti ulongozgi uwo tapokera ukufuma mu Malemba, tikuligomezga chomene gulu la Yehova.—Rom. 12:2.

7. Kasi ni uthenga wuli uwo Yesu wakapharazganga, ndipo gulu la Yehova likulondezga wuli chiyelezgero chake?

⁷ Yesu wakapharazganga “makani ghawemi gha Ufumu wa Chiuta.” (Luka 4:​43, 44) Kweniso Yesu wakatuma ŵasambiri ŵake kupharazga vyakukhwaskana na Ufumu. (Luka 9:​1, 2; 10:​8, 9) Mazuŵa ghano wose awo ŵali mu gulu la Yehova ŵakupharazga uthenga wa Ufumu, kwali ŵakukhala nkhu panji ŵali na maudindo wuli mu gulu.

8. Kasi tili na mwaŵi wuli?

⁸ Tikuwona kuti ni mwaŵi wapadera kuphalirako ŵanji unenesko wakukhwaskana na Ufumu wa Chiuta. Ni waliyose yayi uyo wali na mwaŵi uwu. Mwachiyelezgero, apo wakaŵa pa charu chapasi, Yesu wakazomerezga yayi mizimu yiheni kuchitira ukaboni vya iyo. (Luka 4:41) Mazuŵa ghano napo, pambere munthu wandambe kupharazga na Ŵakaboni ŵa Yehova, wakwenera kufiska dankha ivyo vikukhumbikwa kuti waŵe wakwenelera kuchitako mulimo uwu. Tikulongora kuti tikuwongera mwaŵi uwu para tikupharazga pa m’pata uliwose uwo wasangika, kulikose uko tingaŵa. Nga ni Yesu, chilato chithu nkhupanda na kuthilira mbuto zaunenesko za Ufumu mu mitima ya ŵanthu.—Mat. 13:​3, 23; 1 Kor. 3:6.

9. Kasi gulu la Yehova likuchita wuli kuti limanyiske ŵanthu zina la Chiuta?

⁹ Yesu wakamanyiskanga ŵanthu zina la Chiuta. Apo wakalombanga kwa Adada ŵake ŵakuchanya, Yesu wakati: “Naŵamanyiska zina linu.” (Yoh. 17:26) Pakuyezga Yesu, gulu la Yehova likuchita chilichose icho lingafiska kuti lovwire ŵanthu kumanya zina la Chiuta. Baibolo la Malemba Ghakupatulika mu Mang’anamuliro gha Charu  Chiphya lawovwira chomene pa chigaŵa ichi, chifukwa lili kuwezgeramo zina la Chiuta mu malo ghose ghakwenelera. Baibolo ili lose panji chigaŵa waka, pasono lili mu viyowoyero vyakujumpha 270. Pa Vyakusazgirapo A4 na A5 mu Baibolo ili, musangenge vinandi vyakukhwaskana na kuwezgekeramo kwa zina la Chiuta mu Baibolo. Mu chigaŵa cha Vyakusazgirapo C, icho chikusangika mu Study Bible, muliso ukaboni wakusazgikira uwo ukulongora kuti zina la Chiuta likwenera kusangika malo 237 mu Malemba Ghachigiriki.

10. Kasi tikusambirako vichi ku ivyo wakayowoya mwanakazi munyake uyo wakukhala ku Myanmar?

¹⁰ Nga ni Yesu, nase tikukhumba kovwira ŵanthu ŵanandi chomene kuti ŵamanye zina la Chiuta. Mwanakazi munyake wa vyaka 67 ku Myanmar, wati wamanya kuti Chiuta wali na zina wakathiska masozi na kuyowoya kuti: “Aka nkhakwamba pa umoyo wane kupulika kuti Chiuta zina lake ni Yehova. . . . Mwanisambizga chinthu chakuzirwa chomene icho nindasambirepo pa umoyo wane.” Nga umo chakuchitika ichi chikulongolera, kumanya zina la Chiuta kuli na nkhongono chomene ku ŵanthu ŵamitima yiwemi.

LUTILIRANI KULIGOMEZGA GULU LITHU

11. Kasi ŵalara ŵangalongora wuli kuti ŵakuligomezga gulu la Yehova? (Wonaniso chithuzi.)

¹¹ Kasi ni nthowa wuli yimoza iyo ŵalara ŵangalongolera kuti ŵakuligomezga chomene gulu la Chiuta? Para ŵapokera ulongozgi, ŵalara ŵakwenera kuŵazga mwakupwelelera, ndipo pamanyuma na kuchita vyose ivyo ŵangafiska kulondezga ulongozgi uwo. Mwachiyelezgero, padera pakupokera ulongozgi uwo ukuyowoya umo ŵakwenera kudumbira nkhani pa maungano kweniso umo ŵangalombera, ŵangapokeraso ulongozgi wa umo ŵangapwelelera mberere za Khristu. Ŵalara awo ŵakulondezga ulongozgi wa gulu ŵakovwira ŵabali na ŵadumbu kujipulika kuti Yehova wakuŵatemwa kweniso kuŵapwelelera.

12. (a) Chifukwa wuli tikwenera kupulikira awo ŵakulongozga? (Ŵahebere 13:​7, 17) (b) Chifukwa wuli tikwenera kuŵika mtima pa ivyo awo ŵakulongozga ŵakuchita makora?

¹² Para tapokera ulongozgi kufuma ku ŵalara, tikwenera kulondezga na mtima wose. Para tikuchita nthena, tikovwira kuti chiŵe chipusu ku awo ŵakulongozga kuchita makora mulimo wawo. Baibolo likutichiska kuti tipulikirenge na kujilambika ku awo ŵakulongozga. (Ŵazgani Ŵahebere 13:​7, 17.) Kweni nyengo zinyake chingaŵa chipusu yayi kuchita nthena. Chifukwa wuli? Chifukwa ntchakuti ŵanalume aŵa nawo mbambura kufikapo. Ntheura para tikulaŵiska waka pa ivyo ŵakutondeka kuchita makora m’malo mwa kuŵika mtima pa ivyo ŵakuchita makora, mbwenu tiŵenge kuti tikovwira ŵalwani ŵithu. Munthowa wuli? Tambenge kukayikira gulu la Chiuta, chinthu icho ŵalwani ŵithu ŵakukhumba kuti ndimo tichitirenge. Ipo kasi tingachita wuli kuti timanye mautesi gha ŵalwani ŵithu na kughakana?

KUZOMEREZGA YAYI KUTI ŴANJI ŴAMUTONDESKANI KULIGOMEZGA GULU LITHU

13. Kasi ŵalwani ŵa Chiuta ŵakuyezga wuli kuchitiska kuti gulu la Chiuta liwonekenge kuti ndiheni?

¹³ Ŵalwani ŵa Chiuta ŵakuyezgayezga kupangiska vinthu viwemi vyakukhwaskana na gulu kuwoneka viheni. Mwachiyelezgero, tasambira mu Malemba kuti Yehova wakukhumba ŵasopi ŵake ŵaŵenge ŵakutowa mwakuthupi, mu makhaliro, kweniso mwauzimu. Wakukhumba kuti waliyose uyo wakuchita vinthu viheni ndipo ngwambura kupera, wawuskikemo mu mpingo. (1 Kor. 5:​11-13; 6:​9, 10) Tikupulikira dango la mu Malemba ili. Kweni ŵalwani ŵithu ŵakusangirapo m’pata pa dango ili pakuyowoya kuti tili ŵakukhwimiska vinthu kweniso ŵambura chitemwa.

14. Kasi ni njani uyo wakukhuŵilizga nkhani zautesi zakukhwaskana na gulu la Chiuta?

 ¹⁴ Manyani uyo wakukhuŵilizga mautesi agha. Satana Dyabulosi ndiyo wakukhuŵilizga mautesi ghakukhwaskana na gulu. Iyo ni “wiske wa utesi.” (Yoh. 8:44; Gen. 3:​1-5) Ntheura tikwenera kukhazga kuti Satana wagwiliskirenge ntchito ŵanthu awo ŵakumulondezga kukhuŵilizga nkhani zautesi zakukhwaskana na gulu la Yehova. Ivi ndivyo vikachitika kwa Yesu na Ŵakhristu ŵakwambilira.

15. Kasi ŵalongozgi ŵa chisopa ŵakachita wuli na Yesu kweniso ŵalondezgi ŵake?

¹⁵ Mu nyengo ya Yesu, ŵalondezgi ŵa Satana ŵakayowoyanga mautesi ghakupambanapambana ghakukhwaskana na minthondwe iyo Mwana wakufikapo wa Chiuta wakachitanga. Mwachiyelezgero, ŵalongozgi ŵa chisopa ŵakaphaliranga ŵanthu kuti nkhongono za Yesu zakufumiskira viŵanda zikafumanga kwa “fumu ya viŵanda.” (Mrk. 3:22) Apo Yesu ŵakamwimbanga mulandu, ŵalongozgi ŵa chisopa ŵakatenge wakutuka Chiuta ndipo ŵakakhuŵilizga mzinda kuti uchemerezge kuti Yesu wakomeke. (Mat. 27:20) Pamanyuma, apo ŵalondezgi ŵa Khristu ŵakapharazganga makani ghawemi, awo ŵakaŵasuskanga “ŵakavundura na kugaluska ŵanthu” kuti ŵatambuzge Ŵakhristu aŵa. (Mil. 14:​2, 19) Pakuyowoyapo vya lemba la Milimo 14:​2, Gongwe la Mulinda la Disembala 1, 1998, likalongosora kuti: “Chifukwa chakuti ŵakakhorwa yayi kukana waka uthenga, Ŵayuda ŵakususka ŵakayowoyangaso vinthu viheni mwakuti Ŵamitundu ŵanandi ŵatinkhenge Ŵakhristu aŵa.”

16. Kasi tikwenera kukumbuka vichi para tikupulika nkhani zautesi?

¹⁶ Satana wachali kuthandazga mautesi m’paka mazuŵa ghano. Wachali “kupuluska charu chose.” (Chivu. 12:9) Usange tapulika nkhani  ziheni zakukhwaskana na gulu lithu panji ŵabali awo ŵakulongozga, tikumbuke umo ŵalwani ŵa Chiuta ŵakachitira na Yesu kweniso ŵasambiri ŵake mu nyengo ya Ŵakhristu ŵakwambilira. Mazuŵa ghano, ŵanthu ŵa Yehova ŵakutambuzgika na kuyowoyereka mautesi nga umo Baibolo likayowoyera. (Mat. 5:​11, 12) Tipuluskikenge yayi na nkhani zautesi para tamanya uyo wakukhuŵilizga nkhani izi ndipo tichitengepo kanthu nyengo yeneyiyo. Kasi tingachita vichi?

17. Kasi tingagega wuli kupuluskika na nkhani zautesi? (2 Timote 1:13) (Wonaniso bokosi lakuti “ Umo Tikwenera Kuchitira Para Tapulika Nkhani Zautesi.”)

¹⁷ Kanani nkhani zautesi. Mpositole Paulosi wakapeleka ulongozgi wakupulikikwa makora wa ivyo tingachita usange tapulika nkhani zautesi. Wakaphalira Timote kuti ‘wakanizge ŵanyake kuti ŵaleke kutegherezga nkhani zautesi’ kweniso ‘ŵakane nkhani zautesi.’ (1 Tim. 1:​3, 4; 4:7) Nangauli mwana muchoko wangasora viheni pasi na kuŵika mu mulomo, kweni munthu mulara wangachita yayi nthena chifukwa wakumanya uheni uwo ungaŵapo usange wangarya vinthu ivi. Mwakuyana waka, tikukana nkhani zautesi chifukwa tikumanya uyo wakukhuŵilizga nkhani izi. M’malo mwake, tikutegherezga na kukoleska “mazgu ghaunenesko” pera.—Ŵazgani 2 Timote 1:13.

18. Kasi tingalongora wuli kuti tikuligomezga chomene gulu la Yehova?

¹⁸ Tawona waka nthowa zitatu mwa nthowa zinandi izo gulu la Yehova likuyezgera Yesu. Apo mukusambira Baibolo, yezgani kumanya nthowa zinyake zakusazgikira izo zikulongora kuti gulu likuyezga Yesu. Wovwiraniso ŵanji mu mpingo winu kuligomezga chomene gulu la Chiuta. Ndipo lutilirani kulongora kuti mukuligomezga gulu, mwa kuteŵetera Yehova mwakugomezgeka, na kudemelera chomene ku gulu lake, ilo wakuligwiliskira ntchito kufiska khumbo lake. (Sal. 37:28) Mphanyi talutilira kuzirwiska mwaŵi uwo tili nawo wakuŵa pakati pa ŵanthu ŵa Yehova, awo mbachitemwa kweniso ŵakugomezgeka.