1. Ne fakatoka pefea a tino o Ieova i te senitenali muamua?

 SO SE galuega e tuku mai ne Ieova ke fai ne ana tino, e manako a ia ke fai faka‵lei ne latou. (1 Koli. 14:33) E pelā me se fakaakoakoga, e manako te Atua ke folafola atu a te tala ‵lei ki te lalolagi kātoa. (Mata. 24:14) Ko oti ne ‵tofi ne Ieova a Iesu ke takitaki ne ia te galuega tenā. Ko oti ne fakamautinoa aka ne Iesu me fai faka‵lei eiloa te galuega tenei. I te senitenali muamua, i te taimi ne faka‵tu aka a fakapotopotoga i koga kese‵kese, ne ‵tofi aka a toeaina ke fakatonutonu kae ke fai ne latou te takitakiga i ei. (Galu. 14:23) I Ielusalema, ne fai ne te potukau o toeaina, kolā e aofia i ei a apositolo mo toeaina ma‵tua, a nai fakaikuga kolā e ‵tau o tau‵tali ki ei a tino katoa i te fakapotopotoga. (Galu. 15:2; 16:4) Ona ko te lotou faka‵logo ki fakatonuga konā, “ne tumau kae ‵mautakitaki a te fakatuanaki o fakapotopotoga konā kae ne gasolo aka faeloa o tokouke i aso takitasi.”—Galu. 16:5.

2. Talu mai te 1919, ne takitaki kae tuku atu pefea ne Ieova a meakai faka-te-agaga ki ana tino?

² Koi fakatoka faka‵lei eiloa ne Ieova ana tino ke oko mai ki aso nei. Talu mai te 1919, ne fakaaoga ne Iesu se potukau o tāgata fakaekegina ke fakatoka ne latou te faiga o te galuega talai kae fakasoa atu a meakai faka-te-agaga ki ana soko. a (Luka  12:42) E manino ‵lei me fakamanuia eiloa ne Ieova a galuega a te potukau tenā.—Isa. 60:22; 65:​13, 14.

3-4. (a) Fakamatala mai a te aoga māfai e fakatoka faka‵lei a mea. (e) Ne a mea ka sau‵tala tatou ki ei i te mataupu tenei?

³ Kafai e se fakatoka faka‵lei tatou, ka se mafai o fakaoti ne tatou te galuega ne ‵tofi mai ne Iesu ke fai ne tatou. (Mata. 28:​19, 20) Mafaufau moi seai ne koga talai e ‵tofi mai ki a tatou, penei e talai a tino katoa i so se koga e ma‵nako latou ki ei. Kāti e mafai o galue fakafia se koga talai ne tino talai kese‵kese, kae ko nisi koga talai e seai eiloa ne tino e talai i ei. E mata, e mafai o mafaufau koe ki nisi auala e aoga ei ki a tatou a te fakatoka faka‵lei?

⁴ A mea ne fai ne Iesu i tena nofoga i te lalolagi e tuku mai i ei se ata ki te auala e fakatoka ne ia tatou i aso nei. I te mataupu tenei, ka sau‵tala tatou ki te fakaakoakoga ne fakaasi mai ne Iesu, mo te auala e tau‵tali atu ‵tou fakapotopotoga ki te fakaakoakoga tenā. Ka sau‵tala foki tatou ki te auala ke fakaasi ‵tou loto tali‵tonu ki te fakapotopotoga a Ieova.

E TAU‵TALI ‵TOU FAKAPOTOPOTOGA I TE FAKAAKOAKOGA A IESU

5. Se a te auala e tasi e tau‵tali tatou i te fakaakoakoga a Iesu? (Ioane 8:28)

⁵ Ne tauloto a Iesu mai tena Tamana i te lagi e uiga ki mea mo pati e ‵tau o fai ne ia. E ‵tusa mo te fakaakoakoga a Iesu, e fakavae ne te fakapotopotoga a Ieova ana akoakoga i mea tau amioga mo tena takitakiga ki te Muna a te Atua. (Faitau te Ioane 8:28; 2 Timo. 3:​16, 17) E fakamasaua mai faeloa ki a tatou ke fai‵tau kae fakagalue te Muna a te Atua. E aoga pefea ki a tatou a te faka‵logo ki te fakatonuga tenei?

6. Se a te mea tāua e tasi ka maua ne tatou mai te sukesuke ki te Tusi Tapu?

⁶ E uke mea aoga ka maua ne tatou māfai e suke‵suke ki te Tusi Tapu fakatasi mo te fesoasoani o ‵tou tusi faka-Kelisiano. E pelā me se fakaakoakoga, e mafai o fakapau‵pau ne tatou a akoakoga i te Tusi Tapu mo fakatonuga e maua mai te fakapotopotoga kātoa. Kafai ko lavea ne tatou me i te takitakiga e maua ne tatou e fakavae ki te Tusi Tapu, ka gasolo aka eiloa o tali‵tonu malosi tatou ki te fakapotopotoga a Ieova.—Loma 12:2.

7. Se a te fekau ne talai ne Iesu, kae e tau‵tali pefea te fakapotopotoga a Ieova ki tena fakaakoakoga?

⁷ Ne talai ne Iesu “te tala ‵lei o te Malo o te Atua.” (Luka 4:​43, 44) Ne fakatonu atu foki a Iesu ki ana soko ke talai e uiga ki te Malo. (Luka 9:​1, 2; 10:​8, 9) I aso nei, a tino katoa kolā e ‵kau ki te fakapotopotoga a Ieova e talai ne latou te fekau o te Malo faitalia te koga e ‵nofo latou i ei io me ko te uke o tiute e ‵tau o ‵saga latou ki ei.

8. Se a te tauliaga ne tuku mai ki a tatou?

⁸ Se tauliaga eiloa ko maua ne tatou ke folafola atu te munatonu e uiga ki te Malo o te Atua ki nisi tino! E se ko tino katoa e maua ne latou te tauliaga tenā. E pelā mo te nofoga a Iesu i te lalolagi, ne seki talia ne ia a agaga ma‵sei ke fai mo molimau e uiga ki a ia. (Luka 4:41) I aso nei, a koi tuai o talai fakatasi se tino mo tino o Ieova i te galuega talai, e ‵tau o fetaui ‵lei a ia ke fai penā. E fakaasi atu ne tatou te lasi o te ‵tou loto fakafetai ki te tauliaga tenei mai te molimau atu i so se koga mo so se taimi. E pelā mo Iesu, e taumafai malosi tatou ke ‵toki kae fakasiusiu a fuaga o te munatonu o te Malo ki loto o tino.—Mata. 13:​3, 23; 1 Koli. 3:6.

9. Ne fakailoa atu pefea ne te fakapotopotoga a te igoa o te Atua ke iloa ne tino?

⁹ Ne fakailoa atu ne Iesu te igoa o te Atua ke iloa ne tino. I tena ‵talo ki tena Tamana i te lagi, ne fai atu a Iesu: “Ko oti ne fakailoa atu ne au tou igoa ki a latou.” (Ioa. 17:26) E  ‵tusa mo te fakaakoakoga a Iesu, e fai ne te fakapotopotoga a Ieova a mea e mafai ne latou o fai ke fesoasoani ki tino ke iloa ne latou te igoa o te Atua. E tasi te auala ne fai ei te mea tenei ko te ‵toe fakafokimaiga o te igoa o te Atua ki tena koga tonu i te New World Translation of the Holy Scriptures. Ko mafai o maua te ‵fuliga o se vaega io me ko te Tusi Tapu kātoa i ‵gana e silia atu mo te 270. I te Mataupu Fakaopoopo A4 mo te A5 o te ‵fuliga tenei, ka maua ne koe a fakamatalaga e uke e uiga ki te ‵toe fakafokimaiga o te igoa o te Atua ki te Tusi Tapu. Appendix C, telā e maua i te Study Bible, e tuku mai ei a nisi fakamaoniga me i te igoa o te Atua e ‵tau o sae mai faka 237 taimi i Tusitusiga Eleni Faka-Kelisiano.

10. Ne a au mea ne tauloto mai i pati a se fafine telā e nofo i Myanmar?

¹⁰ E pelā mo Iesu, e ma‵nako tatou ke fesoasoani atu ki tino e tokouke ke iloa ne latou te igoa o te Atua. I te iloaga ne ia me isi se igoa o te Atua, ne tagi se fafine i Myanmar telā ko 67 ana tausaga kae fai mai: “Tenei te taimi muamua i toku olaga ke iloa ne au i te igoa o te Atua ko Ieova. . . . Ne akoako mai ne koe ki a au te ‵toe mea tāua telā e ‵tau o tauloto ne au.” E pelā mo te tala tenei, a te tauloto e uiga ki te igoa o te Atua e mafai o ‵fuli katoatoa i ei a olaga o tino loto ‵lei.

TUMAU TE FAKAASI ATU TE LOTO TALITONU KI ‵TOU FAKAPOTOPOTOGA

11. E fakaasi atu pefea ne toeaina te loto talitonu ki te fakapotopotoga a Ieova? (Onoono foki ki te ata.)

¹¹ Se a te auala e tasi e fakaasi atu ne toeaina me tali‵tonu latou ki te fakapotopotoga a te Atua? Kafai e maua a fakatonuga, e ‵tau mo toeaina o fai‵tau faka‵lei ki ei ko fakagalue ei i te ‵toe auala e mafai ne latou. E pelā me se fakaakoakoga, e maua ne latou a fakatakitakiga ki te auala ke fai olotou tofiga i fakatasiga kae penā foki loa mo te auala ke fai ei a ‵talo i te fakapotopotoga mo te tausi atu ki mamoe a Keliso. A toeaina kolā e tau‵tali ki fakatakitakiga mai te fakapotopotoga kātoa e fesoasoani atu ki tino e tausi ne latou ke maua se lagonaga tokagamalie kae alofagina.

12. (a) Kaia e ‵tau o ga‵lue fakatasi tatou mo tino kolā e fai ne latou te takitakiga? (Epelu 13:​7, 17) (e) Kaia e ‵tau ei o ‵saga atu tatou ki uiga ‵lei o latou kolā e fai te takitakiga?

¹² Kafai e maua ne tatou a fakatonuga mai toeaina, e ‵tau o loto fia‵fia tatou o faka‵logo ki ei. Mai te fai penā, ka fakafaigofie ne tatou a galuega a tino kolā e fai ne latou te takitakiga. E fakamalosi mai te Tusi Tapu ko tatou ke faka‵logo kae ‵lago atu ki a latou kolā e fai ne latou te takitakiga. (Faitau te Epelu 13:​7, 17.) E mafai o faigata te mea tenā i nisi taimi. Kaia? Me i tāgata konei e se ‵lei katoatoa. Kae kafai e ‵saga fua tatou ki olotou vāivāiga i lō olotou uiga ‵lei, ko pelā loa me ko ‵kau fakatasi tatou mo olotou fili. I te auala fea? Ko kamata o se tali‵tonu tatou ki te fakapotopotoga a te Atua, telā ko te mea loa e ma‵nako ki ei a tino e ‵teke mai ki a tatou. Ne a mea e mafai ne tatou o fai ke ‵teke atu a loi a ‵tou fili?

KE MO A MA FAKAVĀIVĀI NE NISI TINO A TOU LOTO TALITONU

13. Ne a taumafaiga ne fai ne fili o te Atua ke fakamasei tena fakapotopotoga?

¹³ E taumafai a fili o te Atua o fai a mea ‵lei i tena fakapotopotoga ke foliga mai pelā me ne mea sē ‵lei. E pelā mo se mea e tasi ne tauloto ne tatou i te Tusi Tapu me e manako a Ieova ko ana tino tapuaki ke ‵ma i te feitu faka-te-foitino, mea tau amioga, mo te feitu faka-te-agaga. Ne fai mai a ia me i so se tino telā e tumau i te faiga o amioga sē ‵ma e ‵tau o tapale kea‵tea mai te fakapotopotoga. (1 Koli. 5:​11-13; 6:​9, 10) E faka‵logo eiloa tatou ki te fakatonuga tenā mai te Tusi Tapu.  Kae e se fia‵fia a ‵tou tino ‵teke ki te manatu tenā kae ‵losi mai me i a tatou e fakavale‵vale, e fakamasino tino, kae e se a‵lofa.

14. Ko oi e pogai tonu mai i a ia a tala sē ‵tonu e uiga ki te fakapotopotoga?

¹⁴ Ke iloa te pogai tonu o ‵tekemaiga. Ko Satani te Tiapolo te pogai o tala ‵loi konā. A ia ko “te tamana foki o te loi.” (Ioa. 8:44; Kene. 3:​1-5) Tela la, e fakamoe‵moe tatou me ka fakaaoga ne Satani a tino e ‵lago ki a ia ke fakasalalau a tala sē ‵tonu e uiga ki te fakapotopotoga a Ieova. Tenei eiloa te mea ne tupu i te senitenali muaumua.

15. Ne a mea ne fai ne takitaki lotu ki a Iesu mo ana soko?

¹⁵ I te senitenali muamua, ne fakasalalau atu ne tino a Satani a loi e uke e uiga ki te Tama a te Atua ‵lei katoatoa telā e fai vavega. E pelā mo pati a takitaki lotu ne fai ki tino me i te ‵mana o Iesu ke ‵tuli a temoni ne maua ne ia mai “te pule o temoni.” (Male. 3:22) I te taimi ne fakamasino ei a Iesu, ne ‵losi atu a takitaki lotu me i a ia ne pati masei ki te Atua kae fakamalosi latou ki tino ke tamate a Iesu. (Mata. 27:20) Fakamuli ifo, i te taimi ne talai atu ne soko o Keliso a te tala ‵lei kae ko tino kolā ne ‵teke ki a latou “ne fakamakosu kae faka‵se ne latou a tino” ke fakasaua atu ki Kelisiano. (Galu. 14:​2, 19) Ne fakamatala mai ne The Watchtower o Tesema 1, 1998 a te uiga o te Galuega 14:2: “Ne seki lotoma‵lie latou ki olotou ‵tekeatuga ki te fekau, kae ne fakasalalau atu foki ne tino Iutaia ‵teke a tala fakamasei i olotou taumafaiga ke takalia‵lia a tino o Fenua Fakaa‵tea ki Kelisiano.”

16. Se a te mea e ‵tau o masaua ne tatou māfai e ‵logo tatou i tala sē ‵tonu?

¹⁶ Ne seki gata eiloa te loi o Satani i te senitenali muamua. Ke oko mai ki aso nei, koi “takitaki ‵se ne ia te lalolagi nofoaki kātoa.”  (Faka. 12:9) Kafai e logo koe i tala sē ‵lei e uiga ki te fakapotopotoga io me ko taina kolā e fai te takitakiga, ke masaua a faifaiga a fili o te Atua ki a Iesu mo ana soko i te senitenali muamua. I aso nei, e fakasauagina a tino o Ieova kae taku fakamaseigina e pelā eiloa mo valoaga i te Tusi Tapu. (Mata. 5:​11, 12) Ka se mafai o takitaki ‵se tatou ne tala sē ‵tonu māfai e iloa ne tatou te pogai o tala konā kae ga‵sue fakavave tatou o fai se faiga. Se a te mea e ‵tau o fai ne tatou?

17. E ‵kalo kea‵tea pefea tatou ke mo a ma fakamaseigina ne tala sē ‵tonu? (2 Timoteo 1:13) (Onoono foki ki te pokisi “ Te Auala ke Saga Atu ki Tala sē ‵Tonu.”)

¹⁷ ‵Teke atu a tala sē ‵tonu. Ne tuku atu ne te apositolo ko Paulo a fakatonuga manino ki mea e ‵tau o fai māfai ko ‵logo tatou i tala sē ‵tonu. Ne fai atu a ia ki a Timoteo ke “fakatonu atu . . . ki nisi tino ke mo a ma . . . ‵saga atu ki tala sē ‵tonu” kae ke “‵teke atu ki tala sē ‵tonu.” (1 Timo. 1:​3, 4; 4:7) E tiga loa e mafai ne se tamaliki koi foliki o puke aka se mea mai te fola o kai ne ia, kae e se mafai eiloa o fai penā se tino matua telā e iloa ne ia te fakamataku o te mea tenā. E ‵teke tatou ki tala sē ‵tonu me iloa ne tatou te pogai o tala konā. E ‵piki ‵mau tatou ki “pati aoga” o te munatonu.—Faitau te 2 Timoteo 1:13.

18. E fakaasi atu pefea me loto tali‵tonu tatou ki te fakapotopotoga a Ieova?

¹⁸ Ko oti ne sau‵tala tatou ki auala e tolu mai auala e uke e fakaakoako ei te fakapotopotoga a te Atua ki a Iesu. I te taimi e fai au sukesukega ki te Tusi Tapu, onoono ki nisi auala e fakaakoako atu te fakapotopotoga ki te fakaakoakoga a Iesu. Fesoasoani atu ki nisi tino i te fakapotopotoga ke ati aka te lotou loto tali‵tonu ki te fakapotopotoga. Kae ke tumau i te fakaasi atu tou loto fakafetai mai te tavini atu mo te fakamaoni ki a Ieova kae ‵piki ‵mau ki te fakapotopotoga telā e fakaaoga ne ia ke fakataunu tena loto. (Sala. 37:28) Ke na tumau i te fakatāua ne tatou a te tauliaga ke ‵kau fakatasi mo tino a‵lofa kae fakamaoni a Ieova.