MUSORO WE KUFUNDA 15
NGOMA 124 Rumbwa Wakatendeka
Bambisai Kutenda Kenyu mu Sangano ra Djehovha.
“Edzurirai aya ari kutungamirira pakati penyu, akamubvunzai soko ra Mwari.”—AHEB. 13:7.
CINANGWA
Kuona zvatinodikana kuita tese, tireremedze uye tigonde sangano ra Djehovha.
1. Anhu a Djehovha ainga akarongeka kudini muzana re makore okutanga?
DJEHOVHA paanopasa basa anhu ake kuti ariite, nguwa dzese iyena anoetsera kuti awona ariite zvakanyasa kurongeka. (1 Ako. 14:33) Ngo muezaniso cido ca Mwari ngece kuti masoko akanaka anocokuita no Umambo aparidzwe mu nyika yese inogarhwa. (Mat. 24:14) Uye Djehovha akapasa Djesu basa iri kuti arionerere. Uyewo Djesu anoita zviri zvese kuti basa iri riizwe nge mushobo wakanyasa kurogeka. Mu zana re makore rokutanga ungano dzakaumbwa uye akuru akagadzwa kuti atungamirire uye aonerere ungano idzi. (Zvii. 14:23) Mu zana re makore rokutanga mu Djerusarema cikwata cimweni ce akuru caiumbwa no aphostori, caiita zvisananguro zvekuti zvaidikana kutondowedzwa no ungano. (Zvii. 15:2; 16:4) Hinga mugumisiro wakhona, “ungano dzaibambiswa mu kutenda uye dzairumbwa dzecikura.”—Zvii. 16:5.
2. Zvinyi zviri kuizwa na Djehovha ku anhu ake kubvira mu gore ra 1919 kuti aapase nhungamiriro uye zvekurhya zve kunamata?
2 Nyamasi uno, Djehovha ari kurumbwa ecironga anhu ake. Kubvira muna 1919, Djesu arikuseenzesa cikwata cidoko ce anarume akadzodzwa kuti aronge basa re kuparidzira uye apase zvekurhya zvekunamata ateeri ake. a (Ruka 12:42) Zviri pamhene kuti Djehovha ari kukomborera basa re anarume aya.—Isa. 60:22; 65:13, 14.
3-4. (a) Pasai muezaniso wekuti tirikubetsereka kudini nge kugara anhu akarongeka. (b) Ticaonei mu fundo ino?
3 Kudai tainga tisikazi kurongeka tainga tisikadi kuzokwanisa kuita basa retakapaswa na Djesu. (Mat. 28:19, 20) Ngo muezaniso, rangarirai kudai tisikaiti zvekupaswa ndima; umwe na umwe waizoparidzira kaanoda. Ndima dzimweni dzaizoseenzwa kakawanda uye no aparidzi akasiyana-siyana, nepoo dzimweni dzainga dzisikazoseenzwi. Imwimwi munokwanisa kurangarira ngezve makomborero atinawo nge kugara anhu akarongeka here?
4 Djesu paainga ari pa nyika pano, iyena wakaronga ateeri ake uye iyena arikundorumbwa ecironga anhu ake dakara nyamasi uno. Mu fundo ino, ticaona muezaniso wakasiiwa na Djesu uye kuti sangano redu ririkuteedzera kudini muezaniso wake. Uyewo ticaona kuti tingapangidza kudini kuti tinoreremedza uye tinogonda sangano redu.
SANGANO REDU RINOTEEDZERA MUEZANISO WA DJESU
5. Ndiupi umwe we mushobo wekuteedzera muezaniso wa Djesu? (Juau 8:28)
5 Djesu akafundira na Baba ake zviro zvekuita uye zvekureketa. Reciteedzera muezaniso wa Djesu, sangano redu rinoseenzesa Bhaibheri kuti ritifundise zviro zvakanaka no zvakashata uye kuti tirarame nge mushobo unopfadza Djehovha. (Erengai Juau 8:28; 2 Ti. 3:16, 17) Sangano redu nguwa dzese rinotiedzurira kuti tierenge Bhaibheri uye tiseenzese zvatinonga tafunda imona. Kuita izvona zvinotibetsera kudini?
6. Ndiupi umwe we mushobo watingabetsereka nawo pa kufunda Bhaibheri?
6 Isusu tinobetsereka maningi patifunda Bhaibheri teciseenzesa mabhuku edu. Ngo muezaniso, tinoezanisa zvatinofunda mu Bhaibheri no nhungamiriro dzatinopaswa no sangano. Uye patinoona kuti nhungamiriro dzatinopswa dzinotsamira mu Matarhwa, rugondo redu ku sangano rinotunhudzirika.—Aro. 12:2.
7. Djesu akaparidzira ngezve masoko api uye sangano ra Djehovha rinoteedzera kudini muezaniso wake?
7 Djesu aiparidzira “masoko akanaka e Umambo wa Mwari.” (Ruka 4:43, 44) Uyezve, Djesu akabhuya kuti afundi ake aidikanawo kuparidzira ngezve Umambo. (Ruka 9:1, 2; 10:8, 9) Nyamasi uno, tese isusu tinotondowedza nhungamiriro dza Djehovha tinoparidzira masoko e Umambo, pasinei no katinogara kunyazi no ubaba watinawo mu sangano.
8. Makomborero api atinawo?
8 Makomborero akakura maningi katiri kureketa ngezve Umambo wa Mwari ku anhu amweni! Uye makomborero aya aapaswi wese wese. Ngo muezaniso, Djesu painga ari pa nyika, iyena aazi kutendera kuti mwiya yakashata irekete nge zvake. (Ruka 4:41) Ndizvonawo no nyamasi uno, munhu paanonga asati abatanidzwa pa basa re kuparidzira no anhu a Djehovha, iyena anodikana kutanga akwaniriswa pa makomborero aya. Uye isusu tinopangidza kuti tinokoshesa maningi makomborero aya atinawo e kuparidzira, nge kuparidzira pese pazvinobvira. Kuitawo hingana Djesu, cinangwa cedu nge ce kusima mbeu ye Umambo wa Mwari mu mwoyo ye anhu uye kuafundisa cokwadi.—Mat. 13:3, 23; 1 Ako. 3:6.
9. Sangano rinosoita kudini kuti zina ra Mwari rinyase kuziikanwa?
9 Djesu akafundisa amweni ngezve zina ra Mwari. Paaita munamato kuna Baba ake, Djesu akati: “Ndakaaziisa zina renyu.” (Juau 17:26) Reciteedzera muezaniso wa Djesu, sangano ra Djehovha rinooita zviri zvese kuti ribetsere anhu kuti aziye zina ra Mwari. Mushobo umweni wekuita izvi ngewe kuturikira Bhaibheri re Nyika Ipsva re Matarhwa Macena. Bhaibheri iri, riri kuoneka rese uye mu matii aro mumureketero unodarika 270. Ma Apendise A4 uye A5 anotipanganidzira kuti ngei zina rekuti Djehovha rakakandhwa mu Bhaibheri. Apendise C yatinogumira mu Bhaibheri rekufunda, inopanganidza upupuri wakawanda wekuti ngei zina ra Mwari rinodikana kuoneka mu Matarhwa e Cigrego e Cikristu kanokwana kuita 237.
10. Tinofundei no zvakarekethwa no mwanakadzi umweni we ku Mianmar?
10 Kuitawo hingana Djesu, isusu tinodawo kubetsera anhu akawanda kuti aziye zina ra Mwari. Mwanakadzi umweni we ku Mianmar uno makore 67 paakatanga kuziya zina ra Mwari, iyena wakatanga kucema uye wakati: “Inini ndainga ndisati ndakambozwa zina ra Mwari mu upenyu wangu wese. . . . Imwimwi mandifundisa ciro cinokosha maningi kupinda zvese.” Hingana zvataona pa muezaniso uu, anhu paanotanga kufunda ngezve zina ra Mwari, izvona zvingakwanisa kucinja upenyu wawo.
RUMBWAI MECIPANGIDZA KUTI MUNOGONDA NO SANGANO
11. Akuru anopangidza kudini kuti anogonda sangano ra Djehovha? (Onaiwo foto.)
11 Akuru angapangidza kudini kuti anogonda sangano ra Djehovha? Paanotambira nhungamiriro, akuru anonyasa kuteya nzee paanonga ecidzierenga uye anoita zviri zvese kuti adziseenzese. Ngo muezaniso, pane kutambira basi nhungamiriro ngezve mushobo waangaita matii mu ungano uye mushobo waangaita munamato pa misangano, awonawo anotambira nhungamiriro dze mishobo yaangaita kuti acengete mabira a Kristu. Akuru paanotondowedza nhungamiriro dzaanopaswa no sangano, hama dzinozwa dzecidiwa uye dzecinyasa kucengetedzwa na Djehovha.
Akuru anotibetsera kugonda nhungamiriro dzatinopaswa no sangano ra Djehovha (Onai ndima 11) b
12. (a) Ngei tecidikana kudzikanda pasi pe aya anotitungamirira? (Ahebheru 13:7, 17) (b) Ngei tecidikana kukanda ndangariro dzedu pa zviro zvakanaka zvinoizwa ngo hama dzinotitungamirira mu sangano?
12 Kana tikapaswa nhungamiriro no akuru, tinodikana kugara takagadzirira kudziseenzesa. Kana tikaita kudaro, zvicaitira nyore akuru kuti aite basa rawo uye atungamirire zvakanaka ungano. Bhaibheri rinotikohomedzesa kuti tinodikana kuzwira uye kudzikanda pasi pe aya anotitungamirira. (Erengai Ahebheru 13:7, 17.) Asi izvona nguwa dzimweni zvingatishuphira. Ngei? Ngokuti anarume aya arikutitungamirira i anhu asikazi kukwana. Uye kana tikakanda ndangariro dzedu pa zvishaishi zvaanoita haiwa pa mawara awo akanaka, zvezvirokwazvo tinonga tecibetsera azondi edu. Nge mushobo upi? Azondi anoda kuti isusu tikane-kane kuti Djehovha arikuseenzesa sangano rake kuti atitungamirire. Kana tikarumbwa tecirangarira zvishashi zvinoizwa nge aya anotitungamirira, zvezvirokwazvo tinonga tecirangarira zvakashata ngezve sangano redu uye teciruza rugondo redu mariri. Tingaita kudini kuti tiziye uye tirambe manyepo anorekethwa nge azondi edu?
MUSASIYE KUTI AMWENI AREMBESE RUGONDO RENYU MU SANGANO RA DJEHOVHA
13. Azondi a Mwari anoedza kudini kusvipisa zvinoizwa no sangano ra Djehovha?
13 Azondi a Mwari anoedza kuita kuti zviro zvakanaka zvinoizwa no sangano ra Djehovha, zvigare hinga zviro zvakashata. Ngo muezaniso, isusu tinofunda mu Bhaibheri kuti Djehovha anoetsera kuti anamati ake agare akacena pa mwiri, pa marangariro uye pa zve kumwiya. Djehovha anobhuyawo kuti munhu upi hake unonga aita cishaishi asikadi kucinyuka aadikani kugara mu ungano. (1 Ako. 5:11-13; 6:9, 10) Ngokuti isusu tinozwira Mutemo uu, azondi edu anorangarira kuti isusu atidi anhu. Ndiyo ndaa, awona anotitonga ngokuti atipfariri anhu aya asikazwiri zviya zvatinoda.
14. Ndiani muridzi we manyepo anobhuiwa ngezve sangano?
14 Zwisisai kuti ndiani ari kukonzera kurhwiswa ke sangano. Sathani Dhiyabhurosi ndiye unobararisa manyepo ngezve sangano. Iyena ndi “baba we manyepo.” (Juau 8:44; Gen. 3:1-5) Hino azvishamisi kuti ndi Sathani unoseenzesa anhu kuti abararise manyepo ngezve sangano ra Djehovha. Ndizvona zvakaitika na Djesu uye no Akristu e pakutanga.
15. Atungamiriri e magereja akaitei kuna Djesu pamwepo no ateeri ake?
15 Djesu Mwana wa Mwari ainga akakwana uye akaita zvishamiso zvinoshamisa maningi, kunyazi zvakadaro Sathani wakaseenzesa anhu anganani kuti abararise manyepo ngezvake. Ngo muezaniso, atungamiriri e magereja aibvunza anhu kuti Djesu aidzingira madhimoni eciseenzesa “mutongi we madhimoni.” (Mark. 3:22) Djesu paaitongwa, atungamiriri e magereja akamupumha kuti iyena atuka Djehovha uye akaedza kuita kuti anhu akumbire kuti iyena auraiwe. (Mat. 27:20) Pedzepo, afundi a Djesu paaiparidzira masoko akanaka, azondi awo “akacengedzera anhu e madzinza amweni kuti awona azonde hama.” (Zvii. 14:2, 19) Wecipanganidza tsamba ya Zviito 14:2, Murindiri wa 1 ya Dezembro ya 1998, unoti: “Nge kutama kugutsikana kawo pa kuramba masoko, azondi e Cidjudha akaita kampanya ye kureketa zvakashata eciedza kuita kuti anhu asiripi Adjudha agare no rusananguro re Akristu.”
16. Zvinyi zvatinodikana kuita patinozwa masoko e manyepo ngezve sangano ra Djehovha?
16 Sathani uri kurumbwa ecibararisa manyepo nyamasi uno. Iyena uri “kucengedza nyika yese inogarhwa.” (Zvak. 12:9) Kana imwimwi mukazwa masoko e manyepo anocokuita no sangano redu uye anocokuita no hama dzinotungamirira, edzurirai kuti azondi a Mwari akabata kudini Djesu pamwepo no afundi ake e muzana re makore rokutanga. Hingana zvakabhuiwa no Bhaibheri, anhu aizoteera uye aizoreketa zvakashata ngezve anhu a Mwari mazuwa ano. (Mat. 5:11, 12) Isusu atizotenderi manyepo aya ari kubarariswa kana tikaziya kuti urikuabararisa ndiani, asi tinoita zviri zvese kuti tidzidziirire no kukasika. Tingaitei kuti tidzidziirire?
17. Zvinyi zvatingaita kuti tirambe ngano dze manyepo? (2 Timoti 1:13) (Onaiwo bhokisi rakazwi: “ Zvamungaita kana Mukazwa Ngano dze Manyepo.”)
17 Musakande ndangariro dzenyu pa ngano dze kunyepa. Muphostori Pauro wakapasa nhungamiriro dzakadjeka dze zviro zvatinodikana kuita kana tikazwa ngano dze kunyepa. Iyena wakabvunza Timoti kuti ‘abvunze anhu amweni kuti, . . . aadikani kupurutana ngano dzo kunyepa’ uye ‘arambe ngano dze kunyepa.’ (1 Ti. 1:3, 4; 4:7) I zvirokwazvo kuti mwana mudoko asina caanoziya ungakwanisa kutora ciro cinokuwadza ocikanda mu pasta, asi munhu mukuru unoziya ngezve ngozi aazomboiti zvakadaro. Hino katiri isusu, tinoramba masoko aya e manyepo ngokuti tinoziya kuti ndiani kamare uri kuita kuti awona aitike. Pane kudaro, isusu tinopurutana “masoko anobetsera” basi e zvirokwazvo.—Erengai 2 Timoti 1:13.
18. Tingapangidza kudini kuti tinogonda no sangano ra Djehovha?
18 Mufundo ino, taona basi mishobo mitatu yekuti sangano ra Djehovha rinoteedzera muezaniso wa Djesu. Pamunonga mecifunda Bhaibheri, nyasai kuona mishobo imwenizve yatinoteedzera muezaniso wa Djesu. Betserai amweni mu ungano yenyu kuti azwe ecireremedzwa uye kuti agonde no sangano ra Djehovha. Uye nguwa dzese seenzerai Djehovha makagondeka, nge kuseenza pamwepo no sangano ra Djehovha raanoseenzesa pakuita kuda kake. (Pis. 37:28) Uye makomborero akakura kuseenza pamwepo no sangano ra Mwari wedu ano rudo Djehovha, tecimuseenzera hinga anhu ake akagondeka. Tese isusu ngatirumbwe tecikoshesa makomborero atinawo e kuseenza pamwepo no anhu a Mwari ano rudo uye akagondeka kuna Djehovha.
MUNODAIRA KUDINI?
-
Anhu a Mwari mazuwa ano anopangidza kudini kuti anoteedzera muezaniso wa Djesu?
-
Tingarumbwa kudini tecipangidza kukoshesa sangano ra Djehovha?
-
Zvinyi zvatinodikana kuita kana tikazwa masoko e manyepo?
NGOMA 103 Aushi—Zvipo zve Anarume
a Onai bhokisi rakazwi: “Nei Tichiti Zvakaitika Muna 1919?” mu bhuku rino musoro unoti: Jehovha Anodzorera Kunamata Kwakachena! mapaji. 102-103, mu ciShona.
b KUPANGANIDZWA KE MIFANIKISO: Mumasure mekuti akuru apedza kucedza ngezve urongwa we kuparidzira mu mbuto dzakadzara anhu, muonereri we cikwata unocedza no aparidzi kuti anodikana kurumbwa akaima uye ari pa dhuze no paredhi.
