1. Иегованың бараалгакчылары бирги векте канчаар организастаттынган?

 ИЕГОВА бараалгакчыларынга даалга бергеш, демниг күүседирин манаар (1 Кор. 14:33). Чижээ, Бурган өөрүшкүлүг медээни бүгү черге суртаалдаарын күзээн (Мф. 24:14). Иегова ол ажыл демниг болзун дээш, удуртулганы Иисуска берген. Бирги векте аңгы-аңгы черлерге чаа чыыштарга суртаал ажылын башкарарын удуртукчуларга дааскан (Аж.-ч. 14:23). Элчиннер болгаш удуртукчулардан тургустунган Иерусалимде удуртукчу чөвүлел шупту чыыштарга сагыыр шиитпирлерни үндүрүп турган (Аж.-ч. 15:2; 16:4). Ол айтыышкыннарны чөпшүл хүлээп алгаш, чыыштарның «бүзүрели быжыгып, улузу хүн санай немежип турган» (Аж.-ч. 16:5).

2. 1919 чылдан тура Иегова библейжи ном-дептерни болгаш удуртулганы канчаар берип турар?

² Чонунуң демниг бараалгалын Иегова бистиң үевисте база удуртуп турар. Иисус 1919 чылдан эгелеп, өөреникчилерин библейжи ном-дептер-биле хандырып, суртаал ажылын башкарарда чагдырган эр улустуң биче бөлүүн ажыглаан (Лк. 12:42) a. Иегова ол бөлүктүң ажылын йөрээп турары чигзиниг чок (Иса. 60:22; 65:13, 14).

3, 4. а) Бараалгалывыстың чурумунда кандыг эки талалар бар? б) Бо статьяга чүнү сайгарар бис?

 ³ Бараалгалдың чуруму багай турган болза, Иисустуң берген даалгазын күүседип шыдавас бис (Мф. 28:19, 20). Суртаалдаар девискээр чок, кижи бүрүзү күзээн-не черинге суртаалдаар дижик. Чамдык черлерге суртаалчылар катап-катап кээп болур, а өскелери кезиттинмес ийик. Демниг суртаалдаарының оон ыңай кандыг эки талаларын эскерер-дир силер?

⁴ Бөгүн Иисустуң эдерикчилери ооң ажылын уламчылап турар. Иисустуң арттырган үлегерин база организациявыс ону канчаар эдерип турарын бо статьяга чугаалажыр бис. Иегованың организациязынга бүзүрээривисти канчаар көргүзүп болурун база сайгарар бис.

ОРГАНИЗАЦИЯВЫС ИИСУСТУҢ ҮЛЕГЕРИН ЭДЕРИП ТУРАР

5. Бистиң организациявыс Иисустуң үлегерин канчаар эдерип чоруур? (Иоанн 8:28).

⁵ Иисустуң алдынары база чугаа-сөзү Адазының өөреткени олчаан турган. Иегованың организациязы Иисустуң чижээн канчаар эдерип турар? Организациявыс удуртулга бээрде база чүнү эки-багай деп өөредирде Бурганның Сөзүнге үндезилээр. (Номчуптуңар: Иоанн 8:28; 2 Тим. 3:16, 17.) Библияны өөренириниң чугулазын биске бо-ла сагындырар. Ону дыңнаары чүге ажыктыг?

6. Библияны шинчилээри Иегованың организациязынга бүзүреливисти канчаар быжыктырып турар?

⁶ Библияны шинчилеп тургаш, ында бижээн чүүлдү Иегованың организациязының ном-дептеринде айтыышкыннары-биле деңнеп болур бис. Ыдыктыг Бижилгеге үндезилеттинген удуртулганы көргеш, организацияга бүзүреливис быжыгар (Рим. 12:2).

7. Иисус кандыг медээни суртаалдап чораан база Иегованың организациязы ооң үлегерин канчаар эдерип турар?

⁷ Бурганның Чагыргазының дугайында өөрүшкүлүг медээни Иисус суртаалдап чораан (Лк. 4:43, 44). Ол ажылды Иисус өөреникчилеринге база дааскан (Лк. 9:1, 2; 10:8, 9). Амгы үеде Иегованың шупту бараалгакчылары кайда-даа чурттап чоруур болза, организациядан алган даалгалары кандыг-даа болза, өөрүшкүлүг медээни суртаалдап турар.

8. Биске кандыг алдар-хүндүнү көргүскенил?

⁸ Бурганның Чагыргазының дугайында чугаалаары — улуг алдар-хүндү! Ынчалза-даа ону кижи бүрүзү күүсетпес. Чижээ, Иисус черге чурттап чорааш, каржы буктарга ооң дугайында чугаалаарын чөпшээревээн (Лк. 4:41). Амгы үеде Бурганның чону-биле кады суртаалдаар күзелдиг кижи баштай Бурганның дүрүмнеринге дүүштүр чуртталгазын өскертип алыр. Арга тыптып кээрге, өөрүшкүлүг медээни улуска суртаалдааш, ону үнелээривисти көргүзер бис. Иисусту өттүнүп, өске улустуң чүректеринге алыс шынның үрезиннерин тарып, суггарарын кызар бис (Мф. 13:3, 23; 1 Кор. 3:6).

9. Чон Бурганның адын билип алзын дээш, организациявыс чүнү кылып турар?

⁹ Иисус кижилерге Бурганның адын билип алырынга дузалажып чораан. Ол дээрде Адазынга мөргүлге: «Мен Сээң адыңны... ажыдып берген мен» дээн (Ин. 17:26). Иисустуң үлегерин эдерип, Иегованың организациязы Бурганның адын чонга таныштырар дээш, хөй күжениишкиннерни үндүрүп турар. Аңаа «Чаа делегей»  очулгазы дыка чугула ажылды кылган. Ында Бурганның адын турар ужурлуг черлерже катап киирип каан. Амгы үеде ол очулга долузу-биле азы кезектей 270 ажыг дылдарда бар. Ол очулганың А4 биле А5 немелде материалдарында Бурганның адын Библияже канчаар база чүге катап кииргенин тодаргай тайылбырлаан. Христиан Грек Бижилгелерде Бурганның ады 237 катап турар ужурлуунуң немелде бадыткалдары англи дылда «Шинчилел Библиязының» (Appendix C) деп немелде материалында бердинген.

10. Мьянмадан херээжен кижи Бурганның адын дыңнааш, чүнү чугаалааныл база ооң сөстеринде кандыг кичээл бар?

¹⁰ Иисус ышкаш, бис база Бурганның адын хөй улус билип алзын деп күзээр бис. Мьянмадан бир 67 харлыг херээжен кижи угбавыска карааның чажы бүлдеңейнип: «Бурганның ады Иегова деп чуртталгамда бир дугаар дыңнап тур мен. Сен меңээ чугула алыс шынны ажыдып бердиң» — дээн. Бурганның адын билип алыры биче сеткилдиг улустуң чуртталгазынга улуг салдарлыг болурун бо таварылга көргүскен.

ИЕГОВАНЫҢ ОРГАНИЗАЦИЯЗЫНГА БҮЗҮРЕҢЕР

11. Удуртукчулар Иегованың организациязынга бүзүрээрин канчаар көргүзүп болур? (Чурукту база көрүңер.)

¹¹ Иегованың организациязынга бүзүрээрин удуртукчулар канчаар көргүзүп болур? Чаа айтыышкыннар кээрге, ону эң дээре кылдыр ажыглаар дээш, акылар кичээнгейлиг номчуп аар болза эки. Чижээ, ужуражылгаларны канчаар эрттирерин, чыыш дээш мөргүүрүнден аңгыда, Христостуң хойлары дээш канчаар сагыш човаарының дугайында айтыышкыннарны олар ап турар. Удуртукчулар организацияның айтыышкыннарын эдерер болза, акы-угбалар Иегованың сагыш човаашкынын болгаш ынакшылын миннир.

12. а) Харыысалгалыг акыларга дыңнангыр болуру чүге чугула? (Еврейлерге 13:7, 17). б) Удуртукчуларның эки талаларынче кол кичээнгейни салыры чүге чугула?

¹² Удуртукчуларның айтыышкыннарын дораан ажыглаарын кызар болзувусса, ол акыларга хүлээлгерин күүседири белен болур. Харыысалгалыг акыларга чагыртып, дыңнангыр болурунче Библия бисти оттуруп турар. (Номчуптуңар: Еврейлерге 13:7, 17.) Чамдыкта ону кылыры ындыг-ла амыр эвес, чүге дизе олар бачыттыг улус болгай. Ынчалза-даа акыларывыстың эки шынарларын эскербейн, четпес талаларынче кичээнгей салыр болзувусса, дайзыннарывыс амыраар. Чүге дизе удурланыкчыларывыс Иегованың организациязынга чигзиниглер тывылдырарын оралдажып турар болгай. Оларның четкизинче кирбес дээш, меге пропаганданы канчаар билип каар бис?

ОРГАНИЗАЦИЯВЫСКА БҮЗҮРЕЛИҢЕРНИ КОШКАТПАҢАР

13. Бурганның дайзыннары ооң организациязын багай кылдыр көргүзерин канчаар кызып турар?

¹³ Бурганның удурланыкчылары ооң организациязының адын баксырадырын оралдажып турарлар. Чижээ, бараалгакчылары мага-бот, мөзү-шынар болгаш чүдүлге талазы-биле арыг болурун Иегова күзээр деп Библиядан билир бис. Бачыт кылгаш, эттинерин күзевес кижи чыышка турбазын Бурган чугаалаан (1 Кор. 5:11—13; 6:9, 10). Ол библейжи айтыышкынга чагыртып турар бис. Ынчалза-даа удурланыкчыларывыс бисти кижилерни  ылгаар, оларга ынак эвес база шыдамык эвес деп буруудадып турар.

14. Иегованың организациязының дугайында нүгүл тарадыры кымга херек?

¹⁴ Халдаашкыннар артында кым турарын тодарадып алыңар. Ол дээрге Эрлик. Ону Библияда «нүгүл-мегениң адазы» дээн (Ин. 8:44; Э. д. 3:1—5). Иегованың организациязының дугайында мегени тарадыр дээш, ол дайзыннарывысты ажыглап турары кайгамчык эвес. Бирги векте база шак-ла ындыг турган.

15. Иисусту болгаш ооң эдерикчилериниң адын карартыр дээш, шажын башкарыкчылары чүнү кылган?

¹⁵ Бурганның Оглу, Иисус, бачыт чок болгаш, хөй хуулгаазыннарны кылып чораан. Эрлик ооң дугайында кижилер таварыштыр мегени тарадып турган. Чижээ, шажын башкарыкчылары аза-букту чагырар күштү Иисуска «буктарның чагырыкчызы» берген деп турганнар (Мк. 3:22). Иисусту шиидип турда, шажын башкарыкчылары Бурганны бактап турар сен деп буруудадып, чонну ооң өлүмүн негээринче көгүткен (Мф. 27:20). Соонда Христостуң өөреникчилери өөрүшкүлүг медээни суртаалдаарга, удурланыкчылар «өске чоннар улузунга христианнарны бактап, нүгүлдээш, оларга удур ыдалапканнар» (Аж.-ч. 14:2, 19). 1998 чылдың декабрь 1-ниң «Таңныыл суургазында» Ажыл-чорудулга 14:2-ни мынчаар тайылбырлаан: «Христианнарның удурланыкчылары, иудейлер, буянныг медээден ойталааш, нүгүл тарадып, иудей эвес улусту Иисустуң өөреникчилеринге удур ыдалаан».

16. Организацияга хамаарыштыр шүгүмчүлел дыңнааш, чүнү сактыры чугула?

¹⁶ Эрлик бөгүнге чедир нүгүлүн тарадып, «бүгү делегейни дуурайлаан» (Ажыд.  12:9). Организациявысты азы харыысалгалыг акыларны буруудатканын дыңнаар чадавас силер. Ынчан бирги векте Иисуска болгаш ооң өөреникчилеринге Бурганның дайзыннарының хамаарылгазын сактып келиңер. Амгы үеде база Иегованың Херечилерин истеп сүрүп, бак сөглеп турар. Ооң дугайында Библияда баш удур бижээн болгаш, кайгавас бис (Мф. 5:11, 12). Мегениң дөзүн билир болзувусса, дораан хемчээн ап, аңаа алдыртпас бис. Мегеден канчаар камгаланырыл?

17. Мегеге алыспазынга чүү дузалаар? (2 Тимофейге 1:13). ( «Бүзүрел чок информацияга хамаарылгавыс» деп көзенекти база көрүңер.)

¹⁷ Бадыткал чок информациядан ойталаңар. Меге чүүл дыңнааш, канчаар алдынарын Павел элчин биске тода тайылбырлаан. Ол Тимофейге база өске улуска Бурганны бактаан «тоолчургу чугаалардан» ойталап, дыңнавазын чагаан (1 Тим. 1:3, 4; 4:7). Шалада чыдар чүвени дораан-на аксынче сугар чаштарга дөмей болуксавас бис. Улуг улус ынчаар алдынмас. Мегениң артында кым барын билир болгаш, оон ойталап, «шынныг өөредигниң үлегеринден» туттунар бис. (Номчуптуңар: 2 Тимофейге 1:13.)

18. Иегованың организациязынга бүзүрээривисти канчаар көргүзер бис?

¹⁸ Бурганның организациязы Иисустуң чижээн эдергениниң чүгле үш талазын сайгардывыс. Организациявыс Иисустан үлегер ап турарының өске-даа бадыткалдарын шинчилел үезинде тып алырын кызыңар. Организациявыска бүзүрээринге акы-угбаларга дузалажыңар. Иеговага шынчы бараалгап, ооң күзел-соруун күүседип чоруур организациязы-биле сырый ажылдажып, бүзүрелиңерни көргүзүңер (Ыд. ыр. 36:28). Иегованың чону-биле бараалгаар алдар-хүндүнү алган бис. Ынчангаш ону үнелээлиңер!