1. Afendeli va Yehova wa sokiyiwile ndati kocita catete?

 OLONJANJA viosi eci Yehova a eca ocikele cimue kafendeli vaye, eye o lavoka okuti va ci tẽlisa lonjila yimue ya sokiyiwa ciwa. (1 Va Kor. 14:33) Ndeci, ocipango ca Yehova ceci okuti olondaka viwa vi kundiwa kolofeka viosi. (Mat. 24:14) Yehova wa eca ku Yesu ocikele coku songuila upange waco. Yesu wa siata oku likolisilako okuti upange waco u lingiwa lonjila yimue ya sokiyiwa ciwa. Kocita catete, eci akongelo a sokiyiwa kolonepa vialua, kua nõliwa akulu vekongelo oco va kuate ocikele coku songola. (Ovil. 14:23) Ko Yerusalãi osungu yakulu yina ya sokiyiwile lovapostolo kuenda akulu vakuavo, ya nõla onjila yimue ya sukilile oku kuamiwa lakongelo osi. (Ovil. 15:2; 16:4) Omo okuti vamanji va pokola konumbi va tambula, ‘akongelo amamako oku pamisiwa vekolelo loku livokiya eteke leteke.’—Ovil. 16:5.

2. Tunde kunyamo wo 1919, Yehova wa siata oku songuila ndati afendeli vaye kuenda oku va ĩha okulia kuespiritu?

² Yehova o kasi oku amamako oku sokiya ciwa afendeli vaye toke cilo. Tunde kunyamo wo 1919, Yesu wa siata oku talavaya locimunga cimue citito colombuavekua, oco ci sokiye upange woku kunda kuenda oku eca okulia kuespiritu kotembo ya sokiyiwa. a (Luka 12:42) Ocili okuti, Yehova wa siata oku sumũlũisa  upange wo cimunga caco.—Isa. 60:22; 65:13, 14.

3-4. (a) Lombolola ndomo tu kuatisiwa omo lioku sokiyiwa ciwa. (b) Nye tu konomuisa vocipama cilo?

³ Nda okuti pokati ketu tuafendeli va Yehova ka pa kalele esokiyo liwa, nda ka tua tẽlele oku tẽlisa upange Yesu a tu kundika. (Mat. 28:19, 20) Ndeci, nda okuti vamanji ka va sokiyile ovikanjo viekongelo tu kundila, omunu lomunu nda wa kundila kocitumãlo a seya. Handi vali citava okuti, nda tua kundila vovikanjo vimue olonjanja vialua, osimbu okuti vikuavo ka via kundiwilile. O pondola hẽ oku sokolola kolonjila vikuavo tu kuatisiwa omo lioku kuata esokiyo liwa?

⁴ Ovina Yesu a linga eci a kala palo posi, via eca ongangu yiwa konjila ndomo ocisoko cetu ci pondola oku talavaya koloneke vilo. Vocipama cilo, tu konomuisa ongangu Yesu a tu sila kuenda ndomo ocisoko cetu ci kuãi ongangu yaco. Tu konomuisavo ndomo tu lekisa okuti tua sanjukila ocisoko ca Yehova.

OCISOKO CETU CI KASI OKU KUAMA ONGANGU YA YESU

5. Lonjila yipi ocisoko cetu ci kuãi ongangu ya Yesu? (Yoano 8:28)

⁵ Yesu wa lilongisila ku Isiaye wokilu ndomo a linga ovina kuenda ndomo a vangula. Ocisoko ca Yehova ca siata oku kuama ongangu ya Yesu, poku talavaya Londaka ya Suku oco yi tu kuatise oku kũlĩha, loku tepisa eci ciwa leci cĩvi kuenda oku tu ĩha olonumbi vi songuila omuenyo wetu. (Tanga Yoano 8:28; 2 Tim. 3:16, 17) Olonjanja vialua tua siata oku tambula olonumbi vioku tanga Ondaka ya Suku kuenda oku yi kapako. Tu kuatisiwa ndati poku kuama olonumbi viaco?

6. Tu kuatisiwa ndati eci tu lilongisa Embimbiliya?

⁶ Tu kuatisiwa calua eci tu lilongisa Embimbiliya lekuatiso lialivulu etu. Ndeci, tu ka tẽla oku sokisa eci Embimbiliya li popia, lolonumbi tua siata oku tambula vocisoko cetu. Eci tu limbuka okuti onumbi tua tambula ya kunamẽla Kembimbiliya, ekolelo lietu kocisoko ca Yehova li livokiya.—Va Rom. 12:2.

7. Esapulo lipi Yesu a kunda kuenda ndamupi ocisoko ca Yehova ca siata oku kuama ongangu yaye?

⁷ Yesu wa kunda “olondaka viwa Viusoma wa Suku.” (Luka 4:43, 44) Handi vali, Yesu wahandeleka kolondonge viaye oco vi kunde eci catiamẽla Kusoma. (Luka 9:1, 2; 10:8, 9) Koloneke vilo, vosi vana vatiamẽla kocisoko ca Yehova, va siata oku kunda esapulo Liusoma ndaño okuti, va kuete ale ovikele vialua vocisoko.

8. Esumũlũho lipi tu kuete?

⁸ Esumũlũho linene tu kuete lioku sapuilako vakuetu catiamẽla ku Soma wa Suku! Pole, havosiko va kuete esumũlũho liaco. Ndeci, eci Yesu a kala palo posi, ka ecelele okuti aspiritu ãvi a eca uvangi watiamẽla kokuaye. (Luka 4:41) Koloneke vilo, osimbu omunu umue ka taviwile oku panga onepa kupange woku kunda, o sukila tete oku ambata omuenyo umue u litava lolonumbi via Yehova. Tu lekisa okuti tua sanjukila upange woku kunda, poku eca uvangi kovitumãlo viosi tu sangiwa. Ndeci Yesu a linga, ocimãho cetu oku kũla ombuto Yusoma vovitima viomanu kuenda oku yi tapela.—Mat. 13:3, 23; 1 Va Kor. 3:6.

9. Ocisoko cetu ca siata oku kuatisa ndati koku sandeka onduko ya Suku?

⁹ Yesu wa longisa onduko ya Suku komanu. Yesu wa likutilila ku Isiaye poku popia hati: “Nda va longisa onduko yove.” (Yoa. 17:26) Ocisoko ca Yehova ca siata oku kuama ongangu ya Yesu, poku likolisilako oku kuatisa omanu oco va kũlĩhe onduko ya Suku. Embimbiliya li Kola Epongoluilo Lioluali Luokaliye, lia siata oku kuatisa koku tumbuluiwa kuonduko  ya Suku, poku yi kapa povitumãlo vina oyo ya molẽhele kalimi atete olio lia sonehiwa. Epongoluilo Liembimbiliya liaco liosi ale onepa yimue, lia sandekiwa kueci ci pitahãla 270 kalimi. Velomboluilo A4 kuenda A5, o ka sangako ndomo onduko ya Suku ya tumbuluiwa Vembimbiliya likola Epongoluilo Lioluali Luokaliye. Elomboluilo C okuti li sangiwa Vembimbiliya lielilongiso kelimi Lioputu, lieca uvangi wokuti onduko ya Suku yi sukila oku molẽha ci soka 237 kolonjanja Vovisonehua vio Helasi.

10. Nye wa lilongisa kulandu wukãi umue wo ko Mianmar?

¹⁰ Ndeci Yesu a linga, tu yongolavo oku kuatisa omanu valua oku kũlĩha onduko ya Suku. Ukãi umue wo ko Mianmar o kuete 67 kanyamo, eci vo longisa okuti Suku o kuete onduko walila kuenda wa popia hati: “Eyi oyo onjanja yatete komuenyo wange nda yeva okuti onduko ya Suku, Yehova. . . . Ove wa ndongisa ocina cimue ci kuete esilivilo lialua.” Ulandu owu u lekisa okuti, eci omanu va lilongisa onduko ya Suku, ci pondola oku pongolola ekalo liomuenyo wavo!

AMAMAKO OKU LEKISA OKUTI WA SANJUKILA OCISOKO CETU

11. Akulu vekongelo va lekisa ndati okuti va sanjukila ocisoko ca Yehova? (Talavo ociluvialuvia.)

¹¹ Lonjila yipi akulu vekongelo va lekisa okuti va sanjukila ocisoko ca Yehova? Eci va tambula onumbi yimue, ovo va sukila oku yi konomuisa lutate kuenda oku likolisilako oku yi kapako. Ndeci, ovo ka va siatele lika oku tambula olonumbi vioku linga ciwa olonepa viavo kuenda oku likutilila kolohongele, pole, va siatavo oku tambula olonumbi ndomo va tata olomeme via Kristu. Eci akulu vekongelo va kapako olonumbi viocisoko, vamanji va liyeva okuti Yehova o va sole kuenda o kasi oku va tata.

12. (a) Momo lie tu sukilila oku pokola ku vana va kuete omoko yoku tu songuila? (Va Heveru 13:7, 17) (b) Momo lie tu sukilila oku tiamisila utima kovituwa viwa via vana va kuete omoko yoku tu songuila?

¹² Eci akulu vekongelo va tu ĩha onumbi yimue, tu sukila oku yi kuama lutima wosi. Poku ci linga, tu ka leluisa upange wavo. Embimbiliya li tu vetiya okuti tu sukila oku pokola ku vana va kuete omoko yoku tu songuila. (Tanga Va Heveru 13:7, 17.) Pamue ka ci leluka oku ci linga. Momo lie? Momo alume vaco ka va lipuile. Nda tua tiamisila utima kahonguo avo okuti kovituwa viavo viwa hakoko, tu ka kuatisa ovanyãli vetu. Momo lie tu ci popela? Momo tu ka kapa kohele ekolelo tu kuetele ocisoko ca Suku okuti, oco ovanyãli vetu va yongola. Nye tu sukila oku linga oco tu limbuke ovohembi ovanyãli vetu, loku a likala?

KU KA ECELELE OKUTI VAKUENE VA HONGUISA EKOLELO O KUETELE OCISOKO CA YEHOVA

13. Alundi api ovanyãli va Suku va siata oku linga?

¹³ Ovanyãli va Suku, va siata oku yapuisa omanu oku kuata ovisimĩlo ka via sungulukile viatiamẽla kocisoko cetu. Pole, pocakati Cembimbiliya Yehova o lavoka okuti afendeli vaye va liyelisa ketimba, kovisimĩlo kuenda konepa yespiritu. Yehova wa handeleka okuti, omunu wosi amamako oku linga ovina ka via sungulukile okuti ka likekembela, o tundisiwa vekongelo. (1 Va Kor. 5:11-13; 6:9, 10) Etu tua siata oku pokola kocihandeleko caco. Pole, omo liepokolo liaco, ovanyãli vetu va siata oku tu lundila poku popia okuti etu ka tu sole omanu, tua siata oku va pisa kuenda tu va kisika oku kuama ovituwa vietu.

14. Helie ono yovohembi a siata oku sandekiwa atiamẽla kocisoko cetu?

¹⁴ Sanda oku kũlĩha una wa siata oku tu katukila. Satana eye wa siata oku sandeka ovohembi atiamẽla kocisoko cetu. Eye “isia yuhembi.” (Yoa. 8:44; Efet. 3:1-5) Omo liaco, tu  pondola oku lavoka okuti, eye o ka vetiya ovanyãli vetu oco va sandeke ovohembi atiamẽla kocisoko ca Yehova. Eci oco ca li pita la Yesu kuenda Lakristão vo kocita catete.

15. Nye asongui vatavo va linga ku Yesu kuenda kolondonge viavo?

¹⁵ Ndaño okuti Yesu omõla a Suku wa lipuile kuenda wa linga ovikomo vialua, Satana wa vetiya omanu oco va sandeke ovohembi atiamẽla kokuaye. Ndeci, asongui vatavo va sapuila komanu okuti, unene Yesu a kala oku talavaya lawo oco a tundise olondele wa tunda ‘kombiali yolondele.’ (Mar. 3:22) Eci Yesu a kala oku sombisiwa, asongui vatavo vo lundila okuti wa popia atonãi kuenda va tutuminya owiñi oku pinga okuti eye o pondiwa. (Mat. 27:20) Noke, eci olondonge via Kristu via kala oku kunda olondaka viwa, vana va enda oku va lambalala “va tutuminya omanu” oco va lambalale olondonge via Kristu. (Ovil. 14:2, 19) Catiamẽla kelivulu Liovilinga 14:2, Utala Wondavululi 1 wa Cembanima wo 1998, wa lombolola okuti: “Vana va vetiyiwa la Satana va likala oku yevelela esapulo Akristão va kala oku kunda kuenda va popiavo ovina via kãla, oco omanu ka va ka va yevelele kuenda oco va va suvuke.”

16. Nye tu sukila oku ivaluka eci tu yeva asapulo uhembi?

¹⁶ Satana o kasi oku amamako oku sandeka ovohembi toke cilo. Koloneke vilo eye, “o kasi oku yapuisa ilu lieve liosi.” (Esit. 12:9) Nda okuti ove wa yeva asapulo uhembi atiamẽla kocisoko cetu, ale ku vamanji va kuete ocikele coku songola, ivaluka ndomo ovanyãli va Suku va tata Yesu kuenda olondonge viokocita catete. Yesu wa popele okuti omanu va laikele oku suvuka afendeli va Yehova kuenda oku sandeka ovohembi atiamẽla kokuavo. Kuenje eci oco ca siata oku li pita cilo. (Mat.  5:11, 12) Nda tua kũlĩha una o kasi oku sandeka asapulo uhembi kuenda nda tua sanda oku liteyuila lonjanga, ka tu ka kolela kasapulo aco. Oco hẽ tu pondola oku liteyuila ndati?

17. Tu yuvula ndati oku yapuisiwa lasapulo esanda? (2 Timoteo 1:13) (Talavo okakasia losapi hati: “ Ceci o Sukila Oku Linga Eci o Yeva Asapulo Esanda.”)

¹⁷ Yuvula asapulo uhembi. Upostolo Paulu wa tu ĩha olonumbi via suapo vieci tu sukila oku linga nda tua yeva asapulo uhembi. Eye wa vetiya Timoteo okuti, “o handeleka omanu vamue oco ka va ka sandeke alongiso esanda . . . ndaño oku yevelela asapulo esanda” kuenda “oku yuvula ovolandu esanda.” (1 Tim. 1:3, 4; 4:7) Sokolola ndoco: Oñaña yimue yi pondola oku nõla posi ocina cimue ca lĩha, loku ci kapa vomẽla. Pole, omunu umue wa kula lalimue eteke nda a ci linga, momo wa kũlĩha okuti, nda cokokela uvei. Cimuamue haico okuti etu tu yuvula asapulo esanda, momo tua kũlĩha ono yovohembi aco. Etu tu kakatela lika kono “yolondaka viocili.”—Tanga 2 Timoteo 1:13.

18. Tu lekisa ndati okuti tua sanjukila ocisoko ca Yehova?

¹⁸ Tua konomuisa lika olonjila vitatu, pokati kovina vialua ocisoko ca Suku ca siata oku setukula Yesu. Poku lilongisa Embimbiliya, likolisilako oku limbuka olonjila vikuavo vi lekisa okuti ocisoko ca Yehova ci kuãi ongangu ya Yesu. Kuatisa vakuene vekongelo oku vokiya ekolelo liavo kocisoko cetu. Amamako oku pamisa ekolelo liove ku Yehova, loku kakatela kocisoko caye cina eye a kasi oku talavaya laco, oco a tẽlise ocipango caye. (Osa. 37:28) Omo liaco, tu amamiko oku sanjukila esumũlũho tu kuete, lioku kala pokati kafendeli va Yehova kuenda oku panga onepa kocisoko caye.