1. Vhathu vha Mudzimu vha tshifhingani tsha kale vho vha vho dzudzanywa hani?

 MUSI Yehova a tshi ṋea vhathu vhawe mushumo, u lavhelela uri vha u ite nga nḓila yo dzudzanyeaho. (1 Vhakor. 14:33) Sa tsumbo, Mudzimu u ṱoḓa uri mafhungo maḓifha a ḓivhadzwe ḽifhasini ḽoṱhe. (Mat. 24:14) Yehova o ṋea Yesu Kristo vhuḓifhinduleli ha u livhisa wonoyo mushumo. Yesu o ita vhungoho ha uri wonoyo mushumo u itwe nga nḓila yo dzudzanyeaho. Tshifhingani tsha Vhakriste vha u thoma musi hu tshi vhumbiwa zwivhidzo zwo fhambafhambanaho, ho vhewa vhahulwane uri vha livhise na u ranga phanḓa. (Mish. 14:23) Tshigwada tsha vhahulwane tshe tsha vha tsho vhumbwa nga vhaapostola na vhanna vhahulwane tshe tsha vha tshi Yerusalema tsho vha tshi tshi dzhia phetho dze dza vha dzi tshi tea u tevhedzwa nga zwivhidzo zwoṱhe. (Mish. 15:2; 16:4) Nga nṱhani ha uri vhenevho vhahashu vho thetshelesa honoho vhulivhisi he vha vhu wana, “zwivhidzo zwa ḓi bvela phanḓa zwi tshi khwaṱhiswa lutendoni na u engedzea.”—Mish. 16:5.

2. U bva nga 1919, Yehova o ṋea vhathu vhawe vhulivhisi na zwiḽiwa nga nḓila-ḓe?

² Yehova u kha ḓi bvela phanḓa a tshi dzudzanya vhathu vhawe na ṋamusi. U bva nga 1919, Yehova o livhisa Yesu uri a shumise tshigwada tshiṱuku tsha vhanna vho ḓodzwaho u dzudzanya mushumo wa u huwelela na u ṋea vhatevheli vhawe zwiḽiwa zwi bvaho Ipfini ḽa Mudzimu nga tshifhinga tsho teaho. a (Luka 12:42) Zwi tou vha khagala uri Yehova u khou fhaṱutshedza mushumo  une tshenetsho tshigwada tsha khou u ita.—Yes. 60:22; 65:13, 14.

3-4. (a) Ṋeani tsumbo ya uri ri vhuyelwa hani nga u vha vho dzudzanyeaho. (b) Ri ḓo haseledza nga ha mini kha ino thero?

³ Arali ro vha ri songo dzudzanyea, ro vha ri sa ḓo kona u ita mushumo we Yesu Kristo a ri ṋea wone. (Mat. 28:19, 20) Sa tsumbo, arali ho vha hu si na tsimu yo avhiwaho, muhuweleli muṅwe na muṅwe o vha a tshi ḓo shuma hune a funa. Iṅwe tsimu yo vha i tshi ḓo shumeswa nga vhahuweleli, iṅwe i si shumiwe na luthihi. Naa ni a humbula dziṅwe nḓila dzine ra vhuyelwa ngadzo nga u vha vho dzudzanyeaho?

⁴ U tou fana na musi Yesu o dzudzanya vhatevheli vhawe musi e kha ḽifhasi, u kha ḓi dzudzanya vhathu vha Mudzimu na ṋamusi. Kha ino thero, ri ḓo haseledza nga ha tsumbo ya Yesu na uri ndangulo yashu i khou tevhedza hani yeneyo tsumbo ṋamusi. Ri ḓo dovha ra haseledza uri ri nga fhulufhela hani ndangulo ya Yehova.

NDANGULO YASHU I EDZISA TSUMBO YA YESU

5. Ndi ifhio iṅwe nḓila ine ndangulo yashu ya tevhela ngayo tsumbo ya Yesu? (Yohane 8:28)

⁵ Yesu o guda kha Khotsi awe wa ṱaḓulu uri ndi mini zwine a tea u ita na zwine a tea u amba. Ndangulo ya Yehova i edzisa tsumbo ya Yesu nga u shumisa Ipfi ḽa Mudzimu u ri thusa u ḓivha zwo lugaho na zwi songo lugaho na u ri ṋea vhulivhisi vhutshiloni hashu. (Vhalani Yohane 8: 28; 2 Tim. 3:16, 17) Tshifhinga tshoṱhe ri humbudzwa uri ri vhale Ipfi ḽa Mudzimu na u shumisa zwe ra zwi guda. Ri vhuyelwa hani musi ri tshi tevhedza yeneyo nyeletshedzo?

6. Ndi tshifhio tshiṅwe tshithu tsha ndeme tshine ra vhuyelwa ngatsho musi ri tshi guda Bivhili ri tshi shumisa khandiso dzashu?

⁶ Ri a vhuyelwa musi ri tshi guda Bivhili ri tshi shumisa khandiso dzo thewaho Bivhilini. Sa tsumbo, ri kona u vhambedza zwine ra zwi guda Bivhilini na vhulivhisi vhune ra vhu wana vhu tshi bva ndanguloni. Musi ri tshi vhona uri vhulivhisi vhune ra vhu wana vhu bva Maṅwaloni, ri tou ṋaṋa u fhulufhela ndangulo ya Yehova.—Vharoma 12:2.

7. Ndi mulaedza ufhio we Yesu a u huwelela nahone ndangulo ya Yehova i edzisa hani tsumbo yawe?

⁷ Yesu o huwelela “mafhungo maḓifha a muvhuso wa Mudzimu.” (Luka 4:43, 44) Yesu o dovha a vhudza vhafunziwa vhawe uri vha huwelele nga ha Muvhuso. (Luka 9:1, 2; 10:8, 9) Vhoṱhe vhane ṋamusi vha vha ndanguloni ya Yehova vha huwelela nga ha mulaedza wa Muvhuso zwi si na ndavha uri vha dzula ngafhi na uri vha na vhuḓifhinduleli vhungafhani ndanguloni ya Yehova.

8. Ndi ndugelo ifhio ye ra ṋewa?

⁸ Ndi ndugelo khulwane u vhudza vhathu nga ha Muvhuso wa Mudzimu. A si muṅwe na muṅwe ane a vha na yeneyi ndugelo. Sa tsumbo, musi Yesu e kha ḽifhasi, ho ngo tendela madimoni a tshi ṱanziela nga hae. (Luka 4:41) Musi muthu a sa athu thoma u huwelela na Ṱhanzi dza Yehova, u tea u vha a tshi khou tshila nga nḓila ine ya takadza Mudzimu. Ri sumbedza uri ri livhuwa yeneyo ndugelo nga u huwelela huṅwe na huṅwe hune ra vha hone, na nga tshifhinga tshiṅwe na tshiṅwe. U fana na Yesu, tshipikwa tshashu ndi u zwala na u sheledza mbeu ya Muvhuso mbiluni dza vhathu.—Mat. 13:3, 23; 1 Vhakor. 3:6.

9. Ndangulo yo ita hani uri dzina ḽa Mudzimu ḽi ḓivhiwe?

⁹ Yesu o ḓivhadza dzina ḽa Mudzimu. Yesu o rabela Khotsi awe wa ṱaḓulu a ri: “Ndo vha ḓivhadza dzina ḽau.” (Yoh. 17:26) Ndangulo ya Yehova i tevhedza tsumbo ya Yesu nga u ita zwoṱhe zwine ya nga kona u itela u thusa vhathu uri vha ḓivhe dzina ḽa Mudzimu. Kha Ṱhalutshedzelo Ya Shango Ḽiswa Ya Maṅwalo Makhethwa, ndangulo yo vhuyedzedza dzina ḽa Mudzimu fhethu he ḽa vha ḽi hone musi  Bivhili i tshi thoma u ṅwaliwa. Ni nga wana yeneyi ṱhalutshedzelo ya Bivhili yo fhelelaho kana zwipiḓa zwayo nga nyambo dzi fhiraho 270. Arali na sedza Ṱhumetshedzo ya A4 na A5 ya yeneyi ṱhalutshedzelo, ni ḓo wana zwidodombedzwa malugana na u vhuyedzedzwa ha dzina ḽa Mudzimu Bivhilini. Ṱhumetshedzo C ine ya wanala kha Study Bible ya Tshiisimane, i ṋea vhuṱanzi ha uri dzina ḽa Mudzimu ḽi tea u bvelela kha Maṅwalo a Tshikriste a Tshigerika lwa 237. b

10. Tshenzhelo ya vhaṅwe mukegulu vhane vha dzula ngei Myanmar yo ni gudisa mini?

¹⁰ U fana na Yesu ri ṱoḓa u thusa vhathu vhanzhi nga hune zwa nga konadzea ngaho uri vha ḓivhe dzina ḽa Mudzimu. Musi vhaṅwe mukegulu vha ngei Myanmar vha re na miṅwaha ya 67 vha tshi guda uri Mudzimu u na dzina, vho lila vha ri: “Ndi lwa u thoma vhutshiloni hanga ndi tshi pfa uri dzina ḽa Mudzimu ndi Yehova. . . . No mpfunza zwithu zwa ndeme vhukuma.” Samusi ro zwi vhona kha yeneyi tshenzhelo, musi vhathu vha tshi guda uri dzina ḽa Mudzimu ndi nnyi zwi nga shandula vhutshilo havho.

BVELANI PHANḒA NI TSHI FHULUFHELA NDANGULO YA MUDZIMU

11. Vhahulwane vha nga sumbedza hani uri vha a fhulufhela ndangulo ya Yehova? (Sedzani tshifanyiso.)

¹¹ Ndi ifhio iṅwe nḓila ine vhahulwane vha nga sumbedza ngayo uri vha fhulufhela ndangulo ya Mudzimu? Musi vhahulwane vha tshi wana vhulivhisi, vha tea u vhu vhala nga vhuronwane na u ita zwoṱhe zwine vha nga kona u itela u vhu shumisa. Sa tsumbo, vha wana vhulivhisi ha uri vha nga vhea hani nyambo miṱanganoni na uri vha nga rabela hani tshivhidzoni, vha dovha vha wana vhulivhisi ha uri vha nga ṱhogomela hani nngu dza Kristo. Musi vhahulwane vha tshi shumisa vhulivhisi vhune ha bva ndanguloni, vhahashu tshivhidzoni vha a kona u vhona uri Yehova u a vha funa nahone u a vha ṱhogomela.

12. (a) Ndi ngani ri tshi tea u shumisana na vhane vha khou ranga phanḓa? (Vhahevheru 13:7, 17) (b) Ndi ngani ri tshi tea u livhisa ṱhogomelo kha zwithu zwavhuḓi zwine vhane vha khou ri ranga phanḓa vha zwi ita?

¹² Musi ri tshi wana vhulivhisi vhu bvaho kha vhahulwane ri tea u vhu tevhela nga u ḓifunela. Musi ri tshi ita nga u ralo, ri ḓo ita uri zwi leluwe uri vhane vha khou ri ranga phanḓa vha ite mushumo wavho. Bivhili i ri ṱuṱuwedza uri ri thetshelese vhane vha khou ri ranga phanḓa na u ḓiṱukufhadza khavho. (Vhalani Vhahevheru 13:7, 17.) Tshiṅwe tshifhinga zwenezwi zwi nga ri konḓela. Ndi ngani? Ndi nga nṱhani ha uri tshiṅwe tshifhinga vhenevha vhanna vha ita vha tshi khakha. Arali ra livhisa ṱhogomelo kha vhukhakhi havho nṱhani ha zwithu zwavhuḓi zwine vha zwi ita, ri ḓo vha ri tshi khou thusa maswina ashu. Nga nḓila-ḓe? Maswina ashu vha ṱoḓa ri tshi timatima uri Mudzimu u khou shumisa ndangulo yawe u ri livhisa. Ngauralo, arali ra humbula zwithu zwi si zwavhuḓi nga ha vhahulwane, ri nga thoma u humbula zwithu zwi si zwavhuḓi na nga ha ndangulo, ra thoma u si tsha i fhulufhela. Ri nga kona hani u ḓivha mazwifhi a maswina ashu na u a iledza?

NI SONGO TENDA URI VHAṄWE VHA ITE URI NI SI TSHA FHULUFHELA NDANGULO

13. Maswina ashu a lingedza hani u ita uri ndangulo i vhonale i si yavhuḓi?

¹³ Maswina a Mudzimu a lingedza u ita uri zwithu zwavhuḓi zwine ndangulo ya zwi ita zwi vhonale zwi si zwavhuḓi. Sa tsumbo, Yehova u lavhelela uri vhagwadameli vhawe vha vhe vho kunaho mivhilini yavho, vho kunaho kha vhuḓifari na uri vha mu gwadamele nga nḓila ine a  i takalela. U ṱoḓa uri vhane vha bvela phanḓa vha tshi ita zwithu zwo khakheaho nahone vha si ṱoḓe u shandula vhuḓifari havho vhuvhi vha bviswe tshivhidzoni. (1 Vhakor. 5:11-13; 6:9, 10) Ri a thetshelesa honoho vhulivhisi vhu bvaho Maṅwaloni. Fhedzi vhane vha ri hanedza vha shumisa zwenezwo u itela u ri pomoka uri a ri humbuleli vhaṅwe, ri a haṱula nahone a ri na lufuno.

14. Ndi nnyi ane a ṱuṱuwedza mazwifhi nga ha ndangulo?

¹⁴ Ri tea u pfesesa uri ndi nnyi zwa vhukuma ane a khou lwisana na ndangulo. Saṱhane Diabolo ndi ene ane a khou ṱuṱuwedza enea mazwifhi nga ha ndangulo ya Yehova. Ndi ene ane a vha “khotsi a vhane vha zwifha.” (Yoh. 8:44; Gen. 3:1-5) Nga zwenezwo, ri tea u lavhelela uri Saṱhane u ḓo shumisa vhatevheli vhawe u ṱuṱuwedza enea mazwifhi nga ha ndangulo ya Yehova. Zwenezwo ndi zwe zwa itea kha Yesu na Vhakriste vha u thoma.

15. Ndi mini zwe vharangaphanḓa vha vhurereli vha zwi ita kha Yesu na vhatevheli vhawe?

¹⁵ Naho Murwa wa Mudzimu Yesu Kristo o vha e si na tshivhi nahone o ita vhuṱolo vhu mangadzaho, Saṱhane o shumisa vhathu u phaḓaladza mazwifhi nga hae. Sa tsumbo, vharangaphanḓa vha vhurereli vho vhudza vhathu uri maanḓa ane Yesu a a shumisa u pandela madimoni, o vha o a wana kha “muvhusi wa madimoni.” (Marko 3:22) Musi Yesu e tsengoni, vharangaphanḓa vha vhurereli vho mu pomoka uri o sema Mudzimu nahone vha ṱuṱuwedza vhathu uri a vhulawe. (Mat. 27:20) Nga murahu musi vhatevheli vha Kristo vha tshi khou huwelela mafhungo maḓifha, vhapikisi vhavho vho “ṱuṱuwedza vhathu” uri vha vha tovhole. (Mish. 14:2, 19) Malugana na Mishumo 14:2, Tshiingamo tsha 1 December 1998 tsho ṱalutshedza uri: “Nge vha vha vha songo fushea nga u hanedza wonoyo mulaedza vhe  vhoṱhe, vhapikisi vha Vhayuda vha thoma fulo ḽa u hwesa mulandu, vha tshi lingedza u ita uri Vhannḓa vha vhenge Vhakriste.”

16. Ndi mini zwine ra tea u zwi humbula musi ri tshi pfa mafhungo a mazwifhi?

¹⁶ Saṱhane u kha ḓi bvela phanḓa na mazwifhi u swika na ṋamusi. Ṋamusi u “khou xedza ḽifhasi ḽoṱhe.” (Nzumb. 12:9) Arali na pfa mafhungo a mazwifhi nga ha ndangulo kana nga ha vhahashu vhane vha khou ranga phanḓa, ni humbule nga ha nḓila ye maswina a Mudzimu a fara ngayo Yesu na vhatevheli vhawe vha u thoma. Yesu o ri vhathu vha ḓo hanedza vhane vha khou shumela Yehova na u amba mazwifhi nga havho. Zwenezwo ndi zwine zwa khou itea ṋamusi. (Mat. 5:11, 12) Musi ri tshi ḓivha uri ndi nnyi ane a khou ṱuṱuwedza eneo mazwifhi, a ri nga ḓo a tenda, ri ḓo a iledza nga u ṱavhanya. Ri nga ḓitsireledza hani kha eneo mazwifhi?

17. Ri nga iledza hani u vhaiswa nga mafhungo a mazwifhi? (2 Timotheo 1:13) (Sedzani bogisi “ Ndi Mini Zwine Ra Nga Ita Musi Ri Tshi Pfa Mafhungo A Mazwifhi?”)

¹⁷ Iledzani mafhungo a mazwifhi. Muapostola Paulo o ri fha vhulivhisi ho livhaho ha uri ri nga ita mini arali ra nga pfa mafhungo a mazwifhi. O vhudza Timotheo uri a ‘laye vhaṅwe uri vha si thetshelese mazwifhi’ na uri a ‘iledze mazwifhi a nyadzisaho Mudzimu.’ (1 Tim. 1:3, 4; 4:7) Humbulani nga hezwi: Ṅwana a nga kha ḓi dzhia tshithu tshi re na mashika a tshi posa mulomoni, fhedzi muthu o aluwaho a nga si zwi ite zwenezwo ngauri u a zwi ḓivha uri zwi nga ita uri a lwale. Ri iledza mafhungo a mazwifhi ngauri ri a ḓivha hune a vha a tshi khou bva hone. Ri farelela kha “pfunzo ya ngoho.”—Vhalani 2 Timotheo 1:13.

18. Ri nga sumbedza hani uri ri fhulufhela ndangulo ya Yehova?

¹⁸ Ro haseledza nḓila tharu fhedzi dzine ndangulo ya Mudzimu ya edzisa ngadzo Yesu. Musi ni tshi khou haseledza Bivhili, ṱhogomelani dziṅwe nḓila dzine ndangulo ya edzisa Yesu ngadzo. Thusani vhaṅwe tshivhidzoni uri vha fhulufhele ndangulo nga nḓila yo engedzeaho. Bvelani phanḓa ni tshi sumbedza u livhuwa nga u shumela Yehova nga u fhulufhedzea na u dzula ni tsini na ndangulo ine a khou i shumisa u ita zwine a zwi funa. (Ps. 37:28) U nga ri ni nga bvela phanḓa ni tshi dzhiela nṱha ndugelo ya u vha vhukati ha vhathu vha Yehova vhane vha vha na lufuno na vhane vha fhulufhedzea.