1. Come che i servi de Geovà i ze stati organisadi nel primo sècolo?

 QUANDO Geovà dà un laoro ai so servi, lu el vol che lori i lo fae de maniera organisada. (1 Cor. 14:33) Par esémpio, Geovà el vol che le bone notìssie del Regno le sìpia “predicade in tuta la tera”. (Mat. 24:14) Geovà el ga domandà che Gesù el organisesse questo laoro, e lu l’è drio farlo tanto ben. Come che Gesù el ga organisà i servi de Dio nel primo sècolo? In quela època, apòstoli e i ansiani in Gerusalen i fea dessision che tute le congregassion le gavaria de obedir. (Ati 15:2; 16:4) E nele congregassion, ansiani i ze stati scoliesti par dir ai fradei e ale sorele cossa che i gavaria de far. (Ati 14:23) Cossita, “le congregassion le restea cada volta pi forte nela fede e ghen’era de pi persone che credea a cada giorno”. — Ati 16:5.

2. Come che Geovà l’è drio organisar i so servi e darghe orientassion de 1919 in qua?

² Geovà l’è drio organisar i so servi anca ancoi. In 1919, Gesù el ga scominsià a doperar un pìcolo grupo de fradei untadi par tender del laoro de predicassion e giutar i so dissìpoli a capir meio la Bìblia. a (Luc. 12:42) Semo sicuri che Geovà l’è drio benedir el so laoro. — Isa. 60:22; 65:13, 14.

3-4. (a) Cossa che ne giuta a capir parché che l’è bon esser organisadi? (b) Cossa che ndaremo imparar in questo stùdio?

 ³ Noantri mai sarìssino boni de far el laoro de predicassion se no fùssino mia organisadi. (Mat. 28:19, 20) Metemo dir che le congregassion no le savesse mia el posto ndove cada una la gavaria de predicar, e che podarìssino predicar da par tuto. Se fusse cossita, pol esser che i fradei i ndaria sempre predicar tuti nel medèsimo posto. Proa pensar anca in altre robe bone che sucede parché semo organisadi.

⁴ Cossita come Gesù el ga organisà i so dissìpoli quando l’era qua nela Tera, lu el seita a tender dei servi de Geovà ancoi. In questo stùdio, ndaremo imparar de pi sora el esémpio che Gesù el ne ga dato e come che la organisassion la fà compagno a lu. Noantri anca ndaremo veder come che podemo mostrar che se fidemo nela organisassion de Geovà.

LA NOSTRA ORGANISASSION LA VA DRIO AL ESÉMPIO DE GESÙ

5. Come che la organisassion de Geovà la va drio al esémpio de Gesù? (Gioani 8:28)

⁵ Gesù el ga imparà del so Pare quel che el gavea de dir e far. Compagno a Gesù, la organisassion la dopera la Bìblia par giutarne a capir quel che l’è giusto e quel che l’è sbalià e a viver de una maniera che assa Geovà contento. (Ledi Gioani 8:28; b 2 Tim. 3:16, 17) La organisassion anca la seita a ricordarne de leder la Bìblia e meter in pràtica quel che imparemo. Parché che l’è bon far quel che la organisassion la ne dise?

6. Cossa che sucede quando studiemo la Bìblia?

⁶ Noantri imparemo tanto quando doperemo le publicassion par studiar la Bìblia. Par esémpio, semo boni de veder quel che la Bìblia la dise e quel che la organisassion de Geovà la ze drio far. E quando vedemo che le orientassion che ricevemo le ze pròpio de acordo cola Bìblia, se fidemo ancora de pi nela organisassion de Geovà. — Rom. 12:2.

7. (a) Sora cossa che Gesù el predichea? (b) Come che la organisassion de Geovà la va drio al so esémpio?

⁷ Gesù el predichea le “bone notìssie del Regno de Dio”. (Luc. 4:43, 44) E lu el ga domandà che anca i so dissìpoli i parlesse ai altri sora el Regno. (Luc. 9:1, 2; 10:8, 9) Ancoi, tuti noantri obedimo ala organisassion e predichemo sora el Regno de Geovà. Tuti parlemo ale persone sora el Regno, no importa ndove semo de star o i laori che ghemo nela organisassion.

8. Che bel laoro quei che i serve a Geovà i pol far?

⁸ Quando Gesù l’era qua nela Tera, lu no’l ga assà che i demoni i parlesse sora lu. (Luc. 4:41) Cossita capimo che gnanca tuti i pol giutar a far el laoro de predicassion. Par esémpio, una persona che la vol giutar nela predicassion insieme ai servi de Geovà la ghe toca pareciarse prima. Alora, l’è sicuro che predicar l’è un grando onor. E noantri mostremo che ghe demo tanto valor a questo laoro quando parlemo sora Geovà sempre che podemo. Cossita come Gesù, noantri volemo sforsarse de parlar sora el Regno de Geovà ale persone e giutarle a cognosser la Bìblia. — Mat. 13:3, 23; 1 Cor. 3:6.

9. Come che la organisassion la ze drio giutar le persone a cognosser el nome de Geovà?

⁹ Gesù el ga insegnà ale persone sora el nome de Dio. Nte una orassion, Gesù el ga dito: “Mi go fato cognosser el to nome a lori.” (Gio. 17:26) E la organisassion la fà compagno a Gesù, parché la ze drio far  tuto quel che la pol par giutar le persone a cognosser el nome de Geovà. Par esémpio, la organisassion la ga fato la Tradução do Novo Mundo da Bíblia Sagrada in de pi de 270 léngue. Nel Apéndisse A4 e nel A5 che ghen’è in questa Bìblia, vedemo parché el nome de Geovà l’è stà metesto tante volte nela Bìblia. Nel Apéndisse C che l’è nela Bìblia de Stùdio, podemo imparar le prove che el nome de Dio el ga de esserghe 237 volte nele Scriture Greche.

10. Cossa gheto imparà con quel che una dona de Mianmar la ga dito?

¹⁰ Noantri volemo far compagno a Gesù e giutar tute le persone che podemo a cognosser el nome de Dio. Varda quel che ga sucedesto con una dona de Mianmar che la gavea 67 ani. Quando la ga imparà che el nome de Dio l’è Geovà, la ga tacà piander e la ga dito: “Mi no gavea mai sentio dir che el nome de Dio l’è Geovà. Valtri me gavé insegnà la roba pi importante che ghen’è.” Quel che ga sucedesto con questa dona la ne insegna che imparar el nome de Dio pol far cambiar la vita de una persona.

SEITA A MOSTRAR CHE TE TE FIDI NELA ORGANISASSION DE GEOVÀ

11. Come che i ansiani i pol mostrar che i se fida nela organisassion? (Varda anca la ilustrassion.)

¹¹ Quando la organisassion la ghe dà orientassion ai ansiani, lori i ga de lederle ben e sforsarse de meterle in pràtica. Par esémpio, i ansiani sempre i riceve orientassion sora come far le riunion, come pregar nela congregassion e come tender dei fradei. Quando i ansiani i fà quel che la organisassion la ghe dise, i fradei e le sorele i vede che Geovà li ama e li tende.

12. (a) De acordo con Ebrei 13:7, 17, parché che ghemo de obedir ai ansiani? (b) Parché che sempre ghemo de vardar le qualità dei ansiani?

¹² Quando ricevemo orientassion dei ansiani, ghemo de obedirghe con alegria. Cossita, lori i sarà boni de seitar a far el so laoro nela congregassion. La Bìblia la dise che ghemo de obedir e rispetar quei che i tende dela congregassion. (Ledi Ebrei 13:7, c 17. d) Ma pol esser che dele volte femo fadiga obedir ai ansiani parché lori i ze imperfeti e i fà sbali. Fursi scominsiemo a vardar de pi i so difeti invesse dele so qualità. Ma se femo cossita, sarìssino drio giutar i nostri nemighi. Come cossita? I nostri nemighi i vol che ghemo dubi che Geovà el dopera la so organisassion par tenderne. Alora, se scominsiemo a sbrontolar de quei che Geovà el dopera, saremo drio ndar contra la so organisassion. Alora, cossa che podemo far par mai ndarghe drio ale busie che i nemighi de Geovà i conta?

NO STÀ ASSAR CHE I ALTRI I TE INTRIGHE DE FIDARTE NELA ORGANISASSION

13. Come che i nemighi de Dio i fà arquanti pensar robe sbaliade dela organisassion?

¹³ I nemighi de Dio i vol che le persone le pense che le robe bone che femo le ze rugne. Par esémpio, noantri ghemo imparà nela Bìblia che Geovà el vol che i so servi no i fae mia robe sbaliade, che i sìpie persone nete e che i lo adore dela maniera giusta. Lu anca el dise che una persona che la seita far un bruto pecato e che no la se ciama grama no la pol pi esser una Testimònia de Geovà. (1 Cor. 5:11-13; 6:9, 10) Sicuro che noantri femo quel che Geovà el vol. Ma, i nemighi i dise che noantri no amemo  mia le persone, che le tratemo mal e che no acetemo quei che i ze difarenti de noantri.

14. De ndove vien le busie che le persone le conta sora la organisassion?

¹⁴ Ricòrdate che l’è Sàtana che l’è drio vegner contra la organisassion. Sàtana el dopera persone par contar busie sora la organisassion. La Bìblia la dise che lu l’è “el pare dela busia”. (Gio. 8:44; Gén. 3:1-5) Alora, noantri belche speteino che Sàtana el doperaria i nostri nemighi par contar busie sora i servi de Geovà. La medèsima roba la ga sucedesto con Gesù e coi so primi dissìpoli.

15. Cossa che i lìderi religiosi i ga fato contra Gesù e i so dissìpoli?

¹⁵ Anca se Gesù el fusse perfeto e el gavesse fato tanti bei miràcoli, Sàtana el ga doperà arquante persone par contar busie sora lu. Par esémpio, i lìderi religiosi i parlea che Gesù ‘el parea via i demoni par meso del governante dei demoni’. (Mar. 3:22) E quando Gesù l’era drio esser giulgà, questi lìderi religiosi i ga dito che lu el bestemea contra Dio e i ga incoraià le persone a domandar che i governanti i mandesse coparlo. (Mat. 27:20) E quando i dissìpoli i era drio predicar, i so nemighi i ga incoraià le persone a vegnerghe contra e a perseghirli. (Ati 14:2, 19) Varda quel che La Sentinela de 1 de disembre de 1998 la ga spiegà sora Ati 14:2: “Quei che i vegnea contra Gesù e i so dissìpoli no i volea mia acetar quel che lori i predichea. Par quela, questi nemighi i seitea a parlar robe tanto brute sora i dissìpoli e i volea che le persone no li scoltesse mia e che li odiesse.”

16. Cossa che ghemo de ricordarse quando scoltemo busie sora la organisassion?

¹⁶ La Bìblia la dise che Sàtana “l’è drio imbroiar tute le persone dela tera”. (Apo. 12:9) Cossita capimo che lu ancora l’è drio  contar busie sora i servi de Geovà. Alora, cossa gheto de far se te scolti busie sora la organisassion e sora quei che Geovà el ga scoliesto par tender de noantri? Ricòrdate de quel che i nemighi de Dio i ga fato contra Gesù e contra i primi dissìpoli. Anca ricòrdate che Gesù el ga dito che le persone le ne vegnaria contra e le contaria busie sora noantri. (Mat. 5:11, 12) Vedemo che queste robe le ze drio suceder ancoi. Se noantri se ricordemo de ndove vien queste busie e se femo suito qualcossa par protegerse, saremo boni de no ndarghe drio. Ma come che podemo protegerse de queste busie?

17. Cossa che ghemo de far par no ndarghe drio ale stòrie false? (2 Timòteo 1:13) (Varda anca el quadro “ Cossa ghemo de far quando scoltemo busie sora la organisassion de Geovà?”.)

¹⁷ No stà ndarghe drio ale stòrie false. El apòstolo Paolo el ga dito quel che ghemo de far quando scoltemo stòrie cossita. Lu el ga dito: ‘Te ghè de ricusar e no darghe atension a stòrie false.’ (1 Tim. 1:3, 4; 4:7) Noantri no semo mia come un bambin che el ciapa una roba sporca in tera e la mete in boca. Alora, noantri mai ndarìssino creder in stòrie false parché savemo che le ze sporche, o sia, che le vien de Sàtana. Pitosto, volemo scoltar sol quel che l’è vero. — Ledi 2 Timòteo 1:13. e

18. Come che podemo mostrar che se fidemo nela organisassion de Geovà?

¹⁸ In questo stùdio, ghemo visto sol tre robe che le mostra che la organisassion la va drio a Gesù. Alora, intanto che te studi la Bìblia, proa vardar anca altre maniere che femo compagno a Cristo e giuta i altri a far pi forte la so confiansa nela organisassion. Te pol mostrar che te te fidi nela organisassion de Geovà se te seiti a esser leal a lu e se te fè tuto quel che la organisassion la dise. (Sal. 37:28) Sicuro che tuti noantri restemo contenti de adorar a Geovà insieme a fradei leai e che i ama tanto un al altro.