1. Moota heeni muloko wa Yehova waaraaya woorehereya eseekulu yoopatxera?

 IKWAHA sootheene Yehova onaavahaawe atthu awe muteko, owo onweherera weera muteko owo opakiweke moorehereya. (1 Akor. 14:33) Mwa ntakihero, Muluku taatthunne weera mitthenka iya sooreera silaleiwe elapo yootheene. (Math. 24:14) Nave Yehova onvaha Yesu muritti woohoolela muteko ola, nave tho Yesu onnawehexexa weera muteko ola ovariweke moorehereya. Eseekulu yoopatxera saahikhala miloko soorehereya ni yaathanliwa asitokweene weera evaheke miruku ni ehooleleke. (Mit. 14:23) Eseekulu yoopatxera, oYerusalemu, egrupu emoha ya arummwa ni asitokweene yannapaka soothanla seiyo saarowa otthariwaka ni miloko. (Mit. 15:2; 16:4) Yookhumelela aya ti yooweera “[miloko] sànalipa mowiwelelani, muloko aya wànatepa wantxerereya nihiku ti nihiku.” — Mit. 16:5.

2. Eheeni Yehova apankaawe ovinyera eyaakha ya 1919 weera avaheke miruku ni yootxa ya omunepani muloko awe?

² Nave-tho olelo, Yehova onnavirelela oreherera muloko awe. Ovinyera eyaakha ya 1919, Yesu onnavarihela muteko egrupu ekhaanini ya alopwana oothanliwa weera ereherereke muteko woolaleera ni yaavaheke yootxa ya omunepani atthareli awe. a (Luka 12:42) Onooneya weera Yehova onnareeliha muteko wa egrupu ela. — Yes. 60:22; 65:13, 14.

3-4. (a) Nvahe ntakihero na moota ninttottelaahu mureerelo okhala muloko woorehereya. (b) Eheeni ninrowaahu woona mwa yoosoma ene yeela?

³ Waakhanle weera hiyo khanaakhanle oorehereya, khanaarowa  owera ovara muteko Yesu onithanlenlaawe. (Math. 28:19, 20) Mwa ntakihero, muupuwele waakhanle weera khanaathanlelinwe mittetthe soolaleera. Mutthu ori poothe aaheereke olaleera nipuro nri poothe eeraawe atthuneke. Mittetthe mikina saamurowa olaleeriwa vantxipale. Neereke munnawera woona mareeliho nimphwanyaahu mwaha wookhala muloko woorehereya?

⁴ Emaara Yesu aaraawe elapo ya vathi, owo aahaareherera atthareli awe ni owo ni nlelo onnavirelela oreherera muloko awe. Mwa yoosoma ene yeela, nnimoona ntakihero Yesu onihiyenraawe ni moota mareherero ahu enttharaaya ntakihero na Yesu. Nave-tho ninrowa woona moota ninrowaahu woonihera nttittimiho ni ororomela mareherero a Yehova.

MAREHERERO AHU ENNATTHARA NTAKIHERO NA YESU

5. Mukhalelo heeni wootthara ntakihero na Yesu? (Yohani 8:28)

⁵ Yesu aaxuttera ni Atiithi awe etthu yoopaka ni etthu yoowuuluma. Ettharaka ntakihero na Yesu, mareherero a Yehova ennanvarihela muteko Biblya weera enxuttihe etthu yooreera ni etthu yoonanara ni okhala mwa mukhalelo ommuhakalaliha Yehova. (Mmusome Yohani 8:28; 2 Tim. 3:16, 17) Mareherero a Yehova ikwaha sootheene ennanuupuxera weera nimusomeke Biblya ni ovarihela muteko ele ninsomaahu. Moota heeni opaka eyo enrowaaya onikhavihera?

6. Mukhalelo heeni mmoha woottottela mureerelo yoosomaahu ya Biblya?

⁶ Hiyo ninnattottela mureerelo vaavo nimmusomaahu Biblya nivarihelaka muteko irevista sahu. Mwa ntakihero, nlikanxeraka ele Biblya onhimaawe ni miruku nnaakhelaahu mmarehereroni mwa Yehova ni vaavo nnoonaahu weera miruku iyo nnaakhelaahu sinkhuma mBiblyani, ororomela wahu mareherero a Yehova, onnunnuwa. — Arom. 12:2.

7. Mitthenka heeni Yesu aalaleyaawe, ni moota heeni mareherero a Yehova enttharaaya ntakihero nawe?

⁷ Yesu annalaleya ‘mitthenka sooreera sa Omwene wa Muluku.’ (Luka 4:43, 44) Opwaha mwa yeeyo, Yesu aahima weera atthareli awe tho yannatthuneya olaleya Omwene. (Luka 9:1, 2; 10:8, 9) Olelo, ootheene hiyo nintthara miruku sa mareherero a Yehova, ninnalaleya mitthenka sa Omwene, nihipwatthaka mapuro ninkhalaahu naari miritti nraahuno mmarehereroni mwa Yehova.

8. Eparakha heeni nraahuno?

⁸ Eparakha wa hiyo waaleela atthu akina Omwene wa Muluku! Ni eparakha eyo khaiyene ya mutthu ori poothe. Mwa ntakihero, emaara Yesu aaraawe elapo ya vathi, owo khaakhulenle weera minepa soonanara suulumeke woohima sa Yesu. (Luka 4:41) Nave-tho olelo, mutthu ohaakunveene opatxera olaleya vamoha ni muloko wa Yehova, owo ontthuneya wiirehera wa eparakha eyo. Ni hiyo, ninnoonihera ovaha wahu mwiitti ni ottittimiha wahu olaleera, nivahaka onamoona ikwaha sootheene ninweraahu. Nave hiihaale ntoko Yesu, yootthunaahu ekhaleke waala mmiso va Omwene vamurimani wa atthu ni waaxuttiha ekhaikhai. — Math. 13:3, 23; 1 Akor. 3:6.

9. Moota heeni mareherero a Yehova enlaleyaaya nsina na Muluku?

⁹ Yesu aahaaxuttiha atthu akina nsina na Muluku. Emaara aapakaawe nivekelo Yesu enre: “Tthiri kòhàsuweliha nsina ná.” (Yoh. 17:26) Ettharaka ntakihero na Yesu, mareherero a Yehova aapaka yootheene enweraaya weera yaakhavihere atthu osuwela nsina na Muluku. Aapaka eyo, envarelaka muteko Tradução do Novo Mundo da Bíblia Sagrada. Biblya ola onnaphwanyeya mwa muulumo empwaha 270.  Apêndice A4 ni A5 a Biblya ola, onnoonihera moota heeni ni mwaha wa heeni nsina na Muluku nilempwalaaya mBiblyani. Apêndice C omphwanyeya mBiblya oomusoma, onnoonihera itthu sintxipale woohima sa mwaha wa heeni nsina na Muluku nimphwanyeyaaya mwa soolempwa sa ekereku sa ekristu ikwaha 237.

10. Eheeni ninxutteraahu ni masu uulummaawe muthiyana mmoha oMianmar?

¹⁰ Hihaale ntoko Yesu, hiyo nintthuna waakhavihera atthu antxipale osuwela nsina na Muluku. Muthiyana mmoha oMianmar, yoowo orino iyaakha 67, vaavo aaxuttenraawe weera nsina na Muluku ti Yehova, owo aapatxera winla. Owo ohimme ha: “Ekumi aka yootheene miyo nkintale wiiwa nsina na Muluku. . . . Nyuwo mookixuttiha etthu yootepa otthuneya.” Ntoko nonnaahu, vaavo atthu enxutteraaya woohima sa nsina na Muluku, eyo ennatxentxa ekumi aya.

NVIRELELE WOONIHERA WEERA MUNNAROROMELA MAREHERERO A YEHOVA

11. Moota heeni asitokweene a mmulokoni enooniheraaya weera ennaroromela mareherero a Yehova? (Nwehe efootu.)

¹¹ Mwa mukhalelo heeni asitokweene a mmulokoni enrowaaya woonihera weera ennaroromela mareherero a Yehova? Emaara enaakhelaaya miruku, asitokweene a mmulokoni ennasoma moomaaleleya ni ennapaka ele enweraaya weera evarihele muteko. Mwa ntakihero, ohiya paahi waakhela miruku woohima sa moota woopaka iparte mmuthukumanoni, ni moota woovekelela muloko, awo tho ennaakhela miruku woohima sa moota wookosoopa iputtiputthi sa Kristu. Vaavo asitokweene enttharaaya miruku enaakhelaaya mmarehereroni, asinna enniisoona okhala oosiveleya ni ookosoopiwa ni Yehova.

12. (a) Mwaha wa heeni nintthuneyaahu owiiwelelaka asinna ennihoolela? (Aheberi 13:7, 17) (b) Mwaha wa heeni nintthuneyaahu owehexexaka mikhalelo sooreera sa asinna ennihoolela mmarehereroni?

¹² Emaara nnaakhelaahu miruku sa asitokweene a mmulokoni, nintthuneya okhala oolikaneene weera ntthareke. Napaka eyo enimwaakhweihera asitokweene a mmulokoni ovara muteko aya woohoolela muloko. Biblya onnahima weera nikhaleke oowiiwelela ni oowiivaherera wa ale ennihoolela. (Mmusome Aheberi 13:7, 17.) Mene ikwaha ikina opaka eyo ti wooxupa. Mwaha wa heeni? Mwaha wooweera alopwana ala toohimalela. Mene wakhala weera ninwehexexa soottheka saya paahi, ohiya mikhalelo saya sooreera, veekhaikhai, nnimwaakhweihera amwiittani ahu. Moota heeni? Amwiittani ahu entthuna weera nihoveleke weera Yehova onnavarela muteko mareherero awe weera aneettihe. Wakhala weera ninweha soottheka sa asinna enhoolela muloko, nnookhalano miyuupuwelo soonanara woohima sa mareherero a Yehova ni khaninrowa ororomelaka. Etthu heeni nintthuneyaahu opaka weera noonelele ni osepa soowootha amwiittani ahu enhimaaya?

MUHAAHIYE ATTHU AKINA ETTEETTHEIHAKA OROROMELA WANYU MAREHERERO A YEHOVA

13. Moota heeni amwiittani a Muluku eneereraaya onanariha mareherero a Yehova?

¹³ Anamavaanyiha a Muluku enneerera weeriha itthu sooreera sa mmarehereroni mwa Yehova okhala ntoko soonanara. Mwa ntakihero, hiyo nooxuttera mBiblyani weera Yehova ontthuna weera ale emmukokhorela ekhaleke ootteela mwa mukhalelo wa weerutthuni wa mmuupuweloni, ni wa omunepani. Ni owo oohima weera mutthu ori poothe ompaka etthu yoonanara ni ohinttharuwa onookumihiwa mmulokoni. (1 Akor. 5:11-13; 6:9, 10) Mene okhala weera hiyo ninniiwelela nlamulo nno,  anamavaanyiha enhima weera khannaasivela atthu, ninnaathoriha nave khannaapwattha ale eri oovirikana ni hiyo.

14. Taani onkumihera soowootha mmarehereroni mwa Yehova?

¹⁴ Mmusuwele taani onkumihera otthara-tthariwa mareherero a Yehova. Satana Diabo, onkumihera soowootha woohima sa mareherero a Yehova. Owo, “tithi a wotha.” (Yoh. 8:44; Eph. 3:1-5) Nto hiyo khanintikhina vaavo nimmoonaahu satana aavarelaka muteko atthu weera ehime itthu soowootha woohima sa mareherero a Yehova. Ti yeeyo yeereñye ni Yesu ni akristu oopatxera.

15. Eheeni ahooleli a ittiini yaapankaaya ni Yesu vamoha ni atthareli awe?

¹⁵ Yesu mwaana a Muluku aari oomalela ni annapaka miriira sootikiniha. Mene nnaamweera vareene hiiho satana annaavarihela muteko atthu akina weera emwaramwareke soowootha woohima sa Yesu. Mwa ntakihero, ahooleli a ittiini yannaaleela atthu weera Yesu ‘oomola minepa soonanara mwa nsina na mutokweene a minepa soonanara.’ (Mar. 3:22) Vaavo Yesu aathorihiwaawe, ahooleli a ittiini yaamoothera Yesu weera owo anveeha Muluku ni yanneerera oweeriha atthu ovekela weera iiviwe. (Math. 27:20) Avinyaka vaavo atthareli a Yesu yaalaleeraaya mitthenka sooreera, amwiittani aya “yàtannya ni yànanariha mirima sa amalapo yìttanaka ni asinna.” (Mit 14:2, 19) A Sentinela a 1 a Dezembro a 1998 uulumaka woohima sa yoolepa ya Miteko 14:2, enre: “Ohiya paahi ohaakhulela mitthenka sooreera, anamavaanyiha aYuda, yanneeriha weera atthu ehaattittimiheke asinna yeerihaka weera atthu yaakhaleleke nthalu akristu.”

16. Eheeni nintthuneyaahu wuupuwelaka emaara nniiwaahu soowootha woohima sa mareherero a Yehova?

¹⁶ Satana onnavirelela omwaramwara soowootha. Mahikwaano ‘owo onnawoka  elapo yootheene.’ (Apok. 12:9) Wakhala weera nyuwo mohiiwa ittthu soowoothiwa woohima sa mareherero a Yehova ni asinna enhoolela muloko, muupuweleke weera amwiittani a Muluku yaamoothera tho Yesu ni atthareli awe eseekulu yoopatxera. Ntoko Biblya ohimmaawe, atthu yanwuuluma moonanara atthu a Muluku mahiku ala. (Math. 5:11, 12) Hiyo khaninkela waakhulela soowootha iyo, wakhala weera nnoomusuwela mutthu onkumihera. Ni napaka eyo, nnimwiikosoopa ni soowootha iyo. Etthu heeni nintthuneyaahu opaka weera niikosoope ni soowootha iyo?

17. Eheeni nintthuneyaahu opaka weera nsepe soohimmwa soowootha? (2 Timotheyo 1:13) (Nwehe-tho ekwaadru “ Muhireyeleke maaru soohimmwa soowootha.”)

¹⁷ Muhireyeleke maaru soohimmwa soowootha. Murummwa Paulo aahima miruku soowiiwanyeya woohima sa etthu nintthuneyaahu opaka emaara nniiwaahu soohimmwa soowootha. Owo aamuleela Timotheyo weera ‘aaleele atthu weera . . . ehireyeleke maaru soohimmwa soowootha’ nave weera ‘esepeke soohimmwa soowootha.’ (1 Tim. 1:3, 4; 4:7) Ekhaikhai weera mwaana ohinsuwela etthu pooti ottotta etthu vathi anhela mmwaano, mene muttu motokweene osuwenle woopiha waya khanrowa opaka eyo. Hiyo ninnasepa soohimmwa soowootha mwaha wooweera noomusuwela nnene sene taani onkumihera soowootha iyo. Hiyo nniiwelela paahi “masu a ekhaikhai.” — Mmusome 2 Timotheyo 1:13.

18. Moota heeni ninrowaahu woonihera weera ninnaroromela mareherero a Yehova?

¹⁸ Mwa yoosoma ene yeela, nonne paahi mikhalelo miraru sa moota mareherero a Yehova emmutakihaaya Yesu. Nto emaara mummusomaanyu Biblya nwehexexeke mikhalelo mikina sa moota hiyo ninttharaahu ntakihero na Yesu. Mwaakhavihere atthu akina a mmulokoni mwayu wiisoona okhala oottittimiheya ni oororomeleya mmarehereroni mwa Yehova. Nave munvareleke muteko Yehova moororomeleya mukhaviheraka mareherero awe yaawo onvarelaawe muteko weera apake yootthunaawe. (Nsal. 37:28) Ootheene hiyo nivireleleke ovaha mwiitti eparakha ela nraahuno yoovara vamoha ntoko muloko woowiiraana ni woororomeleya wa Yehova.