NGANI JAKULIJIGANYA 15
NYIMBO NA. 124 Tuŵeje Ŵakulupichika
Tujidalileje Mnope Gulu ja Yehofa
“Mwakumbuchileje ŵandu ŵakumlongolela jemanja, ŵele ŵakusamjiganya maloŵe ga Mlungu.”—AHEB. 13:7.
CHAKULINGA CHA NGANIJI
Yatukusosekwa kutenda kuti ndaŵi syosope tujichimbichisyeje soni kujidalila gulu ja Yehofa.
1. Ana ŵakutumichila ŵa Mlungu ŵatendaga yindu chamti uli mundaŵi ja ŵandumetume?
YEHOFA papeleche yakutenda kwa ŵandu ŵakwe, akusasaka kuti yitendekweje mwadongosolo. (1 Akoli. 14:33) Mwachisyasyo, chili chakulinga cha Yehofa kuti ngani syambone silalichidwe pachilambo chosope chapasi. (Mat. 24:14) Mwamti Yehofa ŵampele Yesu udindo wakulongolela masengoga. Nombe najo Yesu akusalolechesya kuti masengoga gakukamulidwa mwadongosolo. Mundaŵi ja ŵandumetume, achakulungwa ŵa mumpingo ŵaŵichidwe m’mipingo jakulekanganalekangana ni chakulinga chakuti alongoleleje yakutendekwa ya mumpingo. (Mase. 14:23) Ku Yelusalemu kwapali bungwe ja achakulungwa ŵa mumpingo jajapanganyidwe ni ŵandumetume nambosoni ŵandu ŵachikulile. Jemanjaji ŵasagulaga yindu yakuti ŵandu akuyeje m’mipingo mwamti ŵandu ŵasosekwaga kukuya yeleyo. (Mase. 15:2; 16:4) Ligongo lyakuti ŵandu ŵa pandaŵijo ŵapikanilaga malangiso gaŵapochelaga, “mipingo japitilisye kuŵa jakulimba m’chikulupi, soni chiŵalanjilo cha ŵandu chatupilagatupilaga.”—Mase. 16:5.
2. Ana Yehofa aŵele ali mkwalongolela soni kwapa chakulya chausimu ŵandu ŵakwe mwamti uli kutandila mu 1919?
2 Yehofa akupitilisya kujilongolela gulu jakwe masiku agano. Mwamti kutandila mu 1919, Yesu aŵele ali mkukamulichisya masengo kagulu kamwana ka achalume ŵasagulwe kuti kalongoleleje pa masengo gakulalichila nambosoni kupeleka chakulya cha usimu kwa ŵakumkuya ŵakwe. (Luk. 12:42) Kusala yisyene, Yehofa akujaliwa masengo ga kaguluka.—Yes. 60:22; 65:13, 14.
3-4. (a) Ana tukusapindula chamti uli patukutenda yindu mwadongosolo? (b) Ana chitukambilane chichi munganiji?
3 Yikaŵe kuti gulu jetu jangatenda yindu mwadongosolo, nikuti yikaliji yakusawusya kukamula masengo gatupele Yesu kuti tugakamuleje. (Mat. 28:19, 20) Agambe ganichisya yayikatendekwe yikaŵe kuti pangali dongosolo ja magawo gakulalichila, mwamti jwalijose ni kwambaga kulalichila kwakusaka. Yeleyi yikatendekasisye kuti magawo gane galalichidweje mwakuwilisyawilisya, pele gane ngamkanigalalichilidwa kwene. Alinje ganichisyasoni ya maumbone gane gatukusapata ligongo lyakutenda yindu mwadongosolo.
4 Yaŵatesile Yesu ali pachilambopa, yikusatukamuchisyasoni m’weji masiku agano kuti tutendeje yindu mwadongosolo. Munganiji, chitukambilane yaŵatendaga Yesu soni yajikutenda gulu jetu pakukuya chisyasyo chakwe. Chitukambilanesoni yampaka tutende pakulosya kuti tukusajidalila mnope gulu ja Yehofa.
GULU JETU JIKUSAKUYA CHISYASYO CHA YESU
5. Ana tukusalosya kuti tukukuya chisyasyo cha Yesu m’litala limo lyapi? (Yohane 8:28)
5 Yesu jwalijiganyisye kutyochela kwa Atati ŵakwe ŵa kwinani pa yampaka aŵechete soni kutenda. Pakukuya chisyasyo cha Yesuchi, gulu ja Yehofa jikusajiganya ya ndamo syambone soni kwalongolela ŵandu ŵa Mlungu pakamulichisya masengo Baibulo. (Aŵalanje Yohane 8:28; 2 Tim. 3:16, 17) Mwamti ndaŵi syosope tukusapochela malangiso gakutukumbusya kusosekwa kwa kuŵalanga soni kukamulichisya masengo Maloŵe ga Mlungu. Ana tukusapata umbone wamti uli patukukuya malangisoga?
6. Ana tukusapindula mnope chamti uli patukulijiganya Baibulo?
6 Tukusapata maumbone gejinji patukulijiganya Baibulo pakamulichisya masengo mabuku getu. Mwachisyasyo, tukusakombola kulandanya yajikusajiganya Baibulo ni malangiso gatukusapochela kutyochela ku gulu jetu. Patukuyiwona kuti malangiso gatukusapochela kutyochela ku gulu jetu gali gakamulana ndendende ni yajikusasala Baibulo, yikusatukamuchisya kuti tujikulupilileje mnope gulu ja Yehofa.—Alo. 12:2.
7. Ana Yesu jwalalichilaga utenga wamti uli soni gulu ja Yehofa jikusakuya chamti uli chisyasyo chakwe?
7 Yesu jwalalichilaga “ngani syambone sya Uchimwene wa Mlungu.” (Luk. 4:43, 44) Jwalakwe, jwalamwilesoni ŵakumkuya ŵakwe kuti alalichileje ya Uchimwene wa Mlungu. (Luk. 9:1, 2; 10:8, 9) Nombe masiku agano, ŵandu wosope ŵali mu gulu ja Yehofa akusalalichilaga ya Uchimwene wa Mlungu mwangajigalila ya malo gakutama kapena udindo wakwete mu guluji.
8. Ana tukwete masengo gakusosekwa mnope gapi?
8 Kusala yisyene, uli upile wekulungwa mnope kwasalila ŵane ya Uchimwene wa Mlungu. Masengo gelega nganagapeleka kwa jwalijose. Mwachisyasyo, Yesu pajwaliji pachilambopa, nganakunda kuti misimu jakusakala jimtendeleje umboni. (Luk. 4:41) Nombe masiku agano, mundu mkanatande kukamula nawo masengo gakulalichila yimpepe ni ŵandu ŵa Yehofa, chandanda akusasosekwa kuŵa jwakuŵajilwa kukamula nawo masengoga. Myoyo, mpaka tulosye kuyamichila upile welewu mwakukamula nawo masengoga kulikose soni mwampaka tukombolele. Mpela mwayaŵelele ni Yesu, chakulinga chetu chikusaŵa kupanda soni kwitilila mbeju sya Uchimwene wa Mlungu mmitima ja ŵandu.—Mat. 13:3, 23; 1 Akoli. 3:6.
9. Ana gulu ja Yehofa jikusalimanyikasya chamti uli lina lya Mlungu?
9 Yesu ŵalimanyikasisye lina lya Mlungu. Pandaŵi jine ali mkupopela kwa Atati ŵakwe ŵa kwinani, Yesu jwatite, “Une namanyisye jemanjaji lina lyawo.” (Yoh. 17:26) Pakujigalila chisyasyo cha Yesuchi, gulu ja Yehofa jikusatenda yiliyose yakomboleka pakwakamuchisya ŵane kumanyilila lina lya Mlungu. Guluji jitesile yeleyi mwakuliwuchisya lina lya Yehofa pamalo gakwe mu Baibulo ja Chilambo Chasambano ja Malemba Geswela. Mwamti apano Baibulo jeleji jikusimanikwa josope kapena tumbali twakwe mu yiŵecheto yakupunda 270. Pakuŵalanga mu kamtwe 1 soni kamtwe 2 mu Kabuku Kakamuchisya Pakulijiganya Maloŵe ga Mlungu, chachiyiwona yaŵatesile pakuwuchisya lina lya Mlungu mmalo gakwe m’Baibuloji. Nambosoni mu Yakumbesi C, yayikusasimanikwa m’Baibulo ja Chingelesi jakulijiganyila, yikusapeleka umboni wakupikanika chenene wakuti lina lya Mlungu likusasosekwa kuwonechela m’Malemba ga Chigiliki ga Chiklistu maulendo gakwana 237.
10. Ana alijiganyisye chichi kwa jwamkongwe jwakusatama ku Myanmar?
10 Mpela muŵatendele Yesu, m’wejisoni tukusalingalinga kwakamuchisya ŵandu ŵajinji kumanyilila lina lya Mlungu. Jwamkongwe jwine jwa yaka 67 jwa ku Myanmar jwalisile pajwamanyilile kuti Mlungu akwete lina. Jwalakwe jwatite, “Keleka kali kandanda paumi wangu kupikana kuti lina lya Mlungu lili Yehofa. Munjiganyisye chindu chakusosekwa mnope chele nganinalijiganyejepo paumi wangu.” Mpela muyaŵelele ni jwamkongweju kumanyilila lina lya Mlungu kukusikwakamuchisya mnope ŵandu ŵakwete mtima wambone.
APITILISYE KUJIDALILA MNOPE GULU JA YEHOFA
11. Ana achakulungwa ŵa mumpingo akusalosya chamti uli kuti akusajidalila gulu ja Yehofa? (Alole chiwulili.)
11 Ana achakulungwa ŵa mumpingo mpaka alosye chamti uli kuti akusajidalila mnope gulu ja Yehofa? Guluji pajipeleche malangiso achakulungwaŵa akusasosekwa kugaŵalanga mwakusamala soni kutenda yampaka akombole pakugakuya malangisogo. Mwachisyasyo, kupwatika pakupochela malangiso gakusala yampaka atende pakutendesya misongano ja mpingo nambosoni pakupeleka mapopelo gakwimila mpingo, jemanjaji akusapochelasoni malangiso gakusala yampaka atende pakusisamalila ngondolo sya Klistu. Achakulungwa ŵa mumpingo ŵakusakuya malangiso gosope gakutyochela ku gulu ja Yehofa akusiŵakamuchisya abale ni alongo kuyiwona kuti Yehofa akusiŵanonyela soni kwasamalila.
Achakulungwa ŵa mumpingo akusatukamuchisya kuti tudalileje malangiso gajikusapeleka gulu ja Yehofa (Alole ndime 11) a
12. (a) Ana ligongo chichi tukusosekwa kwapikanilaga ŵakusatulongolela? (Ahebeli 13:7, 17) (b) Ligongo chichi tukusosekwa kulolaga yindu yambone yakusatenda ŵandu ŵakusatulongolela?
12 Patupochele malangiso kutyochela kwa achakulungwa ŵa mumpingo tukusasosekwa kugapikanila ni mtima wosope. Patukutenda yeleyi tukusakamuchisya kuti abale ŵakutulongolela akalagaga pakukamula masengo gawo. Baibulo jikusatulimbikasya kuti twapikanileje ŵandu ŵakutulongolela. (Aŵalanje Ahebeli 13:7, 17.) Nambotu ndaŵi sine kutenda yeleyi mpaka kuŵe kwakusawusya. Yili myoyo ligongo lyakuti achalumeŵa ali ŵangali umlama. Nambope naga tukuganichisya mnope yakulepela yawo mmalo mwaganichisya yindu yakusatenda chenene tuchiŵa kuti tukwakamuchisya achimmagongo ŵetu. Tukuŵecheta yeleyi ligongo lyakuti patutandite kuganichisya mnope yakulepela ya achakulungwa ŵa mumpingo mpaka yitutendekasye kutanda kukayichila gulu ja Yehofa sonitu yeleyi ni yakusasaka achimmagongo ŵetu kuti tutendeje. Ana chichi champaka chitukamuchisye kuti tumanyilile soni kukana nganisyo syakulemwecheka sya achimmagongo ŵetu?
AKAKUNDAGA KUTI ŴANE ŴALEPELEKASYEJE KUJIDALILA MNOPE GULU JA YEHOFA
13. Ana achimmagongo ŵa Mlungu akusayitendekasya chamti uli yindu yambone yajikusatenda guluji kuwoneka mpela yakusakala?
13 Achimmagongo ŵa Mlungu akusalinga kuyitendekasya yindu yambone yajikusatenda guluji kuŵa mpela yindu yakusakala. Mwachisyasyo, tukusalijiganya m’Baibulo kuti Yehofa akusajembecheya kuti ŵakutumichila ŵakwe chaŵeje ŵaswela mwakuchilu, mundamo nambosoni mwausimu. Mwamti jwalakwe jwasasile kuti mundu jwalijose jwakutenda ndamo syakusakala soni ngakusaka kuchenga ndamo syakwesyo ngakusosekwa kuŵape mumpingo. (1 Akoli. 5:11-13; 6:9, 10) M’weji tukusapikanila lilamusi lya m’Malembali. Mwamti patukukuya malangiso gakwamba mundu jwamtyosyedwe, achimmagongo ŵetu akusatujimba magambo kuti tuli ŵakusakala soni ŵangali chinonyelo.
14. Ana ŵani ŵakusalongolela kuŵecheta ngani syaunami syakwamba gulu jetu?
14 Tummanyilileje jwakusalimbana ni gulu jetu. Satana ni jwakusiŵalimbikasya ŵane kuti asaleje ngani syaunami syakwamba gulu jetu. Jwalakwe akusatenda yeleyi ligongo lyakuti ali “msyene unami.” (Yoh. 8:44; Gen. 3:1-5) Myoyo tujembecheyeje kuti Satana chiŵakamulichisyeje masengo ŵandu pakusala ngani syaunami syakwamba gulu ja Yehofa. Mwamti yeleyi ni yayatendekwaga mundaŵi ja ŵandumetume.
15. Ana achimlongola ŵadini ŵamtendelaga yindu yamti uli Yesu soni ŵakulijiganya ŵakwe?
15 Mundaŵi ja ŵandumetume, ŵandu ŵaŵaliji kumbali ja Satana ŵasalaga yindu yaunami yakulekanganalekangana yakwamba yakusimonjesya yaŵatendaga Mwanache jwa Mlungu. Mwachisyasyo, achimlongola ŵadini ŵasalilaga ŵandu kuti machili gaŵakamulichisyaga masengo Yesu pakutyosya yiŵanda gatyochelaga kwa “jwakulamulila jwa yiŵanda.” (Maliko 3:22) Nambosoni Yesu paŵajimbidwaga magambo, achimlongola ŵadini ŵasasile kuti jwalakwe ali jwakwimuchila soni ŵalimbikasisye ŵandu kuti jwalakwejo awulajidwe. (Mat. 27:20) Pali papitile ndaŵi, ŵakumkuya ŵa Yesu paŵalalichilaga ngani syambone, ŵandu ŵaŵasisyaga jemanjaji “ŵasokonasisye nganisyo sya ŵandu ŵamitundu jine soni kwalimbikasya” jemanjajo kuti ŵalagasyeje Aklistuwo. (Mase. 14:2, 19) Mwakamulana ni lilemba lya Masengo 14:2, Sanja ja Mlonda ja Disemba 1, 1998 jasasile kuti, “Ŵandu ŵaŵasisyaga Aklistuŵa nganagambaga kukana utenga waŵalalichilaga, nambo ŵasalilagasoni ŵandu ŵane yindu yakogoya yakwamba jemanjajo nichakulinga chakuti akapikanilaga utenga wawo soni kuti ŵaŵenjeje.”
16. Ana tukusosekwa kukumbuchila chichi patupikene ngani syaunami?
16 Satana akupitilisyape kusala yindu yaunami mpaka lelo jino. Mwamti jwalakwe akupitilisya ‘kusokonasya chilambo chosope chapasi.’ (Chiw. 12:9) Papikene ngani syaunami syakwamba gulu jetu kapena abale ŵakulongolela, akumbuchileje yindu yangali chilungamo yaŵatesile achimmagongo wa Mlungu kwa Yesu soni kwa ŵandumetume. Yesu jwasasile kuti ŵandu chachalagasya ŵakutumichila ŵa Yehofa soni kusala yaunami yakwamba jemanjajo. Yeleyitu ni yayikutendekwa masiku agano. (Mat. 5:11, 12) Ngani syaunami syatukusapikana nganisiŵa situsokonasisye naga tukusamanyilila kwasikusatyochela soni naga tukusatendagapo yindu mwachitema. Ana mpaka tulichenjele chamti uli ku ngani syaunami syampaka tupikane?
17. Ana tukusosekwa kuŵambala kutenda chichi kuti ngani syaunami sikatusokonasya? (2 Timoteyo 1:13) (Alole libokosi lyakuti “ Ana Mpaka Aŵambale Chamti Uli Ngani Syaunami?.”
17 Akaneje ngani syaunami. Ndumetume Paulo jwapeleche malangiso gakupikanika chenene ga yampaka tutende patupikene ngani syaunami. Jwalakwe ŵamsalile Timoteyo kuti, “Ŵalekasye ŵandu ŵane . . kuti aleche kupikanila ngani syaunami” nambosoni kuti ‘aŵambaleje ngani syaunami.’ (1 Tim. 1:3, 4; 4:7) Aganichisye ayi: Mwanache mpaka alokote chindu chakunyalaya ni kuŵika kukamwa. Nambo mundu jwamkulungwa nganaŵa atesile yeleyi ligongo akusamanyilila kuti mpaka chimtendekasye kulwala. Tukusakana ngani syaunami ligongo lyakuti tukusamanyilila kwasikusatyochela. Myoyo kwende wosopewe ‘tupitilisye kugasunga chenene maloŵe gasyesyene.’—Aŵalanje 2 Timoteyo 1:13.
18. Ana mpaka alosye chamti uli kuti akusajidalila gulu ja Yehofa?
18 Tugambile kukambilana yindu yitatupe yajikusatenda gulu ja Yehofa pakumsyasya Yesu. Pakulijiganya Baibulo pajika alinjeje kupata yindu yine yajikusatenda gulu ja Yehofa pakujigalila chisyasyo cha Yesu. Ŵakamuchisyejesoni ŵandu ŵane mumpingo mwawo kuti ajidalileje mnope gulu ja Yehofa. Nambosoni apitilisye kulosya kuyamichila kwawo pakupitilisya kumtumichila Yehofa mwakulupichika soni kujidalila gulu jakwe pajikukwanilisya chakulinga cha Mlungu. (Sal. 37:28) Myoyo, kwende ndaŵi syosope tuyamichileje upile wakuŵa mu gulu ja Yehofa jajikwete ŵandu ŵakulupichika.
ANA MPAKA AJANJE ULI?
-
Ana ŵakutumichila ŵa Yehofa akusamsyasya Yesu m’matala gapi?
-
Ana mpaka tupitilisye chamti uli kulosya kuti tukusayamichila gulu ja Yehofa?
-
Ana tukusosekwa kutenda chichi patupikene ngani syaunami?
NYIMBO NA. 103 Ŵakuchinga Ali Mituka mwa Achalume
a KULONDESYA CHIWULILI: Panyuma pakuti achakulungwa ŵa mumpingo akambilene ya dongosolo jakulalichila pa malo gakusimanikwa ŵandu ŵajinji, jwakulolela kagulu akwasalila ŵakulalichila kuti pakulalichila pa malo gakusimanikwa ŵandu ŵajinji ajimeje mwakuŵandikana ni lipupa.
