1. Uw rogon ni un yarmiy e girdi’ rok Jehovah ko bin som’on e chibog?

 NAP’AN nra pi’ Jehovah reb e maruwel ko girdi’ rok, ma baadag ni ngar rin’ed u reb e kanawo’ nib yaram. (1 Kor. 14:33) Bod nib m’agan’ ngay ni ngan machibnag fare thin nib fel’ u ga’ngin yang e fayleng. (Matt. 24:14) Ke tay Jehovah Jesus ni ir e nge yarmiy rogon ni ngan rin’ e re maruwel ney. Ma kki guy Jesus rogon ni ngan rin’ u reb e kanawo’ nib yaram. Nap’an ni yibe sunmiy boch e ulung u boch e binaw nib thilthil u nap’an e bin som’on e chibog, ma aram mu un dugliy boch e pumoon ni ngar manged piilal ni nga u rogned e thin u lan e ulung. (Acts 14:23) Immoy ba ulung u Jerusalem ni yad boch e apostal nge piilal ni yad ma dugliy boch ban’en ni nge fol urngin e ulung riy. (Acts 15:2; 16:4) Bochan ni i fol e ulung ko fonow ni ur pied, ma aram “mi i gel i yan e michan’ rok girdien e galesiya ma yad be yoor i yan.”​—Acts 16:5.

2. Uw rogon ni be pow’iy Jehovah e girdi’ rok ma be pi’ e ggan ngorad ni fan ko tirok ban’en ni ka nap’an e duw ni 1919?

² Ka be ulul Jehovah ni nga i yarmiy e girdi’ rok e ngiyal’ ney. Ka nap’an e duw ni 1919 ni be fanay Jesus bochi ulung i pumoon ni kan dugliyrad ni ngar yarmiyed fare maruwel ni machib mar pied e ggan ni fan ko tirok Got ban’en ngak pi gachalpen. a (Luke 12:42) Ere ba tamilang ni be ayuwegrad Jehovah ni nge yib  angin e maruwel ni yad be rin’.​—Isa. 60:22; 65:​13, 14.

3-4. (a) Mu weliy reb e kanawo’ ni be dag rogon angin nra yib ngodad ni faanra gad ba yaram. (b) Mang e gad ra weliy ko re article ney?

³ Faanra dad yaramgad, ma dabiyog ni ngad rin’ed e maruwel ni ke pi’ Jesus ngodad ni ngad rin’ed. (Matt. 28:​19, 20) Bod ni faanra dawor ni dugliy e gin ngad machibgad riy, ma gubin e walag nrayog ni ngar machibgad ko gin yad baadag. Rayog ni nga yug un sul ngaun machib u taa bogi binaw, min digey boch ndab ni machib riy. Faanra gad ba yaram, ma mang boch e kanawo’ ni ka ga be lemnag nra yib angin riy ngodad?

⁴ N’en ni i rin’ Jesus u nap’an ni immoy u fayleng e ku be dag rogon ni be yarmiydad e ngiyal’ ney. Gad ra weliy e n’en ni rin’ Jesus ko re article ney nrayog ni ngad folwokgad riy nge rogon ni ma folwok e ulung rodad ko n’en ni i rin’. Ku gad ra weliy rogon nrayog ni ngad daged nib ga’ fan e ulung rok Jehovah u wan’dad.

ULUNG RODAD E MA FOLWOK ROK JESUS

5. Mang reb e kanawo’ ni gad ma folwok rok Jesus riy? (John 8:28)

⁵ I fil Jesus rok e Chitamangin ni bay u tharmiy e n’en nge rin’ nge n’en nge yog. Ma guy e ulung rok Jehovah rogon ni nge puluw e pi n’en yad ma machibnag u murung’agen e ngongol ni ngan rin’ nge fonow ni yad ma pi’ ko Thin rok Got ni bod e n’en ni i rin’ Jesus. (Mu beeg e John 8:28; 2 Tim. 3:​16, 17) Gubin ngiyal’ ni yima puguran ngodad ni ngaud beeged e Thin rok Got ma gad be fol riy. Mang angin ni ma yib ngodad ni bochan e gad ma fol ko re fonow ney?

6. Faanra ud filed e Bible, ma mang reb e kanawo’ nib ga’ fan nra yib angin ngodad?

⁶ Nap’an ni gad ra fil e Bible ni gad be fanay boch e babyor rodad ni kan ngongliy, mab ga’ angin ni ma yib ngodad. Bod ni aram rogon ni gad ma taarebrogonnag e n’en be yog e Bible ko fonow ni be yib ngodad ko ulung. Nap’an ni gad ra guy nib puluw e fonow ni yibe pi’ ngodad ko n’en be yog e Bible, ma ri ma gel e pagan’ rodad ko ulung rok Jehovah.​—Rom. 12:2.

7. Mang e i machibnag Jesus murung’agen, ma uw rogon ni ma folwok e ulung rok Jehovah ko n’en ni i rin’?

⁷ I machibnag Jesus “fare Thin Nib Fel’ ni murung’agen e gagiyeg rok Got.” (Luke 4:​43, 44) Ki tay chilen ngak pi gachalpen ni ngar machibnaged murung’agen e re Gagiyeg nem. (Luke 9:​1, 2; 10:​8, 9) Ngiyal’ ney e ma machibnag urngin e girdi’ u lan e ulung rok Jehovah murung’agen e gagiyeg rok Got ni yugu demtrug e gin yad ma par riy ara urngin e maruwel nib milfan ngorad.

8. Mang tow’ath e kan pi’ ngodad?

⁸ Gad ba tow’ath nrayog ni ngad uned i weliy e tin riyul’ u murung’agen Gil’ilungun Got ko girdi’! Gathi gubin e girdi’ ni bay e biney e tow’ath rorad. Bod nnap’an ni immoy Jesus u fayleng ma da i pag e pi moonyan’ ni ngar weliyed murung’agen. (Luke 4:41) Ngiyal’ ney e u m’on ni nge un be’ ko girdi’ rok Jehovah ko machib, ma thingari puluw e ngongol rok ko n’en nib m’agan’ Jehovah ngay. Gad ma dag rogon feni ga’ fan e re tow’ath ney u wan’dad ni aram e gad ma machib ko gin nrayog ni ngad machibgad riy nge ngiyal’ nrayog ni ngad machibgad. Ere gad ma athamgil u rogon nrayog rodad ni ngad machibnaged e girdi’ ma gad fil e tin riyul’ ngorad ya gad baadag ni ngad boded Jesus.​—Matt. 13:​3, 23; 1 Kor. 3:6.

9. Uw rogon ni ma weliy e ulung rodad fithingan Got ngan nang?

⁹ I weliy Jesus fithingan Got ni ngan nang. Nap’an ni be meybil ngak e Chitamangin ni bay u tharmiy, me yog ni gaar: “Kug weliy murung’agem [“fithingam,” NW] ngorad kar nanged gur.” (John 17:26) Ma rin’ e ulung rok Jehovah urngin ban’en nrayog rorad ni ngar ayuweged e girdi’ ni ngar nanged fithingan Got ni bod e n’en ni i rin’ Jesus. Reb e kanawo’ ni ke rin’ e ulung rok Got e re n’ey riy e u daken fare Bible  ni New World Translation of the Holy Scriptures. Re ke Bible ney e kan sulweg fithingan Got riy kan tay ko yungi n’en ni immoy riy aram ko som’on. Ba pag 270 mit e thin ni kan pilyeg e re Bible ney riy ni boch e kan fal’eg nib polo’ ma boch e kemus ni bang riy. Guruy ni 1 nge 2 ko fare babyor ni Boch Ban’en Nra Ayuwegdad u Nap’an e Fol Bible e be weliy fan nge rogon ni kan sulweg fithingan Got nga lan e re ke Bible ney. Appendix C ko fare Study Bible e ku be weliy boor ban’en ni be micheg nsusun e 237 yay ni nge m’ug fithingan Got u lan e Pi Babyor ko Bible nni Yoloy Nsom’on ni Thin ni Greek.

10. Mang e ga be fil ko n’en ni yog be’ nib pin ni ma par u Myanmar?

¹⁰ Gad baadag ni ngad ayuweged urngin e girdi’ nrayog ni ngar nanged fithingan Got ni bod e n’en ni rin’ Jesus. Nap’an ni fil be’ nib pin u Myanmar ni 67 e duw rok ni bay fithingan Got, ma aram me yor me gaar: “Fin aray e som’on u lan e yafos rog ni kug rung’ag ni Jehovah fithingan Got. . . . Kam fil ngog e n’en nth’abi ga’ fan nrayog ni nggu fil.” Gad be guy ko re n’ey ni buch nnap’an nra fil e girdi’ fithingan Got ma rayog ni nge thilyeg e yafos rorad!

NGAUD DAGED NI BE PAGAN’DAD KO ULUNG RODAD

11. Uw rogon nrayog ni nge dag e piin piilal ni be pagan’rad ko ulung rok Jehovah? (Kum guy e sasing.)

¹¹ Mang reb e kanawo’ nrayog ni nge dag e piin piilal riy ni be pagan’rad ko ulung rok Got? Nap’an ni yira pi’ e babyor ngorad ni be yog e n’en ngan rin’, mab t’uf ni ngar fal’eged i beeg mar folgad ko n’en be yog u rogon nrayog rorad. Bod ni gathi kemus ni yima yog ngorad rogon ni ngar pied e welthin rorad u nap’an e muulung nge rogon ni ngaur meybilgad ni fan ko ulung, ya ku yima yog ngorad rogon ni ngar ayuweged e pi saf rok Kristus. Piin piilal ni yad ma fol ko yaram ni ma pi’ e ulung rodad e yad ma ayuweg e pi walag ni nge pagan’rad mar nanged ni yibe t’ufegrad.

12. (a) Mang fan nsusun e ngad folgad ko piin yad ma yog e thin rodad? (Hebrews 13:​7, 17) (b) Mang fan nsusun e ngaud sapgad nga fel’ngin e piin yad ma yog e thin rodad?

¹² Nap’an nra yog e piin piilal e n’en ngad rin’ed ma susun e nge m’agan’dad ngay ni ngad folgad riy. Faan gad ra rin’ e re n’ey, ma aram e gad ra momnag ngorad ni ngar rin’ed e maruwel rorad. Be pi’ e Bible e athamgil nga lanin’dad ni ngad folgad ko piin yad ma yog e thin rodad. (Mu beeg e Hebrews 13:​7, 17.) Bay yu ngiyal’ nrayog ni nge mo’maw’ e re n’ey. Mang fan? Ya pi pumoon ney e dawor ra flontgad. Machane faanra ud sapgad nga thibngirad ko bin ngaud sapgad nga fel’ngirad, ma aram e gad be ayuweg e pi toogor rodad. Ni uw rogon? Ra war e pagan’ rodad ko ulung rok Got, ni aram e n’en ni baadag e pi toogor rodad ni nge buch rodad. Ere mang e rayog ni ngad rin’ed ya nge yag nda nanged e pi ban rok e pi toogor rodad ma gad siyeg?

DAB MU PAG BOCH E GIRDI’ NI NGAR WARNAGED E PAGAN’ ROM KO ULUNG RODAD

13. Uw rogon ni ke guy e pi toogor rok Got rogon ni nge m’ug nib kireb e ulung rok?

¹³ Ma guy e pi toogor rok Got rogon ni nge m’ug ni gowa ba kireb e pi n’en nib fel’ ni be rin’ e ulung rok. Bod ni kad filed u Bible ni baadag Jehovah ni nge par e pi tapigpig rok nib beech dowrad, nge ngongol rorad, nge liyor rorad. Ba m’agan’ ngay ni ngan chuweg be’ ko ulung nder kalngan’ ko ngongol nib kireb ni be rin’. (1 Kor. 5:​11-13; 6:​9, 10) Gad ma fol ko re motochiyel ney ni bay u Bible. Machane pi toogor rodad e yad ma guy rogon ni ngar fanayed e re n’ey ni nga rogned nde t’uf e girdi’ rodad ma dabi fel’ be’ u wan’dad nib thil rarogon ngodad.

14. Mini’ e be tay tanggin e pi ban ni yibe wereg u murung’agen e ulung rodad?

¹⁴ Ngam nang e en nri ir e be togopuluw ngodad. Satan ni Moonyan’ e ir e be tay tanggin e pi ban ney. Ir “chitamangin urngin e malulifith.” (John 8:44; Gen. 3:​1-5) Ere gad manang nra fanay  e piin yad ba mang ngak ni ngar wereged boch e ban u murung’agen e ulung rok Jehovah. Ireray e n’en ni buch ko bin som’on e chibog.

15. Mang e rin’ e pi tayugang’ ko teliw ngak Jesus nge pi gachalpen?

¹⁵ Nap’an e bin som’on e chibog ma i fanay Satan boch e girdi’ ni ngar wereged boch ban’en nde riyul’ u murung’agen Fak Got ni ir be’ nib flont ni i ngongliy e maang’ang. Bod ni i yog e pi tayugang’ ko teliw ko girdi’ ni en ir “Pilungen e moonyan’” e be pi’ gelngin Jesus ni nge tuluf e pi moonyan’. (Mark 3:22) Nap’an ni yibe pufthinnag Jesus me yog e pi tayugang’ ko teliw ni be darifannag Got mar ted yad ko girdi’ ni ngan thang e fan rok. (Matt. 27:20) Boch nga tomuren u nap’an ni be machibnag pi gachalpen Jesus fare thin nib fel’ me non e piin ur togopuluwgad ko girdi’ ni “ngar pired ni kar damumuwgad” ngak e pi Kristiano nem mar gafgownaged yad. (Acts 14:​2, 19) Be weliy Fare Wulyang Ntagil’ E Damit ko June 1, 1999 murung’agen e Acts 14:2 ni be gaar: ‘Pi Jew e gathi kemus ni ur togopuluwgad ko fare thin nib fel’ ya kur dugdugthingad, mar guyed rogon ni nge dabuy e piin gathi yad e Jew daken e pi Kristiano.’

16. Mang e susun ndab da paged talin ni faanra kad rung’aged boch ban’en nde riyul’ ni yibe weliy?

¹⁶ Ka be ulul Satan ni nga i bannag e girdi’ e ngiyal’ ney. Ka be “bannag e girdi’ nu fayleng ni polo’.” (Rev. 12:9) Faanra kam rung’ag boch ban’en nib kireb ni yibe weliy u murung’agen e ulung rodad ara pi walag ni pumoon ni yad ma yog e thin rodad, ma dab mu pagtalin e n’en ni i rin’ e pi toogor rok Got ngak Jesus nge pi gachalpen ko bin som’on e chibog. Ngiyal’ ney e yibe gafgownag e girdi’ rok Jehovah ma yibe yog boch ban’en nde riyul’ u murung’agrad ni bod rogon ni yiiynag e Bible. (Matt. 5:​11, 12)  Faanra gad manang e gin ke yib e pi ban ney riy ma gad be guy rogon ni ngad ayuweged gadad riy, ma aram e dabi mich u wan’dad. Ere uw rogon nrayog ni ngad ayuweged gadad?

17. Uw rogon ni nge dabi magawonnagdad boch ban’en ni yima weliy nde riyul’? (2 Timothy 1:13) (Kum guy fare kahol ni kenggin e “ Nap’an ni Kad Rung’aged Boch Ban’en Nde Riyul’.”)

¹⁷ Mu siyeg boch ban’en ni yima weliy nde riyul’. Ba tamilang e n’en ni yog apostal Paul ni ngad rin’ed ni faanra kad rung’aged boch ban’en nde riyul’ ni yibe weliy. I yog ngak Timothy ni nge yog ngak boch e girdi’ u lan e ulung ndab kur motoyilgad ko “pi yat” ma ngar ‘tiyed yad u urel ko yat ni gathi murung’agen Got ndariy fan ni ngan weliy.’ (1 Tim. 1:​3, 4; 4:7) Yugu aram rogon ni yugu rayog ni nge fek bochi tir ni kab achig ban’en u but’ nge yon’ nga lan l’igin, machane be’ ni ke piilal e dabi rin’ e re n’ey ni bochan e manang ni bay e riya’ riy. Gad ma siyeg boch ban’en ni yima weliy nde riyul’ ni bochan e gad manang e en ke yib e pi n’em rok. Kemus ni yigoo “thin nib riyul’” e gad ma motoyil ngay.​—Mu beeg e 2 Timothy 1:13.

18. Uw rogon ni ngad daged ni be pagan’dad ko ulung rok Jehovah?

¹⁸ Ulung rok Got e boor e kanawo’ ni yad ma folwok rok Jesus riy, machane kemus ni dalip riy e kad weliyed. Nap’an ni ga be fil e Bible, mag tay fanam i yan u yugu boch e kanawo’ ni ku ma folwok e ulung rodad riy ko n’en ni rin’ Jesus. Mu ayuweg yugu boch e girdi’ ko ulung rom ni ngari pagan’rad ko ulung rodad. Mu kum ulul ni ngam dag ni be pagan’um ko ulung rodad ni aram e ngam pigpig ngak Jehovah u fithik’ e yul’yul’ mag par ni gab chugur ko re ulung ni be fanay ni nge lebguy e n’en nib m’agan’ ngay. (Ps. 37:28) Manga yigi par nib ga’ fan u wan’dad e tow’ath ni bay rodad ni kad manged boch e girdi’ rok Jehovah ni yad ma dag e t’ufeg ma yad ba yul’yul’.