DISOLO DI NDONGOKOLO 15
NKUNGA 124 Tótikala sembo
Kindisa sikididi kiaku mu khubukulu yi Yehova
“Lutebukilanga moyo mintuadisi mieno mi kululonganga mambu ma Nzambi.”—EBE. 13:7.
MAMBU MO MADI MU KHATI DISOLO DIADI
Phila yi kindisila ayi phila yi tatiminina bela sikididi mu khubukulu yi Yehova.
1. Bue bisadi bi Yehova bibela bikubuku mu tandu kitheti?
KADIKA khumbu Yehova keta vana batu bandi biyeko, weta tomba babidukisa mu phila yifuana. (1 Ko. 14:33) Mu kifuani, luzolo lu Nzambi luidi ti nsamu mboti wusamunu mu ntoto woso widi batu. (Mat. 24:14) Yehova wuvana Yesu kiyeko ki kisalu beni. Yesu wutula ti kisalu beni kisalama mu phila yifuana. Mu tandu kitheti bo bimvuka biyiza ba mu bibuangu biwombo, bakulutu basobolo muingi babituadisa. (Mav. 14:23) Ku Yelusalemi kuawu kuba mintuadisi, kuba na bathumu ayi bakulutu, bawu beba bakanga zinzengolo zio bimvuka bioso bieba tumukinanga. (Mav. 15:2; 16:4) Bo bimvuka beni bieba tumukinanga zithumunu zio bieba bakanga, “biba bikinda mu minu ayi thalu yi batu yibuelama.”—Mav. 16:5.
2. Tona mu mvu 1919, bue Yehova katuvanina lutuadusu ayi bidia bi kipheve?
2 Buba phe lumbu kiaki, Yehova wulembo tatamana phe kubika bisadi biandi. Tona mu mvu 1919, Yesu wusadila mua dingumba di batu bo batulu mafuta mu kipheve, muingi bakubika kisalu ki tsamununu ayi bavana bidia bi kipheve kuidi balonguki bandi. a (Luka 12:42) Mu kondo finda phaka, Yehova wulembo sakumuna kisalu ki mua dingumba beni.—Yes. 60:22; 65:13, 14.
3-4. a) Vana kifuani kio kimmonisa mamboti mo tulembo baki bo tuidi bakubuku. b) Mbi tueka ntadila mu disolo diadi?
3 Enati tuisi ko bakubuku, nginu tulendi ko nunga sala kisalu kio Yesu katuvana. (Mat. 28:19, 20) Yindula theti, mu kifuani, enati batukabudilanga ko ziterituare; nginu mutu kalenda kuandi kue samuna koso kuandi ko katidi. Tulenda samuna mu ziterituare zinkaka mu zikhumbu ziwombo vayi tulenda kambu phe samuna mu ziterituare zinkaka. Wulenda yindula ziphila zinkaka zio tueta bakila mamboti ma khubukulu?
4 Bobuawu Yesu kakubikila balonguki bandi mu thangu kaba va mbata ntoto, wulembo tatamana phe kubika bisadi bi Nzambi lumbu kiaki. Mu disolo diadi, tueka ntadila kifuani kio Yesu kamonisa ayi phila yoyi khubukulu’eto yeta landikinina kifuani beni. Matu bue tadila phe phila yo tulenda monisina ti tueta yangalala khubukulu yi Yehova.
KHUBUKULU’ETO YETA LANDAKANA KIFUANI KI YESU
5. Phila mbi tueta landikinina kifuani ki Yesu? (Yowani 8:28)
5 Yesu wulonguka kuidi Disa diandi di mazulu mambu mo kafueti vanga ayi phila yo kafueti tubila. Khubukulu yi Yehova yeta landakana kifuani ki Yesu mu sadila Mbembo yi Nzambi muingi yitusadisa tuzaba diambu dimboti ayi diambu dimbimbi ayi muingi yitutuadisa mu luzingu lueto. (Tanga Yowani 8:28; 2 Tim. 3:16, 17) Thangu ka thangu beta tubambula moyo mu tanga ayi mu sadila mambu mo madi mu Mbembo Nzambi. Mamboti mbi tueta baka mu landakana ndongi beni yoyi?
6. Phila mbi yimfunu yo tueta bakila mamboti ma ndongokolo yi Bibila?
6 Tueta luta baka mamboti ma ndongokolo yi Bibila mu sadila minkanda mieto mi Bukristu. Mu diawu, tueta ba bafuana mu dedikisa malongi ma Bibila na lutuadusu lo tueta baka mu khubukulu. Mu thangu tueta mona ti lutuadusu lo tueta baka mu masonoko lubedi, sikididi kieto mu khubukulu yi Yehova kieta yonzuka.—Loma 12:2.
7. Tsangu mbi Yesu kasamuna, ayi bue khubukulu yi Yehova yeta landikinina kifuani kiandi?
7 Yesu wusamuna “nsamu mboti wu Kipfumu ki Nzambi.” (Luka 4:43, 44) Mu buela, Yesu wutuma diaka balonguki bandi basamuna nsamu beni wumboti wu Kipfumu ki Nzambi. (Luka 9:1, 2; 10:8, 9) Lumbu kiaki phe baboso bo badi mu khubukulu yi Yehova beta samuna nsamu mboti wu Kipfumu ki Nzambi buba koso kuandi ko beta vuanda ayi buba biyeko bio bidi yawu.
8. Lukumu mbi batuveni?
8 Tueta mona ti samunina batu bankaka nsamu mboti wu Kipfumu ki Nzambi didi diluaku dimboti! Diluaku beni disi vanu ko kuidi kadika mutu. Mu kifuani, mu thangu Yesu kaba va mbata ntoto, kasi bikila ko nsua kuidi zipheve zimbimbi mu diambu diandi. (Luka 4:41) Lumbu kiaki, tuamina mutu kabima mu kisalu ki tsamunu ayi Bambangi zi Yehova, kafueti zingila phila yoyi Yehova katididi. Tueta monisa ti tueta yangalala diluaku dio tuidi di samuna, mu thangu tulembo tembikisa nsamu beni voso kuandi ayi buba thangu mbi mu landakana maluaku meto. Banga kuandi Yesu, lukanu lueto luidi lukuna ayi lubondikila kiedika ki Kipfumu mu mintima mi Batu.—Mat. 13:3, 23; 1 Ko. 3:6.
9. Bue khubukulu’eto yeta zabikisila dizina di Nzambi?
9 Yesu wuzabikisa dizina di Nzambi. Mu lusambulu Yesu wukamba siandi di mazulu ti: “Minu ndibazabikisa dizina diaku.” (Yow. 17:26) Khubukulu yi Yehova yeta sokudila kifuani ki Yesu mu zabikisanga kuidi bankaka dizina di Nzambi. Bibila Libongoli ya mokili ya sika kivutula dizina di Nzambi mu bibuangu biobi diba. Mbangudulu beni lumbu kiaki yidi mu 270 yi zimbembo. Mu Apandise A4 ayi A5 yi mbangudulu beni, wela mona mambu mawombo mo matula bavutula dizina di Nzambi mu Bibila. Apandise C, yo yidi mu Bibila ki ndongokolo, yimonisini bidimbu biwombo ti dizina di Nzambi difueti ba mu masonoko ma Ngeleki ma Bukristu mu 237 ki zikhumbu.
10. Dilongi mbi beki mu ziphova zi nketo nio wukala ku Myanmar?
10 Banga Yesu, tutidi sadisa batu bawombo bazaba dizina di Nzambi. Bo kayiza zaba ti Nzambi dizina kadi, nketo mosi nio widi 67 ki mimvu, nio wukala ku Myanmar wudila ayi wutuba ti: “Yawu yayi khumbu yitheti mu luzingu luama loso ndime wa ti dizina di Nzambi, Yehova. . . . Me kundongisa diambu dimosi dilutidi mfunu mu mamoso momo ndilenda longuka.” Banga phila tume dimuena mu disolo diadi, longisa batu dizina di Nzambi, kulenda ba na lulendo lungolo kuidi batu bo badi mintima mifuana.
TATAMANA MONISA PHUTUDULU MATONDO MU KHUBUKULU’ETO
11. Bue bakulutu balenda monisina phutudulu matondo mu khubukulu yi Yehova? (Tala phe foto.)
11 Mu phila mbi bakulutu balenda monisina phutudulu matondo mu khubukulu yi Yehova? Mu thangu babeki zithumunu zio zibedi mu khubukulu yi Yehova, bakulutu bafueti kuzitanga bumboti mboti ayi sadila mambu beni mu landakana maluaku mawu. Mu kifuani, beta baka lutuadusu, bika kaka phila yitudila masolo ayi sambila mu kimvuka, vayi phe mu tanina mamemi mangana ma Kristu. Bakulutu bobo beta landakana lutuadusu lu khubukulu yi Yehova beta sadisa batu bobo badi kutsi lutuadusu luawu bakimona ti badi mu lutanunu ayi beta bazola.
Bakulutu beta tusadisa tutula diana mu lutuadusu lolo khubukulu yi Yehova yeta tuvana (Tala paragrafi 11) b
12. a) Bila mbi tufueti sadila kithuadi ayi batu bo balembo tuadisa kimvuka? (Ebelewo 13:7, 17) b) Bila mbi tufueti luta tadilanga bikadulu bimboti bi batu bo balembo tutuadisa?
12 Mu thangu bakulutu batuveni zithumunu, tufueti zilandakana ayi kuzisadila mu ntima woso. Beto kubutudila, matu lembika kisalu ki batu bobo balembo tutuadisa. Bibila kilembo tukindisa tutumamana ayi zitisa batu bobo balembo tutuadisa. (Tanga Ebelewo 13:7, 17.) Thangu zinkaka yilenda ba phasi mu kubutudila. Bila mbi? Bila batu beni bo bakututuadisa badi batu bakondo lunga. Vayi beto luta tula thalu mu zinzimbala ziawu va buangu ki tula thalu mu mambu mawu mamboti, yawu yilenda tula ti tubalenda. Mu phila mbi? Tuela sie bue tudila ko khubukulu yi Nzambi ntima ayi buawu bambeni zieto beta tombila. Mbi tufueti tula muingi tubakula ayi tumanga luvunu lu bambeni zieto?
KADI BIKILA MUTU NZILA KAVONGISA VOTI MU KONDO BUE TUDILA KHUBUKULU YI YEHOVA NTIMA
13. Bue zimbeni zi Nzambi bedi katombila botudila luma lu khubukulu’andi?
13 Zimbeni zi Nzambi zieta tomba balula mambu mamboti mo khubukulu yi Yehova yeta vanga mu mambu mambimbi. Mu kifuani, masonoko meta tumonisa ti Yehova weta tia ti batu bobo bakunsadila baba bavedila mu nitu, mu mayindu ayi mu kipheve. Ayi tubidi ti, nioso mutu wuntatamana vanga mambu mambimbi ayi mengi balula ntima, kafueti bimusu mu kimvuka. (1 Ko. 5:11-13; 6:9, 10) Tueta tumukina lutumu beni lu Bibila. Vayi bila tueta zitisila lutumu beni, kidi ti bambeni zieto beta tuba ti mambu mangolo tukala, tueta basambisa ayi tukikininanga ko nioso mutu widi disuasanu ayi beto.
14. Nani tho yi masolo ma luvunu momo beta tubila mu khubukulu yi Yehova?
14 Tomba zaba tho yi nioni wukutunuanisa. Satana niandi widi kumanima ma masolo ma luvunu. Niandi “Dise di luvunu.” (Yow. 8:44; 1 Mose 3:1-5) Tufueti zaba ti Satana weta sadila batu bandi mu vunina khubukulu yi Yehova mambu. Buawu phe bubela kuidi Yesu ayi kuidi Bakristu ba tandu kitheti.
15. Bapfumu zi mabundu mbi batula Yesu ayi balonguki bandi?
15 Mu tandu kitheti, batu ba Satana batuba luvunu mu bikumu biduka bio Muana Nzambi Yesu keba vanganga. Mu kifuani, bapfumu zi mabundu batuba ti Yesu mu lulendo lu “pfumu yi zipheve zimbimbi” keba kukilanga zipheve zimbimbi. (Mlk. 3:22) Vayi mu thangu beba sambisa Yesu, bapfumu zi mabundu bamfunda ti niandi mefinga Nzambi ayi basindisila nkangu wu batu muingi batomba lufua lu Yesu. (Mat. 27:20) Kumanima, mu thangu minlonguki mi Kristu beba samuna nsamu mboti, bambeni ziawu “bakambisila ayi babivisa mayindu ma bapakanu” mu diambu di ba bayamisa. (Mav. 14:2, 19) Mu tadila Mavanga 14:2, Nzo yi Nkengidi wu 1 Decembre 1998 wusudikisa ti: “Batu bobo baba kumanima ma Satana bamanga kikinina tsangu yoyi bakristu babe longa ayi batuba mambu matsisi mu diambu diawu muingi batu babika kubawa ayi ba balenda.”
16. Diambu mbi tufueti bambukila moyo enati tuwilu masolo ma luvunu?
16 Satana kasi sukila ko kaka vuna batu mu tandu kitheti. Ayi lumbu kiaki phe wulembo tatamana “vukumuna batu mu nza yoso yimvimba.” (Tso. 12:9) Enati wilu masolo mambimbi voti maluvunu mo matadidi khubukulu yi Yehova voti mu diambu di bakhomba bobo beta tuadisa, bambuka moyo phila bambeni zi Nzambi bavangila Yesu ayi balonguki bandi mu tandu kitheti mambu. Lumbu kiaki bisadi bi Yehova balembo zomu ayi balembo vununu mambu bobuawu bobo phila Bibila ki mabikudila. (Mat. 5:11, 12) Tuedi kikinina ko masolo maluvunu enati tusudikidi kuidi nani meta ba ayi enati tufikidi vanga diambu mu kukitanina. Nzengolo mbi buabu tufueti baka?
17. Bue tulenda nungina manga masolo mambimbi? (2 Timote 1:13) (Tala diaka enkadre “ Bue buvangila mambu beto wa masolo ma luvunu.”)
17 Manga masolo ma luvunu. Mvuala Polo tubidi bumboti mboti mambu mo tufueti vanga ti tuwilu masolo ma luvunu. Wukamba Timote “ti kalubula batu bankaka babika . . . tula thalu mu masolo ma luvunu” ayi “baloza zinongo zi buvungisi.” (1 Tim. 1:3, 4; 4:7) Yindula theti mu diambu diadi, muana nio wulembo tamvuna kalenda tula kima kio kidi kheni mu munu’andi vayi nkulutu kedi kubutudila ko bila wulembo sudika ti kilenda kumvanga phasi voti kilenda kum’bedisa. Tueta loza malongi ma luvunu bila tuzebi kue meta ba. Vayi tueta ‘simbidila bumboti mambu makiedika.’—Tanga 2 Timote 1:13.
18. Bue tulenda monisina ti tuidi na phutudulu matondo mu khubukulu yi Yehova?
18 Mu disolo diadi tume tadila mambu matatu mo mammonisa phila khubukulu yi Nzambi yeta sokudila kifuani ki Yesu. Mu thangu wulembo longuka Bibila, tomba zaba diaka ziphila zinkaka ziwombo zio khubukulu yi Nzambi yilembo sokudila kifuani ki Yesu. Sadisa batu bankaka mu kimvuka baluta yangalala khubukulu yi Nzambi. Ayi tatamana monisa phutudulu’aku matondo mu sadila Yehova mu bukuikama boso ayi tatamana ba pfika pfika mu khubukulu yi Yehova yo kalembo sadila mu diambu di dukisa lukanu luandi. (Nku. 37:28) Bika tutatamana monisa phutudulu matondo mu diluaku diodi tubeki di ba mu khati dikanda di Yehova dio diwedi luzolo ayi kuikama.
MVUTU MBI MAWUVANA?
-
Mu phila mbi bisadi bi Nzambi bieta sokudila Yesu?
-
Bue tulenda tatimina monisa phutudulu matondo mu khubukulu yi Yehova?
-
Mbi tufueti tula ti tueka va ntuala malongi ma luvunu?
NKUNGA 103 Babateli ya mpate—Makabo oyo ezali bato
a Tala enkadre “Pourquoi 1919 ?” mu buku Le culte pur de Jéhovah Enfin rétabli! pha. 102-103.
b TSUDUKUSULU YI FOTO: Mu thangu bakulutu bame soludila diambu ditedi samuna va nyalu nguba, ntuadisi wu dingumba di kisalu ki tsamununu kembi minsamuni ti batadisanga manima mawu mu bibaka bi nzo mu thangu balembo samuna mu shario.
