1. Teʼ yáax siglooʼ, ¿bix úuchik u nuʼuktaʼal u kaajal Jéeoba?

 JÉEOBAEʼ le kéen u kʼubéent wa baʼax meyajil tiʼ le máaxoʼob adorarkoʼ u kʼáat ka beetaʼak tu tsoolol (1 Cor. 14:33). Por ejemploeʼ letiʼeʼ u kʼáat ka tsikbaltaʼak tiʼ tuláakal yóokʼol kaab le baʼax ken u beet u Reinooʼ (Mat. 24:14). Le meyaj jeʼelaʼ tiʼ Jesús u kʼubéentmaj utiaʼal ka u yile, yéetel Jesúseʼ táan xan u yilik ka beetaʼak tu tsoolol. Teʼ yáax siglooʼ tu kaajil Jerusaléneʼ yaan kaʼach junmúuchʼ apóstoloʼob yéetel ancianoʼob chʼaʼtuklik baʼax kun beetbil (Hech. 14:23). Kéen tsʼoʼokkeʼ ku túuxtaʼal aʼalbil tiʼ le múuchʼuliloʼob le baʼaxoʼob chʼaʼtuklaʼaboʼ. Tiʼ cada múuchʼulileʼ ku tsʼaʼabal kaʼach ancianoʼob utiaʼal nuʼuktikoʼob yéetel letiʼobeʼ ku yilkoʼob ka u beet le sukuʼunoʼob le baʼax ku chʼaʼtuklaʼaloʼ (Hech. 15:2; 16:4). Como ku yuʼubik tʼaan le sukuʼunoʼoboʼ «le múuchʼuliloʼoboʼ seguernaj u muʼukʼaʼantal u fejoʼob, yéetel cada kʼiin ku máaneʼ seguernaj u maas yaʼabtaloʼob» (Hech. 16:5).

2. Desde tu añoil 1919, ¿bix tsʼoʼok u nuʼuktik yéetel bix tsʼoʼok u tsʼáaik Jéeoba le janal espiritual tiʼ u kaajaloʼ?

² Teʼ kʼiinoʼobaʼ Jéeobaeʼ láayliʼ táan u nuʼuktik u kaajaleʼ. Tu añoil 1919, letiʼeʼ tu yéeyaj junmúuchʼ máakoʼob utiaʼal u nuʼuktikoʼob le kʼaʼaytaj ku beetaʼaloʼ bey xan utiaʼal ka u tsʼáaʼob le  janal espiritual jach tu yorailoʼ (Luc. 12:42). a Jach chíikaʼan u yilaʼaleʼ Jéeobaeʼ táan u bendecirtik le meyaj ku beetik le junmúuchʼ sukuʼunoʼobaʼ (Isa. 60:22; 65:​13, 14).

3, 4. 1) Aʼal junpʼéel ejemplo eʼesik le utsil ku taasik k-meyajtik Jéeoba tu tsoololiloʼ. 2) ¿Baʼax ken k-il teʼ xookaʼ?

³ U jaajileʼ wa maʼ t-beetik tu tsoolol le meyaj tu kʼubéentajtoʼon Jesúsoʼ maʼ kun béeytal k-tsʼoʼokbesik (Mat. 28:​19, 20). Por ejemploeʼ le territorioʼob yanoʼob teʼ múuchʼuliloʼ kʼaʼabéet u tsʼaʼabal tu tsoolol. Tumen wa maʼeʼ cada máakeʼ yaan u kʼaʼaytaj jeʼel tuʼuxak u kʼáateʼ. Maʼ xaaneʼ yaan k-kʼaʼaytaj yaʼab u téenel tiʼ junpʼéeliliʼ tuʼux yéetel tiʼ uláakʼoʼobeʼ mix juntéen. ¿Baʼax uláakʼ utsiloʼob ku taasik k-meyajtik Jéeoba tu tsoolol?

⁴ Teʼ kʼiinoʼobaʼ Jesúseʼ ku nuʼuktik u kaajal jeʼex tu beetil úuchjeakil yéetel u discípuloʼoboʼ. Teʼ xookaʼ yaan k-ilkeʼex u ejemplo Jesús yéetel yaan k-ilkeʼex bix u seguertaʼal tumen u kaajal Dios. Tsʼoʼoleʼ yaan xan k-ilik baʼax jeʼel u páajtal k-beetik utiaʼal ka maas confiarnakoʼon tiʼ u kaajal Jéeobaeʼ.

U KAAJAL JÉEOBAEʼ KU SEGUERTIK U EJEMPLO JESÚS

5. U kaajal Jéeobaeʼ, ¿bix u seguertik u ejemplo Jesús? (Juan 8:28).

⁵ Tuláakal le baʼax tu yaʼalaj yéetel tu beetaj Jesúsoʼ tiʼ u Taata tu kanaj. Tuláakal le consejoʼob yéetel le kaʼansaj ku tsʼáaik u kaajal Jéeobaoʼ teʼ Biblia u taaloʼ (xok Juan 8:28; 2 Tim. 3:​16, 17). Tsʼoʼoleʼ tiʼ toʼon xaneʼ mantatsʼ táan u kʼaʼajsaʼal kʼaʼabéet k-xokik le Bibliaoʼ yéetel k-tsʼáaik ichil k-kuxtal le baʼax k-kanikoʼ. ¿Baʼax utsil ku taasiktoʼon k-tsʼáaik ichil k-kuxtal le consejoaʼ?

6. ¿Baʼax utsil ku taasik k-xakʼalxoktik le Bibliaoʼ?

⁶ Jach ku taasik utsil k-xakʼaltik le Biblia yéetel u yáantaj le publicaciónoʼoboʼ. Por ejemploeʼ jeʼel u páajtal k-ketik le baʼax ku yaʼalik le Biblia yéetel le baʼax ku yaʼalik u kaajal Jéeoba ka k-beetoʼ. Le kéen k-il igual le baʼax ku yaʼalikoʼoboʼ ku beetik k-maas confiar tiʼ u kaajal Dios (Rom. 12:2).

7. ¿Baʼax tu kʼaʼaytaj Jesús yéetel bix u beetik xan u kaajal Dios teʼ kʼiinoʼobaʼ?

⁷ Jesúseʼ tu kʼaʼaytaj «le baʼaloʼob maʼalobtak ken u beet u Reino Diosoʼ» (Luc. 4:​43, 44). Tsʼoʼoleʼ tu yaʼalaj tiʼ u discípuloʼob ka u beetoʼob xan beyoʼ (Luc. 9:​1, 2; 10:​8, 9). Teʼ kʼiinoʼobaʼ le máaxoʼob yanoʼob ichil u kaajal Jéeobaoʼ kex jeʼel tuʼuxak kajaʼanoʼob yéetel kex jeʼel baʼalak responsabilidad yaantiʼobeʼ ku yilik u kʼaʼaytikoʼob u Reino Dios.

8. ¿Baʼax jatsʼuts privilegioil yaantoʼon?

⁸ Jach jatsʼuts le privilegio tsʼaʼantoʼon ikil k-tsʼáaik ojéeltbil u Reino Diosoʼ. Lelaʼ maʼ tuláakal máak jeʼel u páajtal u beetkeʼ. Jeʼex le tiaʼan Jesús way Luʼumeʼ maʼ tu chaʼaj tiʼ le demonioʼob ka u yaʼaloʼob letiʼ le Mesías, le u Paal Diosoʼ (Luc. 4:41). Teʼ kʼiinoʼob xanaʼ utiaʼal ka jóokʼok máak kʼaʼaytaj yéetel u testigoʼob Jéeobaeʼ táanileʼ kʼaʼabéet u chupik u requisitoil. ¿Bix k-eʼesik k-apreciartik le jatsʼuts meyaj tsʼaʼantoʼonaʼ? Letiʼe kéen kʼaʼaytajnakoʼon tiʼ tuláakal súutukiloʼ. Jeʼex Jesúseʼ toʼon xaneʼ taak k-beetik tuláakal le ku páajtal utiaʼal k-kʼaʼaytik yéetel k-kaʼansik u jaajil tiʼ le máakoʼoboʼ (Mat. 13:​3, 23; 1 Cor. 3:6).

9. U kaajal Dioseʼ, ¿bix tsʼoʼok u tsʼáaik kʼaj óoltbil u kʼaabaʼ Jéeoba?

⁹ Jesúseʼ tu tsʼáaj kʼaj óoltbil u kʼaabaʼ Dios. Tiʼ junpʼéel oración tu beetaj tiʼ u Taataeʼ tu yaʼalaj: «Teneʼ tsʼoʼok in tsʼáaik u kʼaj óoltoʼob a kʼaabaʼ» (Juan 17:26). Teʼ kʼiinoʼobaʼ u kaajal Jéeobaeʼ ku seguertik u ejemplo Jesús tumen ku beetkoʼob tuláakal le ku páajtal utiaʼal u tsʼáaikoʼob kʼaj óoltbil u kʼaabaʼ  Diosoʼ. Junpʼéel tiʼ le baʼax maas ku meyajtiʼoboʼ letiʼe Biblia Túumben Luʼumoʼ. Le Bibliaaʼ traducirtaʼan tu chúukaʼanil wa chéen junjaats ich maas tiʼ 270 idiomaʼob. Teʼ Bibliaaʼ tsʼoʼok u kaʼa tsʼaʼabal u kʼaabaʼ Dios teʼ tuʼuxoʼob unaj u binoʼ. Le jaats Utiaʼal xakʼalxook 1D yéetel 1E, ku tsolik baʼaxten kaʼa tsʼaʼab u kʼaabaʼ Diosiʼ. b

10. ¿Baʼax ku kaʼansiktoʼon le baʼax úuch tiʼ juntúul koʼolel kajaʼan Myanmaroʼ?

¹⁰ Jeʼex Jesúseʼ toʼon xaneʼ taak k-kaʼansik tiʼ tuláakal máak bix u kʼaabaʼ Dios. Tu luʼumil Myanmareʼ juntúul kiikeʼ tu kaʼansaj tiʼ juntúul koʼolel 67 años yaantiʼ bix u kʼaabaʼ Dios. Le koʼoleloʼ jach kiʼimakchaj u yóol ka tu yuʼubaj, hasta báan u jaʼil u yich, letiʼeʼ tu yaʼalaj: «Yáax in wuʼuyik u kʼaabaʼ Diosaʼ. Tiʼ tuláakal le kʼiinoʼob kuxaʼanenoʼ letiʼe baʼax maas importante tsʼoʼok in kanikoʼ». Lelaʼ ku kaʼansiktoʼoneʼ le máaxoʼob uts u puksiʼikʼaloʼoboʼ ku kʼexpajal u kuxtaloʼob kéen u kanoʼob u kʼaabaʼ Dios.

EʼES MANTATSʼ KA CONFIAR TIʼ U KAAJAL JÉEOBA

11. ¿Bix u yeʼesik le ancianoʼob ku chaʼik u nuʼuktaʼaloʼob tumen u kaajal Diosoʼ? (Ilawil xan le fotoʼoboʼ).

¹¹ Le kéen túuxtaʼak junpʼéel carta tiʼ le ancianoʼob utiaʼal u yaʼalaʼaltiʼob bix unaj u beetkoʼob wa baʼaxoʼ letiʼobeʼ kʼaʼabéet u xokikoʼob tubeel, u naʼatkoʼob yéetel u beetkoʼob le baʼax ku yaʼalaʼaltiʼoboʼ. Tiʼ letiʼobeʼ ku yaʼalaʼal bix unaj u máansaʼal jujunpʼéel jaatsoʼob teʼ muchʼtáambaloʼ yéetel bix unaj u beetaʼal le oraciónoʼoboʼ, ku yaʼalaʼal xan tiʼob bix unaj u kanáantkoʼob le sukuʼunoʼob yanoʼob teʼ múuchʼuliloʼ. Le kéen u beetoʼob tuláakal le baʼax ku yaʼalaʼaltiʼob tumen u kaajal Jéeobaoʼ, le múuchʼuliloʼ ku yuʼubik yaabiltaʼan tumen Jéeoba yéetel táan u kanáantaʼal.

12. 1) ¿Baʼaxten unaj k-beetik le baʼax ku yaʼalik le máaxoʼob nuʼuktikoʼonoʼ? (Hebreos 13:​7, 17). 2) ¿Baʼaxten maʼ unaj k-chʼíikil k-il le baʼaloʼob maʼ maʼalobtak ku beetik le máaxoʼob nuʼuktikoʼonoʼ?

¹² Le kéen u yaʼaltoʼon le ancianoʼob ka k-beet wa baʼaxoʼ maʼalob ka k-uʼuy u tʼaanoʼob yéetel kiʼimak óolal, beyoʼ letiʼobeʼ maas chéen chʼaʼabil ken u beetoʼob u meyajoʼob. Le Bibliaoʼ ku yaʼalikeʼ unaj k-uʼuyik u tʼaan le máaxoʼob nuʼuktikoʼonoʼ (xok Hebreos 13:​7, 17). Leloʼ yaan kʼiineʼ maʼ chéen chʼaʼabiliʼ tumen letiʼobeʼ kʼeban máakoʼob xan, yéetel yaan kʼiineʼ ku beetkoʼob baʼax maʼ maʼalobiʼ. Pero wa k-chʼíikil k-il le baʼax maʼ maʼalob ku beetkoʼoboʼ jeʼel u káajal k-tuukul jeʼex le máaxoʼob pʼekmiloʼonoʼ. ¿Baʼaxten k-aʼalik leloʼ? Tumen wa ku joʼopʼol k-tuukul kʼaas tiʼ le ancianoʼoboʼ jeʼel u xuʼulul k-confiar tiʼ u kaajal Dioseʼ. Leloʼ letiʼe baʼax u kʼáat ka k-beet le máaxoʼob pʼekmiloʼonoʼ. ¿Baʼax jeʼel u yáantkoʼon k-rechazart le tuusoʼob ku beetik le máakoʼobaʼ?

MAʼ A CHAʼIK TIʼ MIX MÁAK KA U BEET U XUʼULUL A CONFIAR TIʼ U KAAJAL DIOS

13. Le máaxoʼob pʼekmiloʼonoʼ, ¿baʼaxoʼob ku yaʼalikoʼob tu yoʼolal u kaajal Dios?

¹³ Le máaxoʼob pʼekmiloʼonoʼ jejeláas baʼax ku beetkoʼob utiaʼal u pʼatkoʼob kʼaasil u kʼaabaʼ Dios. Jeʼex k-ojliloʼ Jéeobaeʼ u kʼáat ka u bisoʼob junpʼéel kuxtal limpio le máaxoʼob meyajtikoʼ yéetel ka u adorartoʼob jeʼex uts tu tʼaaneʼ. Tsʼoʼoleʼ jeʼel máaxak ka u bis junpʼéel kʼaakʼas kuxtal yéetel maʼ tu arrepentireʼ unaj u jóoʼsaʼal teʼ múuchʼuliloʼ (1 Cor. 5:​11-13; 6:​9, 10). Toʼoneʼ k-ilik k-beetik baʼax ku yaʼalik le Bibliaoʼ. Le oʼolal k-enemigoʼobeʼ ku yaʼalikoʼobeʼ jach k-píitmáan, kʼasaʼanoʼon yéetel jach k-creertikba.

14. ¿Máax péeksik le máakoʼob u yaʼaloʼob baʼaloʼob maʼ jaajtak tu contra u kaajal Diosoʼ?

¹⁴ Kʼaʼajaktoʼon máax jach tu jaajil pʼekmil u kaajal Dios. Satanás «u taatail le tuusoʼ», letiʼ  péeksik le máakoʼob u yaʼaloʼob baʼaloʼob maʼ jaajtak tu contra u kaajal Diosoʼ (Juan 8:44; Gén. 3:​1-5). Toʼoneʼ k-ojel letiʼ beetik leloʼ tumen desde úuch bey u beetkoʼ.

15. ¿Baʼax tu yaʼalaj u nuuktakil le judíoʼob tu contra Jesús yéetel u discípuloʼoboʼ?

¹⁵ Jesús, u Hijo Dioseʼ kex perfecto yéetel tu beetaj milagroʼobeʼ, Satanáseʼ tu péeksaj yaʼab máakoʼob u yaʼaloʼob baʼaloʼob maʼ jaajtak tu contraiʼ. Tu péeksaj u nuuktakil le judíoʼob u yaʼaloʼobeʼ Jesúseʼ ku jóoʼsik kaʼach demonioʼob yéetel le poder ku tsʼaʼabaltiʼ bin tumen «u nojchil le demonioʼoboʼ» (Mar. 3:22). Tsʼoʼoleʼ teʼ kʼiin ka juzgartaʼab Jesúsoʼ u nuuktakil le judíoʼoboʼ tu yoksoʼob tu tuukul le máakoʼob ka u kʼáatoʼob ka kíimsaʼak Jesúsoʼ (Mat. 27:20). Tsʼoʼoleʼ ka káaj u kʼaʼaytaj u discípuloʼob Jesúseʼ le máaxoʼob pʼekmiloʼoboʼ «tu pʼuʼujsoʼob le j-táanxel luʼumiloʼob» utiaʼal u tsʼáaikubaʼob tu contra u discípuloʼob Jesúsoʼ (Hech. 14:​2, 19). Yoʼolal le baʼax ku yaʼalik Hechos 14:​2, le revista La Atalaya 1 tiʼ diciembre tiʼ 1998, tu yaʼalaj: «Le judíoʼoboʼ maʼ tu yóotaj u kʼamoʼob le baʼax ku kʼaʼaytik le discípuloʼoboʼ. Tsʼoʼoleʼ joʼopʼ u yaʼalikoʼob baʼaloʼob maʼ jaajtak yoʼolal le discípuloʼoboʼ utiaʼal beyoʼ le j-táanxel luʼumiloʼoboʼ ka líiʼkoʼob xan tu contraʼob».

16. ¿Baʼax unaj u kʼaʼajaltoʼon kéen joʼopʼok u yaʼalaʼal baʼaloʼob maʼ jaajtak yoʼolal u kaajal Diosiʼ?

¹⁶ Satanáseʼ maʼ tu xuʼulul u tuus, tak bejlaʼeʼ táan u yilik «u tusik tuláakal yóokʼol kaab» (Apo. 12:9). Le oʼolaleʼ wa k-uʼuyik u yaʼalaʼal baʼaloʼob maʼ maʼalobtak tu yoʼolal u kaajal Dios wa tu yoʼolal le máaxoʼob nuʼuktikoʼonoʼ kʼaʼajaktoʼoneʼ le máaxoʼob pʼekmil u kaajal Diosoʼ deporsi bey u beetkoʼoboʼ. Úuchjeakileʼ tu yaʼaloʼob baʼaloʼob maʼ jaajtak tu contra Jesús yéetel tu contra u discípuloʼobiʼ.  Jach jeʼex u yaʼalmil le Bibliaoʼ teʼ kʼiinoʼobaʼ le máakoʼoboʼ ku chʼaʼpachtikoʼob u testigoʼob Jéeoba yéetel ku yaʼalikoʼob baʼaloʼob maʼ jaajtak tu yoʼolaloʼobiʼ (Mat. 5:​11, 12). Chéen baʼaleʼ le máaxoʼob pʼekmiloʼonoʼ maʼ kun béeytal u tuskoʼonoʼob wa k-kʼaʼajsik tiʼ máax u taal le tuusoʼob ku yaʼalikoʼoboʼ yéetel wa k-ilik k-kanáantikba tu séebaʼanil. ¿Baʼax túun unaj k-beetik utiaʼal k-kanáantikba?

17. ¿Baʼax unaj k-beetik kéen k-uʼuy u yaʼalaʼal baʼaloʼob maʼ jaajtakiʼ? (2 Timoteo 1:13; ilawil xan le cuadro « ¿Baʼax unaj a beetik wa ka wuʼuyik junpʼéel baʼal maʼ jaajiʼ?»).

¹⁷ Maʼ t-chaʼik k-tuʼusul. Apóstol Pabloeʼ jach maʼalob úuchik u tsolik baʼax unaj k-beetik kéen joʼopʼok u yaʼalaʼal baʼaloʼob maʼ jaajtakiʼ. Letiʼeʼ tu yaʼalaj tiʼ Timoteo: «Táan in kaʼa kʼubéentiktech ka pʼáatkechiʼ utiaʼal ka a waʼal tiʼ jujuntúul máakoʼob [ . . . ] maʼ unaj u beetkoʼob u cuentail baʼaloʼob maʼ jaajtakiʼ», yéetel tu yaʼalajtiʼ: «Maʼ a wóotik a wuʼuy le kaʼansajoʼob maʼ jaajtak[oʼ]» (1 Tim. 1:​3, 4; 4:7). Tu chichnileʼ juntúul chan paaleʼ le kéen u yil wa baʼax pekekbal teʼ luʼumoʼ ku chʼaʼik yéetel ku tsʼáaik tu chiʼ. Chéen baʼaleʼ juntúul nojoch máakeʼ junpuliʼ maʼ tu beetik le jeʼeloʼ tumen u yojel tuʼux pekekbal yéetel u yojel jeʼel u beetik kʼaas tiʼeʼ. Le oʼolal toʼon xaneʼ maʼatech k-kʼamik le baʼaloʼob maʼ jaajtak ku yaʼalaʼaltoʼonoʼ, chéen k-kʼamik le «maʼalob kaʼansajoʼob[oʼ]» (xok 2 Timoteo 1:13).

18. ¿Bix jeʼel u páajtal k-eʼesik k-confiar tiʼ u kaajal Jéeobaeʼ?

¹⁸ Teʼ xookaʼ tsʼoʼok k-ilik óoxpʼéel bix u kaajal Dioseʼ táan u seguertik u ejemplo Jesús. Chéen baʼaleʼ wa ka xakʼalxoktik le Bibliaoʼ yaan xan a wilik uláakʼ bix táan u beetik. Le oʼolaleʼ maʼ u xuʼulul a wáantik le sukuʼunoʼob utiaʼal u seguer u confiaroʼob tiʼ u kaajal Diosoʼ. Tsʼoʼoleʼ chúukpajak a wóol a meyajt Jéeoba, maʼ a chaʼik a náachkuntaʼal tiʼ u kaajal. Ichil u kaajaleʼ jach ku yeʼesaʼal yaabilaj yéetel chúukaʼan óolal (Sal. 37:28). ¿Máasaʼ jach kiʼimak k-óol k-múul meyaj yéetel u kaajal Dios?