1. Waigu gu ga Yekova aboro naadu rogo bambata sa kama agarã adu ni mbakadimbakadi yo?

 HO YEKOVA afu sunge ni fu gako aboro, ko naida i mangihe ngba gu gene du ni mbakadimbakadihe. (1 Kor. 14:33) Ni kpiapai, gupai Mbori akpinyemuhe nga i tungusi wene pangbanga rogo zegino dunduko. (Mt. 24:14) Yekova ima maa Yesu ko ni ngerekurii gi sunge re. Na Yesu ima manga gupai si aidaha tipa gi sunge re nimangi ngba gu gene du ni mbakadimbakadihe. Rogo bambata sa kama agarã, ho i asigira vovo adungurati ni rogo kura aba, i asia abaakumba tipa i naafu arugapai na kini ngbembatayo. (Amo. 14:23) Yerusarema yo du riigbu bipasunge adu ni nga gu nadu na amokedi gbiati bete agu abaakumba naadu na bakere inohe rogoho, i anaamanga adiaberã na adungurati dunduko kini mangipai kuti gu diaberã re. (Amo. 15:2; 16:4) Bambiko wa awirina adu na giasangba, “akanisa ki nyaki rogo idapase yo, ki nge ange na uru.”​—Amo. 16:5.

2. Natona rogo 1919, waigu Yekova nangbembatayo fu gako aboro na kini fu gu riahe nga ga toro fuyo?

² Yekova nandu kumbatayo kindi kaa mbakada gako aboro da ku areme. Natona rogo 1919, Yesu ima mangasunge na tooni badona nga ga aKristano tipa i naangbembatayo rogo sunge tungusapai na kini fu riahe nga ga toro fu apefuoko ti ragoho. a (Rk. 12:42) Si tie ziazia nga, Yekova nafu maku afu kurii gu sunge nga ga gu badona re.​—Yes. 60:22; 65:13, 14.

3-4. (a) Oni funga kpiapai tipa wai rengbe ani ka gbia undo ho du ani ni ni mbakadimbakadi rani. (b) Ginipai ani nika sakapai tipaha rogo gi kekeapai re?

³ Ka ani adunga ni mbakadimbakadi rani ya, ani arengbenga ka manga gu sunge Yesu nafuhe furani ani mangihe te. (Mt.  28:19, 20) Ni kpiapai, ka si du nga awirina ho ka yugo gu ba si aida ani tungusipai rogoho te; ka boro naatungusapai rogo ai gu ba ni aida ka tungusaha rogoho. Ani ima rengba ka tungusapai bara dunguhe kina rogo bangisa dagbarago sa, na ka ani atungusanga ha rogo gu kura adagbarago ya. Ya mo mo rengbe ka berã tipa gu kura agene nga gu rengbe ani ngbaha ka gbia undo ni du ani ni mbakadimbakadi rani?

⁴ Kina wai Yesu ambakadi apefuo ko ho ko adu ni auru kpotosende ane, ko nandu kindi kumbatayo areme a kaa mbakada ga Mbori aboro. Rogo gi kekeapai re, ani nika sakapai tipa gu kpiapai Yesu amoihe na wai gaani riigbu apekafuo gu kpiapai re. Ani nika sakapai a tipa wai rengbe ani ka yugo tambuahe tipa ga Yekova riigbu.

GAANI RIIGBU NAPEKAFUO GA YESU KPIAPAI

5. Gini kura gene sa gaani riigbu apekafuo ga Yesu kpiapai ngbaha? (Yoane 8:28)

⁵ Yesu awirikipai be gu Bako du ngbangbaturũ yo tipa gupai si aida ko mangihe na gupai si aida ko pehe. Ga Yekova riigbu napekafuo gu kpiapai nga ga Yesu ni mangasunge na Fugo Mbori tipa ka undo rani ani ini gupai du ni ruruhe na gu du ni irairaha na kini fu arugapai furani tipa si ngbe furani kumbatayo rogo gaani raka. (Oni gedi Yoane 8:28; 2 Tim. 3:16, 17) Ani ninaagbia arugapai dedede tipa geda Fugo Mbori na kini mangipai kutini. Waigu ani agbia undo ti peka ani fuo gi rugute re?

6. Gini kura nyanyakipa gene sa ani agbia undo ngbaha ti wisigo ani Baibiri?

⁶ Ani nagbia bakere undo ho ani amangasunge ni na gaani awaraga tipa ka wisigo Baibiri. Ni kpiapai, ani na rengba ka ringbisa gupai Baibiri apehe na agu arugapai ani agbiaha be riigbu bambiko ani nabi gupai nga agu arugapai riigbu afuhe furani dunduko, mburuhe rii Baibiri na si nasarani ani du na bakere kido kuti riigbu.​—Rom. 12:2.

7. Gini pangbanga Yesu atungusihe, na waigu ga Yekova riigbu apekafuo gako kpiapai?

⁷ Yesu atungusi “wene pangbanga nga ga ga Mbori ngbi.” (Rk. 4:43, 44) Yesu afu gu zinahe fu gako abawiriki a nga, i tungusipai tipa ga Mbori Kindo. (Rk. 9:1, 2; 10:8, 9) Areme, aboro dunduko rogo ga Yekova riigbu natungusa gu wene pangbanga nga ga Kindo, ka i vura kaa raka kina rogo gini arago na asunge ki vura nge beyo wai vurũ rogo ga Yekova riigbu.

8. Gini momu du berani?

⁸ Si nipa irisa furani ka pepa ga Mbori Kindo fu kura aboro! Anga aboro dunduko du na gi momu re te. Ni kpiapai, ho Yesu adu auru kpotosende, ko ambunga gene fu gbegberẽ atoro i tungusipai tipa ko te. (Rk. 4:41) Areme, tipa boro tona kaa tungusapai na aDezire Yekova, si naida ni naaraka ngba gu gene nasa ngbarago ti Yekova. Ani nayugo pa wai du ani na tambuahe tipa gu momu du ani na ni ni tungusa ani pa ga Mbori Kindo rogo ai ba na ti ai gu regbo rengbe ani ka mangaha ti ni. Ani naida kadu wa Yesu, sidu, ani namanga ome ka tungusapai fu kura aboro na kini yugu rengo fuyo.​—Mt. 13:3, 23; 1 Kor. 3:6.

9. Waigu ga Yekova riigbu ayugo rimo Mbori fu aboro?

⁹ Yesu ayugu rimo Mbori fu gu kura aboro. Rogo ga Yesu kparakpee yo fu gu Bako du ngbangbaturũ yo, ko aya: “Mi yugu rimoro fu yo.” (Yo. 17:26) Ga Yekova riigbu nawirika ga Yesu kpiapai ni manga ha gupai rengbe he ka mangaha tipa ka undo kura aboro i ye ka ino rimo Mbori. Gene sa riigbu namangi gipai re ngbaha nga vurube gu Baibiri nga New World Translation of the Holy Scriptures, gi sasa fugo Baibiri re karaga rimo Mbori kurogo gu ba  nga gu si adu rogoyo rogoho rogo agu afugo yo nga gu i ake Baibiri rogoho. Baibiri ima du awere nabaha watadu paparaha rogo afugo nga 270. Ka mo bi Appendixes A4 na A5 nga ga gi sasa fugo Baibiri re, mo nika bi futufutu apai nibipa karaga rimo Mbori kubaha rogo Baibiri yo. b

10. Ginipai ani awirikaha ti gupai gu dee du Myanmar yo apehe?

¹⁰ Wakina Yesu, ani naida ka undo dungu aboro wa rengbe omerani na ni tipa i ini rimo Mbori. Ho gu kura dee du Myanmar yo du garãri nga 67 aini gupai ni nga rimo Mbori kina ti ni, ri atona ka kpara ni aume, ri aya: “Gere nga bambata regbo rogo gimi raka yo mi gi gupai nga rimo Mbori kina ti ni nga Yekova. . . . Oni ima yugo gu nyanyakipa pai fere nga gu mi aawirikanga ha mbata ya.” A wa gi kpiapai re ayugoho, wirika rimo Mbori ima rengba kadu na bakere maapai kurii agu aboro du na wene kpotoyo yo.

ONI NAANDU KUMBATAYO KINDI KAADU NA TAMBUAHE TIPA GAANI RIIGBU

11. Waigu rengbe abaakumba ka yugo tambuahe tipa ga Yekova riigbu? (Oni bi sura a.)

¹¹ Gini gene duho sa rengbe abaakumba ka yugoho ngbaha nga i na tambuahe tipa ga Mbori riigbu? Ho abaakumba agbia rugapai ni be riigbu, si naida i gedihe wenengai na ki mangi ai gupai rengbe yo ka mangaha tipa ka mangapai kuti ni. Ni kpiapai, i agbianga arugapai sa tipa kina wai rengbe yo ka manga papara adunguratise na kini mangi kparakpee rogo dungurati te, ono i nagbia arugapai agbia a tipa wai ka ngerafuo ga Kristo akandoro. Ho abaakumba amangapai ni kuti agu arugapai naye be riigbu, awirina nabi tiyo nga Yekova ima kpinyemu yo na ko nangera angerafuo yo.

12. (a) Tipagine si aida ani mangipai ti ni kuti gupai agu aboro nangbembatayo apehe? (AEbere 13:7, 17) (b) Tipagine si aida ani moiberãrani ti ni tipa gu wene asino du ti agu aboro nangbembatayo?

¹² Ho ani agbia arugapai ni be abaakumba, si naida ani mangipai kutini na nyemuhe. Ni manga ani he wo, ani nasaha taata fu agu aboro nangbembatayo i nimangi gayo sunge. Baibiri nangarasa rani ani du nagiasangba gbiati ranigose fu agu aboro nangbembatayo. (Oni gedi AEbere 13:7, 17.) Ti kura aregbo, gipai re ima rengba kadu ni kpakarakpakaraha. Tipagine? Bambiko agi akumba re nga kpakpa aboro. Sidu, ka ani moiberãrani kina kuti gu gbegberẽ asino du tiyo kuba maa ani berãrani kuti wene asino yo, gure nga ani nikaa undo avurarani. Ngba gini gene? Avurarani naida ani tona du na kapa kuti gupai nga Mbori namangasunge na gako riigbu kaa ngbe furani kumbatayo. Sidu, ka ani aaberã gbegberẽ tipa abaakumba, ani ima rengba ka tona berã gbegberẽ tipa riigbu a na ki zanga kido kuti ga Yekova riigbu. Ginipai rengbe ani ka mangaha tipa ka ino agu aziree nga ga avurarani na ki ká ha?

KA MO MBUNGA KURA ABORO I SA RO MO MBU KIDO KUTI GA YEKOVA RIIGBU YA

13. Waigu avura Mbori aˈasada ka sa gako riigbu si naangera ni gbegberẽhe?

¹³ Avura Mbori naˈasada ka sa agu apai du ni wenehe tipa ga Mbori riigbu si naangera wa gupai du ni gbegberẽhe. Ni kpiapai, ani ima wirika gupai rogo Ziazia Kekeapai yo nga Yekova naida ani banda kpotorani si du ni gigirihe, gaani sino mangapai, na gaani iriso du ngba gu gene ko aida na ni. Ko nape gupai nga gu boro nga guni namanga gupai du ni gbegberẽhe na ka ni aidanga ka aria sino ni ya, i kusi ni kusayo rogo dungurati. (1 Kor. 5:11-13;  6:9, 10) Ani namangapai kuti gu zinahe nga ga Ziazia Kekeapai re. Mbiko pa manga ani pai kuti gi zinahe re, asogorani nape gupai nga, ani akpinga nyemu aboro te, ani na kitangbanga aboro na ani aidanga gu boro du na gani bipai kia du dagbarani te.

14. Da nga gu boro du kugii gu ziree apangbanga du tipa ga Yekova riigbu?

¹⁴ Oni ini gu boro nzunzu nazubo rani. Satana Bakitingbanga du na gbaraga ziree tipa ga Yekova riigbu. “Irazire nga ko, nga baha.” (Yo. 8:44; Bam. P. 3:1-5) Si rẽarẽ tie ani idi kuti gupai nga Satana nikaa mangasunge na avurarani i ni gbaragi aziree tipa Yekova na gako riigbu. Gere nga gupai namangi tipa Yesu na agu aKristano naadu rogo bambata sa kama agarã.

15. Ginipai agbia pambori amangi Yesu na ni gbiati apefuoko?

¹⁵ Wa vura duhe nga Yesu angia wiri Mbori na ki ngia rengberengbe boro na ki mangi dungu iiriwoapai, Satana amangisunge na kura aboro tipa i gbaragi ziree tipa ko. Ni kpiapai, agbia pambori ape gupai fu aboro nga gu ome Yesu aamangasunge na ni ka danda adaimona aaye vurube “gbia adaimona.” (Mk. 3:22) Ho i aasarangbanga Yesu ni, agbia pambori akitingbanga ko nga ko agberẽ ngbako yo na ki sa rimbasa aboro i pe gupai nga i imi ko. (Mt. 27:20) Kusa, ho apefuo Kristo aatungusa wene pangbanga ni, agu aboro naasoga yo ‘azingisi kpoto aGendiria yo’ tipa i rungosi agu aKristano re. (Amo. 14:2, 19) Nibipa Amokedi 14:2, gu Ngbaõbambu Sinziri nangia ga Banduru 1, 1998, ape gupai: “Mbiko gupai nga rago angbanga tiyo na kina ká gu pangbanga re gbua te, agu airasogote nangia aYudo re atona ka manga tua nga ga kitangbangase, kini asadi ka zingisa badungu aGendiria kuti aKristano.”

16. Ginipai si aida ani tingidihe ka ani gi ziree apangbanga?

 ¹⁶ Satana nandu kindi kumbatayo kaa pe ziree da ku areme. Areme, ko kindi ‘nga banangi aboro kpotosende no dunduko.’ (Yugo. 12:9) Ka mo gi gbegberẽ apangbanga tipa ga Yekova riigbu watadu tipa agu awirina nangbembatayo, mo tingidipa wai avura Mbori amangi Yesu na agu abawiriki naadu rogo bambata sa kama agarã. Yesu ape gupai nga aboro nika soga agu aboro asoga nairiso Yekova na i nika pe ziree ape tipa yo. Na gere nga kina boro gupai namanga areme. (Mt. 5:11, 12) Ka ani ini gu boro ziree apangbanga aye beni, ani aidanga kuti te, na ani ka mangapai nibasa ka banda tirani. Ginipai si aida ani mangihe tipa ka banda tirani?

17. Waigu rengbe ani ka ne gu gbegberẽpai naye ti ziree apangbanga? (2 Timoteo 1:13) (Oni bi gu sanduki a nga, “ Wai ka Mangapai Kuti Ziree Apangbanga.”)

¹⁷ Oni ká ziree apangbanga. Gu mokedi nangia Pauro ape gupai ziazia si aida ani mangihe ka ani gi ziree apangbanga. Ko ape gupai fu Timoteo nga ko “rugu agu akumba ya ka i . . . dége nga tuyo fu kungba gumbagumba apai” ya na i “basa gu gbegberẽ menemene apai.” (1 Tim. 1:3, 4; 4:7) Oni berẽnga kurii gipai re, tooni gude ima rengba ka dia bibiriko he sande na ki moihe ku ngbaru yo, ono gu boro naima sona arengbanga ka mangapai wa gure te, bambiko niima ino gu gbegberẽ sangbanapai si narengbe ka ye na ni. Ani na ká ziree apangbanga bambiko ani ima ino da nga mburu gu ziree re. Ani nadegaturani kina kuti “wene apai” nga ga rengo.​—Oni gedi 2 Timoteo 1:13.

18. Waigu rengbe ani ka yugoho nga ani na tambuahe tipa ga Yekova riigbu?

¹⁸ Ani sakipai gbua tipa agene biata dagba gu dungu agene yo ga Mbori riigbu awirika Yesu ngbaha. Wa mo nikaa wisigo Baibiri, mo asadi ka bi gu kura agene ga Yekova riigbu apekafuo ga Yesu kpiapai ngbaha. Mo undo kura aboro rogo gamo dungurati i du na kido kuti ga Yekova riigbu. Mo naandu kumbatayo kindi kaa iriso Yekova niruru ro na ki kakuti gu riigbu ko amangasunge na ni ka digiso gako ringbisapai. (Tam. 37:28) Ani naandunga andu kindi kumbatayo kaa du na tambuahe tipa gu momu du ani na ni tipa kadu ni papara gu ga Yekova aboro nyemuse du ni ruruyo.