Nạ Alegheri Ni?
Uḍighi ika kụ awe dị u/ḍighi buọ Izrạl oḍighi aani bọ we eghạm Odaạm mọ Devid?
ABUNIIN arephelhegbe abuọ areelhe phọ oḍighi aani bọ we eghạm mọ aDevid pọ Zelek olọ Ammon, Uriah olọ aHittite, r’Ithmah olọ aMoab. a (1 Chron. 11:39, 41, 46) Awe eghạm mọ aDevid uḅarạm kẹn buọ “Cherethite, Pelethite, ḅilhẹ r’aGittite.” (2 Sam. 15:18) Awe ugbor ghan ootughiạn mọ abuọ aCherethite phọ r’aPelethite phọ osian r’awe aPhilistia phọ. (Ezek. 25:16) Abuọ aGittite phọ uḍuạ Gath egbogh emhạ abuọ aPhilistia phọ kụ omite.—Josh. 13:2, 3; 1 Sam. 6:17, 18.
Uḍighi ika kụ aDevid amheera bọ mọ aruuruen oḍighi aani we eghạm mọ odị? Odị akuphom owol mọ bidị koḅạr ri nyodị r’aZihova. Esi omaạm, The New Interpreter’s Dictionary of the Bible aghaạph ilọ abuọ aCherethite r’aPelethite phọ mọ: “Bidị uḅạr Devid mem dị asidọl phọ ekạr elhoghorị siphẹ eeḍiạn itooghị phọ odị.” Bidị uḍeenhaan ika oḅạr phọ abidị? Mem dị “oomo awe phọ Izrạl owilhẹ” Odaạm mọ Devid odạph oye dị “aroozọ phọ i/moọgh iyaạr oḍighinom dị oghol mọ aSiba,” abuọ aCherethites phọ, r’Pelethites phọ uḅạr ri Devid kụ olhoghonhaạn nyodị ḍighaạgh okpạr opu izuoghom mọ aSheba. (2 Sam. 20:1, 2, 7) Onyebel roten, bịn Adonijah oọny phọ aDevid Odaạm mọ anyạ orolhọm agadạ oḍaạm mọ asi bọ Solomon. Kuolọ, abuọ aCherethite phọ r’aPelethite phọ ughiọm ni ghisigh oḅạr Devid, kụ olhoghonhaạn ḍighaạgh omhiịn mọ aSolomon aḍighi odaạm mọ, loor esi dị odị kụ edị aZihova masaḅạr.—1 Ki. 1:24-27, 38, 39.
Onhọn ooruen dị aḅạr aani agey Devid pọ Ittai olọ aGittite phọ. Ittai r’600 arephelhegbe awe eghạm ubakị ni Odaạm mọ Devid mem mọ oọny phọ odị Absalom akparaghạ bọ ogboton odị agadạ odaạm mọ. ADevid aḅenhị Ittai mọ loor iduọn odị aḍighi bọ ooruen, mọ odị kuu/ḅaghamiạn loor. Kuolọ Ittai aḅẹm mọ: “Nạ Ogbogh Odaạm, mị akol ḍien aZihova kụ akunya rangọ nyinhạ mọ mị kadạph ni nyinhạ torobọ ekpisi lọ nạ rakị, ghalhamọ iḍighi ni ḍuugh”—2 Sam. 15:6, 18-21.
Ittai aḅạr ri Devid, odaạm mọ aZihova amạ bọ
Ghalhamọ r’iduọn abuọ aCherethite phọ, r’abuọ aPelethite phọ, ḅilhẹ r’aGittite phọ u/ḍighi bọ buọ Izrạl, bidị ulhọgh ni elhegh aZihova idiphọ egey Enhaạn oḅilhẹ omhiịn Devid idiphọ oye dị aZihova kụ amạ. P’eeghe idị aDevid asereghiạn omhoọgh iigaạny odị we phọ abuẹn phọ okpẹ bọ oḍuom olhoghi phọ!
a Olhogh phọ Enhaạn ogẹ bọ siphẹ Deuteronomy 23:3-6 aḅẹm mọ onyọ Ammon ḅilhẹ r’aMoab ku/ḍigh igbo awe phọ Izrạl. Toroboiperolbọ, ekịgh mudị olhogh phọ ophọn phọ aghaạph ghan mọ bidị ko/tue omoọgh oomo aroopoogh idiphọ okạr abuọ Izrạl, kuolọ bidị otue ni ooḍikuan r’awe phọ Izrạl eḍighi maạr dị bidị omheera ooḅereghị aZihova. Miịn Insight on the Scriptures, Volume 1, opoḍi phọ 95.
