ДАВИДТИҤ черӱзинде еврейлердеҥ де ӧскӧ укту улус болгон. Темдектезе, оныҥ јуучылдарыныҥ ортозында аммонит укту Целек деп кижи, хетт укту Урия ла моав укту Итма деп кижи болгон (1 Лет. 11:39, 41, 46) a. Анайда ок Давидке «керетейлер, пелетейлер ле гаттар» иштеген (2 Сам. 15:18). Керетейлер ле пелетейлер — филистимдердиҥ јуук тӧрӧӧндӧри деп бодолот (Иез. 25:16). А гаттар — филистимдердиҥ Гат деп калазыныҥ улузы (Иис. Н. 13:2, 3; 1 Сам. 6:17, 18).

Давид нениҥ учун бойыныҥ черӱзине ӧскӧ укту улус алган? Нениҥ учун дезе олор оны сатпас ла олор Иеговага чындык улус деп билген. Темдектезе, библиялык бир справочникте керетейлер ле пелетейлер керегинде мынайда айдылат: «Олор Давидтиҥ коркышту кӱч ӧйлӧринде ого чындык болгон улус» (The New Interpreter’s Dictionary of the Bible). Темдектезе, качан «бастыра израильтяндар Давидти артыргызып», Шева деп тӱймеечи кижиниҥ кийнинеҥ јӱре бергилеерде, олор каанга чындык артып, тӱймеенди токтодорго болушкан (2 Сам. 20:1, 2, 7). Кийнинде, Давидтиҥ Адония деп уулы јаҥ блаажып турарда, керетейлер ле пелетейлер Давидке чындык артып, Иегованыҥ Давидтиҥ ордына кӧстӧгӧн Соломонды каан этире отургызарга болушкандар (1 Каан. 1:24—27, 38, 39).

Давидке база да бир кижи чындык болгон. Ол гат укту Иттай деп кижи. Авессалом тӱймеен кӧдӱреле, кӧп израильтяндарды бойыныҥ јанына тартып аларда, Иттай 600 јуучылыла кожо Давид каанга јӧмӧшкӧн. Ол ӧскӧ укту болгонынаҥ улам Давид учун јуулашпас аргалу болгон. Давид мыны бойы да ого айдарда, Иттай ого: «Тирӱ Иегова Кудайла, мениҥ кайраканымныҥ, каанымныҥ, јӱрӱмиле чертенип јадым! Сен кайдаар да барзаҥ, кулыҥ да ары барар. Мен сениле кожо божоп то каларга белен!» — деген (2 Сам. 15:6, 18—21).

Керетейлер, пелетейлер ле гаттар израильтяндар болбогон до болзо, Иегованы — чындык Кудай деп, а Давидти — оныҥ майлаткан кижизи деп тооп туратан. Мындый бӱдӱмјилӱ улуска Давид јаан быйанду болгон болор.