Nyo ing’eyo?
Pirang’o jumaco mi thek mange de gibed gitimo i kind juaskari pa Daudi?
JUMACO ma gibino ngo anyoli mir Israel de gibino nuti i kind jurumony pa Daudi; june moko ubino Zelek ma Jaamon, Uria ma Jahithi man Ithma ma Jamoab. a (1 Kei. 11:39, 41, 46) I kind juaskari pa Daudi, jubed junwang’u bende “Jukerethi ..., ku Jupelethi, ku dhanu mi Gath.” (2 Sam. 15:18) Jubed juparu nia Jukerethi ku Jupelethi gibino wedi ma ceng’ini mi Jufilisti. (Eze. 25:16) Dhanu mi Gath ke gibino anyoli mir adhura mi Jufilisti ma julwong’o Gath.—Yoc. 13:2, 3; 1 Sam. 6:17, 18.
Pirang’o Daudi ugam uyiyo nia jumaco mi thek mange de gimond i kind juaskari pare? Cwinye ubino tek nia gibino gwoko bedoleng’ migi ire man m’usagu zoo, ni Yehova. Ku lapor, buku moko (The New Interpreter’s Dictionary of the Bible) ukoro pi Jukerethi ku Jupelethi kumae: “Gigwoko bedoleng’ migi ni Daudi i lembe ma tek nisagu zoo i saa mi bimobim pare.” Nenedi? Kinde ma “dhanu ceke mir Israel” gipiey ni ubimo Daudi pi nilubo tok “janyay yakini moko ... ma nyinge Ceba,” Jukerethi ku Jupelethi gimoko i kum Daudi man gikonye nijigo the jai pa Ceba. (2 Sam. 20:1, 2, 7) I nindo mange, Adoniya ma wod ubimo Daudi upimo nimaku ker ku kero. Ento Jukerethi ku Jupelethi gimediri nigwoko bedoleng’ migi ni Daudi, man gikonyo pi niketho Suleman iwi ker kum en re m’ebino ng’atu ma Yehova ung’iyo pi nilagu ker.—1 Ub. 1:24-27, 38, 39.
Ng’atu ma kucelo mi thek mange m’umoko kikiki i kum Daudi ubino Itai ma dhanu mi Gath. Ku juaskari pare 600, gidiko cing’gi kud ubimo Daudi kinde ma wode ma Absalom ujai ire man uloko adunde dhanu mir Israel cen kud i bang’ ubimo. Daudi ukeuyero ni Itai nia calu m’etie ngo Jaisrael, lwiny maeno uneno ngo wang’e. Ento Itai udwoko kumae: “Calu andha Yehova ubedo kwo, man tek andha rwoth para ubimo ubedo kwo, kaka moko ci m’ibecidho i iye, e rwoth para ubimo, nik’ebed pi tho kadi pi kwo, jatic peri de bicidho!”—2 Sam. 15:6, 18-21.
Itai ugwoko bedoleng’ pare ni Daudi m’ubimo ma Yehova uwiro
Kadok nwang’u Jukerethi, Jupelethi ku dhanu mi Gath gibino ngo anyoli mir Israel de, re gigam giyiyo nia Yehova utie Mungu mandha man nia Daudi re m’utie ubimo m’ewiro. M’umbe jiji, anyong’a ubed unego Daudi lee dit nibedo karacelo ku jumaco maeno ma gimoko kikiki i kume!
a Cik pa Mungu ma nwang’ere i Poy mi Cik 23:3-6 ugam ukwero ni Juamon ku Jumoab nimondo i cokiri mir Israel. Ento ubenen nia cik maeno uweco iwi twero mi doko anyoli mir Israel, man ekwero ngo dhanu mi thek mange maeno nikwo i kind dhanu pa Mungu. Nen buku Étude perspicace des Écritures, Volume 1, mba. 100-101.
