Mafanaˈay Kiso Han?
Itini ilalomaˈ no sofitay no Hongti ci Tafiti hano ira ko ˈalafang a tamdaw?
LALOMAˈ no sofitay ni Tafiti ˈalomanay ko ˈalafang a tamdaw, tinakoen o Amon a tamdaw ci Cilik, o Hitit a tamdaw ci Uciya, o Moap a tamdaw ci Itma. a (1 Rayray 11:39, 41, 46) I sofitay ni Tafiti iraayho ko ‘Ciliti a tamdaw, Piliti a tamdaw, ato Kat a tamdaw.’ (2 Samuil 15:18) Ano nengnengen i, o Ciliti a tamdaw ato Piliti a tamdaw tangongolay ko pilingat to Filistin a tamdaw. (Icikil 25:16) O Kat a tamdaw itiniay i Kat a niyaroˈ no Filistin a finawlan.—Yosuwa 13:2, 3; 1 Samuil 6:17, 18.
Hano pacomoden ni Tafiti ko ˈalafang a tamdaw i sofitay ningra hani? Samanen pakasoˈlinay ci Tafiti madimadiay cangra cingranan, kalimlaan i, madimadiay cangra ci Yihofaan. Tinakoen pakayni to Ciliti a tamdaw ato Piliti a tamdaw, o Citing no Faelohay Fangcalay Cudad (no Padaka) sanay: “Itini pikowan ni Tafiti a laliyadan, soˈlin itini sapasangaray a tatokian cingra, kamayan cangra madimadi ci Tafitian.” O Ciliti a tamdaw ato Piliti a tamdaw samaanay patalahkal to madimadi ci Tafitian hani? Kinacecayay, o cecay ci Sipa ko ngangan a tamdaw mitowakangay, telocto ‘cowato pihakelong ko Israil tamdaw ci Tafitian,’ mihakelongay ci Sipaan. Nikawrira o Ciliti a tamdaw ato Piliti a tamdaw padadotocay madimadi ci Tafitian, hanaca padama ci Tafitian misaysay to mitowakangay a tamdaw. (2 Samuil 20:1, 2, 7) Ikorto, wawa ni Tafiti ci Atoniya sapiˈafasaw to saaroˈan no hongti, nikawrira Ciliti a tamdaw ato Piliti a tamdaw kamayan madimadi ci Tafitian, hanaca midopo to mipiliˈan ni Yihofa a Solomonan mala hongti.—1 Hongti 1:24-27, 38, 39.
O roma padotocay madimadi ci Tafitian a ˈalafang a tamdaw o Kat a tamdaw ci Itay. Mitowakang ci Apsalom ci Tafitian i, o falocoˈ no Israil tamdaw pasayraayto ci Apsaloman, nikawrira ci Itay ato 600 sofitay ningra tanektekay midama ci Tafitian. Satapang aca pasowalan ni Tafiti ci Itay, o ˈalafang a tamdaw cingra, ngaˈayay eca ka pitoor ci Tafitian misiˈayaw to katalawan. Nikawrira, pasowalan ni Itay ci Tafiti: ‘Miketon kako to sowal i kaˈayaw no tahadaˈocay a Yihofaan, itiniho i kaˈayaw no tapang ako miketon to sowal, ano talacowato ko tapang ako hongti ako, ano maˈorip ano mapatay i, wa padotoc ko sikawdan mikotod i tatihi no tapang.’—2 Samuil 15:6, 18-21.
Ci Itay madimadiay to minilnilan ni Yihofa a Hongti ci Tafiti
Soˈliˈlin o Ciliti a tamdaw, Piliti a tamdaw ato Kat a tamdaw sahtoay o ˈalafang a tamdaw, nikawrira tangongolay ko pikangodo nangra ci Yihofaan, mihayi to soˈlinay a Kawas Cingra, mihayiayho o minilnilan Ningra a Hongti ci Tafiti. Ira ko madimadiay a tamdaw padama i tatihi no niyah, maedeng tada miakoˈiday ci Tafiti ci Yihofaan.
a Mikitini Limoˈot 23:3-6, mikecengan no Kawas ko Amon a tamdaw ato Moap a tamdaw micomod i kasakopang no Israil. Nikawrira, o mamitadtad konini a sarikec o ˈalafang a tamdaw cowa ka ngaˈay mihaemin a milayap to malifokay no finawlan no Kawas a sapalemed, kawra cowa pikeceng cangranan micawmaˈ to finawlan no Kawas, anca ilalomaˈ no finawlan no Kawas a mikilomaˈ. Nengnengen ko Sapicalep Mafanaˈ to Fangcalay Cudad ilaeno nonini a “Amon a Tamdaw” a lalakaw “Ciraramod to Israil Tamdaw” sanay a lalangian.
