U Ka Rẹn Ra?
Vbọzẹ ne Ọba ighẹ e Devid na gha mwẹ ivbiyokuo eso nẹi Ivbi Izrẹl?
USUN avbe erriọvbe ni ghaa re ivbiyokuo ọghe Devid ọre Zelek ne Ovbi Amọn, Uriah ne Ovbi Hiti kevbe Itma ne Ovbi e Moab. a (1 Krọ 11:39, 41, 46) Avbe erriọvbe ọvbehe ni vbe gha re ivbiyokuo ọghe Devid ọre, Ivbi e Kerẹt, Ivbi e Pẹlẹt kevbe Ivbi e Git. (2 Sam 15:18) Ọ khọ wẹẹ, etẹn ẹre Ivbi e Kerẹt, Ivbi e Pẹlẹt kevbe Ivbi Filistia ghaa khin. (Ẹzik 25:16) Ẹvbo e Filistia na tie ẹre Gat, ẹre Ivbi e Git ke rre.—Jọs 13:2, 3; 1 Sam 6:17, 18.
Vbọzẹ ne Devid na kue ne avbe erriọvbe deba ivbiyokuo ọghẹe? Ọ ghaa mwẹ ilẹkẹtin wẹẹ, iran i khian sẹ irẹn rae, yevbesọni, iran vbe gha mwẹ ẹkoata daa e Jehova. Vbe igiemwi, vbe ebe ọkpa na tie ẹre The New Interpreter’s Dictionary of the Bible ghi guan kaẹn Ivbi e Kerẹt kevbe Ivbi e Pẹlẹt, ọ na wẹẹ: “Vbe ẹghẹ ne emwi ya kakabọ wegbe mu Ọba ighẹ Devid, iran ma sẹ ẹre rae.” Vbe iran ya ru ọna hẹ? Vbe ẹghẹ ne “Ivbi Izrẹl” ya fi iyeke gbe Ọba ighẹ Devid, ya lele “ọmwa oya ọkpa na tie ẹre Siẹba,” Ivbi e Kerẹt kevbe Ivbi e Pẹlẹt ma sẹ e Devid rae, iran na vbe ru iyobọ nẹẹn ya dobọ ẹre yi ighẹ isọtẹ ọghe Siẹba. (2 Sam 20:1, 2, 7) Ọ vbe gha mwẹ ẹghẹ ọkpa ne ovbi e Devid ighẹ Adonaija ya gha hoo nọ ya egbe ẹre khian ọba. Sokpan, Ivbi e Kerẹt kevbe Ivbi e Pẹlẹt ma vbe sẹ e Devid rae, iran na ru iyobọ nẹẹn ya ma e Sọlomọn ọba rhunmwuda, irẹn ẹre Jehova zẹ nọ khian rri ọba lele Devid.—1 Ọba 1:24-27, 38, 39.
Ọrriọvbe ọvbehe nọ wa vbe kakabọ rhikhan mu e Devid ọre Itai ne Ovbi e Git. Vbe ẹghẹ ne Absalọm ya sọtẹ daa e Devid, ọ na vbe mu Ivbi Izrẹl rẹrẹ ne iran mieke na fi iyeke gbe Devid, Itai kevbe ivbiyokuo ọghẹe ni re 600 keghi ye Ọba ighẹ Devid ike. E Devid te ka tama Itai wẹẹ, rhunmwuda nọ na re ọrriọvbe, esa i rrọọ nọ khian ya deba iran khọn okuo na. Sokpan Itai na kha wẹẹ: “I ya eni e Jehova vẹn ihẹn umogun wẹẹ, ehe ne u rhirhi la, ẹre I ra lele ruẹ la, ọ gha khọnrẹn nọ gha re ọghe uwu!”—2 Sam 15:6, 18-21.
Itai keghi rhikhan mu e Devid, nọ re ọmwa ne Jehova zẹ nọ gha re ọba
Agharhemiẹn wẹẹ, erriọvbe ẹre Ivbi e Kerẹt, Ivbi e Pẹlẹt kevbe Ivbi e Gat ghaa khin, iran rẹnrẹn wẹẹ, e Jehova ọre Osanobua ọghe ẹmwata kevbe wẹẹ, e Devid ọre ọmwa nọ zẹ nọ gha re ọba. Ẹ i mwẹ e Devid ma gha ghọghọ wẹẹ, irẹn mwẹ avbe ikpia vbenian nọ wa rhikhan mu irẹn!
a Uhi ọghe Osanobua nọ rre ebe Diuteronomi 23:3-6 keghi mu awua yọ ne Ivbi Amọn kevbe Ivbi Moab ghẹ la uwu ẹbu Ivbi Izrẹl. Vbọrhirhighayehẹ, ọ khọ wẹẹ, emwi ne uhi na guan kaẹn keghi dekaẹn asẹ ne emọ otọ mwẹ, sokpan ọ ma kha we ne avbe erriọvbe ghẹ gu Ivbi Izrẹl mu obọ ra ne iran ghẹ dia otọ Izrẹl ya. Ya ghee Insight on the Scriptures, Volume 1, ipapa 95.
