LIT kalak asing ntah pe kalak si labo kalak Israel si jadi prajurit Daud. Contohna, Selek kalak Ammon, Uria kalak Het, ras Itma kalak Moap. a (1 Kro. 11:​39, 41, 46) Pasuken Daud termasuk ka ‘kalak Kereti ras kalak Peleti, bage pe kalak Gat.’ (2 Sam. 15:​18, cataten i teruh) Kalak Kereti ras kalak Peleti banci saja sikade-kaden ras kalak Pilisti. (Esek. 25:16) Kalak Gat banci saja tading bas kota Pilisti eme Gat.—Jos. 13:​2, 3; 1 Sam. 6:​17, 18.

Engkai maka pediat Daud kalak asing jadi prajuritna? Perban tek ia setia kalak e man bana janah si pentingna setia kalak e man Jahwe. Contohna, kerna kalak Kereti ras kalak Peleti, bagenda si ikataken salah sada kamus Pustaka, “Tetap kalak e setia man Daud bas masa-masa si meserana kel bas pemerentahen Daud.” Kai buktina? Sanga “kerina kalak Israel” lawes nadingken Raja Daud janah ngikutken ‘Syeba si lalap ndarami masalah,’ kalak Kereti ras kalak Peleti tetap ndukung Daud. Sampati kalak e ka Daud guna mpengadi pemberontaken Syeba. (2 Sam. 20:​1, 2, 7) Selain si e, sanga Adonia, anak Raja Daud rusaha ngerebut tahta, kalak Kereti ras kalak Peleti tetap setia ndukung Daud. Sampati kalak e ka gelah Salomo, kalak si ipilih Jahwe, si jadi raja.—1 Raj. 1:​24-27, 38, 39.

Kalak asing si debanna si setia kel man Daud eme Itai kalak Gat. Setia ia sanga usahaken Absalom ngerebut tahta ras muat ukur kalak Israel guna ngelawan raja. Itai ras 600 prajuritna tetap ndukung Raja Daud. Ikataken Daud man Itai, perban ia kalak asing, la ia perlu erperang guna Daud. Tapi nina Itai, “Ersumpah aku i lebe-lebe Jahwe si nggeluh bage pe i lebe-lebendu Tuanku Raja si nggeluh, ku japa pe kam pagi lawes ku je ka nge budakndu enda. Enggo siap aku mate ras kam, Raja!”—2 Sam. 15:​6, 18-21.

Amin pe kalak Kereti, kalak Peleti, ras kalak Gat labo kalak Israel, tapi tek kalak e Jahwe eme Dibata si benar janah Daud eme kalak si ipilihNa. Pasti meriah kel ukur Daud perban lit kalak si setia si ndukung ia.