BEYEÑE be mbe nkane bezimbi David be mbe Tsélek mon Ammonite, Urie mone Hétien, a Jithma mone Moabite. a (1 Minl. 11:​39, 41, 46) David a mbe fe a bili “Bekéréthien, Bepéléthien, a Begathien” nkane bita wé. (2 Sam. 15:18) Éko éziñe Bekéréthien a Bepéléthien be mbe be wô’an abui a Bephilistin. (Ézé. 25:16) Begathien be mbe bôte ya tisone Bephilistin ya Gath.—Josué 13:​2, 3; 1 Sam. 6:​17, 18.

Amu jé David a nga nyoñe beyeñe nkane bita wé? A nga bo de amu a mbe a too ndi na ba ye ba’ale élat a nye. Jam évok ja dañe mfi é ne na, a mbe a yeme’e na bôte bete be mbe be wulu ba’aba’a a Yéhôva. Éve’an é ne na, kalate The New Interpreter’s Dictionary of the Bible a kobô ajô Bekéréthien a Bepéléthien a jô’ô na: “Be nga dañe ba’ale élat a David biyoñe ya minjuk.” Aval avé be nga bo de? Éyoñe “bôte bese ya Israël” be nga li’i Njô bôte David étam a tôñe “mbia môt a mbe . . . jôé na Shéba,” Bekéréthien a Bepéléthien be nga ba’ale élat a David, a volô nye na a wosane mbia môt ate. (2 Sam. 20:​1, 2, 7) Bekéréthien a Bepéléthien be nga beta liti na ba’ale élat a Njô bôte David éyoñe mone wé Adonija a nga jeñe na a bo njô bôte señe Salomon. Be nga volô nye na a telé Salomon njô bôte ya Israël, amu nnye a mbe njô bôte Yéhôva a nga top.—1 Bb. 1:​24-27, 38, 39.

Môte mbok a nji mbe mone Israëlite a mbe ve wu señe David a mbe Ittaï môte ya Gath. Ittaï a bezimbi 600 bé be nga su’u Njô bôte David éyoñ Absalom, mone David a nga bo nye éngana’a, a jeñe na abui bôte ya Israël é tôñe nye. Mbôle Ittaï a mbe nneñ, David a nga taté jô nye na mewosane mete me nji bo émé. Ve Ittaï a nga jô nye na: “Ane Yéhôva a vee, avale fe a ne tate wom njô bôte a vee, vôm ase tate wom njô bôt a ye tabe, to’o mfa’a awu, to’o mfa’a ya ényiñ, vôm ate fe mbo ésaé wôé a ye fo’o tabe!”—2 Sam. 15:​6, 18-21.

To’o ane Bekéréthien, Bepéléthien, a Begathien be mbe be beyeñ, ve be mbe be yeme’e na Yéhôva nnye a ne nya Zambee, a na David nnye a mbe ñwo’one Yéhôva. David a mbe a yiane bi angôndô ya meva’a ya saé a bôte ba ba’ale élat avale te!